Pages

Loading...

Sunday, May 24, 2009

شوربة فواكة البحر + أرز بفواكه البحر

السلام عليكم و رحمة الله و بركاته



عملت من يومين اكلة

كانت روووعة

تامر و ماما و اخواتي اكلوا منها و عجبتهم جدا

الحمد لله رب العالمين

وما توفيقي الا بالله رب العالمين



عملت الجمبري اللي بالخلطة اللي قلتلكم عليه قبل كده
بس هنا حطيته في طبق
كان شكله كده احسن
و اهه تغيير


اما الاصناف التانية فكنت اول مرة اعملها في حياتي

كنت احب اكلهم بره انما ما اجازفش و اعملهم في البيت



عملت شوربة فواكه البحر

كنت بخاف اعملها علشان بخاف تطلع زفرة
اللي فوق ديه لونها احمر علشان فيها عصير طماطم
انما اللي اكلتها بره سواء في البرج او في عروسة البحر ده كان شكلها

و ديه اللي انا عملتها
ده شكلها تاني يوم
معرفتش اصورها اول يوم من الزحمة


و عملت طبعا ارز بفواكه البحر



و عملت جندوفلي بالخلطة

ده نوع من المقبلات

كنت اكلته في محل عروسة البحر في اسكندرية

و كنت بروح مخصوص هناك اطلب ده بالذات






المرة ديه هقول علي شربة فواكه البحرو في الاخر اقول علي طريقة الرز بفواكه البحر علشان هم مرتبطين ببعض



و المرة الجاية ان شاء الله انزل طريقة الجندوفلي اللي بالخلطة





بسم الله نبدأ



*شوربة فواكه البحر*



الكيمة اللي هقولكم عليها اكل منها 4 اشخاص بالغين و 3 اطفال

و اتبقي منها لتاني يوم كمية تكفي غذاء

طبعا كان في غيرها صينية الجمبري

و رز بفواكه البحر

بس بصراحة ديه اللي كلنا منها اكتر حاجة





1/4 كيلو سبيط(كاليماري)
(تقولي للسماك يتنظفه و يقطعه للشربه)
(او تقطعيه انت بس مكعبات كبيرة علشان ماتعمليش عملتي و بعدين تدوري عليه بمكرسكوب في الشربة بعد كده)



1/4 كيلو سمك فيليه
(لازم يكون سمك جامد علشان مايتهيريش في الشربة)
(انا جبت قشربياض)
(و قطعته مكعبات كبيرة)



(السبيط و الجمبري لان دول اكثر حاجة زفرة انا حطيتهم في ماية فيها شوية دقيق و ملح و ليمونتين كبار لمدة عشر دقائق مش اكتر)





1/4 كيلو كابوريا
(عملو 2 كبار و واحدة صغيرة)
(حطيتها في شوية ماية علشان لو في حاجة متعلقة بيها او فيها رمل و انا مش واخدة بالي)
(كان ريحتها بحر .. جمييلة فكرتني بالمصيف)



1/4 جمبري وسط مقشر
(انا كنت ناوية اجيب الصغير بس مالقيتش غير ده)
(بس حمدت ربنااني جبت ده لان الجمبري المقشر بيصغر خالص)

(ده برضه حطيته في طبق في ماية بس و سيبته شوي علشان لو في قشر من بواقي التنظيف او أي شوائب اخري تطفوا علي وش الماية و كده نقدر نشيلها بسهولة)



1/4 كيلو جندوفلي
(بلح البحر)

هو بيتباع بالشبكة هنا و الشبكة تقريبا كيلو فأنا عملت ربعها و الباقي تبلته كطبق جانبي
(مقبلات)

(الجزء اللي هنعمل بيه الشربة بس نحطه في طبق فيه ماية من الحنفية و نسيبه ساعتين علشان يفتح لوحده)







و نعمل الخلطة ديه و نركنها علي جنب

نصف حزمة كرفس+2جزر وسط مبشور+3 او 5 فصوص ثوم(اصل انا بحب الوتر)+ملح+فلفل+كمون+2 طماطم كبير+2 قرن فلفل اخضر(رومي)لو عايزه حامي انت حرة



الخلطة ديه نحطها في الكبة كله يتفرم مع بعضه
بس مش يبقي عصير لا هيكون مقطع ناعم و متجانس مع بعضه



