Enjoy cooking
Browse through over
650,000 tasty recipes.
Home » » و اخيرا السينابوووون

و اخيرا السينابوووون

Written By Mony on Friday, June 26, 2009 | 1:46 PM

السلام عليكم و رحمة الله و بركاته





كيفكم يا جماعة وحشتوني و الله جدااا





اخباركم ايه في الحر ده



انا بأه الحر ده بالنسبالي مشكلة جامدة جدا لاني اساسا مش بحب الحر

و الظروف اللي انا فيها دلؤتي بضرب درجة الحرارة في 2

و المطبخ عندي صغنن حار مميت صيفا و شتاءً

فمش بيدي فرصه ان ممكن حد يدخل الا علشان يشرب ماية مثلجة من الثلاجة





المهم



انا شفت حلقة السنمون رولز بتاعة شيف حسن

و كانت تحححفة



و مقدرتش استني لما حبوبي يرجع من السفر علشان اعملهاله لما يجي

المهم



مشيت بنفس التوجيهات و الخطوات اللي قال عليها و الحمد لله اخييييييييييييييرا

عملت سينابون





اولاً::لازم الرخامة اللي هنشتغل عليها تكون باردة
ثانياً:: المطبخ مايكونش حر
(طبعا طلعت اشتغلت علي السفرة علشان التكييف اللي في الريسيبشن)

ثالثاً::الزبدة المستخدمة في العجن او الحشو تكون بدرجة حرارة المطبخ
(ديه بأه سبتها في المطبخ علشان تاخد درجة حرارته)



و كده اتقسم الشغل في منطقتين

العجن كان بالكيتشن ماشين في المطبخ

و فرد العجين و الحشو كان عند السفرة علشان التكييف



نبدأ بأه المقادير:

مقادير العجين::



1كيلو دقيق مخبوزات

ملعقة كبيرة خميرة فورية جافة-20 جم
(انا استخدمت الخميرة المستوردة اللي بتباع في باكت نص كيلو روووعة)

ملعقة صغيرة محسن خبز-5 جم

1/4 كوب سكر بودرة-50 جرام

1/3 كوب سكر بني- 70 جرام

1/3 كوب لبن بودرة – 70 جرام

3/4 كوب زبدة-150 جرام

2 1/4 كوب ماء -450 جرام

2 بيض – 100 جرام



الطريقة::

نحط النواشف كلها في الكيتشن ماشين و نلفها شوي علشان تختلط و تتماسك

و بعدين نحط الزبدة بدرجة حرارة الغرفة(طرية) قطعة قطعة لحد ما تخلص الكمية و تتجانس مع باقي المقادير

و نحط البيض واحدة واحدة(بيضه بيضة)لحد برضه ما يختفي و يتجانس مع العجين

و اخيرا نحط الماية شوية شوية لحد ما تنتهي الكمية





و نسيبها شوي في الكيتشن ماشين تلف و هنلاحظ ان لونها بقي افتح

(3 دقائق علي اول سرعة-و 4 دقائق علي السرعة التانية)

نرش عليها رشة دقيق و هي بتتعجن علشان تلم معاي و يسهل اني اشيلها





كده خلاص العجين خلص

نخرجها من الكيتشن ماشين هنلاقيها بتخرج معانا بسهولة نلفها في كيس بلاستيك و نسيبها تريح في الثلاجة لمدة 4 ساعات

مهم جدا اسيبها تريح و مهم الوقت اللي هتريح فيه



بعد الاربع ساعات

محتاجين نشتغل في مكان بارد

هنلم حاجتنا و نطلع عند السفرة

نرش الاول دقيق علشان العجين ما يلزقش

و نفرد بالراحة بالنشابة

هنلاقي العجين بيتفرد معانا بكل سهولة

و مش بيمط

علشان مستريح

نفردها كبيرة اوي

و الطرف اللي هنااك ده اللي هيقفل علي العجين لما نلفها رول نرَفًعه جدا علشان يلزق

و طول ماحنا بنفرد العجين لو حسينا انها هتلزق نرش رشة دقيق و نكمل فرد



كده العجين جاهز للحشو



الحشوبأه::

حشو قرفة او شوكولاته

1/4 كيلو زبدة طرية بدرجة حرارة الغرفة-250جرام

150 جرام سكر ابيض او بني-3/4 كوب

30 جرام قرفة او شوكولاته
(لو عايزة الحشو قرفة يبقي حطي قرفة و لو عايزة شوكولاته حطي شوكولاته)



نحط المكونات ديه كلها في الكيتشن ماشين لحد ما تنعم خاااالص





قبل ما نحط الحشو ننظف العجين كويس من الدقيق بفرشاه

علشان الدقيق ده طبقة عازلة بين العجين و الحشو



وناخد الحشو من الكيتشن ماشين و نفردها علي العجين تماما ماعدا الطرف اللي قلنا عليه علشان ده الي هيلزق لما نقفل العجين علي بعض



