باذنجان و فلفل مخلل

*تم تحديث البوست*

مين عايز حاجة "حرشة"

 :))

ايه رأيكم في الباذنجان و الفلفل المخلل المرة ديه؟؟

الموضوع بسييييط جدا

نبدأ بأه و نقول بسم الله

:))

انا بعمله بالباذنجان الاسود علشان لونه مايغيرش 

بس أهم حاجة لما نشتري الباذنجان نجيبه صغنن كده و ابن ناس

 يعني مايزدش عن طول اصبع السبابة

و لو عرفتي تجيبي اصغر يبقى ياريت

علشان بيدي شكل جميل لما يكونوا صغننين و كمان يادوب قطمتين و يخلص

:)

هنقول مثلا نصف كيلو باذنجان اسود او ابيض(عروس)

و كام واحدة فلفل (ممكن رومي و ممكن حامي)

مقادير الحشوة بالتقريب ::

و 2 طماطم بين الوسط و الكبير

4 فلفل أخضر رومي 

أقل من نصف ربطة كسبرة وزيها شبت (أحنا بس عايزين ريحة مش كمية كبيرة)

راس ثوم كبيييييرة مقشرة طبعا :))

نصف ملعقة صغيرة فلفل أسود

ملعقة صغيرة كمون 

ملعقة صغيرة ملح

ربع كوب أو أكثر قليل خل على حسب الكمية اللي عاملاها في الباذنجان

نصف ملعقة صغيرة شطة (حسب الرغبة)

جدتي كانت بتحط كمان هريسة الشطة بس للأسف مش بعملها لاني الوحيدة في البيت اللي بحب الشطة 

الاول طبعا بشيل الجزء الاخضر اللي فوق الباذنجان و نقطع الجزء اللي تحتها بالسكين

و نقور الباذنجان بس مش زي بتاع المحشي يعنى يادوب لفة واحدة بالمقور الرفيع

حاجة كده يادوب نشيل البذر بس

علشان انا بقرف من البذر بصراحة :(

أنا كنت مصوراه لكم بس الصور راحت :((

المهم هي لفة بالمقور على اد البذر بس

و بعدين نحمر الباذنجان و الفلفل يادوب بس يستوي مش محتاج تحمير جامد

خدوا بالكم احنا هنقور الباذنجان بس الفلفل لسة ماعملناش فيه حاجة

و لما الفلفل و الباذنجان يبردوا نكون محضرين شوية ملح أبيض على جنب و نشق الباذنجان و الفلفل من الجنب شقة واحدة من فوق لتحت

و بالنسبة للفلفل هنشيل البذر بملعقة صغيرة

نحط طرف صابعنا في الملح و ندهن بيه الباذنجان و الفلفل من جوة

من جوة مش من برة ويادوب مسح خفيف

مش حنملحه طبعا و لكن الملح بيستخدم علشان يظهر طعم الحاجة

و نكون محضرين الخلطة اللي هنحشي بيها اللي هيا(الطريقة الاولى) ::

الثوم هنحطه في المطحنة مع الفلفل الاسود و الملح و الكمون و الشطة (البودر)

و نقطع الطماطم و الفلفل الاخضر مربعات وسط (لا كبيرة و لا صغيرة)

و شوية الخضرة اللي معانا (الكسبرة و الشبت)

و نحط عليها خليط الثوم

و عليهم الخل 

و نقلب بأه كويس هنشم الريحة التحفة بمجرد ما نحط الخل و نقلب

:))

التحديث او الطريقة التانية اللي عملتها
هاخد الثوم اللي طحناه مع الفلفل الاسود و الكمون و الشطة و اشوحهم في شوية زيت ذرة يادوب يبدأ يلون اقوم حاطة عليه الخل و اسيبهم يغلوا دقيقة و بعدين احط عليهم عصير 2 طماطم كبيرة و عليهم ملعقة هريسة شطة و اسيبهم على النار لحد ما القوام يتقل شوية كأنها صلصة
و اسيبها تبرد شوية و بعدين احط الفلفل و الطماطم  و الخضرة اللي كنا مقطعينهم و نقلب كويس و كده تكون انتهت الخلطة بتاعة الحشو 

و نحشي الفلفل و الباذنجان و نرصهم في علبة ثلاجة و نشيلهم في الثلاجة على الاقل ساعة قبل الاكل

انا عن نفسي بحشي و باكل في ساعاتها

لكن أقصد نسيبهم يختلطوا مع بعض و يتبلوا

لو عندك عزومة بأه ياريت تعمله من بليل و دوقي أحلي طعم بأه تاني يوم




بعتذر بشدددددة عن سوء حالة الصور

و في انتظار رأيكم
:))

SHARE

About Mony