Enjoy cooking
Browse through over
650,000 tasty recipes.
Home » » صينية الجمبري بالخلطة

صينية الجمبري بالخلطة

Written By Mony on Sunday, April 5, 2009 | 11:01 PM

السلام عليكم و رحمة الله و بركاته



جايبين انهاردة معانا صينية جمبري



و طبعا كالعادة الطريقة واخداها من شيف شربيني ملهمي و ابويا الروحي في عالم المطبخ

ربنا يجعله في ميزان حسناته و الله





رغم اني ضد اني اعمل المأكولات البحرية في البيت الا ان علشان خاطر عيون ست مادي هنعملوه و نزفروا البيت
(علي رأي الاسكندرانية)


عايزة سبراي معطر لو سمحتي
و حد يجي يغسل المواعين بعد الاكل
بهرج طبعا و انا اللي هتدبس فيهم كالعادة





نبدأ بأه يا ستي





المقادير :



كيلو جمبري وسط كبير لو عايزة جامبو مافيش مانع يعني

(اهم حاجة انه يكون حاجة محترمة كده مش اللي بيصتادوا بيه ده)
و فرصة الجمبري دلؤتي رخيص
(محلات المحمل بتبيع الجامبو السويسي ب55 جنيه للكيلو يا بلاش)
(علشان الشعب ينبسط و ياكل)



بصلة كبيرة مقطعة معكبات صغيييرة

طماطم كبيرة مقطعة مكعبات صغييييرة

فلفل رومي كبيرة مقطعة مكعبات صغيييرة

ملعقة صغيرة ثوم مهروس

ملح

فلفل

نصف ملعقة صغيرة كمون

اقل من نصف ملعقة صغيرة زعتر

اقل من ربع كوب خل

عصير ليمونة

شوية زيت





الطريقة:

انا هقولكم بالمرة علي طريقة تنضيف الجمبري علشان كنت بضًيًع نصف الجمبرياية في التنضيف

المفروض انت بتقولي للراجل ينظفلك ضهر الجمبري



طيب لو ما نظفهوش



زي الشاطرة كده تجيي الجمبري من ظهره و بمقص صغير تقصي القشر من الراس للذيل
(ماتقصيش الذيل طبعا)

و تشرطي شرطة بالسكين بالراحة في مكان االعمود الفقري بتاع الجمبري في لحم الجمبري نفسه
(طبعا هو مالوش عمود فقري بس انا بحاول اوضحلك الصورة)

هتلاقي زي عرق كده هو ده امعاء الجمبري

شيلية طبعا

عايزة افكركم اني ماشلتش الراس
(علشان الست اللي في الصور شالتها)


هتلاقي في راس الجمبري مادة كده لونها اصفر او برتقالي
اوووعي تشيليها

بيقولوا عليها البطروخ بتاع الجمبري و هي اللي فيها الفايدة كلها

(اصل انا زي الباشا كنت افضل ادعك فيها لحد ما اشلها تماما)
(و تامر كان بيسألي هو فين البطروخ بتاع الجمبري كنت اقوله اللي شكله برتقالي ده يع انا شيلته)
(فكان بيلطم مني)
(عبيطة بأه)



بس كده خلاص

و تنقعي الجمبري في ماية فيها دقيق و ملح و ليمون
(بس كتري الليمون)

و تسيبيه شوي علشان الزفارة
(10 دقائق مثلا)


انا كده ماقشرتش الجمبري

الصينية ديه بتكون احلي كده



طبعا ممكن تستخدمي المقشر مافيش مشكلة

بس انا بقولك انا بعمل ايه



المهم

نحط كل الحاجات الحلوة اللي عملناها في المقادير ديه مع الجمبري في صينية او طاسة كبيرة و نقلب كويس

و نحطها علي البوتاجاز من فوق
(مش محتاج فرن لانه مش بيخد وقت)



و تغطيها و كل فترة تقلبي



هينزل مايته كلها و بعدين يشربها و كده خلاص نكون خلصنا



التسوية مابتكملش ربع ساعة



ممكن طبعا يتاكل كده من الصينية

بس انا بحب اعمل جنبه رز ابيض

و احط منه علي الرز و شوية صوص و الرز يكون طعمه تححححفة



ممكن من غير رز خااالص و جنبه سلطات و خلاص



و بالهنا و الشفا



(ده بأه يا مادي تجيبيلي منه شوية)


ملحوظة صغننة علي جنب
ممكن لو عايزاه مشوي
يبقي الخلطة ديه ممكن نستخدمها كتتبيلة
تسيبيه فيها نصف ساعة مثلا و بعدين تشوحيه في طاسة علي النار او علي الشواية




SHARE

About Mony

34 comments :

Rosa said...

