Saturday, February 21, 2009

Posted by Mony on 1:44 AM 7 comments
السلام عليكم و رحمة الله و بركاته

كيفكم يا جماعة

انا عملت انهاردة اختراع كان عمله شيف شربيني من سنة تقريبا

عملت ريش بالكولا

او زي ما سماها في البرنامج
(ريش بالمياه الغازية)

بصراحة انا استغربتها خالص
بس انا اخدت ان شيف شربيني لما بيعمل حاجة بعملها وراه و انا مغمضة

و كانت النتيجة تحححححفة

طبعا عجبت ابو العيال جدا

و اخويا الصغير مش بيحب ياكل لحمة خالص

و لما داقها عجبته جدا

و قال لماما اعملي اللحمة زي ما موني عملتها

المهم

ندخل علي المقادير بأه

نصف كيلو ريش
(هو عملها في البرنامج بالريش الضاني)
بصلة كبيرة مقطعة مكعبات صغيييرة
5 فصوص ثوم مهروسين
ملعقة كبيرة صوص صويا
ملعقة كبيرة عسل نحل
(هو حط فيها 3 ملاعق بس انا مابحبش الاكل يكون مسكر بصراحة)
ملح و فلفل
نصف كوب كولا

الطريقة:

نتبل الريش بالبصل و الملح و الفلفل و الثوم و صوص الصويا و نتركها فترة مش اقل من نصف ساعة
نغرز اللحم بالسكين علشان اللحم يشرب التتبيلة كويس
في طاسة نحط فيها شوية زيت يادوب لتحمير الريش من الجانبين
(مش كتير يعني)

لما نحط الريش ننفضها من التتبيلة
نحمر الريش من الجانبين حتي يصل لونهم للبني
و بعد ما تحمر من الجانبين كويس نحط باقي التتبيلة و نقلب كويس لحد ما تذبل التتبيلة

و بعدين نحط العسل و نقلب كويس

و نحط الكولا و نقلب و نهدي النار خااالص و نغطي الطاسة و نسيبها تستوي براحتها

هي اخدت تقريبا نصف ساعة

علي حسب نوع الريش المستخدمة
(ضاني او بتلو او كندوز)

كل فترة كده نطل عليها نشوفها استوت ولا لسة

و نشوف الصوص اللي حوليها نقص ولا لسة

لو الصوص بدأ ينشف و لسة اللحم ما استواش نزود شوية ماية مغلية (قليلة)للتسوية

انا عملت معاها مكرونة و بطاطس محمرة

و بالهنا و الشفا

و أي سؤال انا حاضرة
Categories:

7 comments:

فضفضتي said...

مدام سلاموني انت هايله في الطبخ بصراحه
انا كمان بحب الطبخ جدا ووصفاتك هايله وكنت زعلانه اووي لما جيت ادخل الفتره الي فاتت وكانت مش شغاله
كنت عايزه اتعرف علي حضرتك ان امكن

mony said...

فضفضتي

نورتيني يا جميل

ربنا يبعد عننا الناس الوحشة
و احنا مانقفلش تاني
:)

marmortyana said...

الاكل تجنن يا مونيتى بجد انا بحب اى حاجة بصراحة سى فود هايلة بجد

Anonymous said...

تسلم اياديكي
عندي سؤال
لو جربت الخلطة مع دجاج .. تظني انها تضبط وياي ؟

Mony said...

Anonymous

مش عارفة و الله مع الفراخ تعمل ايه
ماجربتهاش

ممكن تجربيها بس الفراخ تكون مقطعة مش على بعضها علشان تطول التتبيلة

و في انتظار نتيجة التجربة:)

ayat said...

مونى كل سنه وانتى طيبة
من فترة شوفت الريش باكولا دى وعجبتنى بس لما جيه العيد بقى ماما جابت لحمه وريش .....على طول جه فى بالى طريقتك وفعلا عملتها اول يوم وكنا عازمين اخواتى وعجبتنا قوى وطبعا كتبتها فى كشكولى ......تسلم ايدك فعلا طلع طعمها مميز وجميل انا حبتها رغم انى مابحبش الريش اصلا .....كل سنه وانتى طيبة

Mony said...

ayat

بألف هنا يا جميل
كل سنة انتي كل اللي بتحبيه بخير و صحة و عافية


ربنا يدخل على قلبك السرور زي مافرحتيني
:))

مستنية رأيك في باقي الحاجات
:))