Wednesday, July 29, 2009

Posted by Mony on 3:59 AM 13 comments
ديه غير المسقعة الشامي اللي باللحم المفروم و الصنوبر و الحركات ديه

لان ديه نوع من المقبلات

زي البابا غنوج و الطحينة و كده

مش اكلة اساسية يعني





المهم



المقادير:



ربع كيلو باذنجان رومي

ربع كيلو فلفل اخضر

ربع كيلو بطاطس

راس ثوم كبيييرة

نصف كوب كبير خل

3 طماطم حمراء كبيرة

زيت للتحمير و لعمل صوص الطماطم







الطريقة



نقطع الباذنجان زي ماتحبي مكعبات كبيرة ماشي او حلقات او انصاف حلقات مافيش مشكلة

و نحمره في الزيت لحد ما يستوي

و نرش عليه ملح بكمون لما يطلع من الزيت و نركنه علي جنب



و الفلفل الاخضر نشقه نصفين علشان مايفرقعش اثناء التحمير

و نحمره برضه و لما يطلع نحط عليه ملح بالكمون و نركنه



و البطاطس نقطعها مكعبات و نحمرها

و نرش عليها ملح بالكمون و نركنها علي جنب





في اثناء تحمير الحاجات ديه كلها نحضر صوص الطماطم

نهرس الثوم ناعم و عليه ملح و فلفل

و نحضر حلة صغيرة فيها شوية زيت سخن علي قد الثوم

ياريت مانكترش الزيت علشان ماننساش ان الباذنجان و الباطاطس فيهم زيت مكان التحمير

و نشوح الثوم و لما لونه يبدأ يتغير نحط عليه الخل

و لما الخل يغلي نحط علي عصير ال3 طماطمات اللي قلنا عليهم

لو الفلفل بتاعك مش حامي ممكن تحطي ملعقة شطة

بتدي طعم تاني لو مشطشطة

و نسيب الخليط ده كله علي النار لحد ما الصلصة تتقل خااالص

و مايكونش فيها ماية





في طبق بايركس او صينية نحط الباذنجان و نقطعه بإدينا صغير خالص

و عليه الفلفل برضه نقطعه صغير بإدينا

و عليهم البطاطس برصه نهرسها بإدينا



لو عايزة تهرسي الحاجات ديه كلها بالشوكة مافيش مشكلة بس احنا مش عايزين نهرسهم خالص



و بعدين تجيبي صوص الطماطم و تحطيه علي الحاجات اللي قطعناها صغير ديه و تقلبي كويس

بحيث تتجانس كل حاجة مع بعض



(بس طبعا مش هتطلع بكمية الزيت ديه)

و كده خلاص خلصنا بالهنا و الشفا





في افتكاسة حلوة لو عايزة تعملي الاكلة ديه مع مأكولات بحرية



انك تحمري مع الحاجات ديه كاليماري او سبيط و جمبري و يقطع مكعبات كبيرة و بعدين تخلطيه مع الحاجات في الاخر زي ما عملنا

بكون طعمه تحححححفة

(يستحسن ماتحطيش سمك علشان مايتهريش)

و ده شكلها


بس طبعا صوص الطماطم بيكون اقل


و بألف هنا و شفا

Categories:

13 comments:

Shimaa Gamal said...

تصدقى كنت لسة بفكر أكتب طريقتها ،:) سبقتينى

تسلم إيديكى

هاجرب بقى بالسى فود

mony said...

المسقعة تحفة
اول مرة اعملها من ساعة ما اتجوزت كانت اول امبارح
مع ان ماما و تيتا بيعملوها علي طول


بس كنت بكسل بأه


انا فاكرة ان محدش يعرفها غيرنا
اصل كل ما حد يقول انه عامل مسقعة يقول باللحم المفروم


فرحتيني و الله لما قلتي انك عارفاها

جربي اللي بالسي فود و قوليلي:)

Shimaa Gamal said...

بنت خالى بتقول عليها المسقعة الكدابة علشان مايحصلش لبس
:))))

Abu ShoSho said...

الشيفة موني
السلام عليكم
هل يمكن استبدال التحمير بالزيت بالشي مثلا أو أي (افتكاسة) أخرى.
بارك الله فيك

لقد خلقنا الله احرارا said...

