Saturday, April 25, 2009

Posted by Mony on 6:38 AM 39 comments
بقالي كام يوم بفكر في الحلو المرة يه يكون ايييه؟؟

 

و الجو الحر الجامد اللي احنا فيه ده اوحالي اني اعمل آيس كريم

 
قلت اهه مناسب برضه اقولكم عليه

 
بس هفضل شايلاه في الفريزر لحد ما اولادي يخفوا
علشان هم تعبانين اوي من تقلبات الجو ديه





بسم الله نبدأ

 
هنعمل في البوست ده الآيس كريم

و كام صوص

و كمان طريقة البسكويت (القرطاس )بتاع الآيس كريم

 
الطريقة سهلة جدا و المقادير متوفرة برضه



انا بحب اعمل الآيس كريم بالفواكه الفريش في الموسم بتاعها



المقادير:

 
في حدود 3/4 كيلو مانجة مثلا

(او أي نوع فاكهة انت عايزة تعمليه)



و لو شوكولاته يكون في حدود نصف كيلو شيكولاتة خام و نسيحها
(500 جرام يعني)



علبة لبن مكثف نستلة او أي نوع
(ال370 جرام اللي هي اصغر حاجة)



علبة جيلي من نفس نوع الفاكهة
(لو مش متوفر النوع يبقي علي الأقل اللون)
(ممكن طبعا نستخدم الجيلاتين الشفاف)





بس كده المقادير كده خلاص





الطريقة:



نحضر الجيلي زي ما هو مكتوب عليه في التعليمات بالضبط

هيطلع لنا 2 كوب سائل الجيلي

نسيبه لحد ما يبرد شوي

 
نكون محضرين الفاكهة اللي هنستخدمها

تكون متقطعة



نحطها في الخلاط مع الجيلي و نضرب في الخلاط حتي التجانس التام



و بعدين نضيف اللبن المحلي المركز بتاع نستله

و نضرب كويس و بعدين نصب الخليط ده في علبة في الفريزر

ممكن نحط مع الخليط قطع من الفاكهة و نقلبها بتدي طعم جميل برضه

تخيلي كده انت بتاكلي ايس كريم فراولة و فيه قطع فراولة ي

و ياسلام لو مكسرات كمان

بالذات مع الشوكولاته البندق بيخلي طعمها رااااائع

و كمان ممكن نحط قطع من الشوكولاته في الخليط بتدي شكل جميل ساعة الغرف



و نسيبة علي الأقل ساعتين علشان يمسك نفسة و يكون قوامه زي الآيس كريم

طبعا علي حسب الفريزر بتاعك

ممكن يتطلب يقعد في الفريزر ل6 ساعات



بس بيطلع كريمي و طعم الفاكهة الفريش واضح جدا فيه

بيطلع تحححفة

كل اللي هيدوقة مش هيصدق انه معمول في البيت

و من غير ماكنة آيس كريم كمان



ممكن طبعا يتقدم كده سادة او يتقدم مع صوص حسب نوع الآيس كريم اللي معمول



انا بصراحة بستسهل و اجيب مربي و أخفها علي النار باشوية ماية صغيرين و استخدمها صوص

مربي مانجة او مشمش او فراولة او تين

علي حسب نوع الفاكهة المستخدم في الأيس كريم



ممكن تعملي صوص كراميل

كوب كبير و نصف سكر

نصف كوب كبير كريمة لباني
(فريش كريم)

نصف كوب كبير بندق مجروش



نحط السكر في حلة علي نار هادية و نقلب بالراحة لحد ما يسيح و لونة يكون كراميل غامق بس اوعوا يتحرق منكم

و بعدين نحط عليه الفرش كريم و نقلب لمدة دقيقة كده و نحط البندق و نقلب علي النار لحد ما قوامه يغلظ و يصبح عندنا الصوص جاهز
(تقريبا من 4 ل5 دقائق تقليب متواصل)





ممكن صوص شيكولاته

 نشيل شوي من الشوكولاته الخام اللي سيحناها

و نحط عليه زبدة و فريش كريم و نقلب كويس لحد التجانس التام و يكون في قوام الصوص

بس مانكترش الفريش كريم علشان ماتأثرش علي لون الشوكولاته



او نعمله بالطريقة ديه:

نصف كيلو لبن

ملعقة كبيرة مليانة كاكاو

نصف كوب كبير سكر
(100 جرام)

