Pages

Loading...

Saturday, April 18, 2009

جمبري مقلي

بوست استثنائي علشان خاطر عيون
ELMASRYA - MOSLEMA LELLAH



جمبري مقلي:





بصي يا ستي

انا مش بحب اعمل الجمبري بالخلطة اللي فاتت لييي؟
(مع انها تنفع برضه)



انما الجمبري اصلا طري
(مش زي السبيط)



فعلشان اعمله لازم اعمله بطريقة تظهره

يكون يكون هو حاجة و طريقة الغلاف الخارجي حاجة تانية



(مش عارفة فهماني ولا لاء)





بصي يا ستي:



ندخل علي المقادير علي طول



كيلو جمبري وسط
(منظف و مقشر)

4 كوب ماء

كوب و نصف نشا

2 بيضة

3/4 ملعقة صغيرة بودرة ثوم

3/4 ملعقة صغيرة بودرة بصل
(لو مافيش ممكن6 فصوص ثوم مهروسين بالملح و الكمون و ريحوا نفوخكم)
(بس طبعا البودرة تضفي عليها لمسة اكنه معمول في مطاعم بره)

زيت للقلي

بقسماط





الطريقة:



في سلطانية كبيرة نخلط الماء و النشا و البيض



و نحضر كيس كبير و نحط فيه البقسماط علشان يسهل عملية تغطية الجمبري

و نخلط بالبقسماط بودرة الثوم و البصل

و لو مش متوفر نخلط بيه الثوم المهروس بس هنا هندعك كويس بإجدينا علشان الثوم يتجانس بالبقسماط



ركزوا بأه معايا هنعمل ايه علشان مايحصلش لغبطة



هنحط الجمبري في خليط الماية بالنشا و نقلب فيه كويس علشان نتأكد انه اتغطي كويس بالخليط

و بعدين نحطه في كيس البقسماط و نقلب كويس علشان يتغطي كويس

و بعدين ارجع الجمبري لخليط الماية النشا تاني علشان ياخد طبقة تانة

بس في السريع المرة ديه

و بعدين نرجه تاني لكيس البقسماط علشان ياخد طبقة تانية

و بعدين نحمرهم لحد ما يصلوا للون ذهبي جميل

و نطلعهم علي ورق مناديل المطبخ





و بالهنا و الشفا



طبعا طبعا جنب الجمبري المقرمش ده اكيد محتاجين صوص



و طبعا انسب صوص هو صوص التارتار



صوص التارتار نعمله ازااااي؟؟؟





مايونيز + خيار مخلل مقطع صغيييير جدا+فلفل مخلل(كابري)و ممكن كمان بصل مخلل مقطع صغير جدا



ساعات ممكن افتكس و احط ملعقة صغيرة كاتشب و ملعقة صغيرة مستردة

بيطلع مش بطال برضه



و ماتقولوليش مؤمن بأه ولا أي حاجة تانية





يالا

بالهنا و الشفا







16 comments:

احساس طفلة محبة للرومانسية بس واقعية said...

لا مش ممكن دا انا لازم هجربة
بجد بجد تحفة الطريقة دى وسهلة
ومكوناتها تمام جدا بالنسبالى

تسلم ايدك يا مونى
تقبلى مرورى

ELMASRYA - MRS WRITER said...

يا حبيبي يا قمر

إيه التمكن والإبداع ده كله؟

ربنا يخليكي ليا ياللي بتعلميني الوصفات التححححححفه

وصفك يجنن ومقاديرك وتفنيناتك وافتكاساتك ولا أروع من كده

تسلمي على زوقك يا موني واهتمامك بعرض الوصفة

كلك زوق ورقة والله

معلش اتأخرت في الرد كانت المدونات بعافية

بس الحمد لله وصلت لسر شويبس بواسطة واحدة صاحبتي عسولة زيك كده بس تخصص مدوحرة في الكومبيوتر

هجرب الوصفة دي بالظبط بالظبط بإذن الله

بحبك قوي قوي قوي

خمسة فضفضة said...

السلام عليكم ورحمة الله وبركاته

موني انتي اليومين دول عماله تجري ريقنا علي الاكلات الجميله بتاعك

خصوصا بقي الاسماك والجمبري اللي باموت فيهم

اعملي حسابي معاكي في طبق


سلام

tota said...

صباحك سكر ياموني
جميله قوي الطريقه دي وفيها جديد بس طبعا ولأن موني اللي عملاها يبقى اكيد تجنن وانتي عارفه انا بموووووووووووت في الجمبري اد ايه ربنا يخليكي لينا يارب

تسلم ايديكيي ياقمر

اخبار الشغل معاكي ايه ياااارب دايما في تقدم تمنياتي ليكي بالخيروالتوفيق

La cuisine du monde à la marocaine said...

