الرز باللبن
عرفت طريقة جديدة للرز باللبن مختلفة شوي عن اللي كنت عارفاه من ماما
عرفتها من اصحاب محلات الاصيل شخصيا
للي مايعرفش محلات الاصيل
دول ناس بتوع كباب و كشري و حلواني و كله يعني
موجودين في مدينة نصر و المهندسين و وسط البلد
و الغريب ان حاجتهم كلها ممتازة
سواء كانت حوادق او حلويات
بس الرز باللبن بتاعهم غيييير
المهم ندخل علي المقادير و الطريقة علي طول بأه
كوب ارز
(طبعا ارز مصري)
(متنقي و مغسول)
5 كوب مايه
2 كيلو لبن
فانيليا
سكر حسب الرغبة
الطريقة بأه
بنسوي الرز في الماية اللي قلنا عليها
بس نهدي النار و نغطي الحلة كويس علشان احنا عايزين الرز يستوي براحته خااااالص
لحد ما الماية بتاعته تنشف و الرز يكون معجن خاااالص
خلاص كده الرز مافيهوش ماية
نحط سكر بتاعنا و نقلب كويس لحد ما السكر يسيح
و بعدين نزود اللبن حبه حبه
نزود و نقلب لغاية ما يوصل للقوام المطلوب
(ممكن مايحتجش ال2 كيلو كلهم)
لو بتستخدمي اللبن المعلب يبقي حطي شوية قشطة مع اللبن حجم كوب زبادي كبير كده
علشان يدي طعم حلو
و نسيبه لما يغلي علشان نتأكد ان هو ده القوام بتاعنا
بس اول ما يغلي حطي الفانيليا
في ناس هتقوللي احنا ليه ماحطناش نشا
اقول علشان احنا لما غلينا الرز و قطعنا نفسه استخلصنا النشا بتاعه فهو ده اللي هنستخدمه
كده خلاص نغرف بأه في السلطنيات بتاعة الرز باللبن
و نرش علي الوش قرفة و جوز هند و زبيب و مكسرات مجروشة
و بألف هنا و شفا
علي فكرة
انا قاعدة باكل منه دلؤتي و انا بكتبلكم
18 comments :
يا صباح الحاجات الحلوة
إيه الطريقة الروعة دي يا موني؟
أنا هجربها النهارده بإذن الله
بجد وصفاتك للأكلات تححححححححححححفه
في انتظار المزيد
خالص مودتي
ELMASRYA - MRS WRITER
ربنا يكرمك يا جميل
خلاص مستنية النتيجة بأه
نورتيني يا قمر
حلو
انا بعمله حلو بس مش بالطريقة دي
بنقع الرز كتير وبعدين بغليه في اللبن وازود شوية مية لحد برده ما يتقطع قلفبه بس بحط شوية نشا في الاخر وبيطلع حلو اوي
بس هجرب الطريقة دي
تحياتي
انا فعلا بعمله كده بس مكنتش بسويه لدرجة كبيرة اوي وكمان كنت لازم احط نشا علشان يمسك جامد
بس حعمل بأه ان شاء الله المرة الجاية زي ما قلتي بالظبط
تسلم الأيادي يا قمرة
تسلم ايدك يا مونى
انا كنت بعملها كده بالضبط مع ملاحظة انى كنت بضيف معلقة او اتنين نشا عشان يمسك زى المهلبية
بس جربت طريقة تانية ولقيتها احلى كتير .. انك متحطيش مايه خالص وتسوى الرز فى لبن من الاول
مع اضافة فانيلياو ربع معلقة قرفة وجوز هند مبشور ومعلقتين نشا برضه مدوبين فى مايه
طعم الرز بيبقى شارب لبن وتحفة جدااااا احلى من الطريقة الاولانية
وممكن تغرفيه فى طباق
او تحطيه فى صنية وتدخليه الفرن يا خد وش بيبقى مقرمش وطعم و لو ناوية تعمليه كده يبقى تحطى معلقة سمنة بلدى او اتنين حسب المقدار عندك وهو لسه عالنار قبل ما يخلص
خالص ودى
سالى
يممممم
طب هاتى معبقة ادوق
بقى لى فترة ما كلتش رز بلبن فعلا ..