ملعقة كبيرة زبدة لينة

150 جرام شوكولاته دارك قطع



نحط اللبن و عليه السكر علي النار و نقلب كويسو لما يغلي نهدي النار شويو نحط الشوكولاته القطع و الكاكاو و نفضل نقلب علي نا هادية خاااالص حد ما الشوكولاته تسيح تماما في الأخر نحط ملعقة الزبدة علشان التلميع





طيب كده احنا خلصنا الآيس كريم

و الصوصات كمان



ندخل بأه علي المفاجئة الكبري



هقولكم علي طريقة بسكويت الأيس كريم



يالا ان شالله ما حد حوش



المقادير:

90 جرام زبدة لينة

90 جرام سكر بودرة

45 جرام دقيق

بياض بيضة

فانيليا





مبدأياً كده علشان صبرني ماتحدفنيش بحاجة

الملعقة الصغيرة بتساوي 5 جرام

و الملعقة الكبيرة(بتاعة الأكل) بتساوي 15 جرام



يعني 90 جرام هتساوي 6 ملاعق طعام

45 جرام هتساوي 3 ملاعق طعام



اتفقنا؟؟
كده مافيش ضرب
:)



في مقادير تانية و بتدي نتيجة كويسة برضه



نصف كوب سكر بودرة

نصف كوب زبدة

كوب دقيق
(بس ننقص منه مقدار ملعقة كبيرة)

بياض 2 بيضة

فانيليا
(لو اخدنا بالنا هنا زود في مقدار الدقيق مقابل السكر و الزبدة و عوض ببياض البيض)







نسيح الزبدة علي النار و نذوب فيها السكر البودرة و نقلب كويس و يستحسسن نضرب بالمضرب السلك

و نحط بياض البيض و عليه الفانيليا و نخفق كويس جدا و بعدين نحط الدقيق و نفضل نخفق لحد ما الخليط يكون عجين سائل بدون أي كلاكيع



و نجيب ورق مقوي مضلع من عند أي حد بتاع مستلزمات الحلواني

او حتي مش مضلع

و نقصه دواير و نحط عليه العجين بتاعنا بالكبشة و نفرد بالملعقة علي الدايرة بتاعتنا

نحاول ما نرفعهوش اوي علشان يكون قوامه كويس



و نحطه في الفرن علي درجة حرارة عالية

يادوب 5 دقائق او لحد ما الأطراف تحمر

نقوم بسرعة مطلعينه من الفرن و في ساعتها نلفه علي شكل قرطاس

او ممكن نحطه علي طبق علشان ياخد شكل الطبق

و هو دقيقة واحدة و هينشف علي الوضع اللي عملناه عليه
ممكن نحطه في الفرن تاني بعد ما شكلناه علشان يكمل احمرار
كده



علي فكرة انا ساعات بستخدم البسكويت اللي علي شكل طبق ده في تقديم الفروت سلاد (سلطة فواكة)

بتبقي فكرة حلوة ان الواحد بعد ما يخلص طبقة ياكله بعد كده


طبعا ممكن تشتري بسكويت جاهز من بره
 و تعملي ساندويتش ايس كريم
زي الويتش اللي بيتباع في السوبر ماركت
و ممكن نقدمه بالأشكال ديه

 



يالا بأه بالهنا و الشفا



انا عارفة اني تقلت عليكم اوي في البوست ده

بس ده موضوع متكامل لازم يتحط كله مع بعض







Categories:

39 comments:

Bondoka said...

ايه الحلاوه دى
انا اول مره اعرف طريقه الايس كريم فى البيت

تسلم ايدك
بس سؤال :هو ايه نوع اللبن ده اللى استخدمتيه ؟ يعنى ايه لبن مكثف؟

Shimaa Gamal said...

الله ينور عليكى ، زمان و أنا صغيرة كانت ماما الله يرحمها بتحب التفصيل و عندها مجلة بردة كثير و واحدة منهم كان فيها طريقة عمل البسكويت ده و كانت أمنيتى إنى أتعلم ألمانى و أدور على المجلة و أعمله :) الحمد لله وفرتى عليا المجهود و حققتيلى الحلم
إن شاء الله هاجرب الأيس كريم و البسكويت لأغنى كان نفسى أجرب و كل الطرق لازم ماكينة أيس كريم .

تسلم إيديك يا قمر

mony said...