بيعجني أسلوبك في الكتابة
باين ان دمك خفيف جدااااااااا
تسلمي حبيبتي على الوصفة الرائعة

لجين أبو الدهب said...

الطريقة دى جميلة برده جداااا ..

ان شاء الله هاحاول اجربها ..

جزاكِ الله خير ياأحسن شيف مدونتى ..

mony said...

احساس طفلة محبة للرومانسية بس واقعية

ربنا يكرمك يا جميل


خلاص مستنين النتايج بأه

mony said...

ELMASRYA - MRS WRITER

والااه لا ابداع ولا افتكاسات ولا حاجة

انامجرد ناقلة
بس بحب اجرب اللي بنقله علشان يكون نقل مظبوط مبني علي التجربة


يعني اشوف الوصفة في مكان و احاول اعملها
و لو نجحت احاول انفع بيها غيري

فقط لا غير

اما بخصوص المدونات
فكتيييير مننا اليومين دول متعرض للمشاكل ديه
انا و تامر برضه مش بنعرف ندخل علي مدوناتنا بالأكسبلورر

فاير فوكس بأه ولا سفاري


مش عارفة بأه مد من ايه و هيطول ولا نعمل ايه؟؟

يالا
الحمد لله اننا بنعرف ندخل دلؤتي اهه



ملحوظة صغننة:
شكرا كتير للبوست المنفرد للمجموعة القصصية بتاعة تامر

هو فعلا اسلوبه جميل جدااا بس هو مش حاسس بقيمته
ربنا يكرمك يا جميل

ماتتخيليش هو كان فرحان اد ايه بالبوست ده
و انا كمان و انا بقرأ كنت في غاية الفخر
عايزة الم الناس كلها
و اقولهم ده بعلولتي يا جماعة


ربنا يكرمك
علي رفع الروح العنويةالكبيرة ديه
و جزاك الله خيرا يا قمر

mony said...

خمسة فضفضة

و عليكم السلام و رحمة الله و بركاته


يا فندم تحت امرك المينيو كلها و المطبخ و طاحبة المطبخ

اللي عايزاه نعمله و نجيبهولك لحد عندك

mony said...

tota

حبيبة قلبي


اين انت يا ست انت
بتووحشيني بجد و الله
ايه اخبار العزومات علي حسك:)


ادعيلي بأه علشان الشغل علشان لسة برضه مش عارفة اظبط اموري بين البيت و الشغل ده غير الظروف الخاصة اللي بمر بيها كمان دلؤتي
يعني الشغل في الوقت ده بالذات حاجة لوز لوز لوز
ربنا يستر و الله

mony said...

La cuisine du monde à la marocaine


ربنا يكرمك
و الله يسلمك يا جميل علي الكلام الحلو ده

mony said...

لجين أبو الدهب


اوكي
مستنين النتايج
مع اني واثقة منها
علشان انت الي هتكوني عاملة

tota said...

صباحك سكر ياموني
اناموجوده اهو والله بس ياأختي الكمبيوتر بعافيه اليومين دول مش بعرف اكتب كومنت خالص والله وانتي كمان وحشتيني كتير كتييييييييييييييير بس قولت اسيبك اليومين دول تظبطي امورك في الشغل علشان عارفه اللي انتي فيه ربنا معاكي ياقمر ويكرمك انشاء الله اما عن العزومات برتاح شويه وبعدين اول اما يكون في حاجه هتلاقين بقولك الحقيني ماانتي عارفه اختك مش بتعرف تصرف ودايما دايما محتاجلك ياأحلى احت وقلبي معاكي وربنا يوفقك ويكرمك بالخير دايما ويبعد عنك اي مكره
وخلي بالك على نفسك ياقمر

بوسااااااااااااااات لموني حبيبة قلبى

ঔღঔ نـــوارة ঔღঔ said...

اكييييييد هجربها

طريقتك مميزة وسهلة

تسلم ايدك ياقمر

Summer said...

وصفاتك حلوه كتير و طريقة عرضك لها جميل
شكرا على المدونه الجميله و اتمنى انك تعرضي كمان و كمان وصفات حلوه
شكرا

mony said...

Summer


ربنا يكرمك يا جميل
ده بس من ذوقك


انا بحاول بس اوصل المعلومة زي ما احب انها توصلي

فقط لا غير:)

شكلها كده اول زيارة
نتمني ماتكونش الاخيرة بأه
:)