قرع عسلي بالبشاميل

السلام عليكم و رحمة الله و بركاته

كل سنة و انت طيبين و بخير دايماً يا رب

طبعا انا عارفة ان في ناس هتحدفني بالطوب علشان الغيبة الطويييييييلة ديه

بس الآنسة لينة مش مدياني أي فرصة اختلي بها بنفسي

و من منبري هذا اقول لكل واحدة هتتجنن علي الجواز اعقلي يا حبيبتي و استمتعي بدورك كإبنة

طلباتك مجابة و اللي نفسك فيه يجي لحد عنك بس انت تؤمري

تنامي وقت مانت عايزة و تقومي وقت ما تحبي

و أول ما تحسي بشوية تعب صغننين بابا و ماما مايجيلهمش نوم الا لما ترتاحي و ترجعي تبتسمي من تاني

علشان هيجيلك يوم اللأوبشنز ديه كلها هتختفي و تكون غير متاحة بتاتاً

و تبقي قايدة صوابعك العشرين شمع و برضه مش عاجب

و يقولك زوجك المصون

"عمرك ماهتوردي علي جنة"

(يعني عمرك ما هتعتبيها)

مهما عملتي

لا يتحسبلك تربية الولاد و لا المزاكرة و شد الشعر ولا السهر طول الليل مع الانسة خفاش اللي لسة مولودة

و طبعا من الفجر لازم تتنطري من السرير تعملي سندويتشات للأستاذ اللي بيروح المدرسة

و بعده بساعة تحضري حاجات الاستاذ الكبير برضه ..اشمعني يعني

(دانت الاول يا حبوبي طبعاً)

و ساعة كمان تصحالي القردة اللي اسمها روداينا و علي حظي العسر جت الفلونزا الخنازير مش عارفة اطرقها لأي حضانة

باباها خايف عليها

عايزة تاكل و تتشطف و تلاقي حد تكلمه و تلعب معاه

و لسة الشغل و مواله

انا فين بأه

تهت و الحمد لله

يا ريت اللي يلاقيني يبقي يبلغني ضروري

علشان انا وحشتني اوييي

معلش بأه المقدمة الطويلة ديه

جات فيكم بأه

ايه رأيكم انهردة نعمل القرع العسلي

انا كنت قلت عليه من كام شهر كدة

فاكرين

؟؟

نبدأ بأه علشان رغينا كتير

الأول أحب أقولكم إن القرع العسلي الناس اللي شفتهم ما اتفقوش علي حبهم ليه

يإما بيحبوه جداااا أو بيكرهوه موووووت

مش عارفة ليه

بس أهه اللي حصل

بس انا عن نفسي

بمووووووووت فيه

المقادير

1 كيلو قرع عسلي

نصف كيلو سكر

فانيليا

لبن

3 ملاعق كبيرة سمن

(يكون بلدي طبعاً)

3 ملاعق كبيرة دقيق

كوب لبن

مكسرات محمصة

جوز هند مبشور

قرفة مطحونة

الطريقة

الأول بنقطع القرع العسلي شرائح كده

و بعدين نقطعه مكعبات كده

و نحطه في حلة على النار و عليه السكر

و نهدي النار عليهم خااالص بدون أي اضافات

و نغطي الحلة كويس

هنلاقي بعد كده القرع نزل ماية و السكر ذاب فيه

و كمان القرع هيكون استوي

بس مانسيبهوش لحد ما يتهري اوي

نحاول نحافظ عليه مكعبات علي اد ما نقدر

و نحطه في مصفي علشان نفصل العصير اللي نزل عن القرع

و بعدين نعمل الباشاميل

نحط السمن علي النار و لما يسخن نحط الدقيق و نقلب لحد ما يبدأ ياخد لون ذهبي فاااتح و بعدين نحط 2 كوب من العصير اللي نزل من القرع و نقلب بسرعة كويس علشان ما يكلكعش و بعدين نحط كوب اللبن و عليه الفانيليا و نفضل نقلب لحد ما يغلظ قوامه و يكون زي قوام الباشاميل

و كده الباشاميل خلص

طيب اللي عاملة رجيم و مش عايزة سمن و دقيق محمر و الحاجات ديه تعمل ايه

؟؟

مافيش مشكلة

حطي كوبايتين العصير علي كوب اللبن بالفانيليا علي الدقيق في الخلاط

و اضرب يا معلم لحد التجانس التام

و بعدين حطيهم علي النار لحد ما يغلظ القوام و كده نكون برضه عملنا بشاميل

و مافيش حد احسن من حد

ندخل بأه علي صينية القرع شخصياً

نجيب الصينية

(تكون صينية وسط)

و ندهنها سمن او زيت زي ما تحبو

بس انا بعمل كل حاجة بالسمن البلدي

و بعدين نجيب البقسماط اللي بنعمل بيه البفتيك و نبطن بيه الصينية

(يعني نرش رشة في الصينية علي السمن او الزيت لحد ما يغطي كل اطراف الصينية و قعرها كمان)

و نحط نصف القرع العسلي اللي عملناه من غير ما نهرس بأه و لا حاجة

(في ناس بتحب القرع يكون مهروس او مضروب )

و نحط الكسرات المحمصة و جوز الهند المبشور

(اللي بيعملوا رجيم بأه المكسرات مافيش بتاتاً)

و نحط الطبقة التانية باقي القرع العسلي كله

و نحط علي الوش الباشاميل اللي عملناه

و في الاخر بأه علي الوش نرش رشة قرفة تدي لون و ريحة جنااان

علي فكرة في ناس بتحط نصف كمية الباشاميل تحت خالص قبل القرع في الصينية و النصف الباقي علي الوش

(ممكن تعملي كده عادي)

بس اللي بقوله ده هو اللي انا بعمله بالضبط و انتم ليكو حرية الاختيار مين فوق و مين تحت

بس كده خلاص خلصنا

نحط الصينية في الفرن بأه لحد ما جنابها و وشها يحمر

علي درجة حرارة متوسطة

و تطلع بأه و بالهنا و الشفا

SHARE

About Mony