جامدة جداً و إن شاء الله هجربها بس لما أفهم حوار الريجيم اللي أنا دخلت فيه دا هيجرا فيه ايه الأسبوع الجاي.

أنا بقالي فترة مش متابعة برنامج من كل بلد أكلة فتعملي في معروف يا موني و تقولي لي مواعيد الشيف شربيني و الشيف يسري و الشيف حسن؟

Mony said...

Om HAGAR

ماهو البحريات تناسب الرجيم يا ام هاجر
و لا انت ماشية علي قايمة اكل معينة؟؟


انا عندي حلقات قديمة
انما انا مش منتظمة برضه في الفرجة علي البرنامج
من ساعة مشو شريف تقريبا
بس مواعيدهم مش منتظمة كتير بيعتذروا و حد تاني يجي بدالهم



هحاول اسألك حد متابع

بنت مصر said...

بصي الجمبري والكابوريا والاستاكوزا من الممنوعات عن دخولها البيت

انا دخلت للمشاركة المعنوية بس:)

وطلب لو سمحتي

عايزة موضوع عن المكرونة لأن دي من الاساسيات اللي بيحبوها الولاد وبصراحة بزهأ من الطريقة التقليدية اللي بالصلصة أو البشاميل فلو ينفع تجيبيلنا طرق متنوعة لعمل المكرونة أكون شاكرة

تسلميلنا يارب ومعلش بنتعبك معانا

Mony said...

بنت مصر


انا كمان مابدخلش المأكولات البحريه في البيت علشان انا عندي حساسية و الريحة بفضل شامها بعدها بيومين كمان
تامر بيقعد يحلف ان الريحة مشيت بس انا بفضل قرفانه من نفسي طول الوقت


المهم يا ستي
طيب ينفع مكرونة بالجندوفلي و الكريمة؟؟؟
اه بعدت عن الجمبري و الاستاكوزا و الكابوريا
:)

اصلي مش بعرف افكر لما حد يقولي افكرله في اكل

ممكن تجربي المكرونة بصوص الماشروم و تعملي معاها بيكاتا
انا بحبها جدا

القدر و انا said...

مونى
تقبلى مرورى اولا
تسلم ايديك
انا احب الجمبرى ولم اجرب عمله ابدا
لكن انشاء الله اتتبع وصفاتك
انت عارفة الاسكندرانية
نص الاسبوع ماكولات بحرية
جزاك الله خيرا

Anonymous said...

طريقة جديدة وشكلها لذيذ

انا بجيب الجمبري كتيرر لانه جوزي بيحبه لكن معرفش الا طريقتين بس

زبدية الجمري

والجمبري المقلي بالبقسماط

هبقى اجرب الصينية بالخلطة

تسلم ايدك

Mony said...

القدر و انا

يافندم مرورك علي راسي من فوق


طبعا الوصفة ماتجيش جنب الوصفات الاسكندرانية حاجة طبعا

انا برضه بحب البحريات بس السمك لاء
و ما اكلهمش في البيت

متعبه في اكلي
:)


نورتينا بالزيارة اللي نتمني انها تتكرر

Mony said...

نـــوارة

طيب شاركينا يا جميل بذبدية الجمبري ديه
انااول مرة اسمع عنها
:)

و جربي صنيتنا وابقي قوليلنا النتيج بأه

بنت مصر said...

هههههههههه

يا موني خلينا بعيد عن اي اكلة بحرية مع المكرونة

لأن حتى الجندوفلي ممكن أكله بس برة البيت

بس حلوة اوي المكرونه بالمشروم لكن معرفش اعملها

تسلميلي يارب

لجين أبو الدهب said...

الله ..

جميلة جدا الطريقة دى ..

انا على طول باكل روبيان مسلوق ..

بس ان شاء الله هحاول اجيبه وابقى اجرب الطريقة دى ..

تسلمى يااجدع شيف فى الدنيا ..

دمتِ بخير ..

Mony said...

