السلام عليكم و رحمة الله و بركاته
استكمالا لموضوع البوست اللي فات
فالنهردة ان شاء الله هنتكلم عن الجندوفلي
او
بلح البحر
او
البكلويز علي رأي الاسكندرنية
طبعا الجندوفلي بيستخدم في حاجات كتير
زي ما قلنا المرة اللي فاتت في شوربة فواكه البحر
و أرز فواكه البحر
و كمان طاجن مع الجمبري و السبيط
انا بعمله علي المكرونة بيكون روووووعة
المرة ديه هنعرف طريقة الجندوفلي بطريقة محل عروسة البحر اللي في اسكندرية
اللي راح اكل هناك
هيرفض الاكل في أي مكان تاني اقل منه
المهم
هو ده الجندوفلي
او هو ده شكله بعد ما اتعمل
بس بتاعنا في في مصر لونة بيج
مش اسود زي بتاع اسيا كده
و اللحم اللي من جوة بيكون اقل
ندخل علي المقادير
1 كيلو جندوفلى أو أى نوع محار
ربع كوب زيت
3 ملاعق صغيره ملح
نصف ملعقه شطه حسب الطلب
حزمه كرفس و زيها بقدونس
7 فصوص ثوم
بصله صغيره
قرنان فلفل أخضر حامى او عادى حسب الطلب
جزرتين مبشروين
رشه كمون
رشه زعتر
رشه قرفة
ليمونة كبيرة
طريقه العمل :
في حلة فيها ماء على النار و عند الغليان تصبى الجندوفلى داخله و الإنتظار حوالى 10 - 15 دقيقه حتى تمام السلق
تمام السلق ده يعني الجندوفلي كله يفتح معاك
فى صينية كبيرة يتم عمل الخلطه المفتكسه بضربهم فى الكبه ( يادوب كبسه زر ) و بعدين نحط عليهم الزيت و نخلطهم جيدا و في الاخر اعصر عليهم الليمون و اقلب لاخر مرة
و بعد كده يوضع علي الجندوفلى بعد إنتقاء الحبايه المفتوحه فقط ... لأن حبايه الجندوفلى المغلقه ( لا أنصح بفتحها ) فيها رمله سوداء ( نتيجه زيت البترول الملقى فى المياه ) عدا رائحتها السيئة
و بعد الخلط الجيد بالمكونات تترك نصف ساعه لتتفاعل الخلطه بالجندوفلى
في عروسة البحر كانوا حطين الخلطة في الجندوفلي في كل واحدة علي حدى
زي الصورة اللي فوق
ييعني جندوفلياية جندوفلياية
و انا بصراحة مليش مرار
قلبته فوق الخلطة و تقليب محترم
و ركنته ساعة تقريبا في الثلاجة
(علي ما يوصل بأه لجوة)
و يقدم بعد ذلك
ولا انصح بأكله تاني يوم
لانه بيملح اوي
و بألف هنا
أي خدعة يا ديدي
في كمان طريقة لطاجن سبيط و جمبري و محار لو عايزة
علي فكرة
الطريقة ديه انا عرفتها من شيف شاطر جدا
مسمي نفسه سي هورس في منتدي ابناء مصر
30 comments :
تسلم الايادي بجد
انا بحبه جدااااا بس مكنتش اعرف اعمله
حبقى أجرب الطريقة بتاعتك ان شاء الله
آه يا قلبي
حاطالي صور حبيبي الجندوفلي وكمان بالخلطة
أنا ياختي عايشه في اسكندريه ماريا وهجيب الجندوفلي ده قريب بإذن الله واعمل خلطة حبيبتي موني
يسلموا إيديكي وعنيكي
وعلى فكرة البت ديدي مبسوطة خالص إنك كتبتيلها الطريقة
أصل ديدي تبقى بنت ابن عمتي وعرفتها بيكي ومن وقتها وهي مقيمه في مدونتك
أصلها مجنونة بالطبخ وأشغال الإبرة وأستاذة فيهم
أنا وديدي بنحبك في الله يا موني
و بعدين معاك يا قمر كل يوم كده تخلي اكلي ما يعجبنيش و اتمرد علي الاكل التقليدي و ظروف االامتحانات في البيت و الشغل الايا م دي مش سامحة بالابداع
