Wednesday, October 29, 2008

Posted by Mony on 5:21 AM 8 comments
معلش سامحوني علي التقصير
.
بس مشغولة اوي والله اليومين دول
.
انهارده هنعمل لقمة القاضي زي اللي بناكلها علي البلاج و لا في النادي
.


.
نبدأ بأه
.
"المقادير"
.
2 كوب دقيق
.
ملعقة صغيرة مليانة خميرة فورية
.
ملعقة صغيرة مليانة سكر
.
ملعقة صغيرة مليانه نشا
(علشان تكون ناشفة من برة و طرية من جوه)
.
رشة ملح
.
ثلاثة ارباع او كوب ماء دافئ
(علي حسب نوع الدقيق)
.
*****
.
الكمية ديه بتعمل طبقين
(اللي بنقدم فيهم الجاتوه)
.
طبعا اللي عايز يزود المقدار شوي يبقي يراعي باقي المقادير
.
"الطريقة"
.
نحط كل المكونات الناشفة كلها مع بعض
و تخلطهم كويس مع بعض
.
و بعدين نحط الماية
نحط تلات ارباع الكوباية
و نقلب و لو محتاج ماية تاني نحط لغاية ماتخلص الكوباية
عايزين نوصل لقوام عجين شبه سائل
لما نمسكه يكون عامل زي اللبان الملزق
.
و نغطي العجين بفوطة و نحطة في فرن دافئ لحد ما يخمر
(تقريبا ساعتين)
(يعني يتضاعف حجم العجين)
و بيكون شكل العجين كده
و بعدين نحضر الزيت الغزير
(يكون دافئ)
.
و نجيب ملعقة الشاي الصغيرة و ناخد في نصفها عجين
.
و ننزله بصوباعنا الكبير في الزيت و نستخدم الصابع التاني(السبابة)لتشكيل العجين زي كورة
.
(لازم ادينا تكون مبلولة ماية زي الراجل بتاع الطعمية علشان العجين مايلزقش في ايدينا)
.
هي مش هتكون مكورة اوي
(ممكن تدي شكل بيضاوي)
.
بيطلع عندي نفس الشكل اللي في الصورة ده
و انت و شطارتك
و لما الطاسة تمتلئ نعلي النار
.
و يخرج علي الشربات مباشرة
( شربات تقيل بس مش قوي)
.
و احنا بنشيل لقمة القاضي من الزيت نكون طافيين النار
و علي ما نحطها في الشربات و نقلبها كويس و نحطها في طبق
يكون الزيت درجة حرارته نزلت تاني
و نحط الشوط التاني و النار مطفية
(لان الزيت لو سخن عن كده لقمة القاضي هتتحرق منك)
.
و بعدين لما نملي الطاسة نفتح النار
و هكذا لغاية ما نخلص كل الاشواط
.
اول مرة هتكون العملية ديه بطيئة شوي
بس لو انت شاطرة هتتعلمي بسرعة
و كل شوط هيكون اسرع من اللي قابله
.
*علي فكرة*
لو عايزاها زلابيا
(الطرية)
.
.
ماتحطيش نشا
(هتكون طرية من برة ومن جوة)
.
بس لازم تطلع علي سكر بودرة
(مش شربات خاااالص)
.
و هتطلع تحففففة
.
.
يالا بأه جربوا و قولوا رأيكم
.
.
.
عايزة حد يا جماعة يجرب و يقولي ايه الاخبار
.
.
.

المرة الجاية هقولكم علي طريقة فراخ حلوة اوي هتعجبكم
Categories:

8 comments:

سماسم said...

السلام عليكم انا زائرة للمنتدى وده اول يوم لى اعرف المنتدى بصراحة المنتدى رائع وطريقة عرض المعلومات رائعة انا بشكر كل القائمين عليه انا بقالى مدة مش قاعدة غير عليه وكل شوية اشوف وجبة احسن من التانية وجامعين بين القديم والحديث والحلو والحادق وببساطة فعلا رائع ربنا يجازيكم كل الخير عن هذا الموقع انا دورت علشان ابقى عضوة ما عرفتش اصل لكيفية الاشتراك ولاول مرة ابقى مهتمة اشارك بمنتدى كدة انا ماجربتش ولا وصفة لكن يكفى شعورى بمدى اهتمامكم ان تصل كل معلومة للزائر وقد ايه مبسطة وانا على يقين ان كل الوصفات جميلة فعلا رائع

mony said...

و عليكم السلام و رحمة الله و بركاته..


ربنا يكرمك يا جميلة
ده مش منتدي ولا حاجة
ديه ركنة كده علي قدي
:)
مدونة صغننة
بكتب فيها نتيجة تجاربي من وصفات عرفتها من برامج اكل او من مجلات او من حد ادهالي اجربها و نجحت


و انت كده يا جميلة مشاركة معانا
بمجرد تعليقك عندي


ربنا يكرمك
و اي حاجة عايزاها انا تحت امرك

Anonymous said...

السلام عليكم
الموقع بتاعك اكتر من رائع وانا جربت منه حاجات كتير اوى وطلعت جميلة اوى ياريت لو فيه وصفات تاني تضيفيها لاني بحب طريقتك في شرح الوصفة اوى :)

Mony said...

Anonymous

ربنا يكرمك يا جميل


بحاول افضى بس شوي و انا احطلكم كل اللي نفسكم فيه ان شاء الله


شرفتونا:)

بجد جميله said...

لسه عملاها وجميله جدا تسلم ايديكى يا عسل

Mony said...

بجد جميله


:)

بجد جميلة انا مش عارفة ده لقبك و لا رأيك:)

بس المهم انها عجبتك:)

أي خدعة;)

Shereen said...

Yummmm. Well done! Love it.

Mony said...

Thanks toooo much
:)