هاجيب لبن النهاردة اعمله ان شاء الله ..
جزاكِ الله خير يااجدع شيف ..
دمتِ بخير ..
والله فعلا تسلم ايدك
عمري ما عملته بالطريقة دي
ها اعمله وادعي لك يا مثقفانا بالقوي يا موني
تحياتي
ايوووووه تمام انا باعمله كده على فكره
بس انا توصلت للموضوع ده لوحدي
ماما كانت بتنقعه فى اللبن وبعدين تحطه على النار ونفضل نقلب بقى وموال
بعدين انا قلت يعنى لو سويناه الاول فى مايه هايحصل ايه بدل وجع القلب ده
وجربت وطلع احلى بكتير
بس انا بقى باحب ازود الحليب شويه واحط معلقة نشا
مش عارفه بيبقى اطعم كده
تسلم اديكى يا بطه
kochia
اكيد لازم يطلع منك حلو يا جميل
انك لمتمكن
:)
جربي تستخلصي النشا بتاع الرز بدل ما يضيع في الماية
لو بتحبي الرز باللبن خفيف
يعني مش ماسك اوي
يبقي ماتزوديش نشا
بنت مصر
انا برضه ماكنتش بسويه جامد
بس كنت بستغرب من بتاع بره ان الرز بتاعه يكاد يكون مش باين
و اكتشفت بعد كده الطريقة
بس لو انت بتحبي قوامه جامد اوي زي مابتقولي
يبقي لازم تحطي نشا برضه في طريقتنا ديه في الأخر
واحــ الفكر و القلم ــة
طريقتك التانية جميلة اوي
انا كنت بعمل كده في الاول
بس كده الرز هياخد وقت طويل في التسوية لو لقيتي حل لتسويى الرز اسرع و بطريقتك ديه قوليلي يا ريت
نورتيني يا سالي
لجين أبو الدهب
ربنا يكرمك يا لوجي
بس عايزة افكرك لو بتحبيه ماسك اوي يبقي حطي نشا في الاخر
(ملعقة كبيرة او ملعقتين حسب الكمية مذابة في اقل من ربع كوب ماء بارد و تحطيه بعد ما يغلي الرز باللبن)
ستيته حسب الله الحمش
ربنا يكرمك يا ستوتة
يا حبيبة قلبي
ثقافة ايه بس يا فندم
ماتحرجيناش امال
صبرني يارب
ده بأه اسمه توارد افكار يا جميل
و طبعا لما يكون في لبن كتير لازم طعمه يكون احلي
واحــ الفكر و القلم ــة
طريقتك التانية جميلة اوي
انا كنت بعمل كده في الاول
بس كده الرز هياخد وقت طويل في التسوية لو لقيتي حل لتسويى الرز اسرع و بطريقتك ديه قوليلي يا ريت
==================================
مش بياخد وقت ولا حاجة والله
الفرق بسيط يعنى
ممكن تنقعى الرز فى مايه قبلها عشان يستوى بسرعة من غير سلق
لكن انا بغسله واصفيه واحطه فى اللبن على طول يدوب يغلى وهدى النار بقى عالاخر وسيبيه يعيش مع نفسه وكل شوية قلبى عشان ميلزقش
خالص ودى
سالى
حاجات جوايا
طبعا احسن كتييير اني اعمله في اللبن صافي
علشان الغذا
و علشان الرز يشرب لبن علي اد ما يقدر
عملته يا موني امبارح بس أنا ماهريتش الرز قوي سيبته يكمل سوا في اللبن علشان يشرب منه و بالتالي بما انه ماستواش قوي احتجت أزود ملعقة نشا مذوبة في شوية ماء في الآخر و طلع تحفة تسلم ايديكي يا جميل
مرسى جدا
Post a Comment