Tuesday, April 21, 2009

Posted by Mony on 7:03 AM 17 comments
شميتوا فين السنادي

 
اول مرة نخرج في شم النسيم

عادة احنا مش بنحتفل بيه

 
لكن كل سنة بنحاول نخطط لاستغلال الكام يوم الاجازة بتوعه
 اربع ايام مش قليلين برضه

و الواحد عايز يغير جو

 
تامر اقترح اننا نروح البلد بتاعته عند عماته

 
و قد كان

 
قعد يكسل كالعادة

 
يالا يا تامر



اصلي انا عايز ءأنتخ شوي

طيب انام بعد الضهر و بعدين نسافر

طيب بعد العصر

 
لحد ما اليوم خلص و زهقت انا و بطلت اسأل

 
جه حمايا بالليل سألنا اذا كنا عايزين نسافر البلد علشان هو مسافر بكره الفجر

 
لولا حمايا ماكناش اتعتعنا من مكاننا

 
و رحنا البلد الحمد لله

 
ارض كبييييرة علي مداد النظر بس الخضرة قليلة علي غير العادة

كانت صفره

اصله كان موسم قمح

 
بقيت مستغربه ازاي مساحة القمح الفظيعة ديه و مش بيكفينا

ده الناس كلها زارة فمح

و شوية برسيم لا يذكروا علي جنب كده علشان اكل باقي الحيوانات

 
ادو و لي لي كانوا مبسوطين خااالص

 
عبد الله بيه طول السكة و احنا مسافرين

عمال يقول هي المزرعة بعيدة يا بابا

المزرعة باقي عليها اد ايه؟؟

و انا مكسوفة جداص يقول الكلام ده قدام الناس هناك اللي احنا رايحين لهم

هيقولواعلينا بنفشرعلي الواد و مفهمينه ياما هنا و ياما هناك

 
يا حبيبي احنا ماعندناش مزرعة

ده احنا راحين لناس قرايبنا في البلد و عم عندهم حيوانات بيربوا

 
و الولد:ايوة ايوة شغالين في المزرعة

يانهار مش باينله الوان

يا واد دول اهلنا

 
ايوة يا ماما اهلنا و مشغلينهم في المزرعة

ياخراااااااااشي

اعمل ايه في الواد اللي هيفضحنا ده

 
يا تامر الحقني

قول للواد ده حاجة

 
و رحنا الحمد لله

و الحمد لله عبد الله ماجبش سيرة المزرعة ديه هناك غير بالليل لما جه ينام

علي الاقل بيني و بينه مستورة

 
الناس هناك جميلة اوي

قلوبهم صافية و اللي في قلبهم علي لسانهم

و ترحابهم بينا كان فوق الوصف

 
الماية ليها طعم تاني

لا فلتر بأه ولا معدنية

 
طعمها جميل

تشرب منها ماتشبعش

و الأكل طعمه حاجة تانية خالص

اكننا في الجنة

 
و في العصرية كده

خرج تامر مع عبد الله يمشوا بين الزرع

الاقي عبد الله باشا راجعلي بكام فرع قمح و بيقوللي جبتلك قمح يا ماما علشان تعمليلنا عيش

 
قلت اشمعني انا يعني ما امتعش عيني بالزرع

رحت واخدة لي لي و قلت لواحدة من البنات اللي موجودين يجوا يمشوا معايا

 
و قد كان

 
لسة مامشيتش مترين علي بعض

رحت واقعه في قناية

القناية ديه للي مايعرفش هي حوض صغيرمحفور بين الرزع علشان يوزع الماية

اتبهدلت من الاخر

رحت مكلمة تامر علي الموبايل و حكيتله

قالي طيب تعالي ياختي

انت ايه اللي خرجك اصلا

و مشينا مع بعض وانا بتعكز عليه

و الخبر انتشر في البلد ان الست موني حرم سي تامر وقعت في قناية

و اللي ضحك علي و اللي اتصعب علي

 
ربنا يستر

هروح انهاردة ان شاء الله للدكتور اتطمن علي الناس اللي برة و الناس اللي جوة

و ربنا يسترها معانا باه

 
تاني يوم بأه اللي هو شم النسيم

الاقي الناس جاية تسلم علينا و كل واحد جاي يقوللي كلام عجيب

 
بنت عمة تامر:

