كنت ناوية اكتب طريقة صينية القرع العسلي
بس ام عمر طلبت عيش بوري و ده ماينفعش بالكلام بس
لازم صور
اصل انا ما استمخش بالوصفة غير لما اشوفها كلها علي بعض
مش اقعد اتخيل
العيش البوري هو عيش هندي معروف
و في بيتعمل بالبهارات و فيه من غير أي بهارات يادوب ملح بس
المقادير::
1 و 1/2 كوب دقيق
1 و 1/2 ملعقة صغيرة بيكنج باودر
(شييف اسامة ما استخدمهوش في وصفته بس انا لقيته بيهبط لما يخرج من الزيت و انا عايزاه يفضل منتفخ فترة اطول)
كوب لبن رايب
(مش هنستخدمها كلها)
علي فكرة معظم طرق البوري بيستخدموا ماية مش لبن رايب
بس انا بحترم أي وصفة فيها لبن او مشتقاته علشان القيمة الغذائية و صدقوني بتفرق في الطعم كتييير
نصف ملعقة صغيرة حبة البركة
نصف ملعقة صغيرة كمون ممكن حصي و ممكن مطحون
(علي حسب الرغبة)
رشة ملح
و زيت غزير للتحمير
الطريقة::
بنحط المقادير كلها علي بعض و نحط شوية من اللبن الرايب و نعجن كويس اوي و نزود لحد ما يكون عندنا عجينة ناعمة و طرية
و نسيب العجين يستريح 10 دقائق
(مش اكتر)
و بعدين نقسم العجين لكور صغيرة في حدود انش للكورة
و نفرد الكور ديه بالنشابة لسمك 2 مللي تقريبا علي شكل قرص او أي شكل تاني تحبيه
(رفيعة يعني بس مش اوي)
انا ساعات بعمله رفيع و ساعات بحب اتخنه شوي
و بعدين نحمرها في طاسة فيها زيت غزير
كل رغيف لوحده
ولما تطفو على الزيت نحط من الزيت السخن علييها من فوق علشان تعلى من الجنب التاني
و هو هينتفخ لوحده و يكون بالشكل ده
و بمجرد ما يخرج من الزيت نحطه علي ورق ماص علشان الزيت
و في اقتراح صغنن
بمجرد ما يطلع من الزيت نحط عليه رشة دقة
طبعا كلنا عارفين الدقة ديه ايه
ملح و فلفل و كمون و شطة
و ممكن زعتر لبناني يغني عن الدقة ديه
او دقة المدينة
و يستحسن يتاكل اول بأول علشان لما بيبات بيكون طعمة مش حلو و بينشف و يهبط
فيستحسن يكون طاااازة
و اديكووا شوفتوا مابياخدش وقت خااالص
يالا بالهنا و الشفا يا ام عمر
انا عايزة اربع ارغفة لي انا و العائلة الكريمة
27 comments :
مدام سلامونى
السلام عليكم ورحمة الله وبركاته
انا مقيم بالسعودية
وهذا النوع من الخبز . اشتريه من السوبر ماركت مثل ( الدانوب - بن داود)
ولكنه لا يحمر فى الزيت بل يخبز فى الفرن
ويطلقون عليه ايضا اسم خبز التارامى
تحياتى
منذر
أ/منذر
و عليكم السلام و رحمة الله و بركاته
طبعا مع احترامي لحضرتك
انا مش عارفة الخبز اللي حضرتك بتتكلم عليه
بس معروف ان الخبز البوري بيتحمر في الزيت
و اول ما شفت الطريقة او سمعت عنها كان من شيف اسامة السيد كان مستضيف شيف هندي و عمل شوية اكلات هندية و ده كان من ضمنها
مع اختلاف المقادير بأنه بيحط ماية للعجن و مش بيحط بيكنج باودر
بس فكرة
ممكن اجرب رغيف في الفرن
بدل الزيت و التحمير
خصوصا انا مش بحب الحاجات تتحمر في الزيت علشان تكون خفيفة
شكرا لمداخلتك
شكرا غزيرا رهيبا مريعا
أنا بقالى سنتين بدور على طريقه حلوه للعيش البورى مش لاقيه لحد ما الفت طريقه قريبه شويه من اللى انتى كتباها لكن دايما بحس ناقصه حاجه لكن بجد الطريقه دى تحفه تسلم ايدك يا قمر
دايما كده مغذيانا
إيمان
ربنا يكرمك
و جزاك الله خيرا علي الشكر الغزير الرهيب المريع
:))
طيب قوليلي علي طريقتك اللي مألفاها
اصل بحب اتعرف علي باقي الافكار
جربي بأه ة قوليلي رأيك..
