Enjoy cooking
Browse through over
650,000 tasty recipes.
Home » » قرع عسلي بالبشاميل

قرع عسلي بالبشاميل

Written By Mony on Saturday, December 5, 2009 | 9:07 AM


السلام عليكم و رحمة الله و بركاته







كل سنة و انت طيبين و بخير دايماً يا رب






طبعا انا عارفة ان في ناس هتحدفني بالطوب علشان الغيبة الطويييييييلة ديه


بس الآنسة لينة مش مدياني أي فرصة اختلي بها بنفسي










و من منبري هذا اقول لكل واحدة هتتجنن علي الجواز اعقلي يا حبيبتي و استمتعي بدورك كإبنة


طلباتك مجابة و اللي نفسك فيه يجي لحد عنك بس انت تؤمري


تنامي وقت مانت عايزة و تقومي وقت ما تحبي


و أول ما تحسي بشوية تعب صغننين بابا و ماما مايجيلهمش نوم الا لما ترتاحي و ترجعي تبتسمي من تاني










علشان هيجيلك يوم اللأوبشنز ديه كلها هتختفي و تكون غير متاحة بتاتاً


و تبقي قايدة صوابعك العشرين شمع و برضه مش عاجب


و يقولك زوجك المصون


"عمرك ماهتوردي علي جنة"


(يعني عمرك ما هتعتبيها)
مهما عملتي


لا يتحسبلك تربية الولاد و لا المزاكرة و شد الشعر ولا السهر طول الليل مع الانسة خفاش اللي لسة مولودة


و طبعا من الفجر لازم تتنطري من السرير تعملي سندويتشات للأستاذ اللي بيروح المدرسة


و بعده بساعة تحضري حاجات الاستاذ الكبير برضه ..اشمعني يعني


(دانت الاول يا حبوبي طبعاً)


و ساعة كمان تصحالي القردة اللي اسمها روداينا و علي حظي العسر جت الفلونزا الخنازير مش عارفة اطرقها لأي حضانة


باباها خايف عليها


عايزة تاكل و تتشطف و تلاقي حد تكلمه و تلعب معاه






و لسة الشغل و مواله














انا فين بأه






تهت و الحمد لله










يا ريت اللي يلاقيني يبقي يبلغني ضروري


علشان انا وحشتني اوييي














معلش بأه المقدمة الطويلة ديه


جات فيكم بأه










ايه رأيكم انهردة نعمل القرع العسلي






انا كنت قلت عليه من كام شهر كدة


فاكرين


؟؟






نبدأ بأه علشان رغينا كتير






الأول أحب أقولكم إن القرع العسلي الناس اللي شفتهم ما اتفقوش علي حبهم ليه


يإما بيحبوه جداااا أو بيكرهوه موووووت






مش عارفة ليه






بس أهه اللي حصل






بس انا عن نفسي


بمووووووووت فيه










المقادير


1 كيلو قرع عسلي


نصف كيلو سكر


فانيليا


لبن


3 ملاعق كبيرة سمن


(يكون بلدي طبعاً)


3 ملاعق كبيرة دقيق


كوب لبن


مكسرات محمصة


جوز هند مبشور


قرفة مطحونة







الطريقة






الأول بنقطع القرع العسلي شرائح كده










و بعدين نقطعه مكعبات كده







و نحطه في حلة على النار و عليه السكر


و نهدي النار عليهم خااالص بدون أي اضافات


و نغطي الحلة كويس







هنلاقي بعد كده القرع نزل ماية و السكر ذاب فيه


و كمان القرع هيكون استوي


بس مانسيبهوش لحد ما يتهري اوي


نحاول نحافظ عليه مكعبات علي اد ما نقدر






و نحطه في مصفي علشان نفصل العصير اللي نزل عن القرع







و بعدين نعمل الباشاميل






نحط السمن علي النار و لما يسخن نحط الدقيق و نقلب لحد ما يبدأ ياخد لون ذهبي فاااتح و بعدين نحط 2 كوب من العصير اللي نزل من القرع و نقلب بسرعة كويس علشان ما يكلكعش و بعدين نحط كوب اللبن و عليه الفانيليا و نفضل نقلب لحد ما يغلظ قوامه و يكون زي قوام الباشاميل






و كده الباشاميل خلص








طيب اللي عاملة رجيم و مش عايزة سمن و دقيق محمر و الحاجات ديه تعمل ايه


؟؟






مافيش مشكلة


حطي كوبايتين العصير علي كوب اللبن بالفانيليا علي الدقيق في الخلاط


و اضرب يا معلم لحد التجانس التام






و بعدين حطيهم علي النار لحد ما يغلظ القوام و كده نكون برضه عملنا بشاميل






و مافيش حد احسن من حد










ندخل بأه علي صينية القرع شخصياً






نجيب الصينية


(تكون صينية وسط)






و ندهنها سمن او زيت زي ما تحبو


بس انا بعمل كل حاجة بالسمن البلدي






و بعدين نجيب البقسماط اللي بنعمل بيه البفتيك و نبطن بيه الصينية


(يعني نرش رشة في الصينية علي السمن او الزيت لحد ما يغطي كل اطراف الصينية و قعرها كمان)