بنت مصر

طريقة المكورنة اللي قلتلك عليها عن البيكاتا بصوص الماشروم

لما بعمل البيكاتا بشيل اللحم و اصلب الصوص علي الكرونةواقلب كويس بيطلع طعمها جميييل اوي و الاولاد عندي بيحبوها

Mony said...

لجين أبو الدهب

ربنا يكرمك يا لوجي

بس مسلوق يا شيخة

انتوا بتعملوا رجيم و لا ايه؟؟

لا جربي ديه و انت مش هترجعي للمسلوق تاني خااالص

ستيتة said...

انا جاية اسلم
واقول يخليكي يااوختشي انكقولتي لي على المحمل
وطبعا انا بورسعيدية يعني راضعة رز وسمك
هع هع هع
جربتي الملوخية بالبعجري؟ تفحة تفحة صدقيني يا موني

تحياتي

الجواز و سنينه said...

مش هاقولك غير
جوعتييييييييييييييييييييييييينى

Mony said...

ستيته حسب الله الحمش


طيب الحقي بأه يا سوتيتة علشان العرض ده بدأ من اسبوعين
و جميع فروع المحمل كانت علي عينها و خاصة قسم الاسماك


انا جربت الملوخية بالجمبري
في مطعم البرج

هي كويسة و بنت حلال

بس حسيت الملوخة بتاعتنا اطعم

يمكن علشان ديه معمولة بالماية
و بتاعتنا معمولة بالشربة


مش عارف

Mony said...

الجواز و سنينه

اتفضلي ياا فندم كلي كل اللي نفسك فيه

كل حاجة متاحة اهه
:)

Anonymous said...

مرسي ياموني بجد مرسي علي زوقك ياجميل
انا هجرب ان شاء الله يامونمون
بس ياحبيتي التنضيف ده في سمكين بينضفوا
بدل وجع القلب
ده وصلت عندنا لتقوير البذنجان
شكلها تحفه ياموني ان شاء الله هجرب
تسلم ايدك

kochia said...

تسلمي

Mony said...

mayada

مانا عرفت موضوع ان السماكين هم اللي بينضفوه ده متأخر اوي يا مادي

اصل ماما مابيعجبهاش تنضيف حد
فكانت تجيب السمك و الجمبري و تقف تنضف علشان تتطمن
و طبعا كان بيبقي كمية كبية

و ماقلتلناش خالص انه ممكن السماك ينضف
دانا عرفتها بالصدفة

يالا بأه جربي و بيضي وشي
بس برضه عايزة افكرك بالكِنز اللي عندك
(مامتك)
اكبشي منها علي قد ما تقدري

Mony said...

kochia

جزاك الله خيرا

و عايزين نسمع اخبار التجارب بأه
:)

خمسة فضفضة said...

السلام عليكم ورحمة الله وبركاته

ماشاء الله تسلم الايادي يا موني

باعملها زيك بالظبط بالظبط ماعدا الخل بس مش باحطه

واصلا انا باموت في الجمبري واي اكله ليها علاقه بالبحريات ان شالله اكلها كل يوم


هو انت ليه ضد عمل المكولات البحريه في البيت ؟؟

سلام يا قمر

احساس طفلة محبة للرومانسية بس واقعية said...

بحبوا جدا خاصة بعد ما عرفت اعملة
هبقى اجرب الطريقة دى كمان
بس اعتقد هيأخذ وقت اكبر على النار
انا بيأخذ معايا من نص ساعة
لساعة الا ربع

يمكن لان حجمة كبير ؟؟

مستنية باقى الاكلات اللى بتجوع جدا دى

تقبلى مرورى

Mony said...

خمسة فضفضة


ربنا يكرمك يا دكتورة
شكلك فعلا شاطرة في المطبخ

انا بأه مابحبش اعمل بحريات في البيت علشان انا عندي حساسية
و الحساسية ديه تخليني اشم حتي الروايح الخفيفة جدا اللي محدش يشمها
فأقل ريحة ممكن افضل شماها باليومين و التلاتة كمان
و كل شوي افضل ارش معطر و اهوٍي في الشقة علشان الريحة تروح
و زوجي يقعد يحلفلي انه مش شامم حاجة و ان الشفة رحتها كويسة بل ممتازة لكن انا للأسف بفضل شامة الزفارة لمدة طويلة

فبفضل متعذبة انا لوحدي بالريحة الي اجل غير مسمي

Mony said...

