Pages

Loading...

Tuesday, March 31, 2009

الحواوشي المصري

السلام عليكم و رحمة الله و بركاته


 
معلش يا توتا اتأخرت عليكي في طلبك





طريقة الحواوشي ديه قاللي عليها واحد شغال في محل بيبيع حواوشي

و الحواوشي بتاعهم مشهور جدا و دايما زحمة



 
قاللي الموضوع بسيط جدا





المقادير



1 كيلو لحم مفروم

نصف كيلو بصل مبشور

ثمن كيلو لية ضاني

ملح و فلفل

 


الطريقة



بنحط اللحمة المفرومة و البصل المشور و اللية و الملح و الفلفل علي بعض



اللية لو طرية
(مش مجمدة في التلاجة )

اضربيها في مطحنة الخلاط و هي هتبقي عاملة زي السمن
و لو لسة مطلعاها من التلاجة يعني جامدة

ابشريها علشان تبقي حتت صغيرة ماتبانش



بس الاحسن ان تحطيها في الخلاط او المطحنة او الكبة
(المتاح يعني)





و علي فكرة مش هيكون ليها أي ريحة زفرة خاااالص

لان الراجل اللي قاللي الطريقة قاللي ان السر في اللية الضاني



انا مابحبش اطبخ باللية و الحاجات ديه بس لما دقت طعم الحواوشي
(قبل ما اعرف ان فيه ليه)

ماحستش بطعمها خااالص

و البصل و الملح و الفلفل غطي علي طعمها خالص





حتي انا سألت الراجل قلتله مامتي بتبشر علي اللحم المفروم طماطم و بتحط فلفل اخضر

قاللي كل ده مالوش لزمة لو من غير اللية





و ممكن تقللي كميتها بأنك تحطي نص الكمية اللي قلت عليها



و بعدين تجيبي العيش البلدي و تفتحيه من الجنب و تحشي بيه اللحم المفرومة اللي بالخلطة اللي قلنا عليها

بس ماتكتريش كمية اللحمة في الرغيف علشان تستوي





و تلفيها في ورق ابيض

او ورق فويل



و تحطيه في الفرن من تحت في درجة حرارة متوسطة



لو الفرن سُخن من قبل كده الرغيف مش بياخد تلت ساعة


انا بعمل الكمية بتاعة اللحم المفروم اللي بالخلطة ديه كلها  و احشي بيها عي
العيش و ألِفهم و احطها في الفريزر علشان لو ماليش نفس اطبخ اليوم ده ولا كنت بره طول اليوم
الاقي حاجة ناكلها

 



و طبعا الطريقة ديه غير بتاعة الاسكندرانية



لانهم مش بيحشوه في عيش

دول بيعملوا عجينة و يحشو العجينة باللحم المفرومة



و أي خدمة يا فندم انا تحت امرك



يالا بالهنا و الشفا







21 comments:

احساس طفلة محبة للرومانسية بس واقعية said...

انا اول مرة اعرف حكاية اللية دى
انا عادى بحط بصل وطماطم وفلفل

بس اعرف اى حاجة بتتشوى لازم يكون فية كمية دهون كتير شوية وان اللحمة الضانى فى الشواء بتكون اطعم

وممكن واحنا بنجيب اللحمة المفرومة نجيبها فيها دهون كتير شوية بالمرة
ولا مينفعش ؟

شكرا ليك يا مونى
تقبلى مرورى

mony said...

احساس طفلة محبة للرومانسية بس واقعية

هو الراجل قاللي ان اللية اهم من اي مكون تاني في الحواوشي

حتي انا بطلت احط طماطم

و كده كده اللحم المفروملما بتجيبيه من الجزار بيحطلك فيه كمية دهون كبيرة


لما تجيبي اللحم المفروم بتاعة الحواوشي قوليله يفرم معاها كمية اللية الضاني اللي قلتلك عليها
الثمن كيلو يعني

و كده تكون جاهزة ليكي مايكونش ناقص غير البصل المبشور و الملح و الفلفل


بس لاااازم اللية الضاني
ولا تقلقي من الريحة يا جميل

حاجات جوايا said...