صبرك علي بس لما الصيف يجي حبقي وراك صنف بصنف
تسلم ايدك
انا فوت ليكي امبارح وقلت متعرفش هي عملت في قلبي ايه وانا متشحتفة على اكلة سمك اسكندراني
لكن تجيبي لي البكلويز عيني عينك وتدخل مصرية تغيظني وتقول انا اسكندرانية وها اعمله
عاااااااااااااااااااااااااااااااااااا
عااااااااااااااااااااااااااااااااا
ها اسيبك للأيام وهي تعلمك
مصرية منصحكيش خالص تاكليه من غيري
صدقيني ها تندمي
ها اكري عليكي قطاع طرق
ومحدش يقول لي هاتي من القاهرة واعملي
اللي زيي بورسعيدي ميعرفش ياكل الحاجات دي الا من الطوالة اللي خارجة من البحر
عااااااااااااااااااااااااااااا
تسلمي يا قمر أنا زي مقلتلك بموت في السمك بكل أنواعو و انت ماشاء الله شغلك حلو جدا
يسلمو اديكي يا قمر
بنت مصر
الله يسلمك يا جميل
خلاص مستنية النتايج بأه
ELMASRYA - MRS WRITER
احبكم الله الذي احببتوني فيه
و جمعنا تحت ظل عرشه يوم لا ظل الا ظله
يابختك باسكندرية و الله يا مصرية
البحر و النوة بتاعة الشتا
و الاكل الطازة
تصدقي انا كمان مجنوة ابره و اشغال يدوية
بس ماليش في الخياطة
سلميلي علي ديدي و قوليلها اي خدعة
:)
أم أحمد المصرية
ولا تزعلي يا قمر
نظرا لظروف الامتحانات
و ان انا فاضية ولا عندي امتحانات ولاااا اييييي حاجة
(انا مش بغيظك ولا حاجة يعني)
:)
فممكن اعملك اللي نفسك فيه و اجيبه لحد عندك يا جميل
بس انت اؤمر
:)
و بعدين الوقت ده انسب وقت نبدع فيه في الفسفور
علشان الامتحانات
و الذكاء اللي بينتج من اكل الفسفور
احنا عايزين اللاولاد مخهم ينور
ستيته حسب الله الحمش
يا سوتيتة انا تحت امرك يا قمر
اجيبلك البكلويز الاسكندراني لحد عندك يا جميل
بس في مشكلة
ان دلؤتي فعلا مافيش بكلويز في اسكندريةولا كابوريا
السماك هو الي اللي كده
الحاجة ديه كانت عنده في الفريزر
و بعدين في مشكلة كمان
البكلويز الفريش بيقعد يطلع لسانه و يرش ماية
طيب ده هيجيلي قلب اطبخه ازاي بس
بصراحة لا يمكن قلبي يطاوعني
فانا عن نفسي بحمد ربنا ان انا اشتريته و هو في الفريزر
و الا كان هيصعب علي و احطه في حوض السمك
دا ماما عايزاني اشتريلها من جنبي سمك بلطي
و في سوق الزيتون
السمك البلطي بيتباع صاحي
بيكونوا حطينه في بانيو كبير و بيقعد يتنطط
طيب انا اجيبه ازاي ده بس
بالتنطيط ده
نصيحة لو عايزة سمك طاااازة
في سوق الزيتون (اللي في شارع سليم)السمك فريش يوم الاحد و الجمعة
بس روحي الصبح و الحاجة لسة نازلة
هتاكلي احلي اكل
بس هم حراقين شوي في الاسعار
غير بره يعني
في موسم البكلويز هتشوفيه و هو صاحي و بيرش ماية
و كل حاجة تانية ممكن تكون صاحية
بتشوفيها رأي العين
و مش هتحتاجي سفر ولا حاجة
نكهة مغربية
ربنا يكرمك يا جميل
انازي ما قلت قبل كده ماليش في الاسماك
بس لي في باقي البحريات
بالهنا و الشفا يا قمر
صباحك سكر ياقمر
