Enjoy cooking
Browse through over
650,000 tasty recipes.
Home » » كاليماري مقلي(حبار مقلي)

كاليماري مقلي(حبار مقلي)

Written By Mony on Wednesday, April 15, 2009 | 11:05 PM

السلام عليكم يا جماعة

بعتذر بشدة عن التأخير



بس فعلا مش فاضية خالص اليومين دول

خاااالص



اصلي عقبالكم اشتغلت

اينعم من منازلهم بس لسة الواحد في الأول و لسة بحاول ارتب اموري



المهم



في بالي يا مادي علي طول
عايزة ادخل احطلك طريقة الكاليماري(الحبار)المقلي

و انتهزت فرصة ان الدنيا صبح و الناس نايمة و لسة مابدأتش شغل قلت اما الحق اكتبهالك في السريع

بصي يا ستي انا بعمل الكاليماري بطريقتين

و الإتنين تحححفة
(لا تقلقي)



اول طريقة:

المقادير تكفي 4 اشخاص
(مش اكيلة اوي)

نصف كيلو كاليماري
(لو جه معاكي 600 جرام خير و بركة)

3 بيضات

دقيق

ملح و فلفل و كمون

بقسماط
(اللي بنعمل بيه البفتيك ده)

الطريقة يا ستي:



طبعا بتجيبي الكاليماري متنضف من عند السماك
و تنقعيه في شوية خل و ليمون
(علشان الزفارة)

و بعدين تكوني قايلة للسماك يكون مقطعهولك حلقات
(الحلقة في حدود 1 سم تقريباً)

تحضري طبق فيه البيض مخفوق
(و عليه شوية ملح و فلفل صغيرين)

و تخلطي بالدقيق ملح و فلفل و كمون
(تبَهري الدقيق يعني)

و طبعا البقسماط في طبق تاني لوحده

و تحضري جنبك طبق فاضي للي هيطلع عليه الحبار المعمول بالبيض و الدقيق و البقسماط

تاخدي من الحبار و تحطي في الدقيق الأول و بعدين في البيض و في الأخر البقسماط

و تكوني محضرة طااسة علي النار في زيت ساخن

و تحطي فيها الحبار اللي بالبقسماط

هياخد معاك في حدود 3 دقائق

و تخرجيه علي ورق ماص للزيت

و يقدم بالهنا و الشفا





الطريقة التانية ديه بأه يا ستي اخدتها من موقع ايطالي

كانت بنت حلال برضه

بس فيها فكرة جديدة

المقادير تكفي 4 اشخاص
(بس اكيييلة)

كيلو كاليماري متنضف و مقطع حلقات

كوب كبير و نصف دقيق سميولينا
(بس يكون مطحون اوي مش محبب)

كوب و نصف دقيق ابيض

كيلو لبن كامل الدسم

ملح



ممكن نبهر الدقيق زي الطريقة الأولانية



الطريقة:

هي عجيبة بس لا تقلقي بيطلع جميل و الله
طبعا هننقع الكاليماري في الخل و الليمون برضه علشان الزفارة


و بعدين هننقع الكاليماري في اللبن لمدة ربع ساعة
(لسبب لا يعلمه الا الله)
(اللي يعرف يقوللي الله يكرمكم)
و بعدين نصفيه من اللبن و نحطه في طبق الدقيق
(بنكون خالطين دقيق السميولينا مع الدقيق العادي)

و بعدين نروح حاطينه في طاسة كبيرة فيها زيت ساخن

و نسيبه دقائق لحد ما لونه يكون ذهبي غامق

و نرش عليه ملح

او ملح و فلفل او كمون

او نرش عليه دقة تححححفة
(كاتبالك عنها تحت)