و نحط نصف القرع العسلي اللي عملناه من غير ما نهرس بأه و لا حاجة


(في ناس بتحب القرع يكون مهروس او مضروب )






و نحط الكسرات المحمصة و جوز الهند المبشور
(اللي بيعملوا رجيم بأه المكسرات مافيش بتاتاً)

و نحط الطبقة التانية باقي القرع العسلي كله


و نحط علي الوش الباشاميل اللي عملناه
و في الاخر بأه علي الوش نرش رشة قرفة تدي لون و ريحة جنااان





علي فكرة في ناس بتحط نصف كمية الباشاميل تحت خالص قبل القرع في الصينية و النصف الباقي علي الوش


(ممكن تعملي كده عادي)






بس اللي بقوله ده هو اللي انا بعمله بالضبط و انتم ليكو حرية الاختيار مين فوق و مين تحت











بس كده خلاص خلصنا






نحط الصينية في الفرن بأه لحد ما جنابها و وشها يحمر


علي درجة حرارة متوسطة







و تطلع بأه و بالهنا و الشفا
SHARE

About Mony

16 comments :

اقصوصه said...

مرسي جدا علىالطريقه :)

صبرني يارب said...

موووووووووني يا حياتي وحشااااااااااني

ازيك يا جميل وازي البيبى الصغيره

معلش انا عارفه حالة عدم التوازن دي اصبري شويه وكل شيء هايتظبط كل حاجه

والقرع بتاعك جميل يا بطه انا باعمله كده برضه
تسلم اديكى يا قمر

وبرضه عندي ما حدش بياكله اوي بس لما بيجيلى قرع باعمله امال اوديه فين يعنى

هههههههههههههههههههههه

نورتي البلوج يا جميل

سواحة said...

تسلم ايدك
:-)

شكرا و نعلمك ان مدام السلامونى ظهرت فى مدونتها ممكن تلحقيها هناك :-) قبل ما تاكل هى و عيلتها الكريمة القرع العسل و ينسوا العالم بالى فيه

Mony said...

اقصوصه

لا ميرسي علي واجب يا فندم


نورتينا
:)

Mony said...

صبرني يارب

و انت كمان وحشاني مووووووت يا صبصب
و البلوجر كله واحشني


حالة عدم التوازن طولت اوي المرة ديه
ربنا يعديها علي خير


لما يجيلك قرع احدفيلي علي طول
انا عندي هنا كلهم بيحبوه الحمد لله


علي فكرة القرع ده صحي و مفيد جدا جدا جدا

في حالات مرضية مستعصية بينصحوهم بالقرع بكل اشكاله
حلو و حادق و شربة
كل حاجة


يعني اكليهولهم بالعافية

نورتيني يا جميل

Mony said...

Wanda

اتفضلي يا فندم كلي كل اللي نفسك فيه

انت تؤمر يا جميل

و مش عزومة مراكبية
:)

موناليزا said...

"الجنة تحت اقدام الامهات"
:)
يعنى مش بالساهل وكله وثوابه
ربنا يعينك ويخليهوملك ياحبيبتى
--
الوصفة حلوة وبسيطة
تسم ايدك

لجين أبو الدهب said...

وحشتنى اكلاتك موت
والله على طول كنت فاكراكى باكلاتك
واكلة النهاردة جميلة
هحاول اجربها ان شاء الله
تسلم ايدك يامونى

أميرة said...

ازي النونو ومامة النونو و اخوات النونو و حبايب النونو كلهم:)

ان شاء الله تكونوا جميعا بخير يارب

Rosa said...

وحشتيني قويييييييييييييييي يا موني ربنا يعينك يا حبيبتي دا أنا واحدة و بشد في شعري

تسلم ايدك و أوعدك هجرب أصل جوزي بيحب القرع جدا و دايما يحكي و يتحاكى عن صينية جدته و أنا ما بعرفش اعمله

هجرب و أقول لك و ربنا يستر

Mony said...

موناليزا

ربنا يكرمك و يعزك يا موناليزا


اعملي الوصفة بأه و قوليلي رأيك

Mony said...

لجين أبو الدهب

ربنا يباركلك يا لوجي
انت بس اللي نفسك حلوة

عايزين نعرف النتايج اخبارها ايه

Mony said...

أليس في بلاد العجائب

ربنا يكرمك يا اليس
علي سؤالك الدائم علي و علينا كلنا


الحمد لله

تمام
احنا بخير

Mony said...

Om HAGAR


و انت كمان وحشاني يا جميل

يالا اعمليله الصينية و نسيه طعم بتاع جدته ده خااالص

:)

Anonymous said...

انااسمى ام صلاح ونفسىجدااااا اشترك معاكم وكمان بحب جميع اكلاتكم و بقوم بتنفيزاها وكان نفسىيبقى لى اميل اتكلم فيه مع حبيبة قلبى مدام سلامونى واقول لكى تسلم الايدى الف مره ويارب يوصلك كلامى

Mony said...

Anonymous



اهلا اهلا أم صلاح
:)


نورتيني و نورتي مدونتى المتواضعة
قوليلي جربتي ايه بأه و ايه ظبط و ايه نص نص




انا مونى(مدام سلامونى)


و كلامك الجميل ده رفع من روحي المعنوية كتييير كتييير

ربنا يكرمك و يباركلك