|
سلام عليكم و رحمة الله و بركاته
لسة مخلصة شغل
و عرفت طريقة جميلة جداً للفراخ المشوية
اهم حاجة انها سريييييييييييعة
فقلت اما اشارككم بها
مش محتاجة وقت في التتبيل ولا اي حاجة خااالص
بصوا بأه بنجيب الفرخة و نتبل في عظمها من جوة بالملح و الفلفل
و بعدين نجيب بصل مبشور و عليه ملح و فلفل و شوية خل
و نغرز الفرخة بالسكين لحد ما نصل الفتحات الي العظم
و نحاول ندخل التتبيلة بتاعتنا في الفتحات ديه و نسيب الفرخة فيها 5 دقائق مثلا
و نفتح الفرن علي درجة حرارة متوسطة
(بين المتوسطة و العالية)
ركزوا معايا بأه علشان اللي جاي عايز تركيز
نجيب زجاجة حاجة ساقعة فاضية
و التتبيلة حتكون نزلت شوية ماية بجانب الخل اللي حطيناه
نلم التتبيلة اللي تحت الفراخ بالماية و نحطهم جوة زجاجة الحاجة الساقعة و نجيب الفرخة و ندخل الزجاجة في بطن الفرخة
بحيث يكون عنق الزجاجة داخل الفرخة
كده بالضبط
يعني هنستخدم زجاجة الحاجة الساقعة كحامل للفرخة
كده
و نكتف الفرخة كويس
باننا نحط رجليها في الفتحة
باننا نحط رجليها في الفتحة
و نحط الفرخة بالزجاجة علي صينية و ندخلهم في الفرن
طبعا انتم مستغربين ليه انا استخدمت الزجاجة الفارغة
(هو وجع دماغ و خلاص)
لا يا فندم مش وجع دماغ ولا حاجة
ده علشان احنا مستعجلين و الفرخة ما خدتش وقت في التتبيل
فإحنا حطينا التتبيلة جوة الزجاجة الفاضية و وقفنا الفرخة علي الزجاجة علشان ايييه؟؟
التتبيلة هتسخن و هتغلي و تتطلع البخار بتاعها داخل الفرخة
بس عايزة انبهكم ان عنق الزجاجة تكون جوة الفرخة مش بره
يعني الصورة ديه غلط
ولا تقلقوا
لا الزجاجة هتنفجر
ولا اي تساؤلات من اللي اتسألتها تلتميت مرة ديه هتحصل
يعني الصورة ديه غلط
لازم العنق تكون جوة علشان نسنفيد بالبخار
احنا مش عايزين نبخر الفرن
هنبخر الفرخة بسولا تقلقوا
لا الزجاجة هتنفجر
ولا اي تساؤلات من اللي اتسألتها تلتميت مرة ديه هتحصل
لمدة ساعة البخار بيدور جوة الفرخة..
و كمان في فايدة كمان
ان الفرخة مش هتنشف
هتفضل طريةمن جوة
و مقرمشة من بره
في حاجة مهمة كمان
المفروض ما نشيلش الجلد من علي الفرخة علشان هو ده اللي هيساعد انها مانتشفش
و يديها لون تححححفة
و لا تقلقوا هو هيسيح خااالصو هيكون عبارة عن جلدة مقرمشة
يعني المرأه العاملة ترجع من بره ومعاه الفرخة يا دوب تغسلها و تعملها اللي قلنا عليه ده و تدخل ترتاح لها ساعة كده علي ما الفرخة تستوي
لو الفرخة في حدود كيلو نص بتاخد ساعة
لو اكتر يبقي الوقت هيكتر شوي
فنتابع تسوية الفرخة بأننا نغرز سكين في الدبوس بتاع الورك علشان هو ده اخر حاجة بتستوي
و بالهنا و الشفا يا فندم
و اي تساؤلات انا تحت امركم
صحيح الحق يقال يعني
واحد صاحب تامر اللي قاله علي الطريقة ديه
و تامر باشا جه قالهالي
علشان ادي كل ذي حق حقه
و اي تساؤلات انا تحت امركم
صحيح الحق يقال يعني
واحد صاحب تامر اللي قاله علي الطريقة ديه
و تامر باشا جه قالهالي
علشان ادي كل ذي حق حقه
الله الله يا ست موووووني
حلوه الفكره دي
انا كنت باعمل ايه بقى
باحشي الفرخه تحت الجلد البصله الى عليها لمون وفلفل وكده
تحت الجلد ووفى قلب االفرخه وبعدين اشكها على السيخ بتاع الشوايه عادي
بتطلع برضه حلوه
بس نجرب حوكاية الزجاجه دي
وايه الرجاله الى بيقولوا وصفات لبعض دول ؟؟
هههههههههههههههه
الا جوزي عمره ما جه قالي وصفه يا اختي ولا طلب مني اكله معينه بيحسسنى انى باطبخ كل يوم مايه ساقعه