و ماتنسيش تقوليلي علي طريقتك
ممكن اعرف بيعمل كمية اد ايه
لو عملت التلت يعمي بنص كوب لكل مقدار ممكن يعمل 2 او 3 منه؟؟
جزاكي الله خيرا
مدونتك رائعة واكثر
حياكي الله
Anonymous
للأسف الشديد انا مش عارفة ممكن يعمل معاكي كام رغيف
اصل انا مش بركز في الموضوع ده اوي خصوصا اني بضاعف كمية المقادير علشان يعمل كتير..علشان انا بعمله لما يكون فيه لمة او عند مامتي علشان هناك بنكون كتير
لكن لو نصف المقدار يعمل كام؟؟
مش عارف بصراحة
آسفة اني خيبت ظنك و معرفتش ارد عليكي
و شكرا للرد اللي عرفنا عليكي
:)
مممممممممممم
سهل جدا انشاء الله أجربو و ردو عليكي
تسلمي حبيبتي
السلام عليكم
ايه الابداع ده كله
كل سنة و انت طيبة
كل سنة وانتي طيبة واسرتك بخير وفي احسن حال ان شاء الله
لا تنسينا من دعائك
كل سنة و انتي طيبة يا موني و تسلم ايديكي على الحاجات الحلوة دي
بس قولي لي هو أنا ممكن أستخدم اللبن العادي بدل الرايب؟
موني أنا لي سؤال كمان لو سمحتي هو العيش البوري بيتقدم جنب المشويات بس مش كدا؟؟
و لا ممكن نقدمه جنب حاجات تانية؟؟
نكهة مغربية
ربنا يكرمك يا جميل
مستنين النتائج
Sonnet
و عليكم السلام و رحمة الله و بركاته
اي خدعة:)
و انت طيبة يا جميل
أليس في بلاد العجائب
جزاكم الله خيرا علي مرورك اللي فلا منتظرينه..و اعذري تقصيري
كل سنة و انت طيبة
بارك الله فيما عنك وزادك من فضله العظيم
Om HAGAR
و انت طيبة يا جميلة
مش عارف و الله يا قمر بس لو عايزة تبدلي بيقي تبدلي بالزبادي مش باللبن
لان الرايب و الزبادي فيهم باكتيريا تخمير انما البن لاء
عموما شيف اسامة عمله بالماية
بس انا ماباحبش الحاجة اللي بالماية
بتطلع ناشفة
و بالنسبة لتقديم العيش البوري
فده حاجة تبع ذوق كل واحد
ممكن تاكليه مع مشويات او محمرات علي حسب رغبتك يا جميل
عايزين نعرف النتيجة بأه
:)
و بوسيلي هاجر من كل حتة
السلام عليكم
انا اشتغلت بالسعودية
سنتين عشت فيهم مع واحدة هندية
واتعلمت منها البورى وطريقته
بس الحقيقة لا كانت تستعمل
الخميرة ولا اللبن الرايب
يعنى ميه ودقيق
وذرة ملح
وكتير
كان خفيف
كنا ناكله مع البيض
المسلوق ومع الشاى ساعات ومع الجبنة
norahaty
و عليكم السلام و رحمة الله و بركاته
الاول نسلم علي بعض الاول
و نقولك انك نورتينا
و بعدين
مش انا قلت ان شيف اسامة لما عمل الحلقة الهندي و جاب واحد هندي و عمل العيش البوري بماية مع الدقيق و ملح بس
انا بس بقول علي طريقة جربتها و عجبتني
خصوصا ان انا بحب عمل العجائن باللبن و مشتقاته
عموما نورتينا برأيك
طيب مكن تغششينا بأه طريقة صحبتك الهندية
:)
مساء الخير
كنا بنعملها بنفس
طريقة حضرتك حتى ما كان
عندنا نشابة بالبيت قامت هى
علمتنى اعملها بزجاجة فاضية استعملها بالنشابة بصراحة(سوسيلا)وهذا كان أسمها علمتنى كتير فى المطبخ !وفى الحياة كمان (تصدقى دى!)لانها كانت كتير صبورة ومتحملة لاى مشقة فى الدنيا والاهم من كل ده تركت لى ذكريات سعيدة جداُ معاها
ما انساها مهما عشت.
norahaty
انا كمان ماكنش عندي نشابة و كنت بستخدم ازازة مدورةلما كنت بعمل العيش الصاج..و من ساعة ما اشتريت النشابة و انا ماعملتش بيها حاجة خااالص
:)
ربنا يباركلكم في بعض و يجمعكم علي الخير دنيا و اخرة
Blog more than great,,, Barak Allah feeky... Gazaky Allah khayran En Shaa Allah.. keda fee e7temal gozy ma yetalakneesh after this nice blog......
السلام عليكم ورحمة الله وبركاته
ازيك يا موني وازي اسرتك
ان شاء الله تكونوا بخير
اخبار خالك ايه يارب يكون في تحسن والي شفاء تام ان شاء الله
الله يطمنكم عليه ويريح قلوبكم
ان شاء الله تكونوا بخير يا رب
سسسسسالوصفة رائعة وسهلة ولو ممكن لو حد يعرف طريقة صنية الكالماري بالبشاميل
جربتي اللي بيتعمل في تيكا؟
بيطلع نفس طعمه وللا مختلف؟
والنعمه طبيخك زي الفل.....بارك الله فيكي يا مدام...
بجد البلوج ده جامد جدا جدا جدا جدا
انا فاشلة فى الطبيخ مش اوى يعنى بعمل كل الاكلات بس بحس انه مش هو الاكل البروفيشنال بصراحة بحس ان فيه حاجة ناقصة
وكمان بحب العيش البورى وخبز الصاج اللى هو فلاحى بجد بموت فيه ومش كنت بعرف اعمله بس البلوج بتاعك وفر عليا كتير واتعلمت منه كتير وكل شوية حتلاقينى نطالك بكومنت هههههههههههه
تسلم ايدك وعينك
عائشة
ديه شهادة اعتز بيها يا فندم
:)
أهلا بيكي في أي وقت
جربي كده تستعيني بالله قبل بداية الطبخ و استغفري طول مانتي واقفة بتطبخي و انتي هتبقى اكبر بروفيشينال شوفتيها في حياتك:)
Post a Comment