Tuesday, March 17, 2009

Posted by Mony on 10:43 PM 20 comments
تورتة ايس كريم


بعد الكشري قلت اجيبلكم حاجة تبرد علي قلبكم شوي
:)


انهاردة عرفتلكم طريقة لتورتة الايس كريم

سهلة خااالص

و تكلفتها مش هتكون زي شرائها جاهزة طبعا



جبتلكم الطريقة ديه من نايجلا لاوسون اللي بتيجي في فتافيت



ندخل في المفيد
المقادير:



هنحتاج كيكة او بواقي كيكة
ناس هتقوللي تمشي بسكوت
ماااشي
نمشيها بسكوت
(بس انا مجربتوش)




مكسرات مجروشة خشن

لتر و نص ايس كريم جاهز اللي في علب
طبعا الكمية انتم اللي تحددوها

(النوع اللي تحبوه بأه)
(هبقي اقول لكم علي طريقة الايس كريم اللي بعملها بعدين)






الطريقة سهلة جدااااا:


 
لو عندنا بواقي كيك او تورتة او جاتو

نحط البواقي ديه في التلاجة علشان تنشف

و كده يسهل اننا نفتفتهم علشان يكونوا قاعدة لتورتة الايس كريم
و نخلط بالفتافيت ديه المكسرات المجروشة
(ممكن مانحطش مكسرات طبعا ده حسب الرغبة)
(بس بتدي رونق للحاجة و بترفع من قيمتها)




نجيب الصينية اللي هنشتغل فيها

و نفرد عليها ورق نايلون بحيث يكون مغطي جميع جوانبها
(بيتباع في السوبر ماركت لفة شبة لفة الفويل)

بحيث يكون ده شكل الصينية



و بعدين نفرد الكيكة اللي فتفتناها و خلطناها بالمكسرات
و نضغط عليها جامد علشان تنضغط

و كده نكون عملنا قاعدة للأيس كريم



طبعا احنا كنا سايبين الايس كريم في درجة حرارة الغرفة علشان ينفع افرشه بسهولة

ممكن نحط معاه شوية مكسرات مجروشة و نقلب كويس علشان المكسرات تتوزع كويس
(بس لو هنحط في القاعدة مكسرات يبقي بلاش نحط في الايس كريم)
(علشان الحاجة تطلع شكلها شيك)

و ننزل الايس كريم في الصينية علي قاعدة الكيك اللي عملناها



ممكن طبعا نعمل نوعين ايس كريم
(طبقتين)
بس الله يكرمكم الطبقتين يكونوا لايقين علي بعض



ممكن نحط الطبقتين علي بعض و خلاص
و ممكن نحط بين الطبقتين قاعدة تانية من الكيك المفتفت و فوقيها الطبقة التانية من الايس كريم
بس كده هنستني لما الطبقة الاولي تجمد شوي و بعدين تطلعها و نحط طبقة الكيك و فوقها الطبقة التانية للايس كريم


و نحطها في الفريزر لحين وقت التقديم
و تقدم من الفريزر مباشرة


و لما نقدمها طبعا سهل اننا نطلعها من الصينية بسهولة علشان النايلون اللي فرشناه في الصينية الاول



ممكن وقت التقديم نكون محضرين أي صوص
(اللي بنحبه و طبعا يكون لايق علي الأيس كريم اللي محطوط)

ممكن صوص شوكولاته

صوص كراميل بالمكسرات

لو الايس كريم شوكولاته ممكن الصوص يكون فانيليا

اهم حاجةاننا نراعي ان الحاجة اللي احنا حاطينها تناسب بعضها
(لايقة علي بعض يعني)





ممكن مانحطش صوص خالص و هتكون جميلة برضه

او ممكن نرش علي وش التورتة مكسرات





و ياريت طبعا لو هنعمل الايس كريم شيكولاته مثلا

ياريت الكيكة اللي هنسنخدمها قاعدة تكون كيكة شوكولاته







في ناس هتقوللي احنا ليه محطناش الكيكة او شريحة منها تحت الايس كريم عادي كده من غير ما نفتفتها



هقول ان الايس كريم لما بيسيح علي الكيكة بشكلها العادي بيخليها عاملة زي العيش المبلول

انما الفتافيت المضغوطة ديه هتقاوم شوي



طبعا انت ممكن تحطيها كده من غير ما تفتفيها لو متأكده انك اول ما تحطيها لضيوفك مش هيسيبوها تسيح

و هتتاكل فورا
و سلمولي بأه علي التهاب الزور
:)


و بالهنا و الشفا


Categories:

20 comments:

reem said...