لا لااستنى مره جابلي طريقة طابخه من الشيف الى كان بيطبخلهم لما كان فى فرنسا
هابقى انزلهالكم مره
ظالماه انا
تسلم اديكى يا بطه ايه الحلاوه دي
اه من الحق يا موني
انا عملت البشاميل بطريقتك
طلع حلو اوي والله وسهل
بس هو مش طعمه برضه الى بيبقى متحمر
بس المتحمر ده بيبقى تقيل تقل يا اختي بيموتني
دي كانت خفيفه جدا واول مره اكل مكرونه وما اتعبش
وماما ما عرفتش ان انا عملتها كده وقعدت تشكر فيها
نيهاها هااااا
وبالنسبه للحليب المكثف
ازاي طلع خفيف سبيه يغلي زياده شويه
ده انا ساعات انساه على النار زياده الاقيه بقى تقيل اوي اوي اخففه بشوية حليب عادي
بس مش عارفه هاينفع فى الايس كريم
هاجرب بقى
لما الواد خالد يخف احسن عنده برد
تاخدي حتة بسبوسه ؟
تسلمي يا قمر على الطريقة
سهلة و سريعة
بس قوليلي هي ممكنتصلح لجميع أنواع الفرن و لابس لي لي بيوزع الحرارة من الجناب أصل الفرم بتاعي حرارتو من فوق و تحت بس الجوانب لاء
و الله يا قمر بتطولي الغيبة
متغبيش كتير
ايه الحلاوة دي
ايه الطعامة دي
الغريب اني سمعت الحدوتة دي من سنتين من جوزي لا عملتها ولا افتكرتها لحد النهاردة
بس هو شرحها بطريقة خوفتني برضه من قصة ان الإزازة تنفجر
مشكرين يا موني يا مبدعة
موني حبيبتي
وحشتيني كنتي فين كل ده؟
طبعا طريقة رهيبة وعمري ماسمعت عنها بس أكيد روعة لأنها سريعة وبتوصلنا لطعم جميل برضه وكاننا سيبنا الفرخة فترة في التبيلة
ما تتأخريش علينا تاني يا قمراية
أحبك في الله
انا من فترة سمعت الطريقة دي من اختي الكبيرة
جوزها كان بيشتغل بمطاعم وليه اصحاب بيقولوله الوصفات الجديدة
بس كنت فاكرة انهم بيعملوا كدا لانه معندهمش شواية
وياخسارة مينفعش اعملها عندي عالفرن لانه مش مناسب
الطريييقة توووحفة
تسلم ايدك
فكرة جديده برضه موضوع الازازة ده
تسلميلنا بجد على الطرق المتنوعه والمختلفة اللي بتقدميهالنا
صبرني يارب
ربنا يكرمك يا صبصب
ده بعض ما عندكم
مانا بعملها كده علي سيخ الشواية اللي بيلف بس لازم تقعد علي الأقل 6 ساعات في التتبيل
انما هنا احنا مش محتاجين وقت التتبيل خالص
و هو ساعة و الموضوع كله هيخلص
و بعدين ممكن تعملي اربع فرخات في نفس الوقت علي حسب وسع الفرن بتاعك
و اهه كاه هيقف جنب بعضه
في رجالة كتير موضوع الطبخ ده عنده هوايه
بس في ناس بيقلب عندهم بمرض
ربنا يبعدهم عننا
:)
شوفتي ظلمتي الراجل ازاي يا صبصب
اهه طلع قالك علي وصفة اهه
كويس انك جربتي الباشاميل
تصدقي يا صبصب
امي كان صوتها بيتنبح من كتر الصريخ علشان اتعلم اعمل الباشاميل
اللي بيتحمر
بس انا دراعي كان بيتخلع من كتر التقليب
فكنت بطنش و اخرج و اسيبلها المطبخ
و لما اتجوزت ماعملتوش خالص غير لما عرفت طريقة حماتي
و من ساعتها
علمته لماما و ماما مابقتش بتعمل الباشاميل غير بيه
علشان سهل و خفيف
اما اللبن المكثف
فممكن اكون انا اللي زهقت و ماصبرتش عليه
احاول اجرب مرة اخري
هاتي هتة بسبوسة بأه
:)
نكهة مغربية
جزاكم الله خيرا
اه ينفع طبعا يا جميل
انا الفرن بتاعي حرارته من تحت بس
و فوق ده الشواية
فممكن في اي فرن ان شاء الله
معلش بأه اعذروني علي التأخير
:)
ستيته حسب الله الحمش
هههههه
ربنا يكرمك يا ستوتة يا جميلة
و ماتقلقيش الإزازة مش هتنفجر ولا حاجة..لان فيها سائل..تنفجر في حال انها ناشفة بس
وحشتيني و الله يا ستيتة
انا فاكرة ان ماما عملتها لنا مرة وكان طعمها حلو فعلا ..
