Pages

Loading...

Sunday, April 12, 2009

رز باللبن

الرز باللبن





عرفت طريقة جديدة للرز باللبن مختلفة شوي عن اللي كنت عارفاه من ماما



عرفتها من اصحاب محلات الاصيل شخصيا

للي مايعرفش محلات الاصيل

دول ناس بتوع كباب و كشري و حلواني و كله يعني

موجودين في مدينة نصر و المهندسين و وسط البلد



و الغريب ان حاجتهم كلها ممتازة

سواء كانت حوادق او حلويات

بس الرز باللبن بتاعهم غيييير



المهم ندخل علي المقادير و الطريقة علي طول بأه





كوب ارز
(طبعا ارز مصري)
(متنقي و مغسول)

5 كوب مايه

2 كيلو لبن

فانيليا

سكر حسب الرغبة





الطريقة بأه



بنسوي الرز في الماية اللي قلنا عليها

بس نهدي النار و نغطي الحلة كويس علشان احنا عايزين الرز يستوي براحته خااااالص

لحد ما الماية بتاعته تنشف و الرز يكون معجن خاااالص



خلاص كده الرز مافيهوش ماية

نحط سكر بتاعنا و نقلب كويس لحد ما السكر يسيح

و بعدين نزود اللبن حبه حبه

نزود و نقلب لغاية ما يوصل للقوام المطلوب
(ممكن مايحتجش ال2 كيلو كلهم)

لو بتستخدمي اللبن المعلب يبقي حطي شوية قشطة مع اللبن حجم كوب زبادي كبير كده

علشان يدي طعم حلو

 
و نسيبه لما يغلي علشان نتأكد ان هو ده القوام بتاعنا

بس اول ما يغلي حطي الفانيليا

 
في ناس هتقوللي احنا ليه ماحطناش نشا



اقول علشان احنا لما غلينا الرز و قطعنا نفسه استخلصنا النشا بتاعه فهو ده اللي هنستخدمه





كده خلاص نغرف بأه في السلطنيات بتاعة الرز باللبن

و نرش علي الوش قرفة و جوز هند و زبيب و مكسرات مجروشة



و بألف هنا و شفا





علي فكرة

انا قاعدة باكل منه دلؤتي و انا بكتبلكم





17 comments:

ELMASRYA - MRS WRITER said...

يا صباح الحاجات الحلوة

إيه الطريقة الروعة دي يا موني؟

أنا هجربها النهارده بإذن الله

بجد وصفاتك للأكلات تححححححححححححفه

في انتظار المزيد

خالص مودتي

mony said...

ELMASRYA - MRS WRITER

ربنا يكرمك يا جميل
خلاص مستنية النتيجة بأه


نورتيني يا قمر

kochia said...

حلو
انا بعمله حلو بس مش بالطريقة دي
بنقع الرز كتير وبعدين بغليه في اللبن وازود شوية مية لحد برده ما يتقطع قلفبه بس بحط شوية نشا في الاخر وبيطلع حلو اوي
بس هجرب الطريقة دي

تحياتي

بنت مصر said...

انا فعلا بعمله كده بس مكنتش بسويه لدرجة كبيرة اوي وكمان كنت لازم احط نشا علشان يمسك جامد

بس حعمل بأه ان شاء الله المرة الجاية زي ما قلتي بالظبط

تسلم الأيادي يا قمرة

واحــ الفكر و القلم ــة said...

تسلم ايدك يا مونى
انا كنت بعملها كده بالضبط مع ملاحظة انى كنت بضيف معلقة او اتنين نشا عشان يمسك زى المهلبية

بس جربت طريقة تانية ولقيتها احلى كتير .. انك متحطيش مايه خالص وتسوى الرز فى لبن من الاول
مع اضافة فانيلياو ربع معلقة قرفة وجوز هند مبشور ومعلقتين نشا برضه مدوبين فى مايه

طعم الرز بيبقى شارب لبن وتحفة جدااااا احلى من الطريقة الاولانية


وممكن تغرفيه فى طباق
او تحطيه فى صنية وتدخليه الفرن يا خد وش بيبقى مقرمش وطعم و لو ناوية تعمليه كده يبقى تحطى معلقة سمنة بلدى او اتنين حسب المقدار عندك وهو لسه عالنار قبل ما يخلص


خالص ودى
سالى

لجين أبو الدهب said...