و نطلعه و نقدمه بالهنا و الشفا



لحسن حظك طلعت محتفظة بالفيديو بتاع الطريقة ديه

اهه








بالنسبه للطريقتين بتوعانا

اول ما بيطلع الكاليماري علي المانديل بكون محضرة حاجة اسمها دقة

عبارة عن ملح و فلفل و كون و شطة و ارش علي الكاليماري و هو طالع بيدي طعم روووووعة

الدقة ديه جدتي الله يرحمها كانت بتحبها و بتعمل منها كميات كبيرة و تشيلها

و ساعات كانت بتحب تاكلها كده بالعيش فقط لا غير





انا فعلاً كان نفسي في الكايماري جدا

و طبعا تامر باشا هايص علشان البحريات اللي بياكلها ديه

ممكن المرة اللي بعد الحلو اعملك طاجن كاليماري

دقته في محل عروسة البحر في اسكندرية و كان تححححفة

او مكرونة بفواكه البحر



فتكم بعافية بأه علشان الواحد يشوف شغله بأه

SHARE

About Mony

16 comments :

ELMASRYA - MOSLEMA LELLAH said...

أولا : مبروك على الشغل ربنا يوفقك

ثانيا يسلموا إيديكي يا موني الطريقتين تحفة تحفة وأنا عن نفسي هعمل الطريقة الأولى النهاردة بس هجربها في الجمبري لأن مافيش عندي كاليماري اللي هو الصبيد بالاسكندراني

بالنسبة لخلطة جدتك دي فعلا روعه وحماتي بتعملها على طول

يسلموا إيديكي وفي انتظارك دايما انتي وأطباقك اللذيذة

دمتي سالمة

ستيتة said...

طيب انا عندي سؤال عجيب
لاحظت في الطريقتين شيء غريب
خير اللهم اجعله خير

بنجيب توم ونفرمه عدل قوي وبنجيب خلطة السمك من عند العطار "رجب العطار تحديدا" وبعد ما تغسلي الكاليماري لازم يتخلط بالخلطة دي قبل الدقيق ثم البيض ثم البقسماط

مش عارفه يا اوختشي هو ينفع حد ياكل السي فود من غير تتبيلة التوم؟
التوم ما لينا غيره والله ما لينا غيره

قلت اديكي نقطة في العضل مع اعترافي الكامل بأنك ونعم النساء والله

الف مليون مبروك ع الشغل ربنا يكرمك فيه
تحياتي

tota said...

مبروووووووووووووووووووووووووووك ياقمر على الشغل ويارب دايما في تقدم

ربنا يكرم ويوفقك ياموني وتقدري علينا احنا الاتنين احنا والشغل

اما عن الكليماري المقلي جميل جدا الطرقيتين برغم اني اول مره اسمع عن الطريقه التانيه الا انه الجديد منك ياموني كله جميل وتسلم ايديكي ياقمر وطبعا انشاء الله هجرب واقولك على ...............النتيجه؟؟؟؟
تسلمي لينادايما؛؛؛

نكهة مغربية said...

طريقة فعلا جميلة و لديدة
شكرا يا عسل

Mony said...

ELMASRYA - MOSLEMA LELLAH


ربنا يكرمك يا جميل

بالنسبه للجمبري انا ممكن اقولك علي طريقة احسن من ديه كمان

خاصة بالجمبري فقط
و تخليه مقرمش و تححححفة
لو لسة ماعملتيهوش قوليلي و اناانزلهالك مخصوص

اما خلطة جدتي فهي فعلا روعة
و بتستخدم في حاجات كتيييييييييير جدا

Mony said...

ستيته حسب الله الحمش

سوتيتة حبيبة قلبي

لا يا فندم كلامك صح
و أوامر كمان

بس لما نعمل التتبيلة ده هتديله النكهة البيتي

يعني اا وقفت جنب الراجل بتاع الجمبري و هو بيقليه و مابيكونش متب ولا حاجة

بس طبعا التتبيله ديه بتخلي طعمه اطعم و الذ


و ربنا يكرمك يا جميل علي الكلام الحلو اللي انا ما اجيش فيه حاجة

(اخجلتم تواضعنا)

Mony said...

tota

الله يبارك فيكي يا جميل

هو مش شغل زي المعني المعروف
لأني بشتغل من البيت
بس المشكلة اني بفضل علي الكمبيوتر لمدة 8 ساعات مش بقدر افتح حاجة تانية ولا حتي الحق ارد علي حد

الحمد لله


جربي الكاليماري
و طمنيني ايه الأخبار
مع اني مطمنة عليكي لانك ماشاء الله عليكي شطورة

Mony said...