Bondoka

ربنا يكرمك يا جميل
لا حلاوة ولا حاجة

ديه حاجة كده علي قدنا يعني
:)


اللبن المستخدم هوالحليب الكثف(المركز) المحلي بتاع نستلي

mony said...

Shimaa Gamal

ان شاء الله الطريقة تعجبك

كتير من اللي داقوه عندي ماصدقوش انه جاهز

مستنين النتائج بأه
:)

احساس طفلة محبة للرومانسية بس واقعية said...

لا يا مونى لا
انتى وصبرنى هتعملوا فيا حاجة على فكرة
مش كدا براحة عليا
اول ما يتشحنلى جيلى من مصر
هعملوا على طول
واستنى النتيجة
هبقى اقولك بهدلت الدنيا وعملت اية

انا عملت الجمبرى على فكرة وفعلا مأخدش وقت فى التحمير وطلع جميل جدا
تسلم ايدك بجد

تقبلى مرورى

mony said...

احساس طفلة محبة للرومانسية بس واقعية


ههههههه علشان مايكونش فيه حجة عند حد و يقول مش عارف اطبخ ايه
ولا ايه رأيك؟؟

طيب ما تجربي الجيلي اللي مكتوب عليه كوشر

كوشر ديه يعني حلال بس بالعبري
اصل اليهود تقريبا زينا في المحرمات في الأكل
و مش بياكلوا من دهن الخنزير علشان حرام عندم
فممكن لو لقيتي جيلي مكتوب عليه كوشر او اي عبارة توحي انه حلال تعرفي انه حلال علي طول
ولا تستني الشحن من مصر ولا حاجة


بجد انت فرحتيني لما بتقولي ان الجمبري طلع حلو
ماتتخيليش بفرح اد ايه لما بسمع كده

طلع حلو يا جميل علشان انت اللي عاملاه بس

لجين أبو الدهب said...

يمممممم..

الصراحة يامونى بوست من الاخر بجد ..

بس ليه صابنى شعور انى مش هاعرف اعمله ؟؟ :(

مع انى عملت حاجات من عندك وطلعت حلوة جدا واخر حاجة عمكلتها الرز بالبن وطلع زى بتاع بره بالظبط ..

طب انتى قلتى لو جيلى نعمله بالطريقة بتاعته ..

طب لو جيلاتينا شفافة ؟؟

نعمل مقدار كويتين ولا نعمل ايه بالظبط ..

بجد تسلم ايدك ياشيفنا يارافع راسنا ..

دمتِ بخير ..

mony said...

لجين أبو الدهب

لا يا جميل ماتقلقيش خالص
و عموما اعملي حاجة حاجة

اول مرة اعملي الآيس كريم
و فعلا مش بياخد وقت خالص خالص
هتقطعي الفاكهة و تضربيها مع الجيلي و اللبن المركز بسسسسسسسسس

و حطيهم في الفريزر

يستحست تدوري علي جيلي مناسب للفاكهة بتاعتك علشان تقوي النكهة بتاعة الآيس كريم
اما لو مالقيتيش فلما تشتري الجيلاتين الشفاف اسألي الراجل العطار او بتاع مستلزمات الحلويات اللي جبتيه منه..علي طريقة العمل
و احنا عايزين مقدار كوبايتين سايب


و مرة تانية تعملي الصوصات


و مرة تالتة تعملي البسكويت بتاع الآيس كريم


مش لازم كله مرة واحدة


و انت هتتمكني يا قمر باذن الله و تعملي بعد كده التلالتة في نفس الوقت


ربنا معاك يا جميل
هيوفقك ان شاء الله

Om HAGAR said...

بصي يا موني الطريقة دي عظيمة جداً جداً بصراحة يعني الحق يتقال تسلم إيدك و أنا هجربها و أقول لك

بس أنا لي سؤال لو أنا حبيت أعمل آيس كريم فانيليا طريقته ايه؟ و لو آيس كريم كراميل برضه طريقته ايه؟

و بعدين أنا كنت واخدة من الشيف حسن طريقة عمل سوربيه المانجو و الفراولة و أي سوربيه فواكه و هو ساعتها قال ان آيس كريم الفواكه هو سورببيه فهل دا مختلف عن اللي انتي عملتيه؟

سؤال أخير بقى و النبي معلش استحمليني. كوبايتين جيلي سائل و ثلاثة أرباع كبلو فاكهة كمية كبيرة على دورق الخلاط اللي هو 2 لتر فبتعملي ايه بقى؟ بتقسميهم على كذا مرة و لا ايه؟

نكهة مغربية said...