بقى أغيب عنك كام يوم ألاقيكي عامله ضرب نار اقول ايه بس تسلم اديكي ياقمر ويخليكي لينا يارب
السلام عليكم ورحمة الله وبركاته
ازيك يا موني
ايه يا ستو انا الاكلات اللي تقطع القلب دي
انت بقالك فتره مجريا ريقنا علي اكلات السمك اللي انا باموت فيها
الجندوفلي ده في بورسعيد ومدن القناه اسمه بكلويز باموت فيه
هو عموما اي حاجه من البحر انا ماقولش لأ
بس تصدقي يا مونمون اننا لما بنروح اسكندرية برضو مش بناكل الا عند عروس البحر
هو كويس جدا بالنسبه لقدوره انا كلت هناك مره ماعجبنيش خالص
بس لعلمك الاسكندرانيه بيقولوا انه مش اد كده وقالولي علي اسامي مطاعم تانيه في كذا حت منها حته اسمها كفر عبده ومطعم تاني في ابو قير علي البحر بس نسيتهم
عموما بالنسبه لي اكلة سمك محترمه من اللي قلبك يحبها وفيها كل ماتشتهيه الانفس وكمان بنص تمن اسكندريه معنها مطعم الكاستن في بورسعيد وهي بورسعيد عموما احسن من اسكندريه في كل الاسماك
جربي تروحي هناك مره عمرك ما هاتستطعمي سمك في اي حته الا بورسعيد
سلام يا قمر امووووووووووه
tota
ازيك يا جميل
بحاول بس اعوض الايام اللي كون فيها مش قادرة اقعد علي الكمبيوتر
و الايام التانية اللي مافيهاش الهام
:)
طمنيني عليكي يا قمر
خمسة فضفضة
انا بعشق البكلويز ده(علي رأي السواحلية)كنت بقرف منه زمان
طبعا اكيد ماكنتش لسه دوقته
بس لما دوقته ماقدرتش استغني عنه
الاسكندرنية بيحبوا قدورة اوي
مع اني لما رحته ماعجبنيش خالص
و شوربه فواكه البحر كان طعمها زفر خالص
مقدرتش اكمل اكل هناك
انما عروس البحر تحسي بالتظافة في ريحة السمك و في الاطباق و الجارسونات و كل حاجة
انا رحت بورسعيد قبل كده
و اكلت في البرج
كان كويس برضه
مستواه حلو
في النظافة و في الجارسونات برضه
اللي في القاهرة هنا مش زيه طبعا بس اهه بيحاول يتماشي مع اللي هناك
اللي نفسي فيه اوي و مش قاددرة انساه
كنت اكلته في البرج هنا في القاهرة
سلطة كافيار
كانت تههههوس
كنت اول مرة ادوقها اساسا
و السلطات كده كده بتنزل مجانا
طلبناها اكتر من اربع مرات في قعدتنا
و معرفتش استخلص ازاي بتتعمل
لو تعرفي ياااريت تنجديني
و انا اشيلك الجميل ده طول عمري
هي كانت شبه سلطة الطحينة بس اغمق شوي
كانت بالضبط شبه سلطة الحمص
بس طعم غيييير
ممكن نروح قريبا ان شاء الله بورسعيد و نجرب الكاستن
ربنا يسهل الحال
السلام عليكم ورحمة الله وبركاته
والله ياموني بالنسبه لسلطة الكافيار انا مادوقتهاش قبل كده هناك
بس الوصف اللي انت يبتقوليه ده ينطبق علي
ال
Taramosalata
ودي سلطة يوناني من انواع معينه من الكافيار الفاتح مش الاسود العادي و دي صورتها
http://4.bp.blogspot.com/_59tXa9YyvJs/RomSRECc4PI/AAAAAAAAAW8/nX8qSf_kIn0/s400/DSC03164.JPG
وطريقة تحضيرها هاتلاقيها هنا :
http://kopiaste.blogspot.com/2008/04/taramosalata.html
وخدي بالك من التكه اللي بيشرحها هنا :
http://greekgourmand.blogspot.com/2008/02/taramoslata-or-tarama-fish-roe-salad.html