تسلم ايديكى ياقمر
ايه الشطارة دى كلها
بصي انا حالا هاقوم اعملها عشان لما يرجعو يلاقوها جاهزة يتغدو وياكو منها بجد سهلة اوى
وانا جوزى بيعشق الحلويات والايس كريم
صبرنى ياريت لو مش عندك مانع طبعا نتكلم على الايميل عاوزه اخد رأيك في حاجة
تحياتى ياقمر والمدونة دى حلوة اوى بس هتبوظ لنا ريجيمنا

mony said...

reem

الله يسلمك يا جميل


يلا اعمليها و ربننا ييسر و تطلع تحفة
و ياكلوا صوابعهم و بعدين صوابعك وراها
هههههههههه


و ان شاء الله صبرني تدخل و تشوف النداء
و ترد عليكي علي طووول

اما بالنسبة للرجيم
فاعمليها في اليوم الفري يا ستي
:)


نورتيني يا جميل

reem said...

تصدقي يامونى انا طلعت متخلفة خالص انا بدخل دايما هنا عندك اشوف اكلك الحلو وبدخل كمان عند صبرنى مدونة الاكل بتاعتها وكتبت التعليق دا واتلخبطت وفكرت انى بكتب لصبرنى يارب
سورى ياقمر معلش جالى الزهايمر من حماتى
حاولت ادخل مدونتك التانية بس لقيتها للمدعوين فقط
عموما كويس ان دى مفتوحة للجميع ومبسوطة بجد انى عرفتك ياجميل
وتسلم ايديكى

mony said...

reem

ولا يهمك يا جميل انا و صبصب حبيبتي واحد


المدونة التانية مغلقة حتي اشعار اخر
ربنا يهديلنا سيدنا لافندي و نفتحها علي مصرعيها
:)


و انا كمان مبسوطة اني عرفتك يا قمر

نورتيني

صبرني يارب said...

تصدقي يا موني انا عندي ايس كريم عايزه اعمله

اصل انا باجيبه باودر كده بالكيلو اسهل من العمايل فى البيت دي بطلع روحي يا اختي

بس انا خايفه اعمله عشان العيال على طول الايام دي برد والتهاب زور وودان
وحاجه صداع

تسلم اديكى يا موني

وعلى فكره يا حبذا لو كان الكيك ده يدخل الفرن بعد التفتيت ده يتحمص سنه كده

بيبقى مقرمش بقى تحت الايس كريم وتحفه

انا ما عملتوش قبل كده بالايس كريم انما عملته فى التارت والتشيز كيك

لما اعمل الايس كريم هاقولك يا بطه

صبرني يارب said...

ايه ده رييم غلطت فى المدونات
هههههههههههههههههههههه

طيب يا ريم ماشي عنيه الاميل هاكتبهولك عندك فى التعليقات وابقى شيليه اول ماتشوفيه

تسلمى يا موني

ستيته حسب الله الحمش said...

تسلم ايدك والله
وبمناسبة البسكويت

خلوا الصينية مربعة
وافردي ثلاث طبقات بسكويت سادة
ثم باكيت كريم كراميل "بس مش ها تحتاجوا الكراميل" يعني تعمليه بدون صب كراميل
صبيه على البسكويت ودخليه التلاجة ينشف

ثم افردي الأيس كريم
طعمه فوق كلمة تحفة بشوية

تحياتي

mony said...

صبرني يارب

انا عادة باعمله بالفاكهة الطبيعية المتاحة عندي و عليها جيلي ممن نفس نوع الفاكهة و لبن مكثف
و بيطلع طعمه احسن من الجاهز

و ساعات بجيبه من عند بتوع مستلزمات الحلويات
و اجيب معاه محسن ايس كريم
و بيطلع حلو برضه

بس مش بخرج كتير فبستسهل و اشتري الجاهز


عندك حق في تأجيله شوي علشان تقلبات الجو
فعلا بين الفصول الولاد بيتعبوا كتير

ربنا يصلح حالهم و يشفيهم


موضوع تحميص الكيك مجربتوش
ممكن ابقي اجرب شوي علي جنب



و نورتيني يا صبصب كالعادة

mony said...