و نبدأ نلف العجين علي شكل رول بالراااحة

في الاول الرول هيكون شكله عجيب لكن بعد كده هيتظبط معانا و يتلف كويس لا تقلقوا

و في الاخر هنلزق الطرف اللي قلنا عليه في الاول و نقفل بيه الرول



كده بقي عندنا ارتفاع تقريبا 6.5 سم

نقطعها بقي حلقات بعرض 5.5 سم



و نرص الرولز اللي عملناها في صاج مدهون مادة دهنية و نحطهم جنب بعض و نبططهم بإدينا بالراحة

احنا رصناهم قريبين من بعض علشان عايزينهم يخمروا لفوق مش من الجنب



و نغطيها بأكياس بلاستك او بالنايلون رول و نسيبها لحد ما تخمر و يتضاعف حجمها مرة و نص

(تقريبا من نص ساعة –لساعة)

علي حسب مكان التخمير اللي حطيتيها فيه

و نحطها في الفرن علي درجة حرارة 220 مدة 35 دقيقة





علي ما السينمن رولز تستوي نحضر التوبنج:

لو صوص ابيض:

150 جرام زبدة 
150 جرام كريم تشيز
هي العلبة بتاعتها شبه ديه
(بس ديه طبعا قشطة)

 و في منها بأسم المصرين 
و بأسم حلايب 
و فلاديلفيا برضه عاملة كريم تشيز


300 جرام سكر بودرة
كيس فانيليا 
عصير 2 ليمونة و بشرهم

و ضربهم مع بعض في الكيتشن ماشين لحد ما يبقوا سايحين خالص كده


راح واخد ملعقة كبيرة فوق كل سينابوناية
و سابها تسيح عليه
(لانه خارج سخن)






و لو صوص كراميل::
(حبيب قلبي)


200 جرام سكر(كوب كبير)نحطهم في طاسة علي النار و مع ملعقتين ماء و ادوب السكر في المايه و انا بقلب علي النار لحد ما يسيح السكر و يبقي لون ذهبي فاتح

احط فيهم كوب كبير بندق مجروش خشن و اسيبه شوي يتحمص معاه لحد ما يصل الكراميل للذهبي الغامق

اقوم حاطة عليه 1 كوب كبير فريش كريم و اقلب كويس

و تقريبا مقدار نصف كوب او اكثر شوي من الصوص الابيض اللي عملناه

و ده شكله بعد ما خلص خلاص و حط عليه الصوص اللي بالكراميل







مهم جدا جدا

اننا نحط الصوص علي السينابون و هو لسة خارج من الفرن

و احسن حاجة له انه يتاكل و هو دافئ

زي ما بناكله في المحل

اما لو برد

يبقي عليه العوض في التعب بتاعنا كله لان الطعم هيروح



فأنا فكرت فكيرة



اني بعد ما الف الرولز بتاعتي ارصها في صينية و اشيلها في الفريزر

و لما احب اكل سينابون او حد جايلي (ضيوف)اروح مطلعاها من قبلها بساعتين علشان علي ما تفك و تخمر و بعدين احطها في الفرن 35 دقيقة و كأني وقفت و خبزت من اول و جديد

بس علشان نحافظ علي نتيجة يكون طعمها حلو



لازم لازم تتاكل و هي لسة خارجة من الفرن دافئة



و بألف هنا و شفا



---------------------------------------



ملحوظة صغننة



في صور انا مصوراها من التلفزيون و البرنامج شغال
فممكن تلاقوني جايبالكم التلفزيون من فوق بعيد عن الصورة
و صور تانية ضايعة تماما
طبعا مكنش ينفع انزلهالكم


بس كده خلاص
SHARE

About Mony

22 comments :

إيمان said...

ياسلاااااااااااام
بجد مش عارفه اشكرك ازاى
غدا صباحا هجرب الوصفه
بس ليه شؤال لو الخميره اللى عندى مش فوريه اعمل ايه
وبعدين ايه هى كريمه تشيز دى

Mony said...

إيمان

لا شكر علي واجب يا قمرايا

هو مممكن طبعا تستخدمي الخميرة البيرة
(اللي بتتباع في الفرن)

بس بيني و بينك انا جربت استبدل مكون من مكونات شيف حسن و النتيجة ماكنتش بتطلع حلوة معايا


فحاولي تدوري علي الخميرة الفورية (الجافة)
اللي بقولك عليهاو هي فعلا هتعجبك في كل حاجة

اما الكريم تشيز فأنا حطيتلك صوريتها في الموضوع


و اي خدعة يا جميل

دعاء said...

مممممممممم
حلوة تسلم ايدك
كنتي فين والحاجات الحلوة دي كانت فين

Mony said...