ماشاء الله عليك فنانة بمعنى الكلمة
جيما اقتراحاتك حلوة
شكرا يا قمر

الفقيرة إلى الله أم البنات said...

تسلم ايد يا مونى بجد توحفه
وفى طريقة تانيه للأيس كريم بيستخدموا فيها الكريم شانتى مع الفواكه
ومش بيحطوا جيلى
بس اجمل شئ فى طريقتك انها سهله ومش محتاجه فذلكه
تسلم ايدك

tota said...

الله الله الله الله ايه الحلاوه دي ياموني

حبيبة قلبي ياناس

انا بقى بحب قوي الآيس كريم بطريقة مش
معقولة بجد بمووووووووووووووت فيه وعتلم كمان وعندي محل فتح امام
العماره اللي انا فيها عتلم كل يوم
يجيب وهوه جاي من الشغل كده بقى الواحد يجرب انشاء الله الطريقه بتاعتك وهو مطمن بس هجرب حاجه حاجه وانشاء الله يطلع حلو

تسلم ايديكي ياقمر

ELMASRYA - MRS WRITER said...

واااااااااااااااااااو

يجنن

سيبك من الآيس كريم

جميل وحلو ورائع وكل حاجه بس أنا هتجنن على طريقة عمل البسكوتة بتاعة الآيس كريم

جمييييييييييله يا موني

ربنا يخليكي لينا

ولا حكاية الطبق بتاع الفروت سلات

ههههههه حلوة دي ناكل الطبق في الآخر

أنا هعمل الآيس كريم ده بإذن الله بس لما الدنيا تحرر شوية أحسن اسكندرية تلللللج لسه

يسلموا إيديكي وشكرا إنك بتدينا من وقتك وتعلمينا الحاجات الرائعة دي

مواااااااه

mony said...

Om HAGAR

يا هلا بيكي يا جميل :)

بصي انا ماجربتش اعمل آيس كريم الفانيلا ولا الكراميل قبل كده
انا بعمل ده بالفواكه الفريش علشان اضمن ان فيها فواكه مش مكسبات طعم


اما ده مايمنعش اني ممكن اجرب
يعني الفانيليا هتبقي نصف كيلو لبن و عليه فانيليا و ريحة فانيليا من العطار و اكمل عادي باقي المقادير بعد كده

و الكراميل اعمل الصوص اللي قلت عليه ده بحيث يطلع مقدار نصف كيلو اللي هو كوبايتين و بعدين اكمل برضه باقي المقادير عادي

بس هنا هنستخدم الجيلاتين الشفاف بس


يعني خدي قاعدةكده الفواكه بس هي اللي تكون 3/4 كيلو اما السوائل زي اللبن و الشوكولاته و الكراميل و الشاي الأخضر و اي سوائل تانية هنخليها نصف كيلو بس


اما بخصوص دورق الخلاص
فانا بحط علي الفاكهة جيلي الي يادوب يخليها تتخلط كويس و يعدين بحط كل الاجات ديه في طبق غويط و استخدم مضرب البيض علشان كل حاجة تتجانس مع بعض كويس


يعني بستخدم الخلاط لضرب الفاكهة و تنعيمها تماماً بس


يالا مستنين النتايج بأه

mony said...

نكهة مغربية

انا مش فنانة ولا حاجة والله
انا بس بحب اجرب و ساعات ربنا بيوفقني


جزاك الله خيراً

mony said...

tota

تسلميلي يا جميل

يالا جربي و انا واثقة في عمايل ايديكي هيكون نتيجتها ايه


ماقلتيليش صح؟؟ايه اخبار الفخدة عملتوا فيها ايه؟؟

mony said...

الفقيرة إلى الله أم البنات

جزاك الله خيراً يا جميل

طيب قوليلنا علي الطريقة االتانية علشان الكل يستفيد برضه
و الفايدة تعم

mony said...

ELMASRYA - MRS WRITER

حلوة حكاية بتدينا من وقتك ديه

يا شيخة انا اللي بشكركم علي انكم بتاخدوا من وقتكم و تيجوا تشرفوني هنا
ده شرف كبير ليا و الله


طيب علي ما يبدأ الجو يحرر اعملي بسكويت الأيس كريم للفروت سلاد بس
شكليه علي شكل طبق


علشان تظبطيه علي ما الصيف يجي للأيس كريم

tota said...