انا متابعة مدونتك من زمان
جميلة جدا حقيقى
وعرفت كل بنات العيلة عليها
حتى ماما اللى مالهاش فى النت خالص
ظبطتها فى مرة جايبة ورقة وقلم وبتنقل من المدونة
وكل شوية تقول لى ادخلى على النت هاتى لنا اكلة جديدة
بس النهارده انا راجعة من الشغل تعانة جدا ومش قادرة اعمل اكل
حسيت انى بحقد على المسقعة دى ببص للطبق عايزة اكله حسيت انه قدامى
بجد ربنا يكرمك

ঔღঔ نـــوارة ঔღঔ said...

ازززيك ياحبيبتي

وحشتيني ان شاء الله تكوني بالف خير

انا بحب المسقعة جداااا

وبعملها باللحمة المفروومة لكن طريقتك جديدة وعجبتني

ومفيهاش حاجة غلط يعني اكييد هتكون لذيذة:)

بس مش عارفة ايه لازمة الكمون دا الي كل شوية ترشيه انا مش بحب الكمون ومش بحطه

الا عالاسماك والاكلات الي عاوزة كمون مش بحط على اي حاجة كدا :]

تسللللللللم ايدك ياقمر

دمتي بالف خير

ستيته حسب الله الحمش said...

ازيك يا موني
وحشتيني
مختفية فين كل ده؟
تصدقي يا موني لو حد يقول لي عازمك على مسقعة وألاقي فيها لحمة مفرومة أو مشهيصني وحاطط صنيبر
يالهويييييييييييييييي
اجطعه جطيع
ايون انا بحبها كده مصري شحط محط
عيب المسقعة الوحيد الصغنن يوم صيفي حار واقف اقلي فيه انا كل الحاجات دي لحد ما نفسي تتسد ومأكلهاش غير تاني يوم ومن التلاجة واحرم الشعب منها

mony said...

Shimaa Gamal

لا يا جميل ديه اسمها مسقعة مصري.


انما اللي بالاضافات ولا شرايح مرصوصة و فيها لحم مفروم او عليها بشاميل ديه بأه اسمها مسقعة شامي



صححيلها المعلومة بأه:)

mony said...

Abu ShoSho

و عليكم السلام و رحمة الله و بركاته

هو انا مجربتش بصراحة..بس اعرف ان الباذنجان ممكن تتحط في صينية مدهونة زيت في الفرن و لما الوجه اللي تحت يحمر تقلب علي الوجه الاخر
و هو ده بس اللي بيشرب زيت اما باقي المكونات مش بترب كمية زيت كبيرة

بس انا معملتهاش قبل كده

ممكن تجرب في كمية صغيرة


و ربنا يسرلك الحال

mony said...

لقد خلقنا الله احرارا

جزاك الله خيرا
ربنا يكرمك رفعتي روحي المعنوية لفووووووووووووق
:)


و سلميلي علي ماما
و خليها تعلمنا شوي من الاكلات المتينة بتاعة الامهات


في شوية اكلات مابقدرش ادوقها الا من ايد ماما
مع انها برضه بتدخل تاخد وصفات من عندي

بس في حجات محفورة في الذاكرة
:)

طيب لو ساكنة جنبي كنت جيت لحد عندك و جبتلك كل اللي انت عايزاه
مسقعة و غيره و غيره


تحت امرك يا ستي في اي وقت
:)

mony said...

نـــوارة

ربنا يكرمك يا جميل


طبعا المسقعة الليباللحم المفروم انت اكيد استاذة فيها

لان انتوا الاصل في عمايلها

انما ديه مسقعة مصري ابا عن جد
:)


جربها و هتعجبك

و كمان الويكة الصعيدي اللي في البوست اللي قبلها برضه هتعجبك ان شاء الله
و منشئها الصعيد عندنا في مصر
مش كتير مصريين يعرفوها
:)

mony said...

ستيته حسب الله الحمش

وحشاني و الله يا جميل جدا جدا

بحاول اتابع بس خلاص مابقتش بستحمل قعدة الكمبيوتر
ربنا ييسر الحال


و بالنسبة للمسقعة
اعمليها الصبح بدري
علشان الحر
و علشان علي ما يجي معاد الغدا تكوني جوعتي و نسيتي التعب
:)

و جربي الويكة
في البوست اللي فات
ديه بأه مصرية صعيدية شحط محط و خفيفة اوي في الصيف

و مابتاخدش وقت خااالص

نكهة مغربية said...

موني وحشانا خالص ايه الغيبة الطوياة دي
أنا و الله نفسي أتعلم كل الاكل المصري بس أنا مأجل التجارب دي لغايت ميبرد الجو الحر الخنقة ده و نرجع من السفر
مرسي جدا على الطريقة الحلوة الخفيفة دي