هحاول اجربها ان شاء الله ..
تسلم ايدك يامونى ..
الشغل خدك منا :(
ربنا يجزيكِ كل خير ..
ELMASRYA - MRS WRITER
و الله يا مصرية التأخير ده غصب عني
اصل الشغل بتاعي يتطلب اني اقعد علي الكمبيوتر 8 ساعات ..و افضل متنحة في الشاشة طول الفترة ديه
ده غير الكتابة كمان علي الكي بورد
فلما بخلص شغل بكون مش طايقة اسمع اسم الكومبيوتر ده خالص ولا اشوف خياله حتي
:))
نـــوارة
لا يا جميل مش بيعملوها كه علشان ماعندهومش فرن
دول بيعملوها كده علشان مابيلحقوش يتبلوها
و تكمل تتبيل في الفرن من البخار الناتج عن غليان التتبيلة جوة الزجاجة
اخيرا قفشتك
:))
كاتبالك رسالة علي مدونة البرامج
ابقي ردي علي فيها للضرورة
بنت مصر
جزاكم الله خيرا يا جميل
لجين أبو الدهب
وحشتيني يا لوجي و الله
فعلا الشغل خدني
و خلاني مقصرة معكم خااالص سواء هنا و لا في مدوناتكم
بي غصب عني و الله
بصى يامونى
اناعملت موضوع الازازة ده من مدة
بس تبلت الفرخة عادى بخلطه البصل ديهوبحشى بها تحت الجلد وجوة الفرخة ومن بره بحط علبة زبادى مع نص ملعقة صلصة وحبة بهارات او زعتر وبدهنها كويس من برة اما الزجاجة انا ماتيها مية ودخلتها جوة الفرخة وكنت خايفة من حكاية الانفجار لكن ماحصلش حاجة
بس قالولى لازم تكون الازازة مليانة مية مش فاضية
المهم ان منظرها بيكون تحفة
وحطينها علة السفرة والزجاجة بداخلها مش باينة
والضيوف استغربوا ازاى الفراخ قاعدة كده
ولما عرفوا عجبتهم الفكرة
بس برضه حجرب طريقتك
وجزاكى الله خير
أخيرا ياموني وحشتينا ياقمر بس ربنا يكون في عونك
أولا جميلة قوي الطريقه دي وسهله وزي ماانتي قولتي سريعة يعني فيها كل الصفات المميزه خلتيني اشم ريحتها انشاء الله أجرب وأقولك على النتيجه ودايما كده عندك الجديد ياقمر
تسلم ايدكي ياقمر
هاااي
رديت عليكي ياقمراية
ابقى جربي زي ماكتبتلك وردي عليي
تحياتي ياقمر
ماشي ياموني
بس والله لو الازازه انفجرت انت حره
مش ناقصه فضايح يااوختي
بصي انا بعمل حاجه شبه كده عشان الشوايه عندنا مبتلفش بالفراخ الزياده عن كيلو بس في الصنيه بتاعه الاستاند دي بس هجرب الازازه يامنمون
أم مالك
يا هلا بأم مالك
جميلة الفكرة بتاعتك طبعا
بس ليه بتحطي في الإزازة ماية
انت لو حطيتي في التتبيلة
(جوة الزجاجة)
هتوصل للنص
و علي ما الفرخة تستوي هتقل للربع بس
لا تقلقي
احنا بنحط تتبيلة جوزة الزجاجة علشان تكمل تتبيل الفراخ و لمدة ساعة يفضل البخار يدور جوة الفرخة
نورتينا يا فندم
tota
ربنا يكرمك يا توتا يا قمر
مستنية النتايج باه
mayada
اهلااااااااا مادي فينك يا بنتي انا خفت عليكي و الله
ايه اخبار التجارب المطبخة
(ربنا يسر)