يااااااااااه انتي لسه فاكره ياموني
عموما هقولك ايه اللي حصل يوميها
قسمتها زي ماانا قولتلك وكنت عارفه انها كتير علينا بس تقولي ايه بقى مشيت ورا كلامهم ياأختي ويارتني مامشيت عموما هما اللي عملوها وبرضه اتبقى كتير يااختي يالا اهي فخده تفوت ولا حد يموت اهههههههههههههه

شكرا على سؤالك ياقمر
وربنا يكرمك ويخليكي لينا ياأحلى اخت

إيمان said...

مشكريييييييييييين

بجد شوية حاجات تحففففففففه

والله بجد مش عارفه اشكرك على المدونة التحفه دى بأيه روحى يا شيخه ربنا يوقفلك ولاد الحلال
وميجوعلك حبيب ابدا
اول مره ازور مدونتك
بس ايه خلاص انا كده بقيت مقيمه كل ما تدخلى هتلاقينى
مووووووووووه

صبرني يارب said...

تصدقي يا موني انتى بنت حلال

والله انا كنت من كام يوم باقول عايزه اقول لموني تنزل الايس كريم الى قالت عليه بقى الصيف جه

شوفي انا جربت في البيت ميت طريقه للايس كريم واخر لما زهقت بقيت اجيب بودر كده للايس كريم بالكيلو
وازود عليه شويه فاكهه طبيعى واعمله واكبر دماغي

انما هاجرب طريقتك دي ان شاء الله واقولك

وبالنسبه للبسكوت طبعاااااااااا هابوووووووسك انا باموت فيه
برضه هاقولك ان شاء الله لما اعمله


على فكره انا باعمل حركة المربي دي برضه
هههههههههههههههههههه


واه انتى ما قلتليش جربتي تعملي اللبن المكثف زي ما انا قلتلك ؟
ونفع ولا لا ؟

mony said...

tota

هههههههههههه


لا لا

اعملي حسابك انا مش بنسي


طيب خير


قعدتوا تاكلوا فيها لمدة كام اسبوع طبعا..صح

:):)

mony said...

إيمان

اي خدمة يا ستي
تحت امرك
:):)


ايه ده هو انت و مصرية غير بعض

انا كنت فاكراكم حد واحد
علشان نفس اسم المدونة تقريبا
بس دلؤتي بس اخدت بالي من الفرق

معلش يا فندم امسحيها عندي المرة ديه


انا متابعاكي مع تامرعلي طول و الله

و كنت ادخل معاه عندك الاقي موضوع..و اجي اعلق(كنت بدخل مدونة مصرية علي انها انت)الاقي موضوع تاني
اقول ده اكيد موضوع جديد



يالا يا ستي سعدت بالتعرف عليكي عن قرب اكتر


طيب انت خبيرة تغذية هتفيديني كتير بأه
:(:(:(
(استغلال بأه)

يعني ماينفعش مدونة فيها اكلات من غير اراء و مشورات خبيرة التغذية
:)

اهلا بيكي في اي وقت تشرفينا يا جميل

mony said...

صبرني يارب

اي خدعة يا صبصب

انت بس فكري من غير ما تقشري تلاقي اللي نفسك فيه قدامك
و لو حكمت نجيبه لحد المنصورة يا ستي


لا تقلقي هيعجبك ان شاء الله
انا لما دقته عند واحدة قريبتي اول مرة
اتلحست و قلتلها الطريقة دلؤتي ولا مش مروحة و هلبدلكم في الدرة
هههه



انا عملت اللبن بس كان خفيف
(مش زي بتاع نستله)
مش عارفة بأه العيب كان مني ول من اللبن

مى said...

ما شاء الله لا قوة إلا بالله

أول مرة أدخل مدونتك
النهاردة

و إتشجعت و عملت

شراب الدوم و الخروب

و قلت أكتب التعليق بعد ما أشوف النتيجة

اللى كانت كما توقعت









تحفففففففففففففففففة



و أُعجبت جداً بردك على ضيوف مدونتك
اللى كله ذوق و عذوبة

بارك الله فيكى و فى زوجك و ذريتك

mony said...