ستيته حسب الله الحمش

ستوتة حبيبة قلبي


فعلا شكل الوصفة جميلة بجد
انا مجربتش الكريم كراميل قبل كده
انا حطيت البودنج
و كان حلو برضه

نجرب الكريم كراميل و اكيد هيطلع تحفة

بس تلات طبقات بسكوت؟؟
معني كده اننا هنحطه سليم مش مفتفت!!

افيديني في موضوع سليم مش مفتفت ده علشان اجرب


ربنا يكرمك
و يجازيكي عنا خير

mony said...

الازهري


انا لسة جديدة في الموديريشن بتاع التعليقات ده

فمن غير قصد
طيرت تعليقك
:(

المدونة التانية مغلقة حتي اشعار اخر
ربنا يصلح الحال و نفتحها


اما بخصوص التوترتة

نقي الحتة اللي تعجبك و اتفضلها
ولا خدهم كلهم و كلهم علي مهلك بالهنا و الشفا
خالصين كده؟؟
:)

ستيته حسب الله الحمش said...

موني يا حبي
البسكويت المفتفت ده بيتحمر في الزبدة ويتعمل منه الشيز كيك

اما هنا البسكويت بحاله علشان يعمل قاعدة كويسة للأيس كريم
وبعدين الكريم كراميل بيخليه طبقة واحدة وكأنك حطيتي كيكة بس طعم تاني

بالهنا والشفا

لجين أبو الدهب said...

حلوة اوى ما شاء الله وتكلفتها فعلا مش هاتيجى نص بتاعت بره ..

هحاول اعملها ان شاء الله ..

جزاكِ الله خير يامونى بجد ..

ربنا يجعله فى ميزان حسناتك ..

دمتِ بخير ..

mony said...

ستيته حسب الله الحمش


خلاص يا ستوتة


علم يا فندم و ينفذ

mony said...

لجين أبو الدهب

فعلا يا لوجي تكلفتها تعتبر بسيطة


جزانا و اياكم و يا جميل
عايزة اسمع عن تجارب ناجحة ان شاء الله

mayada said...

ازيك ياموني ماما بتقولك مررررررررررررررسي

عشان خليتي الحجر ينطق انا عملتها ياموني
عملتها
بصي عملتها بكيك بار
جبته من جاهز من السوبر ماركت في منه محشي وساده
وعملتها فانليا وشيكولاه وغطيتها بصوص شيكولاه من بتاع التورته ورجعتها التلاجه بس طلعه جميله

mony said...

mayada


لولولولولولولوليييييييي

الف الف مبروك يا مادو

حاسة اني شايفاها قدامي من الفرحة و الله


عقبال التقيل يا مادو

عبير said...

شكرا علي المدونة الجميلة ياريت تقبلوني معاكم
وهبدأ بسؤال غبي شوية
بالنسبة للبسكويت لما بحط الكريم كراميل بفكه علي النار باللبن عادي؟ وبحطة وهو سخن وللا فهمت غلط؟

Anonymous said...

ايه الشطارة دى كلها عيونا عليكى باردة

Mony said...

عبير

أولا أعتذر جداااا على التأخير الطويل ده
و الله لسة شايفة الكومنت بتاعك و انا داخلة حالا
بس انت بنت حلال برضه :)) الرد جه و بعد سنتين كمان
انا فعلا مكسوفة منك و الله على التأخير و ياريت تسامحيني


بالنسبة لسؤالك فهو زي ماقلتي بالضبط ان شاء الله

ياريت تفرحيني بردك على إنك سامحتيني على التأخير

Mony said...

Anonymous

ربنا يكرمك:))
ولا شطارة و لا حاجة خالص
ادينا لسة بنتعلم
:))
نورتينا
و في انتظار نتائج حاجة عملتيها من عندنا علشان اعرف رأيك عن تجربة:))