يممممم

طب هاتى معبقة ادوق

بقى لى فترة ما كلتش رز بلبن فعلا ..

هاجيب لبن النهاردة اعمله ان شاء الله ..

جزاكِ الله خير يااجدع شيف ..

دمتِ بخير ..

ستيته حسب الله الحمش said...

والله فعلا تسلم ايدك
عمري ما عملته بالطريقة دي
ها اعمله وادعي لك يا مثقفانا بالقوي يا موني
تحياتي

صبرني يارب said...

ايوووووه تمام انا باعمله كده على فكره

بس انا توصلت للموضوع ده لوحدي


ماما كانت بتنقعه فى اللبن وبعدين تحطه على النار ونفضل نقلب بقى وموال

بعدين انا قلت يعنى لو سويناه الاول فى مايه هايحصل ايه بدل وجع القلب ده

وجربت وطلع احلى بكتير

بس انا بقى باحب ازود الحليب شويه واحط معلقة نشا
مش عارفه بيبقى اطعم كده

تسلم اديكى يا بطه

mony said...

kochia


اكيد لازم يطلع منك حلو يا جميل
انك لمتمكن
:)

جربي تستخلصي النشا بتاع الرز بدل ما يضيع في الماية


لو بتحبي الرز باللبن خفيف
يعني مش ماسك اوي
يبقي ماتزوديش نشا

mony said...

بنت مصر


انا برضه ماكنتش بسويه جامد
بس كنت بستغرب من بتاع بره ان الرز بتاعه يكاد يكون مش باين

و اكتشفت بعد كده الطريقة


بس لو انت بتحبي قوامه جامد اوي زي مابتقولي
يبقي لازم تحطي نشا برضه في طريقتنا ديه في الأخر

mony said...

واحــ الفكر و القلم ــة


طريقتك التانية جميلة اوي
انا كنت بعمل كده في الاول

بس كده الرز هياخد وقت طويل في التسوية لو لقيتي حل لتسويى الرز اسرع و بطريقتك ديه قوليلي يا ريت


نورتيني يا سالي

mony said...

لجين أبو الدهب


ربنا يكرمك يا لوجي


بس عايزة افكرك لو بتحبيه ماسك اوي يبقي حطي نشا في الاخر
(ملعقة كبيرة او ملعقتين حسب الكمية مذابة في اقل من ربع كوب ماء بارد و تحطيه بعد ما يغلي الرز باللبن)

mony said...

ستيته حسب الله الحمش

ربنا يكرمك يا ستوتة
يا حبيبة قلبي


ثقافة ايه بس يا فندم
ماتحرجيناش امال

mony said...

صبرني يارب


ده بأه اسمه توارد افكار يا جميل

و طبعا لما يكون في لبن كتير لازم طعمه يكون احلي

حاجات جوايا said...

واحــ الفكر و القلم ــة


طريقتك التانية جميلة اوي
انا كنت بعمل كده في الاول

بس كده الرز هياخد وقت طويل في التسوية لو لقيتي حل لتسويى الرز اسرع و بطريقتك ديه قوليلي يا ريت
==================================


مش بياخد وقت ولا حاجة والله
الفرق بسيط يعنى

ممكن تنقعى الرز فى مايه قبلها عشان يستوى بسرعة من غير سلق

لكن انا بغسله واصفيه واحطه فى اللبن على طول يدوب يغلى وهدى النار بقى عالاخر وسيبيه يعيش مع نفسه وكل شوية قلبى عشان ميلزقش


خالص ودى
سالى

mony said...

حاجات جوايا

طبعا احسن كتييير اني اعمله في اللبن صافي

علشان الغذا
و علشان الرز يشرب لبن علي اد ما يقدر

Om HAGAR said...

عملته يا موني امبارح بس أنا ماهريتش الرز قوي سيبته يكمل سوا في اللبن علشان يشرب منه و بالتالي بما انه ماستواش قوي احتجت أزود ملعقة نشا مذوبة في شوية ماء في الآخر و طلع تحفة تسلم ايديكي يا جميل