اسلم عليكي بأه علشان انا رايحة اشم في المنصورة
(معرفتش يعني ايه اشم ديه غير بعديييين)



واحدة تانية :
احنا رايحين نشم في السمبلاوين





فييين علي ما فهمت انهم رايحين يشموا النسيم مش حاجة تانية

معلش باه

اول مرة احضر شم النسيم بره البيت



و علي العصر من تاني يوم رجعنا ارض الوطن سالمين نص نص

و طبعا غانمين


انتوا بأه شميتوا فييييين؟؟










17 comments:

صبرني يارب said...

مونيييييييييي


وحشاااااااني وحشااااااااااااااني

كده

السنبلاويين والمنصوره؟؟

انتى كنتى فين

فى ميت غراب ولا ايه

طيب كنتى جنبي يا وحشه
صفريلي وانا كنت جيتلك طيب

كل سنه وانتم طيبين يا جميل

اروح اشوف الجمبري والحبار الى فاتوووووني بقى

Om HAGAR said...

ها ها ها ها ها ها ها ها

يعني هي حبكت معاكي التمشية يا ست موني؟

إن شاء الله تطمني و تلاقي كله كله تمام و تطمنينا

المهم انك غيرتي جو و اتبسطوا و كله كوم و عبد الله كوم آه لو كان قال حكاية المزرعة دي كانت هتبقى حكاية D:

كل شم نسيم و انتي طيبة بس يا ترى أكلتي فسيخ؟

بعبعه said...

ياااااااااه

طيب انتى وقعتي من قبل ما نحقد اهو

نفسي اروح اقعد يوم فى الارياف كده على فكره

ماشيه معاكي حلاوه ياعم

قر مباشر ما انتى وقعتي خلاص بقى
ههههههههههههههههههههههههه

خلينى اشوفك

ستيته حسب الله الحمش said...

موني
مبروك مبروك مبروك يالا بقى اديها عبد الرحمن علشان عاوزاكي تكملي اسماء الله الحسنى
عارفة عبد المنعم مدبولي لما كان بيقول خلف توم واحد باسمك وواحد باسمي
انا المكان اللي شميت فيه النسيم ها اطلعه بوست لأنه تحفة يا موني ولازم نتقابل فيه ذات يوم ان شاء الله
ها تنبسطي منه قوي قوي وهو جوا القاهرة
نسيم سعيد وطمنيني على اللي بره واللي جوا
تحياتي

tota said...

صباحك سكر ياموني

أولا كل سنة وانتي طيبه ياحبيبة قلبي
ويارب كده تكوني بخير قلقتيني عليكي كده تقعي امال فين خلي يالك على نفسك ياهانم انشاء الله تكوني بخير ويارب يبعد عنك اي مكروه يااااارب
اما عن الريف في المناسبه دي فهو احلى مكان ممكن تنبسطي فيه وتلاقي فيه كل حاجه على طبيعتها الهوا والميه والناس كل حاجه هناك جميله والخضرا يابختك ياقمر شوفتي الطبيعه الجميله انتي عارفه مفيش هنا الحاجات دي ولا حتى احتفالات بأي حاجه
بتمنى تكوني بخير وطمنينا عليكي

وكل عيد ربيع وانت بخير انتي والاسره

Anonymous said...

حمد لله على السلامه

ELMASRYA - MRS WRITER said...