لا تقلقي يا جميل
بس اعملي زي ما انا كاتبه بالضبط
و بلاش فزلكة
الصديقة الجديدة مدام سلاموني الشهيرة بموني
ايه المدونة الرائعة دي و اللةو لا لك علي يمين اكتر من مرة افكر اعمل مدونة للاكل زي المدونة العسل دي بس وقتي مش متحمل مدونتين
حتلاقيني ضيفة دائمة عندك جعل الله هذه المدونة في ميزان حسناتك
النسة للفرخة ياقمر انا بعملها الطريقة دي م فترة و لو تسمحي لي اضيف ملحوظتين
اولا الزجاجة انا ملاها ماء للاخر و اضعها كما ذكرت معرفش انت كان قصدك كده و لا انت بتضعيها فاضية انا بس حبيت اوضح النقطة دي ان البخار جاي من الماء اللي داخل الزجاجة
ثانيا انا بضع الزجاجة بفرختها داخل صينية عشان الدهن بتاعها لا يقع علي الفرن فلو كنتم خاسين و ليس لديكم مشاكل كولستيرول مثلي انا و ابو أحمد ممكن تضعوا في الصينية حلقات بطاطس و بصل سواء بيضاء او طماطم بينزل عليها دهن الفرخة و طعم التتبيل و بتكون روعة بس اعيد التأكيد انها تقيلة لمن لديه مشاكل مع الدهون
ان شاء الله بدايه تواصل دائم و بالهنا و الشفا للجميع
أم أحمد المصرية
ده شرف لي انك تعتبريني صديقة
ده شي يسعدني و يشرفني و الله
طيب جربي موضوع مدونة الأكل ديه و هتلاقي ربنا كرمك في وقتك
و يا سلام كمان لما تعمليها بنية اطعام الطعام
من غير ما تقفي ولا تتعبي
اي حد يعمل بوصفاتك هيوصلك الثواب لحد عندك
فكري بس في الوضوع
و ربنا ييسرلك الخير ان شاء الله
اما بخصوص الفراخ
فأنا مش بملاها ماية
انا بملاها بتتبيلة الفراخ اللي هي عبارة عن البصل المبشور+الخل+الملح و الفلفل
بتوصل لنصف الزجاجة تقريبا
و جربيها هتلاقي فرق في الطعم
(بقي اغني)
لان البخار هو بخار التتبيل
عامة احنا لما بحط علي بشر البصل مالح و فلفل
فده في حد ذاته بينزل ماية البصل
فبالتالي بتكتر السوائل في التتبيلة
فهمتيني؟؟
اما بخصوص استغلال دهن الفرخ الي بينزل في الصينية
فانا اخاف بصراحة
انا بفضل اسمي قبل اكل الفراخ و اقول بسم الله الذي لا يضر
لان معظم الدكاترة كانوا بيحذروا من جلد الفرخةعند الطبخ
فمقدرش استخدم الدهن اللي نازل من الجلد ده في طبخ حاجة تانية
مع ان طعمها هيكون تحفة اكيد
و اها وسهلا بيكي في بيتك التاني في اي وقت
بصى يا مونى
أنا حاحكيلك على اللى حصل
قريت طريقةالفراخ الصبح
غيرت خطة المطبخ المقررة سلفاً و قولت أجربها
و ده طبعاً لإنى واثقة فيكى
دخل الدكترة
لقى الفراخ متشعلقة
قالى "مى" إنتى معذبة الفراخ كده ليه
إنتى مش خايفة من الحاجة بيرجريت باردو
ترفع قضية و تدخلنا فى الرفق بالطيور
طب حتى خافى على سمعة بلدك
ديه .. بلدنا أمانة فى إيدينا
دخل الزئردة
و قالى : مامى إنت مذنبة الفراخ
!!