ازيك يا جميل

اعتقد ان الحواوشى بالفلفل والطماطم يبقى شاورما أكتر

المشكلة فى الطريقة دى اللية فعلا يعععععععع انا اصلا مبدخلش البيت اى سنتوفة ضانى


الحواوشى انا عملته قبل كده بالقطايف
وكان طعم الحواوشى بالضبط ومن غير لية ولا حاجة

واللحم المفروم عملته بطريقة العصاج من غير طماطم وزودت التوابل والدهن .. ملح وفلفل وكمون وبهارات

بتدهنى الصينية زيت وترصى نص حلقات القطايف .. وبعدين تحطى العصاج معلقة ونص كده أو معلقتين على حسب حجم القطيفة وتفرديها فى كل واحدة .. وبعدين تغطيهم بباقى الحلقات .. وتضغطى على كل واحدة من الجنب كده نص دايرة عشان تبقى مقفولة زى الرغيف واللى جواها مينشفش .. وبعدين تدهنى الوش ببيض وتدخليه الفرن من غير ما تغطيه ولا حاجة

بياخد اد ايه بالضبط مش فاكرة الحقيقة بس قولى تلت ساعة على نار هادية
ولما يخلص شغلى الشواية من فوق يحمر شوية دقايق كده وخلاص

ولا الحوجة للية :)

mony said...

حاجات جوايا


جديدة حكاية القطايف ديه اول مرة اسمعها


انا برضه مابحطش لا طماطم ولا فلفل في الحواوشي
لان الطماطم بتطري العيش اوي و يبقي مهري


اما الليه فانا كمان مابطقهاش خاااالص مالص
و كنا في عيد الاضحي بنطفش من البيت علشان ريحة الضاني


بس لما دقت الحواوشي ده كنت مستعدة احلف ان مافيهاش اي ليه
بس الراجل اكدلي انهم بيحطوا لييه و ان طعمها مع التوابل و البصل مابيبانش خااالص

صبرني يارب said...

اها يا موني تصوري البت اختي عملتلى حبه وجابتهوملي

بس هى بقى بتروح تجيب عيش من مخبز جنبها عيش نص سوى

وبرضه ما حطتش ليه عشان جوزها ما بيحبوش بالليه

بس كان حلو اوي برضه

هاجرب موضوع الليه ده انا بقى

هاجرب موضوع القطايف ده يا سالي جديده
تسلم اديكى يا موني

kochia said...

جميل اوي
هجربها ان شاء الله
بس يعني اللحمة هتستةي وهي نية خالص ؟؟
هي دي المشكلة اللي بفكر فيها دائما

mony said...

صبرني يارب

بس ليه عيش نص سوي

مش محتاج عيش نص سوي ولا حاجة
العيش العادي يفي بالغرض
بس يكون طازةو طري


اما اللية فملهاش ريحة خااالص صدقيني لانك بتحطي كية صغيرة اوي بالنسبة لكمية اللحمة و البصل

و القطايف علي رأيك شكلها كده تستاهل التجربة

نورتيني يا جميل

mony said...

kochia

لا تقلقي يا جميل
ماتكتريش كميةاللحمة في رغيف العيش و هي هتستوي بسرعة

و علامة التسوية ان العيش هيبدأ ينشف شوي
(يبدأ يقرمش)

لجين أبو الدهب said...

بحب العيش باللحمة اوى ..

بس انا بحب الاسكندرانى اكتر رنه جوا العجينة بيبقى عامل زى الفطيرة وبيبقى طعم اوى ..

طب كنت ايزة اسألك سؤال يامونى ..

ينفع اعمله فى عيش شامى ..الابيض ده ؟؟

جزاكِ الله خير حبيبتى ..

وربنا يخليكى لينا ..

بنت مصر said...

تخيلي كنت لسة امبارح فاكرة الحواوشي دخلت النهارده لاقيتك عاملاه

بتحسي بينا من غير ما نتكلم
:)

طريقه سهلة جدا ومش محتاجة مجهود وحلوة فكرة انك تعمليه وتشيليه في الفريزة للظروف

وفعلا الحواوشي بتاع اسكندرية بيعملوه بعجينة خاصة بالحواوشي وبتكون طعمها مع العيش تحفة

تسلميلنا يا جميلة

reem said...

تسلم ايديكى يامونى

انا بعمله من غير ليه وبحط فلفل اخضر بس لان الطماطم زى ما قلتى بتخلى العيش يطرى

وفكرة القطايف دى هاجربها ان شاء الله شكلها ممكن تكون حلوة

مونى كنت عاوزه اسألك ما تعرفيش اكله جديدة كدا تكون مجربة وحلوة
انا زهقت كل يوم من التفكير هانطبخ ايه

والواحد محتاج تغيير خاصة عشان البنوتات بتوعى

وميرسي ياقمر

mony said...

