Pages

Wednesday, July 29, 2009

من اكلات جدتي..ويكة

السلام عليكم و رحمة الله و بركاته

انا عارفة اني مقصرة جدا معاكم


سواء هنا في المدونة ولا عندكم في مودناتكم


بس و الله مشغولة موووت
الصيف جه و التمارين بتاعة عبد الله بدأت


يادوب بخلص شغل


و اجري اطبخ



و جري علي النادي


و بعد ما نرجع نبقي ناكل علشان مافيش وقت ناكل قبل التمرين



فأنا دلؤتي تقريبا بطبخ الاكلات السريعة بس


و في الاجازات بكون عايزة انااااااااااااام و بس


شكلي كده هسيب الشغل ده قريب لاني مش وش بهدلة
اول مرة في حياتي اشتغل بجد بأه و مطلوب مني تقارير يومية و وحركات ماليش فيها بتاتا البتة


المهم


عملت امبارح بامية ويكة

مش عارفة في حد يعرفها ولا لاء


اصل ديه اكلة صعيدي شحط محط


جدتي ام ابويا ربنا يديها طول العمر و الصحة هي اللي معلمهالنا


اصل جدتي ام ابويا صعيدية
فمعلمانا الاكل الصعيدي اللي علي اصوله



و ام امي الله يرحمها فلاحة
و معلمانا اصول الاكل الفلاحي


فإحنا كده نكون عملنا زي مينا موحد القطرين
:)



ندخل علي الويكة بأه و بلاش رغي


الموضوع سهل خاااالص و بسيط


نجيب البامية الكبيرة ديه
ونقمعها عااادي جدا

و نقطعها بالشكل ده




و بعدين نحطها في شوية ماية و عليها شوية ملح صغننين علي النار
بس شوي ماية كتير


و بعد ما نحس انها طريت و استوت نركنها علي جنب لحد ما تبرد


و بعدين نحطها في الخلاط

جدتي كان عندها عصايا بشكل معين كده اسمها مفركة
كانوا بيستخدموها علشان يفركوا البامية

بحيث البامية تكون مفروكة مش مطحونة في الخلاط



بس بصراحة انا ماحبتهاش كده

الخلاط بيخليها انعم و احسن


و بعدين تزوديلها شربة و تضربي تاني
زودي شربة لحد ما قومها يكون عامل زي قوام الملوخية

و حطيها في حلة و حطيها علي النار تاني علشان تاخدلها غلوة واحدة و تطفي عليها

و في اثناء ذلك
تكوني محضرة شوية ثوم علشان تعملي الطشة او التقلية

زي بتاعة الملوخية بالضبط
ثوم و ملح و فلفل و كسبرة ناشفة مطحونة ناعم
و تضربيهم في المطحنة او الهون
زي ما تحبي


و تجيبي طاسة و تعملي الطشة ديه بالسمن البلدي طبعا


و تحطيها علي البامية الويكة اللي في الحلة و تقلبي كويس
معلش مش عندي صورة ليها دلؤتي..
هصورها و احط صورتها في اقرب وقت ان شاء الله

و تتغرف في سلطانية
و ممكن يتحط عليها ليمون بعد ما نغرف
بيديها طعم حلو برضه

و بألف هنا و شفا


حمايا كان بيسمع عنها و لما عملتها و داقها كان بيشربها مش بيغمسها من كتر ما عجبته
و ولاد اخت زوجي كانوا بطلبوا مني احطهلهم في كوبايات زي الشربه كده


عايزة اسمع عن تجارب


*ملحوظة مهمة جدا*

لما عملت البامية كانت تقريبا ثمن كيلو و عملت معاي كتيييييييييير
و احنا اتنين و نص (بالعيال ) فالكمية كانت كتير علينا و باتت لتاني يوم
مع ان الولاد حبوها جدا
فإحذزوا و انتم بتعملوا علشان الكمية ماتكترش منكم و تبات لتاني يوم

7 comments:

Shimaa Gamal said...

أخيرًا لقيت حد يعرف الويكة الحقيقية
كنت قبل كده لقيت طريقة بس فيها تسبيك و طماطم
بس دى الويكة اللى بنعملها ماهو بابا صعيدى و الويكة الأكلة الرسمية فى الصيف
أنا بفركها بالشوكة

شدى حيلك بقى و ماتسبيش الشغل خسارة

mony said...

لا لا طماطم ايه و تسبيك ايه
كل ديه تفريعات مالهاش علاقة بالويكة خالص

بس بتفركيها بالشوكة كده هتطلع تخينة
غليظة يعني

اصل انا و جوزي بيني و بينك مابنحبش البامية صحيحة..

فالخلاط هيطمس معالمها
و تبقي اقرب للشربة
بس اتقل حاجة بسيطة

تيتا كانت بتقلها
بس كنا بنقرف منها اوي

و لما عملتها بالخلاط و كترت الشربة بقت ممكن تتاكل
و تتشرب كمان:)


جربي بأه و قوليلي طلعت زي بتاعة باباكي ولا في تغييير
:)

kochia said...

والله انا مبسوطة انك كتبتي البامية الويكة
واحنا بنعملها طبعا بس باختلاف بسيط عنك
اننا واحنا بنسلقها الاول بنحط فيها بصلة مبشورة مرتة
ومش بنضربها في الخلاط لكن بنهريها بالشوكة عشان يبقي فيها برده حاجة تتغمس
والطاشة برده بالثوم والسمن وشوية كسبرة ناشفة

تسلم ايدك
تحياتي

ahmed said...

تسلم الايادى برافو عليكى على فكره فى منتدى نسائى ممكن كلنا نشارك فيه وده الرابط الخاص بيه
http://doniaalmr2a.200u.com/vb/

Yasour said...

احب اسجل اعجابي بمدونتك واسلوبك السهل .. دا اولا ،، اصل طول عمري بخاف ادخل المدونات واسجل فيها بحس اني داخلة قصر كبير شيك بس مهجور ! معرفش ليه
ما علينا ... تقبلي اعجابي خصوصا البامية الويكة اللي بحبها جدا بس انا بحبها مكسرة بس منغير خلاط ولا مفراك بالشوكة واضربها كأنك بتروبي بيض

Mony said...

kochia:

الله يسلمك يا جميل
:)

معلش بعتذر عن التأخير
(وش مكسوف بجد)

Mony said...

ahmed:


شكرا يا فندم على الرابط
و الي الامام دائما
:)