في القناية يا موني؟

فكرتيني بواحدة صاحبتك ومطبخها شكيك لمطبخك وقعت في الترعة زماااااااااااان

مش وقعت قوي أصلها مسكت في الضفه بتاعة الترعة وجت سليمة بس كنت قرفانه خالص

المهم بقى بالنسبة للشم

أنا مش بحتفل بموضوع شم النسيم ده خالص

زمان كانت ماما الله يرحمها بتحتفل بكل أنواع الطقوس المتعارف عليها من حلبة مزرعة وترمس وبيض ملون وبريوش

وبابا الله يرحمه كان بيجيب الملوحه والفسيخ والرنجه وملحقاتهم من الخضرة واللمون والعيش والملانه كمان

لكن أنا نو نو نو أينعم بجيب فسيخ ورنجه وملوجه لكن باكل منهم قبل اليوم المخصص

والسنه دي جاتلي واحده صاحبتي على الغدا وبالليل زارني ابن عمتي ومراته
يعني شميت في بيتي

على فكرة كتبتلك طريقة القشطليه ونصيحه لوجه الله اعملي الطريقة بتاعتي أنا

موااااااه

mony said...

صبرني يارب

و الله يا صبصب انا معرفش الا ليلتها بالليل خالص زي ما قلت في البوست

و تامر ماكنش باينله قومه الا لما عمي جالنا


لا يا جميل كنا في بلد كده اسمها ترانيس العرب تبع مركز ديرب نجم


يالا يا صبصب الجايات اكتر من الرايحات

mony said...

Om HAGAR

اهه اللي حصل بأه نعمل ايه

اه و الله ديه كانت تبقي فضيحة بجلاجل و الله
الحمد لله ربنا ستر


اكلت فسيخ اه بس قبل شم النسيم بكتيييير
مع اني ممنوعة منه اليومين دول بس اهه اللي حصل بأه برضه
اصل الفسيخ ماينفعش حد يقولله لاء

و ربنا يسترها معانا بأه

mony said...

بعبعه

اتفضلي يا فندم الارياف مفتوحة و الغيطان مادة ايديها للي عايز يروح
و احنا مروحين منالبلد كان في ناس فسحتهم انهم فرشين جنب الحقول وقاعدين بياكلوا و بيستمتعوا بالمناظر الجميلة

mony said...

ستيته حسب الله الحمش

الله يبارك فيكي ي حبيبة قلبي
ربنا يكرمك و الله


و الله اللي ربنا يجيبه خير
بس بالصحة و العافية ان شاء الله

طيب مش تحكيلنا يمكن نحب نقلدك

ربنا يجمعنا علي الخير دايما يا رب

ادعيلنا بأه انا و اللي بره و اللي جوة ربنا يسترها معانا

mony said...

tota

ربنا يرجعكم بالسلامة و تمتعوا عينكم و جميع حواسكم بالمناظر الجميلة

mony said...

biberss222

الله يسلمك يا فندم

كده برضه تشرفنا من غير ما تشرب عندنا حاجة ولا حتي تاكل

لازم نعوضها مرة تانية ان شاء الله

mony said...

ELMASRYA - MRS WRITER

شوفني
اهه كانت فضيحتي بجلاجل

بس انا برضه واعية
وقعت واقفة
اينعم مافرقش كتير
بس اهه بنتمحك


هروح علي طول اهه للقشطلية

و اكيد طريقتك هتكون احلي مليون مرة

نكهة مغربية said...

حبيت بس أسلم عليكي يا قمر

يسعد نهارك

القدر و انا said...

مونى
كل شم نسيم وانت طيبة
ومعلش ما يقع الا الشاطر
الف سلامة عليك
واجازة سعيدة ان شاء الله
انا قضيته فى بيتى وهو يطل على حدائق المنتزة فى الاسكندرية
يعنى لا احتاج للخروج فى الزحمة والحمد لله

عاشــــــ النقاب ـقــــة"نونو" said...

مدونة ظريفة ودمها شربات
وحمد الله على سلامة اللي برا واللي جوا وسليمة باذن الله
انا بقى للاسف مش هقدر اقولك حصل ايه اليوم دة مع انه يوم ميلاد بنوتي بس علشان ما انكدش عليكم من اول زيارة كدة
نتواصل باذن اله تعالى
دمتم بخير