نركن الخطة ديه بأه لحد ما اقولكم عليها

اتفقنا





نبدأ بأه في الطريقة

نجيب بصلة وسط و نبشرها و نحطها في حلة علي النار مع شوية زيت و عليها شوية ملح و فلفل و كمون

يادوب البصلة تبدأ تذبل نحط فواكه البحر الاجمد فالاقل و هكذا



يعني نحط السبيط المقطع و تقلب 3 دقائق

و نحط الكابوريا و الارجل بتاعتها و نقلب برضه 3 دقائق
(الكابوريا تكون مقسومة بالسكين نصفين بالطول و مقطعة الارجل)

و بعدين الأقل تسوية اللي هو الجندوفلي و برضه 3 دقائق و نقلب

و الجمبري المقشر برررضه 3 دقائق

و اخيراً السمك

و نقلب كويس وبسرررعة
نحط الخلطة بتاعتنا اللي عملناها في الاول و نشيل منها ملعقتين كبار علي جنب

و نقلب الخلطة كويس مع فواكة البحر علشان تتجانس و تتغلغل كويس

و بعدين نزود الماية و نسيبها تغلي دقيقتين علشان نتاكد من تجانس الحاجة مع بعض



(كل ده علي نار عالية عااادي جدا)



و نحط ملعقتين الخلطة اللي كنا شايلينهم علي جنب و نقلب كويس و ندوق علشان نشوف لو محتاجة ملح تاني ولا حاجة

و بمجرد ما تغلي تاني نطفي عليها و بالهنا و الشفا



انا محطيتش دقيق لان الدنيا حر و الدقيق كان هيمسكها شوي و تفضل سخنة فترة طويلة

فطنشت موضوع الدقيق ده تماما و مافرقش في الطعم خالص



و مارضيتش اعملها بالكريمة لاني كنت عايزة ادوقه كده في الاول



فاللي عايز يحط دقيق اهلا وسهلا مافيش مشكلة





.....



طيب لو عايزة اعمل ارز بفواكه البحر



اشيل شوية من البحريات اللي استخدمناها في الشوربة

بس طبعا مخلية

يعني السبيط و الجمبري ماشي

و نخلِي الكابوريا و الجندوفلي من الاصداف بتاعتهم و نحطه معاهم





و في حلة نبشر بصلة صغيرة و عليها ملح و فلفل و كمون و نقلب لحد ما لون البصل يصل للون الذهبي الغامق

و نحط السبيط و نقلب 3 دقائق

و بعدين الجندوفلي و 3 دقائق تقليب

و بعد كده الجمبري و3 دقائق تقليب و اخيرا الكابوريا المخلية

خلينا الكابوريا اخر حاجة علشان بقت زي لحم السمك طرية

فاحنا مش عايزين نهريها



ماحطناش سمك ليييه؟

علشان السمك بيستوي بسرعة جدا و كده هيتهري في الارز اثناء التقليب



خلصنا تقليب خلاص

كده الحاجة ديه استوت خلاص..







لو عايزة فواكه البحر تكون مع الرز متقلبين مع بعض

يبقي حطي علي اللي عملناه ده نصف ملعقة كبيرة قرفة و قلبي كويس و بعدين زودي الماية بتاعة الرز

لو هنعمل مثلا 3 كوب ارز يبقي هنحتاج 3 كوب ماية

و لما الماية تغلي وطي النار خااالص لحد تمام تسوية الارز



بس انا بأ مش بحب كده

بحب الشكل بتاع المطاعم اللي بيجبولنا الرز و فوقه فواكه البحر



فبخلي اللي عملته فوق ده علي جنب

(فواكه البحر المخلية المتعصجة)



و في حلة تانية احط بصلة وسط مبشورة و عليها ملح و فلفل و كمون و اقلب لحد ما لون البصل يغمق خالص و يكون لونه بني

و احط عليه نصف ملعقة قرفة و اقلب كويس

وبعدين احط الرز اللي هنعمله و يكون مغسول طبعا

و اقلب كويس بحيث يتجانس الارز و البصل

و بعدين ازود مقدار الماية بتاعك العادي

و لما يستوي الرز



اجيب سلطانية غويطة واحط من تحت فواكه البحر اللي احنا راكنينها و اغرفها فوقها الارز

و بعدين اقلب الرز ده في طبق تاني

و هيطلع لنا الشكل اللي بيجيلنا في المطعم
ممكن نعمل الطريقتين مع بعض
بحيث يكون جوة الرز فواكه بحر
و فوقه كمان
:)



و بألف هنا و شفا



لولا اني لسة عاملة الاكلة ديه انا كان زاني عملتها تاني

15 comments:

ঔღঔ نـــوارة ঔღঔ said...