مى


ربنا يباركلك و يشرح صدرك زي ما شرحتي صدري

ماتتخيليش اد ايه بكون فرحانة لما وجه جديد يشرفي و يعمل حاجة من هنا و كمااااان تعجبه
بطير من علي الارض طير


و اخجلتيني خالص بصراحة من الكلمتين اللي قلتيهم في الأخر دول
و كمان بونص دعاء
يعني 2 في 1
كلام جميل و دعاء في نفس الوقت
ربنا يكرمك و يباركلك


جزاكم الله خيرا

الشموع البيضاء said...

انا اكتشفت مدونتك من قريب بس
بس بجد تحففففه وخدت طريقة لقمة القاضى اجربها وهجرب البراونيز لانى بحبه اوى انا وجوزى
بجد تسلم ايديكى مدونه تحفه
بس للاسف زعلت جيت ادخل المدونة التانيه لقيتها للمدعوين بس
ياريت لوسمحتى اقدر اقرا لانى حاسه انك انسانة جميله واكون سعيده بده
وده الميل لو حبيتى تعمليلى الدعوه وشكرا
marool_afifil@hotmail.com

mony said...

الشموع البيضاء


تصدقي


انا مكسوفة جداااا دلؤتي




مش عارفة حتي ارد عليكي اقولك ايه


بصي يا ستي بما انك زائرة جديدة
نحكيلك الحكاية من الأول

حصل كام مشكلة في المدونتين الخاصين بي

ديه و مذكرات موني
و بقرار جمهوري من زوجي العزيز قرر(هو لوحده)
اني الغي جميع المدونات و ارجع لشغلتي الأساسية الا و هي ربة منزل


بس اختنا العزيزة صبرني يا رب عملت اعتصام شديد و جمعت عدد لا يستهان به من الأخوة و الأخوات المدونين و نددوا و شجبوا فلم يتحمل زوجي العزيز الضغط
اللي كان من ناحيتهم فقط
(وانا ولاااكأني هنا)

و جه و قاللي..بصي يا موني انا موافق ترجعي مدام سلاموني للحياة مرة اخري

انما مذكرات زوجة شابة لاااااء


(مع ان المشكلة الأساسية حصلت في مدام سلاموني)
بصراحة ما صدقت و شبط في الكلمة

و جيت علشان ارجع مدام سلاموني كما تنص بنود الإتفاق الاقي مدام سلاموني اتلطشت
في حد خد اللينك اللي كانت عليه
قاصد بأه و لا مش قاصد الله اعلم

فأنا علشان احافظ علي مذكرات زوجة شابة
رحت مرجعاها علي نفس اللينك القديم بتاعها
بس علشان الأوامر العليا بتقول مانفتحهاش يبقي مانفتحاش
فخليتها للمدعوين اللي هم انا فقط لا غير
حفاظا علي اللينك لا يتلطش زي ما اللينك القديم بتاع مدام سلاموني اتلطش



طبعا انا كان لازم احكيلك الحكاية ديه كلها علشان اقولك
و الله المدونة محدش بيدخلها خالص ولا حتي انا
انا بس مخلياها لحد ما يقضي الله امرا كان مفعولا
و احاول مرارا و تكرارا اني افتحها مرة اخري

لو لسة عايزة تدخلي انا ممكن اكتبلك اليوسر نيم و الباسورد بتوعي
تدخلي تبحري براحتك يا فندم


تسمحيلي بأه أستغل الميل بتاعك
علشان مايكونش اتكتب علي الفاضي و اضيفك عندي علي الماسنجر؟؟؟

الشموع البيضاء said...

تسلمى يامونى ياجميله ومعلش خليتك تحكيلى القصه كلها انا والله مكنتش اعرف بس مادام اوامر عليا يبقا علم وينفذ امرك لله بقا :-)
على فكره والله اول مره مدونة تطلع معايا للقراء واطلب من صاحبتها لانى حسيت انك بتكلمى كلام جميل زيك بس ولايهمك
بالنسبة للماسنجر طبعا يشرفنى تضيفينى
وبالنسبة لمدام سلامونى عاوزه اقولك انى مش من هواة مدوانت الاكل خالص انتى الوحيده الى مدونتها بجد حلوة وشيك وتفتح النفس
وعلى فكره دى مش مجامله ده احساسى
تحياااتى لكى

mony said...

الشموع البيضاء

اه و الله فعلا أوامر عليا

ربنا ييسر و نحاول نفتحها مرة اخري

و ربنا يكرمك يا جميل علي الكلام الجميل اللي انا مش اده خالص ده


ادخلي كده علي مدونات مطبخية شقيقة و هتلاقي ناس احسن مني كمان هناك

nona said...

