Wednesday, May 12, 2010

Posted by Mony on 3:05 PM 6 comments
سلام عليكم



انا بقالي كتييييير مش بطبخ

مش بطبخ حاجة بجد يعني ينفع انزلهالكم







و زوجي مقاطع اللحم علشان أسعاره..أنا كنت فاكره أنه هيرجع في كلامه أول أسبوع

بس سبحان الله صامد صمود فظييع



المهم ده معناه أن الثلاجة عندي ملياااااانة فراخ





أنا بحب الفراخ جداً

بس من كترها قرفت فعلا



و عندنا مافيش هاجة اسمها مانعملش يوم أكل من غير لحوم





المهم





نطت في راسي فكرة إني أعمل

أرزمعمر بالفراخ





دخلت و طلعت الفرخة من الفريز و سيبتها شوي تبدأ تفك



قبل ما تفك خالص قطعتها 10 قطع

علشان التقطيع و هي ماسكة نفسها أفضل من التقطيع و هي طرية

ممكن لحمها يتهري و هي فاكة و طرية





المهم قطعتها و هي شبه مجمدة

و تبلتها بملح فلفل في العظم و كل مكان





و رصيتها في قعر طبق بايركس





و جبت كوبين ارز و غسلتهم و بشرت عليهم بصلاية صغننة و تبلتها بالملح و الفلفل

و حطيت الرز على الفراخ في الطبق البايركس





و حطيت عليهم 2 كوب لبن دافيء





و دخلتهم الفرن



و لما الريحة طلعت و بدأ الوش ياخد لون وزعت على الوش ملعقتين كبار قشطة

غطيت الوش تماماً

بس متتأخروش في الخطوة ديه علشان الرز اللي على الوش ماينشفش



و سيبوا القشطة تاخد لون في الفرن مش تحت الشواية



و بس خلاص



الصينية طالعة تححححفة

شكل الوش ذهبي جميل





و الرز مفلفل

لا معجن و لا نص سوى

و الملح مظبوط



جربوها و قولولي



على فكرة ممكن بدل الفراخ نحط حمام


و ممكن نعمله باللحم الفليتو بس نتبله بملح و فلفل و بصل مبشور و خل
علشان الخل يسهل تسويته بسرعة

مش هو ده اللي كنت عايزة اكتبهلكم



بس اهه احسن من الانقطاع اللي مضايقني ده


إلى لقاء قريب إن شاء الله



6 comments:

Anonymous said...

وحشاني والله

كيفك يارب تكوني بالف خير

الاكلة جامدة

هبقى اجربها

تسلم ايدك

Anonymous said...

واحشتانى انتى فين بحبك قوى

Food Lover said...

فكرة حلوة وجديدة
بس الفراخ طلع طعمها ايه باللبن!!
أنا ماجربتش الموضوع ده قبل كده
يعني الفراخ استوت في اللبن ازاي وكان نتيجتها ايه؟

Mony said...

نـــوارة

و انت كمان و حشاني يا نوارة يا قمراية


عملتي الأكلة و لا لسة

مستنية رأيك يا جميل

Mony said...

Anonymous:



:)


طيب قوليلي انت مين علشان اقولك و انا كمان

Mony said...

Food Lover:

لا تقلقي يا جميل الفراخ فعلا بيطلع طعنها حلو اوي


و الفراخ بتستوي و الرز و كله بيبقى تمام


جربي في طاجن صغنن و حطي فيه ربع فرخة و قوليلي رأيك