Wednesday, October 15, 2008

Posted by Mony on 4:46 PM 6 comments


عيش الصاج زي اللي عند شاورما ابو مازن


و عندنا في الصعيد بيسموه العيش المرحرح


معلش انا قرفتكم بالبوستات اللي ورا بعض دول


اصلهم مرتبطين ببعض


استحملوني بأه معلش



"المقادير"


2 كوب دقيق


3\4 كوب لبن دافئ


2 ملعقة كبيرة زبادي


ملعقة صغيرة خميرة فورية


ملعقة صغيرة سكر


نص ملعقة صغيرة ملح




" الطريقة"


احط الخميرة و السكر علي اللبن و اقلب لغاية ما تدوب تمام او اغطيهم و اسيبهم 10 دقائق لحد ما يخمر


و بعدين احط الدقيق و عليه الملح و عليه الزبادي و اللبن و اقلب لغاية ما توصل لعجينة طريه


و بعدين احط ملعقتين زيت علشان ما تلزقش


و اغطيها و اسيبها لغاية ما تخمر و يتضاعف حجمها


و بعدين اقطعها كور صغيرة و افردها بالنشابة علي رخامة مرشوشة دقيق

(لومعندكيش نشابة مش مشكلة اي ازازة مدورة تفي بالغرض)


لغاية ما تكون دايرة متوسطة الحجم


و علشان اسويها

لو عندك صاج في البيت


حطيه علي النار علي البوتاجاز من فوق


و حطي عليه العجين و لما يحمر اقلبي للوجه الاخر


انا بأه معنديش صاج


فبجيب الصينية التيفال و اقلبها علي وشها علي النار و استخدمها علي انها صاج
(طبعا علي العين الصغيرة في البوتاجاز)



و ماتخافوش الصينية مش هيجرالها اي حاجة


بالهنا و الشفا
Categories:

6 comments:

shaimaa said...

شكرا علي الوصفة
بس بجد الصينية مش بتتحروق و لا حاجة؟؟

و هل ممكن اعمل كمية و اشيلها في الفريزر و يعاد تسخينها عند الاحتياج و لا مش بينفع في النوع دة؟؟؟؟

mony said...

shaimaa

لا تقلقي يا جميل الصينية عندي زي الفل ولا اي حاجة فيها

وممكن طبعا تعملي الكمية اللي انت عايزاها و تشيلي في الفريزر بس يكون لسة سخن علشان لما تطلعيه من الفريزر و تسخنية يكون في نفس الحالة اللي دخل بيها

عائشة said...

يااااااااااااااااااااه زى ماون عطشان وشربت ههههههههههههه

بجد كنت بدور على الطريقة من زمان ونفسى فيها اوى بس انا بحب الحاجات الدسمة واتبسطت لما لاقيت طريقتك فيها لبن مش ماية عشان كمان تغذى العيال المسمومة دى هههههههههه

بس عايزة اعرف ايه لازمة الزبادى انا عارفة انها بتديله طراوة بس ممكن استغنى عن معلقتين الزبادى واحط بدالهم معلقتين قشطة ينفع ولا ابطل افتى واعملها بالزبادى وخلاص ههههههههههه

Mony said...

عائشة

أهلا أهلا بيكي
اشربي براحتك خااالص
:)

ماينفعش نحط القشطة بديل للزبادي ممكن لبن رايب انما القشطة ديه سكة تانية خاااالص

و الزبادي بتديها طراوة و طعم ناعم و جميل حتى لو شيلتيها في الفريزر
تطلعيها بس شوية تفك و ترجع تاني طرية كأنها طازة

Anonymous said...

شكرا ع الوصفة حبيبتى انا كنت فاكرة انى شيفة بس جنبك بقا ولا حاجة ربنا يكرمك

Mony said...

أهلا بيكي :)

يا فندم ده بعض ما عندكم
كلنا بنجعد نجرب في الحاجة مليون سنة لحد ما تظبط

نورتينا ;)