جميله اوى طريقه الايس كريم دى
انا وعدت اخواتى اعمله لهم بعد امتحانى يوم الاربع بس عندى سؤالين

مش ممكن اعمل بلبن عادى مش مجفف؟
و لو هستخدم الجيلاتين بدل الجيلى استخدم كميه اد ايه؟

و يا رب اعمله حلو كده زى بتاعك

mony said...

nona

ماتقلقيش يا جميل

هيطلع احسن من بتاعي كمان ان شاء الله


بالنسبة للبن انا مش بحط لبن مجفف
انا بحط لبن مكثف
المكثف المحلي اللي زي بتاع نستلة
بيكون مسكر و قوامه ثقيل


اما بالنسبة للجيلاتين
اعملي المقدار اللي يطلعلك كوبايتين

علشا الجيلاتين ده في انواع بتكون بتربط و تتقل بسرعة و انواع تانية مالهاش لازمة
فانت لما تشتريه من محل مستلزمات الحلويات
اسألي هناك اد ايه يعمل 2 كوب سائل


ماشي كده
يالا بأه اعملي و دقيني
عايزة ادوق الابداع

بقولك صحيح لو هتعملي شوكولاته ولا فانيليا
(اي حاجة مش من الفواكه)
علشان مايطلعش ناشف معاك
ابقي حطي علي الوصفة اللي قلنا عليها ديه كريم شانتيه


بس كده خلاص
و اي استفسار انا تحت امرك يا جميل

nona said...

انا هقول لك اللى حصل معايا بس بلاش تريقه

انا قريت ردك بعد ما جيت و كنت جبت الجيلاتين و الشيكولاته بس مش جبت لبن مكثف و مش لقيت فى البيت فاكهه طازة ممكن اعمل بيها الا فراوله مجمده
فقلت مشيها شيكولاته دلوقتى و لما لقيتك بتقولى ان الشيكولاته محتاجه كريم شانتى كان صعب ارجع تانى اجيبه فقلت هاعمل باللى موجود وامرى لله

جبت اللبن العادى و عملت بيه الجيلاتين(ال يعنى بدل اللبن المكثف و الميه بتاع الجيلى) و دوبت الشيكولاته و حطيتها فيه و طبعا حطيت شويه سكر

و سبته يتجمد .. حتى مش لقيت مكان يكفيه فى الفريزر فصبيته فى كبايات و حطيته فى الدرج اللى تحت الفريزر

المهم طلع فى الاخر حاجه كده شبه دانيت

بس انا لسه ما فقدتش الامل و ان شاء الله اعمل ايس كريم مظبوط فى يوم من الايام

mony said...

nona


طيب ايه رأيك بأه ان انت ابدعتي كده
انت كده اخترعت طريقة دانيت

و بيتي كمان

انا كده ممكن الطش منك الطريقة و اعملها لولادي
علشان انا كنت قريت ان دانيت مش كويس علشان فيه مواد مسرطنة


يبقي كده عندي دانيت بيتي


بس بيني و بينك كده انا بعمل حاجة شبه الدانيت برضه
بس بكستر الشوكولاته


عموما مبروك اول اختراع

و عقبال الاختراعات الباقية
:)

nona said...

ربنا يخليكى

بترفعى روحى المعنويه

يللا مستنيين اكلات حلوة كده عشان اجربها فى العيال اخواتى

yasser said...

السلام عليكم
بارك الله فيكى

samoha

أميـــ الذوق ــــرة said...

من جد مطبخك راااائع بصراحه استحيت من مطبخي عند مطبخك

والف الف شكر لصاحب المدونه اعجبت بها وبتنسيقها ومواضيعها على طوووول ع المفضله راح اكون من المتابعين

ولي الفخر بأن أضع كلماتي بين طيات هذه المدونه الراقيه

واتمنا تشرفون مدونتي المتواضعه

http://ikingdoms.blogspot.com/

Anonymous said...

بصراحه الطريقه سهله كان نفسي نعمل الايس كريم من زمان زي اللي في المحلات

pntre pantre said...

خطوة بخطوة تعملى اسرع طريقة عمل ايس كريم فراولة من موقع باتيه وانتريه الموقع الغنى بأشهى وصفات حلويات وطبخ
http://www.pntre.com/how-making-icecream/