Enjoy cooking
Browse through over
650,000 tasty recipes.
Home » » العرقسوس

العرقسوس

Written By Mony on Thursday, April 2, 2009 | 5:38 AM

السلام عليكم و رحمة الله و بركاته

جبتلكم معايا انهاردة طريقة العرقسوس بتاع بره




بصراحة انا ماليش فيه اوي يعني بس عندي اخت مدمناه و ماما كمان بتحبه و تامر بيمووووت فيه



في يوم اختي سألت الراجل اللي بتجيب من عنده كل يوم لتر و تشربه لوحدها
(اللهم لا حسد)
قالتله ايه السر في العرق سوس بتاع بره



اشمعني بتاع البيت مش بيكون بالطعم ده



قاللها الراجل السر في التخمير



و قاللها علي الطريقة ديه



لو عايزة تعملي مثلا 2 لتر



المقادير



5 ملاعق كبيرة مسحوق العرقسوس
(بيتباع عند العطار)



ربع ملعقة صغيرة بيكاربوناتو

(بيكنج صودا- او – بيكاربونات الصوديوم)
(نفس الاسم يعني)




الطريقة:


خدوا بالكم بأه من الطريقة كويس علشان ديه اللي فيها الحرفنه



بيحط العرقسوس في طبق كبير غويط

و يحط عليه البيكاربوناتو

و يقلب

و يرش عليهم ماية

يا دوب رش بسيط

بحيث العرقسوس يكون مِنَدِي كده مش مبلول

و نقلب كويس و نفتفته كويس بايدينا
(لا تقلقوا لون العرقسوس هيروح من ايدك بمجرد ما تغسليها)



و نسيبها ساعتين مثلا علشان تخمر

يخمر ازاي بأاااه

يعني لون يتحول لاحمر خفيييف



و بعدين نجيب شاش نضيف و نحط العرق سوس فيه و نقفلها كويس

و نحطها في حلة فيها 2 لتر ماية

و نسيبها من بليل لتاني يوم علشان تكون نزلت كل العصارة اللي فيها

و نشيلها

(انا كتير بخليها مش باشيلها ماهو كل ما تقل العرقسوس كان احلي)



لما باجي اصبه لتامر بعمل زي الراجل بتاع العرقسوس ده و اصب في كوباية من بعيد كده علشان يعمل رغاوي



ههههههه



و طبعا كلنا عافين فوائد العرقسوس الكتيييييييييير جدا

بس اللي ضغطه عالي مايشربش منه كتير كفايا كبايه بلاش طفاسة الله يكرمكم







يالا بالهنا و الشفا

SHARE

About Mony

26 comments :

Rosa said...

موني يا حبيبتي تسلمي على الدعوة للمشاركة في يوم النظافة و ربنا يجعله في ميزان حسناتك إن شاء الله فالدال على الخير كفاعله و يا رب كل واحد و واحدة يقرأوا الموضوع دا عندك هم كمان ينشروه في مدوناتهم و ربنا يوفقنا جميعاً للخير.

أما يا ستي بقى عن العرقسوس أنا كمان بعمله كدا بالضبط بس بحط له بيكنج بودر من بتاع الكيك اللي في الأكياس من السوبر ماركت دا و بيطلع تحفة و برضه ما بشيلش الشاشة علشان يتقل حاكم أنا كمان مدمناه.

بس انتي ابقي حاولي تشربي منه على قد ما تقدري كمان لإنه مفيد جداً للكلى و الجهاز البولي و دي معلومة أكيدة.

و يا رب دائماً كدا ممتعانا بوصفاتك.

بس عايزاكي بقى تشدي حيلك معانا في الآيس كريم علشان واضح إن الصيف السنة دي ثقيييييييييييييييل و الحر بدأ من بدري قوي

Anonymous said...

بلاش طفاسه
هههههههههههههههههههههه
ماشي ياموني طيب ياست الكل ماما بتعمله كده بس بتحطه في الشمس مش المسحوق ده
وفي حاجه كمان انا رفدت نفسي من الشغل ياموني وباجي اتعلم من عندك هنا وعملت الكنتاكي وفراخ بالكاري وعملت الكوردون والسمبوسك بس ماما بتضحك عليه وبتقولي انت لسه عماله تدوري في فلك الفراخ
الله يخليكي ياموني ادخلي علي الاسماك واللحمه عشان اكيد العزال يااوختي
متشمتيش حد فيا

صبرني يارب said...

اه يا بت يا موني يا اروبه
ماما بتعمله كده

انا مش باعمله اوي ما حدش عندي بيشربه
والدكتوره كانت منعاني منه وقالتلى بيزود الوزن جدااااااااااااا

بس بابا بيموت فيه باعمله ساعات له فى رمضان

تسلم ا ديكى يا موني

Mony said...