دعاء


انا بس حرااانة
علشان كده مش عايزة اشوف وش المطبخ
و كمان شوية مشاغل كده

ربنا يصلح الحال
نورتيني يا قمر..
و انت كمان وحشتيني

أم أحمد المصرية said...

وحشتينا وو حشتنا اكلاتك الحلوة من زمان يا قمر
ربنا يقومك بالسلامة ان شاء الله

نكهة مغربية said...

السلام عليكم و رحمة الله
محشتينا و الله يا قمر

تسلملنا على الشرح الوافي
كنا مفتقدينك جدا الله يقومك بالسلامة

صبرني يارب said...

موني ايه الاسامي دي

مش انا قلتلك انى قرويه ساذجه ماليش فى ا لاسامي دي
ههههههههههههههههههههههههه

بس شكله حلو يا بت يا مون

بس انا عندي مشكله فى حكاية سخنه دي

يلا مش مهم نتصرف


بس انسى مش هاجربه فى الحر ده انا اساسا الايام دي باخاف اولع الفرن

هاموت يا اختي هاموت

تسلم اديكى يا قمر

Mony said...

أم أحمد المصرية

و انتوا كمان وحشتوني اوي و الله
هي بس مسألة تنظيم وقت
و ربنا ييسر و يوفقني و اعرف انظم وقتي بحيث اني ما انقطعش عنكم تاني بإذن الله تعالي

Mony said...

نكهة مغربية

و عليكم السلام و رحمة الله و بركاته

ان شاء الله احاول ما اتأخرش تاني

لاني فعلا افتقدكم

Mony said...

صبرني يارب


انا ماليش دعوة يا صبصب
ده اسم عالمي

خلاص اعمليه في الشتا و هو عيعجبك بجد

انا لما دقته اول مرة في المحل اللي بإسمه اتلوست

و كنت هتجنن و اعمله

و الحمد لله

موعدنا في الشتاء بأه يا صبصب
:)

واحدة مجنونة said...

بصراحة اول مرة ادخل المدونة
و بصراحة تاني مليش في المطبخ خالص
بس عجبتني فكرة المدونة و ان شاء الله اجرب يمكن اتعلم على ايدك
تقبلي مروري
تحياتي

Mony said...

واحدة مجنونة


اهلا بيكي في مدونتك
و يا رب ماتكونش الاخيرة

الحاجات اللي موجودة معظمها سهل و مابياخدش وقت
جربي
و قوليلي النتيجة

انترنتاوي said...

حاجة حلوة جدا
مشكورة

هديـــل الـروح said...

كل اما بدخل هنا بحس انى جعانه وعاوزه اكل
ربنا بكرمك ع الوصفات دى والله

Anonymous said...

قوي انا بردة جربتها و طلعت تحفة

المحبة في الله ندى said...

ربنا يجزيكوا كل خير

انا قلبي قدرة فول said...

السلام عليكم
انا جديد هنا يا جماعة والنبي حد يساعدني ومش عارف انا باين ع الخريطة ولا اية اصلي مبفهمش كتير في التكونولوبيا اصلي لسة جديد في الطبخ الموقع دة عجبني اوي وحاسس اني في بيتي هنا اكلكو حلو و بيخليني دايما جعاااااااااااااااان حيات ابوكو لو كلام وصل حد يعبرني انا بقالي 3 ساعات بحاول اكتب و مش عارف..

انا قلبي قدرة فول said...

طيب معلش دي محاولة تانية يمكن اكون دوست على الزرار الغلط..انا كتبت يجي 100 كومنت مش عارف اعرف ازاي انهم وصلو..بس انا كدة تعبت النهاردة بكرة ادخل و اشوف ممكن يكونو وصلو بس المواصلات شوية زحمة ع النت..

انا قلبي قدرة فول said...

طيب شكلي اكيد بقا زي صنية المسقعة طب معلش اصل في واحدة ست برة بتقول انها ولدت الف مبروك ليها ويتربا في عزها يارب دي بقا توصل اصلي جربت كل الزراير اللي هنا..على الله

Mony said...

انا قلبي قدرة فول


ايون
الو
الو

واحد اتنين تلاتة


ايوة كده الصوت وصل يا فندم
معلش زهقناك في عيشتك
بس انا عاملة موديراشن للردود

يعني لازم اشوفها الاول قبل ما تتعرض علي الملاء كده

علشان في ناس بتحب تستظرف كتير

معلش بأه
اهه البيت بأه بيتك برضه

علي فكرة انا اللي قلت بره اني ولدت

الله يسلمك يا فندم و الله

عموما مرورك شرفنا و اهلا بيك معانا في اي وقت

أشراقة الأمل said...

روعة مدونة لذيذة بارك الله فيك

noory said...

شكرا يامدام سلاموني على الطبخات الحلوه واتشوق الى رؤية جديدك