اوووووووووووول

تعليق

ان شاء الله

هيييييييييه

ঔღঔ نـــوارة ঔღঔ said...

انا مليش بالاكلات البحرية دي كلها

مش باكل الا انواع معينة لاني للاسف بقرف من الاسماك نوعا ما

تسلم ايدك ياقمرررررر

تحياتي ليكي

mony said...

ঔ نـــوارة ঔ

شرفتيني يا قمر بأول تعليق
:)


انا كمان ماليش في الأكلات البحرية اوي

مش اي حاجة اكلها يعني

بالذات السمك
بقرف منه جداااااااا

يمكن علشان الزفارة مش عارفة



الله يسلمك يا جميل

نكهة مغربية said...

انتو الاتنين ملكمش في الاكلات البحرية يا بختي بالاكل ده كلو لية لوحدي أنا بموت في السمك و الشوربة
تسلمي يا قمر

mony said...

نكهة مغربية

هههههههه
اتفضلي يا جميل كله
بالهنا و الشفا


انا ماليش في الاسماك

ممكن اكلها بره
انما في بيت
لاااااااء


ممكن اكل باقي البحريات بس بشروط
اكون عارفه اللي بيعملها
و ضامنه نظافته
و عارفه نفسه في الاكل عامل ازاي


ساعتها بس ممكن اكل بحريات
:)

أم أحمد المصرية said...

لا يا موني حرام عليك انا ريقي جري و شميت ريحة الكابوريا الجميلة و انا بقرأ الاكلة اللي شكلها روعة دي انا بعمل الارز بس الشوربة هي اللي شكلها خرافة اكيد حجربها و ادعي لي تنجح
بالامانة مدونتك دي لقطة انا سعيدة جدا اني اتعرفت عليها و عليك يا قمر ربنا يعطيك الصحة يارب

صبرني يارب said...

يخرب عقلك جوعتينى

انا كنت فى السوق الصبح

وكنت هاشتري حاجات عشان اعمل شوربه

وبعدين لقيت الكابوريا وحشه

قلت بلاها النهارده


تسلم اديكى يا موني انا باعملها كده فعلا بالظبط

بس انا باحط دقيق جايز انتى شوفتيها عندي

ومش بتطلع زفره ولا حاجه بالعكس والله دى الى فى المحلات الى بتبقى زفره اوي


والرز برضه جميل تسلم اديكى

مستنيه الجندوفلي ولو انه مش منتشر هنا وانا مش ميته فى هواه
بس ايحاجه من البحر انا معاها على طول

دعاء said...

انتي بقى بتكلمى واحدة دمياطية يعنى ليا فى السمك والجمبرى والذى منه
ومن موقفى هذا اعلن أن اكلاتك حازت على رضانا

تسلم ايديكى بجد

mony said...

أم أحمد المصرية

ربنا يكرمك يا جميلة
فعلا الكابوريا كان ريحتها تحححفة
ريحتها كأنها لسة خارجة من البحر مباشرة

ولا تقلقي يا جميل
انا برضه كنت اول مرة في حياتي اعملها من الاول للأخر لوحدي
مشيت علي الخطوات بالضبط و طلعت جميلة الحمد لله


انا اللي سعيدة يا قمر انك بتشرفيني

mony said...

صبرني يارب


كنت جبتي يا صبصب و عملتيها و بلاها كابوريا يا ستي
مع ان الكابوريا تحفة


علي فكرة انا ماقلتش ان الدقيق بزفرها
خالص

انا بس قلت كان طعمها حلو كده و ماكنتش محتاجة اي اضافات اخري
فطنشت الدقيق

مع ان كتير بيقولوا ان الدقيق ده هو اللي بيشيل الزفارة

بس الحمد لله ماطلعتش معايا زفرة خالص

انا بس ماحطيتش دقيق علشان قلت الدنيا حر بأه و الدقيق هيخليها تحتفظ بحرارتها مده اطول

بس كده و الله


الرز فعلا حلو
انت عارفة بيجبولنا في البرج سلطانية صغننة خالص بتاعة الرز باللبن ديه
و يقولولنا ان شوية الرز دول ب15 جنيه

جربيه هيعجبك


و الجندوفلي فعلا فعلا اللي هيعجببك


انا اصلا كنت بقرف من الصدفيات كلها
كنت فاكراه بأه زي ام الخلول
مليان رمل و بيتاكل نيئ

بس لما دقته اول مرة في عروس البحر اذبهليت
و كل شوي اقول لتامر ماتيجي نروح اسكندريه صد رد
ناكل و نرجع


بالهنا و الشفا
ياجميل و مستنية النتايج

و صور الايس كريم علشان اعمل بيها تحديث في موضوع الايس كريم و اقول نتيجة تجربتك
علشان الناس تستفاد

mony said...