Om HAGAR

الله يكرمك يا جميل
ربنا يجعله في ميزان حسناتنا ان شاء الله

بالنسبة للعرقسوس بتحطي بيكنج صودا و بيكنج باودر مع بعض
ولا الباودر بدل الصودا؟؟

بس بصراحة انا ماليش فيه اوي يعني
بيغريني الطعم الحلو بعد ما يتبلع بس و هو بيتشرب بيكون طعمه يع


اوكي يا فندم الايس كريم قريبا ان شاء الله

Mony said...

mayada

ماما بتحطه في الشمس ازاي
قوليلنا كده علشان نجرب


اما بخصوص الاكلات
مش تفرحيني طيب و تقوليلي ايه الاخبار
ماشي يا ستي
هعديهالك المرة ديه


انا عاملة لحوم هنا يا مادو
جربي الريش هتعجبكم اوي
و الصينية اللي في الفرن جميلة برضه



طيب تحبي البوست الجاي يكون ايييه؟؟
طيب ايه رأيك في صنية جمبري سريعة و طعمها تحفة
ولا شوفي انت عايزة ايه و انا انزله البوست الجاي ان شاء الله

Mony said...

صبرني يارب

حبيبة قلبي
ده بعض ما عندكم يا فندم
هو انا اجي جمبك ايه بس

Anonymous said...

ازيك ياموني
بصي ياستي احنا مش بنجيبه بودر لا ياموني بنجيبه اعشاب زي الكركديه كده
بصي انا بجيبه من الغوريه لو تعرفيها والراجل العطار هو اللي كان قايل لماما علي الطريقه دي
تجيبي العرقسوس وتنديه في ميه وتفرديه في صنيه وتقلبيه كل عشر دقايق مثلا لحد ماللون يبقي غامق يعني لا اسمر ولا احمر بين البنين وبعدين تجيبي مصفه ضيقه خالص وتحطي شاشه في المصفه وتضيفي العرقسوس اللي هو كان في الشمس ده
وبعدين تحطي الميه شويه بشويه يعني حبه قليلين خالص وتسبيهم يقطروا عشان انت طبعا بتكوني حطه حله تحت المصفي وكل ماتفوتي عليهم تضيفي اوك علي حسب الكميه بقي وبعدين لو عاوزه يتقل اربطي الشاشه وحطيها في وسطه بس ماما بتقولك ملهاش لازمه هتمرره وخلاص لان بالتقطير هيكون نزل كل السائل مش هيبقي فيه عصاره
وكمان ماما بتقولك انت بتحطي بيكربوناتو ليه عشان يغمق ولا ايه احنا مش بنحطها ؟
وممكن تضيفي عليه نقطه مورد لو تحبي بتخليه ووواو
جربي الطريقه دي هي غلب بس هتعرفي الفرق

===============
النتايج كانت حلوه لاتقلقي بس في الكنتاكي انا حطيت معلقه صلصه بدل السماق وطلعه تحفه والباقي زي ماقلتي انت بالظبط حلو كله
===========
حلوه الجمبري ياموني توكلي علي الله ماما بتلعب بيه كتير بس انا مبفهمش منها حاجه بتتنرفز عليه بسرعه
يعني كفته
صنيه
كلته مره في محل عندنا اسمه جاردينو بالكريمه ياريت لوتعمليه يامنمون
والحبار ياموني انا عاوزه سبايسي ومقرمش
معلش ياقمر تقلت عليكي

Anonymous said...

استني ياموني نسيت اقولك
الصنيه انا شفتها بس هي تنفع بلحمه غير الضاني عشان الصاني ده مش بندخله بيتنا

كمان الريش بالكولا (بيحبوا الاكل اللي مفيهوش لعب ياموني عسل وكولا وحباشتكانات)
بس شوشو جربتها وبتقول حلوه وعجبت ابيه سامي
كمان هبقي اكتبلك طريقه تانيه للباكاتا بتاعه ماما بس لما الاقي الورقه مش عارفه رميتها فين

بنت مصر said...

تسلميلنا يارب على الحجات الحلوة اللي بتعمليها

ليكي تاج عندي تعالي خديه

عايزين نتعرف عليكي أكتر

:)

لجين أبو الدهب said...

موووووووووووووونى العسل ..

الف شكر على العرقسوس اللى بموت فيه ..

الصراحة بابا كان بيعملهونا تمام التمام ..

وكنت محتاجة الطريقة ..

ربنا يخليكى لينا ..

وجزاكِ الله خير ..

kochia said...

بصراحة كل حاجتك حلوة
ومتجددة
الواحد بينسي انواع الاكل وبيفضل علي حاجة مش بيتحرك لما بنزهق

تحياتي

tota said...

الله الله الله ايه ياعم يبتاع العرق سوس
بوصي بقى ياموني انا مليش خالص في العرق سوس ولا من بعيد لبعيد بس عتلم واخواته بيحبوه قوي وجدتي واخواتي
ودايما اشوف جدتي تعمله زي ماانتي قولتي بالظبط وبما اني مش بحبه فاانا مش بعمله ام عتلم راح يجيب علبة بس جاهز زي الشاي الباكيت وهوه اللي بيعمله بس لا مانع اني اجرب
وتسلمي ايديكي دايما

ahmed_k said...