احساس طفلة محبة للرومانسية بس واقعية

لا لا مش بياخد وقت خالص
بالكتير اوي اوي هياخد ثلث ساعة علي النار
الجمبري مش بياخد وقت علي النار ابدا يا جميل و إلا ينشف و يبقي عامل زي الكاوتش

صبرني يارب said...

يا موني يا وحشه

جوعتييييييييينى

انا هاروح اجيب جمبري كده على فكره

Mony said...

صبرني يارب


انتهزي فرصه ما هو رخيص اليومين دول





مش عارفة انا هو لسة رخيص ولا لاء

ليلا said...

تسلم الايادى حبيبتى على جميع الاكلات الرائعه بس لو سمحتى عايزه طريقه كفته السى فود لو امكن تنزليها لانى مش لقيها خالص

Mony said...

ليلا

بصي يا جميل
ديه كفتة الجمبري
نجيب الجمبرى الصغير خالص ونقشرة ونقطعه بالسكينة صغير قوى ثم نضع علية ملح وفلفل وكمون وليمون وثوم ونتبله كويس وبعدين نجيب كبشة دقيق نعجن بيها الجمبرى لحد ما يمسك نفسه . نعمله صوابع ونحمرها او بعد مانعملها صوابع نشويها على الشواية

و في طريقة تانية
لكفتة الجمبرى او السمك
نجيب كيلو لحم جمبرى من النوع الابيض او الرمادى
او كيلو لحم سمك بحرى
وبصله متخرطة وراس توم متقشره وشبت وبقدونس وكسبره خضرا
وكوباية رز مغسوله ونسيبها شويه مبلوله لسهولة الطحن
وطبعا ملح وكمون وكسبرة ناشفه وشطة
نفرم ده كله مع بعضه بالمفرمة او بالكبه
هاتلاقى عجينه لونها اخضر وتلزق فى الايد
:2:
هانجيب طبق غويط ونحط فيه نص كوباية زيت
ونبدأ ندهن ايدينا الاتنين بالزيت ونصبع من العجينه صوابع قد الصباع
ونرص فى صينيه كبيره .. لان مش هانلحق نصبع ونحمر فى نفس الوقت
:uff:
ويكون عالنار زيت عميق ساخن ونبدأ ننزل الصوابع ونحمرها فى الزيت
ونطلعها باللون الذهبى او البنى الفاتح


و معلش بأه علي التأخير في الرد
:)

أم ياسمين و حبيبة said...

جزاك الله خيرا

انا متابعة طرقك وان شاء الله اجربها

ملك said...

السلام عليكم ورحمة الله اولا حبيت اقولك تسلم ايدك على الجمبرى وانا كنت بدور على طريقة حلوة للجمبرى ومبسوطة انى دخلت الموقع بتاعك لان بجد شكل الاكل كله تحفة انا لسه مشوفتوش كله طبعا وكمان اسلوبك بسيط ورائع اتمنى ليكى التوفيق واتمنى انك تقبلينى صديقة مبتدئة فى فن الطبخ

Mony said...

ملك

الله يسلمك يا فندم
ده من ذوقك


عايزة اعرف رأيك بعد التجربة كمان
:))
و انا موجودة بإذن الله في أي وقت
:)

Anonymous said...

ان شاءالله اكيد هجربوه النهاردة ومتأكدة انه هيبقى حلو ان شاء الله بس انا كنت عايزة اقترح شىء ممكن اقدمه من خلال موقعك يمكن اقدر افيدكم واخذ ثواب انا ربة منزل ومحبة للاستماع للمعلومات الطبية والنفسية وكل ما يخص المرأة وخاصا ربة البيوت فلو تحبى انى اضيف بعض المعلومات الطبية للموقع انا حابة انى افيد ربات البيوت من البيت لو حضرتك مش محبذة الفكرة مفيش مشكلة ونظل مشاركين فى فنون الطهى وشكرا

Mony said...

ملك

معذرة على التأخير في الرد
:))
أهلا بيكي طبعا في أي وقت
بس للأسف المدونات بتختلف عن المواقع و المنتديات
علشان بتكون عاملة زي البروفايل الشخصي
صاحب المدونة هو اللي يقدر يضيف فيها و يظهر التعليقات (علشان كده تعليقك تأخر في الظهور)

على عكس المنتيات الكل ممكن يشارك

أنا بعتذر و الله جدا لأني أنا كمان كنت هستفيد أكيد كتير من إضافاتك

Unknown said...

روعه