و ده يا ستى
علشان كلمتك
إحنا مش عايزين نبخر الفرن
فلازم يكون بق الزجاجة جوة
و عنها ..رفعت الجناحين و شبكتهم بخلة أسنان.. و كمان قصيت حتة من الرقبة و سديت بيها فتحة الفرخة من فوق
المهم
شوية و لقيتلك الدكترة بيتصل
و بيقول
هاه الحزام الناسف اللى فى الفرن إنفجر و لا لسه
؟؟
قولتله الولاد بياكلوه
بجد يا مونى
تسلم إيديكى و يبارك فيكى
طريقة خرافيييييية
أكرمكى الله و أطعمكى من طير الجنة و أدعوه تعالى أن يجعلنا صحبة فيها
مى
تصدقي يا مي
انا اتخضيت في اول التعليق
قلت ده هتقوللي اني كنت فاشلة و أدي الموضوع ده الي تفجير الفرن ولا حاجة
كنت حاطة ايدي علي قلبي و بقول يا رب تكون افتكرت تحط التتبيلة في الزجاجة
بس الحمد لله طلعتي طباخة ماهرة
بس مكنش ليه لازمة تمثلي بالفرخة كده
قطعتي رقبتها ليه بس المسكينة
فم الزجاجة لو كان جوة الفرخة
في الصدر كده
كان هيبخرها كويس
بس انت خدت احتياطات زيادة شوي
مافيش مشكلة
الحمد لله انها طلعت كويسة
و كمان عجبتكوا
بالهنا و الشفا يا فندم
كنا عيزين نعرف رأي الدكتره ايه في الحزام الناسف
يا تري اتنسف ولااا
بالهنا و الشفا يا جميل
والله برافو عليك, طريقة جديدة, عجبتني, حجربها وحرد عليك, تسلم ايديك
السلام عليكم ورحمة الله وبركاته
تسلم الايادي يا موني
باعملها كتير
الاول كنت باعملها كده في الزجاجه
بس طلعت صواني مخصوصه لده فيها زي اسياخ كده واقفه ، عباره عن صينيه صغيره ليها خرمين من الجوانب بيتركب فيهم السيخ الواقف ده اللي الفرخه بتتلبس فيه
وبعد شويه طلعت حاجه تانيه عباره عن دايره كده وفيها سيخين واقفين لفوق برضو عشان تكفي فرختين مع بعض الدايره دي علي اد اكبر ميقاس في طقم الصواني التيفال
بعمل نفس التتبيله واحطها تحت جلد الفراخ وجوا الفرخه
ويااما احط في الصينيه شوية ميه وعليها حبة اعشاب زي الزعتر والحبهان وورق اللوري وطرنشات ليمون وكل ما الميه تنشف ازودها او ساعات باعمل تحتها صينية بطاطس والبخار اللي بيطلع من الميه او صينيه البطاطس برضو بيخليها ماتنشفش
وبتبقي اكله روعه وسهله ومن غير اي تعب
سلام يا قمر
السلام عليكم ورحمة الله وبركاته
موني لاقيتلك صوره للاسياخ اللي بقولك عليها
هنا
http://www.kitchenniche.ca/images/beer%20can%20chicken%20roaster%201.jpg
هي شبههاتقريبا بس اللي في النص مش مدوره اوي كده هي شبه حرف في مقلوب
sabah
جزاك الله خيرا يا صباخ
مستنية التجارب بأه
خمسة فضفضة
ربنا يكرمك يا جميل
جزاكم الله خيرا
انا عارفة الصواني اللي بتقولي عليها
بس انا بستخدم الطريقة ديه في حال ان ماعنديش وقت اتبل الفراخ
فبحط التتبيلة 10 دقائق للحد ما الفرن يسخن
و بعدين احط التتبيلة في الزجاجة
علشان اكمل تتبيل الفراخ
بس حلوة فكرة الماية اللي في الصينية اللي فيها زعتر و روز ماري و ليمون
اجربها ان شاء الله
جزاكم الله خيرا علي اللينك و علي الإهتمام
جميلة اوي الحكاية دي
ان شاء الله اجربها
kochia
جزاكم الله خيرا
خلاص مستنين النتائج بأه
الفراخ روووووووووووعة و جميلة , تسلم ايديكى .
انا جربتها وكانت ممتازة بس أخدت عندى فالفرن حوالى 90 دقيقة لان الفرخة كانت كبيرة , ربنا يزيدك من علمه .
شكراٌ .
منى الفولى .