بنت مصر

اي خدعة يا فندم
تحت امرك
;)

للاسف انا مش بعرف اطلع العيش باللحمة الاسكندراني رغيف كامل زيهم
بيطلع معايا نص رغيف
:(


بس بعرف اعمله
بس الفرق ان بتاعي نص رغيف
:)

mony said...

reem


انا طول عمري ماعرفش اجاوب السؤال ده

انا نفسي بقعد اسأله لنفسي

بس انا روح علي الفريزر و اشوف المتاح ايه

يعني مثلا لو عندي لحم مفروم
اعمل الحواوشي
او ممكن بيض اسكتلندي
(ولادي بيحبوه)
او كفتة في الفرن

لو عندي فراخ
افكر هعملها مسلوقة عادي ولا مشوية ولا صينية
و لو بانيه
ممكن اعمل شاورمة او احشيه و يبقي كوردون بلو


و لو لحمة
ممكن اشوف هل هي مناسبة تتعمل كباب حلة مثلا ولا ممكن كبسة
و لا ممكن بيكاتا
ولا لو بوفتيك ممكن احشيه او ممكن اعمله شاورمة


كده يعني

بحصر تفكيري بالمتاح عندي

mony said...

لجين أبو الدهب

فعلا يا لوجي انا كمان عجبني العيش باللحمة
دقته قبل كده لما كنا في اسكندرية اخر مرة

بس ماقدرتش اكل منه كتير
لاني بتعب من الحاجات اللي فيها عجين و خميرة
بتتعبلي معدتي اوي

بس ميزة ده يا جميل
زي ما قلت انك ممكن تعملي كمية و تشيليها للزمن في الفريزر

اما بخصوص العيش الشامي
ممكن

و لو ان مافيش احسن من البلدي
بس ممكن مش هيقول لاء يعني
اصل انا اعرف ان الشوام بيعملوا الحواوشي بتاعنا في العيش الشامي
و بيطلع كويس برضه
بس انا مجربتوش في الشامي بصراحة


اصلي اعز البلدي معزة خاصة
:)

tota said...

حبيبة قلبي يانااااااس
ربنا يخليكي ليا
ومش اتحرم منك ابدآ
انشاء الله هعمله واقولك على التيجه بس ياموني انا عندي الفرن كهرباء اشغل تحت بس ودرجه الحراره160 كويس

ومرسي خالص ياموني
وبوساااااااااااااااات كتير لموني حبيبتي

mony said...

tota

اي خدعة يا توتا
انت بس اشري و انا اطبخ و ابعتلك علي طووول


انا زي ما قلتلك علي الشات بوكس انا ماليش خبرة في الفرن الكهربا

للاسف هو ده كل الي اقدر افيدك بيه


لو حد معانا عارف تظبيط الفرن الكهربا يا ريت يرد علينا علشان نفيد البنية الغلبانة ديه
بس المفروض ان الحواوشي بيتحط علي درجة حرارة متوسطة

بنت مصر said...

موني

ليكي تاج عندي تعالي خديه

:)

ঔღঔ نـــوارة ঔღঔ said...

لذيذة جدااا انا بحبها وبعملها دايما

واللحمة اساسا فيها لية بتعطي طعم ونكهة لذيذة

تسلم ايدك ياقمر

بنت النيـــل said...

مساك عسل ياعسل
بس حبيت اسألك لما تحطي الحوواشي في الفرن بتدهني الوجه والصينية ولابس تكتفي انك تلفيه في ورق الفويل

طيب وازاي الوجه يتحمر

الملاك الحزين said...

بصراحة اول مرة اشترك معاكم وفكرة اللية فعلا ممتازة مع انى كنت بستبدلها باى مادة دهنية موجودة عندى يعنى سمن او زيت

وبجد مطبخ مدام سلامونى رائع بارك الله فيكم اخواتى

الملاك الحزين said...

بصراحة اول مرة اشترك معاكم وفكرة اللية فعلا ممتازة مع انى كنت بستبدلها باى مادة دهنية موجودة عندى يعنى سمن او زيت

وبجد مطبخ مدام سلامونى رائع بارك الله فيكم اخواتى