Saturday, February 12, 2011

Posted by Mony on 1:06 PM 6 comments
السلام عليكم و رحمة الله و بركاته



هلا و غلا للجميع



بما ان في خبر سعيد و الناس فرحانه

ربنا يجعل فرحتنا ديه أول قطرة في سيل النصر و الفرح لينا كلنا يارب





فقلت ننتهز الفرصة ديه و نحط حاجة حلوة الناس تحلي بيها



ايه رأيكم انهردة في

**بلح الشام**



اه احنا مش في رمضان

بس الحدث يستاهل برضه اننا نعمل حاجة خاصة برمضان





نبدأ بأه على طول من غير رغي كتير



::المقادير::



1كوب ماء

1و نص كوب دقيق

8 ملاعق زيت

( ملاعق كبيرة اللي بناكل بيها مش الكبشة)

3بيضات

1بطاطس وسط مسلوقة و مهروسة

(و هي ساخنة نهرسها علشان مايكونش فيها كلاكيع)

1فانيليا

رشة ملح صغننة على الدقيق

شربات تقيل
(بس مش ثقيل اوي علشان بلح الشام مايتفتفتش)





ندخل على الطريقة بأه

نحط الماية على النار و نحط عليها ال8ملاعق زيت اللي قولنا عليها

أول ما الماية تغلي نحط الدقيق و نطفي النار و نقلب كويس أوي و بسرعة علشان الدقيق كله يختفي و معاهم رشة الملح

لحد ما يتكون عندنا كورة عجين

نفرد الكورة و نقلب معاها البطاطس المهروسة اللي محضرينها و نقلب كويس لحد ما الاتنين يتجانسوا تماما

و لما العجين يكون دافي نحط معاهم البيض واحدة واحدة

نحط واحدة و نقعد نقلب لحد ما تتجانس و لما العجين تنشف تاني تحط التانية و هكذا

مع اخر بيضة نحط الفانيليا

و نقلب كويس لحد ما يوصل لكده




و نجهز الاداة بتاعتنا

القمع

زي ده كده


و يكون الفتحة بتاعته كبيرة مش صغننة










لو مش عندك قمع مافيش مشاكل خاااالص

ممكن كيس حلوانى

أو المسدس ده اللي بيعملوا بيه أشكال

كله ماشي

اهم حاجة الشكل اللي هيطلع يكون شكل بلح الشام اللي احنا عارفينه




نجهز الطاسة اللي هنحمر فيها

عايزينها واسعة و غويطة الي حد ما

علشان تاخد كمية كبيرة و تتحمر كويس



و نلبس الجوانتي بتاعنا و نحط العجين في القمع و نبدأ نزل القطع بتاعتنا في الزيت

(اهم حاجة ان الزيت يكون باااااارد)

على الاقل تقدري تحطي صباعك فيه

ده سر الصنعة
:)

 

و تحطي القطع بتاعتك طويلة او قصيرة او وسط

زي ماتحبي


أهم حاجة تسيبي مسافات معقولة بين القطع علشان نعمل حساب إن القطع هيتضاعف حجمها



و لما تاخد اللون الذهبي اللي احنا عارفينه نشيلها من الزيت و نطفي النار

و نحطها في مصفة لحد ما نشيل كل القطع

و بعد كده نحطها في الشربات

و نحطها في مصفة تانية علشان تصفي الشربات

و بعد كده نرصها في طبق التقديم بتاعنا



خدوا بالكم انا قلت نطفي النار



علشان الزيت يلحق يبرد شوي على ما اعمل اللي قلنا عليه



و بعد ما الزيت يكون برد شوية نعمل الليلة ديه تاني من الاول

و هكذا لحد ما العجين يخلص





و بالهنا و الشفا

:)
Categories:

6 comments:

كلمات من نور said...

تحية إلى ارواح الشهداء التي تحلق في سمائنا فرحة فخورة بنا

تحية إلى كل أهالي الشهداء الذين ارتفع صوتهم مزغردين فرحين بنصر مصر ولو بالتضحية بهم

تحية إلى مصررررررررررررر

نور الشام said...

السلام عليكم

مدونة مفيدة ومجهود مميز

يسلموا الأيادي

في انتظار زيارتك لمدونتنا

خالص تحياتنا

doaa wahdan said...

كويس جدا بس انا عندي سؤال مهم انا كل ماعمل بلح الشام بعد ماضع البيض ه الاولي تبدا العجينه تلزق في ايدي واقعد اقلب فيها لحد مابيض يتجانس مع العجينه بس برد بيتلزق ارجع اقول يمكن لما ازود البيض يمكن تكون حلو احط البيضة التانية وبره تلزق انا معرفاشالعيب ايه اريد حل ديه يكمن
عاشر مرة اعمله وارمية
اريد حل سريع لاني جوزي نفسة فيها

Mony said...

كلمات من نور

أعتذر جدااا عن عدم الرد
لسة شايفاه حالا و الله
لعلها بشرة خير بردك الطيب بعد حالة الاحباط اللي عايشينها الايام ديه

جزاك الله خيرا لمرورك الطيب و لصبرك
:)

Mony said...

نور الشام

جزاك الله خيرا
و اعتذر ايضا عن التأخير سنة كاملة
كما قلت لكلمات من النور الان فقط رأيت التعليقات على هذا الموضوع
مدونتك قيمة و معلوماتها كتير مفيدة
ياريت ماتتوقفيش و تستمري
:)

Mony said...

doaa wahdan

مش عارفة يا دعاء و الله بتبوظ منك ازاي
طيب انتي بترميها في اي مرحلة؟؟
اتأكدتى من كمية الزيت اللي
بتحطيها؟؟
انا بحط العجين على البيض في الكيتشن ماشين و اعملها
و اسيبها تتضرب 5 دقائق مثلا او اقل حاجة بسيطة انتي بتعمليها ازاي؟؟

طيب ممكن نتكلم على الشات بتاع المدونة و نعملها خطوة خطوة لو تحبي
قوليلي على الساعة و نتفق مع بعض باذن الله
و هتطلع من ايدك جميلة بإذن الله:)
في انتظارك