بيقولك المفروض الزيت وعصير الليمون يتضافوا بالراحه وبالتبادل لحد ما يتنهوا من غير ما توقفي الفودبروسيسور
يعني زي المايونيز
جربيها بقي وقوليلي هي اللي تقصديها ولا لا
سلام
خمسة فضفضة
تسلملي ايدك و عينك يا قمر...انا آسفة كتيييير علي التأخير و الله
بس ضغط الشغل اليومين دول هيموتني
لما شفت التعليق بتاعك و انا بشتغل عملت
Publish
كده في الخباثة..اصل ممنوع الحاجات الشخصية في الشغل
و طبعا اتلهيت بعد كده و معرفتش ارد
بس هيي شكلها زي اللي اكلتها في البرج..بس مش عارفة اشتري منين الكافيار
في فالسوبر ماركت كافيار كريم كده في انبوب زي المعجون
ده سعره معقول
بس انا اعرف ان الكافيار الحقيقي غالي جدا
فمش عارف بأه اجيبه ازاي ده
بس هي شكلها فعلا زي اللي اكلتها
يا رب اعرف اشتري كافيار
علشان احاول اعمل السلطة ديه
بس ربنا يستر علي المرتب بأه اللي هيطير في مكون من مكونات السلطة:)
نورتيني يا جميل و ميرسي اوي علي تعبك معايا
اولا ما شاء الله المدونة راااااااااااائعة
والوصفة جميلة جدا
انا بحب الطبيخ جدا جداااااااا وناوية ابدع الصيف دة انا هاخلص امتحانات وهتلاقينى بايتة عندك فة المدونة ان شاء الله :)
don don
ربنا يكرمك يا ستي
ده من ذوقك بس
خلاص مستنين نسمع الروائع و نشم الروائح
:)
:)
موني يا حبيبتي انا عندي ليكي هدية بسيطة يا رب تعجبك خشي لمدونتي و انت تلاقيها
وحشاني يا عسل موت
أنت فينك من زمان مشفتكيش
يا رب تكوني بخير
تحفة قوي
انا كمان نفسي اتعرف عليكو انا جديدة في المدونات دي و لسة معرفش حد
ياريت نتعرف على بعض
انا فرحانة إنى إنضميت ليكم
و ياريت تقبلونى معاكم
نفسى أنضم لكم
نكهة مغربية
انا اسفة موووووووت يا جميل علي التأخير
بس انا كنت مريضة بس الفترة اللي فاتت ديه
ادعيلي ربنا يرفع عني
ربنا يكرمك يا قمر علي الهدية الغالية ديه
و اللي كتير علي خالص
جزاكم الله خيرا يا قمر
هنزل اعلان عنها قريبا في المدونة في بوست منفصل بأسمك يا قمرايا
و كمان مرة
سامحيني علي التأخير
Anonymous
اهلا بيكي في وسط اخواتك
و اي خدمة يا جميل انا تحت امرك
غادة الجنة
ده احنا اللي نفرح بيكي يا جميل
نورتينا طبعا
الجنة
انت معانا يا جميل من غير طلب و لا استأذان
ده شرف لينا
اهلا بيكي مع اخواتك
و اي حاجة كلنا معاك يا قمر
ازيك يا مونى
الجندوفلى ده شكله حلو
بس بصراحه معرفش هو ايه
انا اخرى فى اكلات البحر السمك المقلى
بس انتى رحتى فين
يا ريت كده تنزلى اكلات للاطفال عشان تفتح نفسهم على الاكل عشان انا عندى عيال و لا بتوع المجاعات
ما بياكلوش خالص
تسلم الايادى على كل ما هنا بصراحه اكثر من رائع
بس انا ليا طلب لو سمحتى عايزه طريقه كفته السى فود بصراحه دوخت عليها ومش لقيها الطريقه
وجزاكى الله كل خير
لا أنصح بوضع ملح في خلطة الجندوفي لأنه أصلا مالح
السلام عليكم هو لو الجندوفلي مفتوح قبل القلي ارميه
Post a Comment