La cuisine du monde à la marocaine

جزاك الله خيرا
و لا شكر علي واجب

لجين أبو الدهب said...

جميل اوى ..

وانا كنت اعرف الطريقة الاولى ..

وكان هافف عليا اليومين دول فعلا ..

تسلم إيدك يااحسن شيف ..

ومبروك على الشغل ..

دمتِ بخير ..

ELMASRYA - MOSLEMA LELLAH said...

موني حبيبتي

قوليلي على طريقة الجمبري

أنا ماعملتوش وعملت بداله كفتة رز وسمبوسة

في انتظار الطريقة الرهيبة يا معلمي وكلمة السر كتكوت

خمسة فضفضة said...

السلام عليكم ورحمة الله وبركاته

ماشاء الله تسلم الايادي يا موني
جميله جدا الوصفه الطريقه التانيه دي فعلا بتبقي روعه بس باعملها بالدقيق العادي لوحده
باعمل اللبن والدقيق زي الزلابيا كده بس تخينه شويه ، وطبعا نكون متبلينها بالملح والفلف والكمون والشطه ، واحط حلقات السبيط وبعدين اطلعها علي الزيت بتبقي مقرمشه وجميله جدا وعليها طبقه حلوه زي بتاع البطاطس الفريسكس اللي في كوك دوور


بس خدي بالك المفروض ما يتسابش يتقلي زياده عن اللزوم يادوب يصفر لانه لو اتساب كتير في الزيت بيجلد ويبقي بيشد وطعمه بيبقي مش حلو


الخلطه بتاع جدتك دي ما باقدرش استغني عنها ابدا بس باضيف عليها كمان كسبره ناشفه ، باستعملها فكذا حاجه وعلي طول لازم يكون عندي منها كميه متحضره


سلام يا قمر

kochia said...

تسلم ايديكي
انا جربتها الحكاية دي قبل كدة والحقيقة فشلت فشل جامد اوي
مش عارفة ليه طلعت بتشد كدة
ناس قالولي اخرتيها علي النار
وناس قالولي كانت عاوزة تستوي اكتر
مع اني اكلتها من عند اصدقاء حلوة اوي .. ومكسوفة اسالهم عملوها ازاي
اجرب بقي تاني وامري لله ولا ايه ؟؟

خايفة اجربها تاني بصراحة

Mony said...

kochia


بصي يا جميل
لو طلعت بتشد يبقي اخذت سوا كتير علي النار

عموما البحريات معظمها مش بتاخد وقت كبير علي النار
زي الكبدة كده لو سبتيها علي النار كتير تيقي ناشفة و عاملة زي الكاوتش



زي ما قالت دكتورتنا خمسة فضفضة:
خدي بالك المفروض ما يتسابش يتقلي زياده عن اللزوم يادوب يصفر لانه لو اتساب كتير في الزيت بيجلد ويبقي بيشد وطعمه بيبقي مش حلو



ماشي الكلام يا ستي

و بعدين انا لو قلتلك عد عدد مرات الفشل اللي بفشله علي ما اظبط الأكلة هتعرفي انك في منتهي التفوق

Mony said...

خمسة فضفضة


تسلم ايدك انت يا جميل

الخلطة بتاعتك ديه فعلا جميلة
ساعات بعملها

و ساعات تانية بحمر بيها السم
ك
و ساعات اكتر بعمل فيها حلقات البصل المحمر بتاع المطاعم
onion rings
بتبقي رووووعة برضه
زي بتاعت المطاعم بالضبط

Mony said...

ELMASRYA - MOSLEMA LELLAH


علم يا فندم و ينفذ
الطريقة في بوست خاص
علشان خاطر عيونك يا ستي بس انت اطلبي

Mony said...

لجين أبو الدهب

ماشي يا ستي

عايزين نسمع عن نتايج التجارب

بس كل خير ان شاء الله