دعاء

يا سلام يا سلام


ده شرف عظيم انا ما استحقهوش ابدا و الله

ربنا يكرمك يا فندم

ELMASRYA - SHAMLOOLA HANEM said...

إنتي جميلة قوي يا موني

يتتعبي علشان تعلمينا أصناف راقية وبنلاقيها في المطاعم وندفع كتير وأكيد مش بنستمتع زي لو عملناها في بيوتنا

ربنا يديكي الصحة وتعلمينا كمان وكمان

أنا عايزة أروق بقى للأصناف دي لأني مرة كسلت نخرج من البيت طلبت من مطعم قدورة يجيبلنا الأصناف دي

ويوميها دفعنا مايقرب من 400 جنيه وكانت كميات قليلة رغم جمالها وكل حاجه بس ماشبعناش

عايزة أنفذ اللي قلتيه ده بقى على رواقه وافاجيء الأولاد أكيد هيفرحوا قوي بإذن الله

بحبك قوي

mony said...

ELMASRYA - SHAMLOOLA HANEM

انتي اللي اجمل يا قمر

مش تعب ولا حاجة و الله

بس انا دايما كانت بتواجهني مشكلة ان امامي وصفة بالطريقة و المقادير ماكانتش بتظبط معاي

علشان بكون محتاجة تفصيل ممل
او اشوفها عملي


فعلشان كده تلاقيني عاملة من الحبة قبة في البوستات

يعني مثلا شربة الفواكه ديه ماخدتش نصف ساعة
بس من الشرح الطويل الناس تفتكر انها بتاخد وقت

بس الحقيقة اني بعوض عقدتي في طلب التفصيل الممل

علشان اتفادي اي اخطاء ممكن تحصل





طيب لو انت اسكندرنية جربي عروسة البحر
اللي في بحري
جنب جامع المرسي ابو العباس
هتقولي لقدورة يقفل من جمال اكل عروسة البحر

انا اكلت في الاتنين
بس قدورة معجبنيش

في كمان واحد في اسكندرية بس جوة مش علي شارع الكرنيش
ده بأه اسعارة للغلابة اللي زي حلاتنا


تروحي الأزاريطه و تسألي المحلات الموجوده هناك عن واحد إسمه ( حوده جوندر ) و ده مشهور للقله من للأسكندرانيه بس
المهم هتلاقيه واخد ممر طويل لحسابه
الممر ده هيكون بجوار جامع و هتلاقى كل اللى فى نفسك من مأكولات بحريه موجوده عنده ... الراجل بيشتغل فى كميات و لما يبيع لك بيكون بدون ميزان ( بالبركه يعنى ) و عنده عمال يسدو عين الشمس ... المهم انت تنقى و تطلب وعندك خيارين إما تاخدي الأكل تك أواى او تدخل المطعم و الأفضل تاخديه تيك اواي و زى ما بقولك حتدفعي فكه ... و ممكن تعملي حاجه إسمها وجبات .. يعنى لعدد خمس أشخاص تعملي وجبات ل 5 أشخاص . و الوجبه تحددهيا انت ... يعنى سمكه مشويه على كبشه جمبرى على2 كفته سمك على رز صياديه و بطاطس و السلاطات و العيش و كله ملفوف فى الفويل لفه شيك .. تدخل فى حوالى 25 جنيه للوجبه
و ابقي بعد كده خدي رقمه و يجيبلكك اللي نفسك فيه


هتاكلي وجبه فل
و تدفعي قليل

و لما تروحي ابقي ادعيلي بأه
و كولي لي وجبه معاك
بس بلاش تحطيلي سمك
:)

Anonymous said...

انا عملت الشوربة و طلعت جميلة سلم ايديكى

Mony said...

Anonymous

الرك على الي عمل
:))
بألف هنا و شفا
:))