أنا شايف ان الحضور هنا كلله نسائي أو بنانيتي وده طبعا طبيعي جدا
المهم حبيت أسجل أو حضور رجالي في البوست ده
اولا انا مليش اوي في المطبخ بس بعد ما قراته فيها بأنصح كل رجل ان يطلع زوجته على محتواها وتحاول تستفيد منها
انا عن نفسي ناوي اعمل كده إن شاء الله

وبالتوفيق دوما

مع خالص تحياتي

Mony said...

mayada


ازيك يا مادو

طريقة مامتك في العرقسوس غريبة
بصراحة اول مرة اسمع عنها
بس شكلها تستاهل التجربة


بالنسبة للبيكربوناتو انا ماعرفش بصراحة بيتحط ليه
بس في مرة قللته من غير قصد
و بصلراحة كان طعمه مش حلو خالص
اكنه بايت بقاله كام يوم

بس الماورد انا مابحبش ريحته خاااالص
في اي حاجة
معتقدش اني ممكن اجربه


من عيني الجمبري يا مادو ان شاء الله
ليه مش بتفهمي من طنط
ده المأكولات البحرية بالذات مافيهاش غلبه خالص

و بعدين انت معاكي كنز اللي هو مامتك
و بتتعلمي من واحده غلبانة زيي
لسه بتقول يا هادي
ربنا يسامحك يا مادي
رعبتيني و الله

Mony said...

mayada

اكل التعليق
معلش اصل جالي ناس و كنت خايفة الكلام اللي فات يروح رحت بعتاه من غير ما اكمل رد


راجعي نفسك يا مادي و حاولي تكبشي من الكنز اللي عندك

بالنسبة لصينية الجمبري اللي بالكريمة
انا مادقتهاش قبل كده بصراحة
ولاااازم ادوقها علشان اعرف اعمل زييها

انا نزلت طريقة لصينية الجمبري بالكريمة من علي النت
بس
طالما ما دقتهاش مش هعرف اظبطها

ممكن ابعتلك الطريقة و تجرب انت بما انك دقتيها


اما صينية الللحم اللي في الفرن
فانا كمان مابطقش الضاني ولا اخواتي
و الطريقة ديه علشان تضيع زفارة الضاني

و كان عندنا مدرس لاختي و قدمناله منها غدا قال انتوا بعتوا جبتوا كباب ولا ايه
و ماكنش مصدق اننا عاملينه في البيت

Mony said...

بنت مصر

ليه بس كده يا بنوتة
انا عملت فيكي حاجة


دانا بحبك حتي



هحاول


بس موعدكيش قريب

Mony said...

لجين أبو الدهب

تحت امرك يا لوجي انت ءأمري بس


و انا من عيني يا جميل

Mony said...

kochia

جزاك الله خيرا علي الكلام الجميل ده



ربنا بس ينفع الناس بالكلام
و مايكونش هباءً منثورا

Mony said...

tota


طيب كده ماعندكيش حجة بأه

اتفضلي يا فندم اعملي لزوجك العرقسوس

الطازة احسن مليون مرة من الباكت


و بعدين ده هو كان سبب معرفتنا بيكي يا توتا
لا ممكن ابدا

لازما و حتما تعمليله عرقسوس و تشيليهوله في التلاجة يشرب منه وقت ما يعوز

Mony said...

ahmed_k

و الله يا استاذ احمد انا معظم اللي اتعلمت منهم الطبخ هم رجال

يعني اصحاب الفضل في مجال الطبخ هم رجال

و بعدين يا فندم حضرتك لو بصيت علي الاكلات هتلاقي انها مش بتاخد وقت ولا جهد خااالص
فتنفع لحد مالوش علاقة بالمطبخ
و يتفوق علينا كمان

انا اتشرف طبعا بان المودام تشرفنا و تبص علينا بصة


ربنا يرزقك بالزوجة الصالحة
و الذرية الصالحة
و يقر عينك بهم ان شاء الله دنيا و اخرة

Bent Men ElZman Da !! said...

فعلا الطريقه دى بتخلى العرقسوس يمكن احسن من بتاع بره كمان
كنا بنعملها زمان وكان بيبقى تحفه
المدونه تحفه
تسلم ايدك

Mony said...

DaNDoNa


ربنا يكرمك يا دندونة


هو لازم يمون احسن من بتاع بره
حتي لو مش نفس الطعم


كفايه اننا ضامنين نضافته


نورتيني يا جميل

نكهة مغربية said...

تبارك الله عليك
و ماشاء الله طريقة تقديمك حلوة

Anonymous said...

متشكرين يا موني
أنا بحس إني قاعدة مع أختي ... عايزين وصفات خفيفة لرمضان عشان الطبيخ مبيتاكلش ... وسلامي لتامر والأولاد

أم محمد

Mony said...

La cuisine du monde à la marocaine
:))
ربنا يكرمك و يعزك
:))
"كن جميلا ترى الوجود جميلا"

Mony said...

أم محمد

أهلا أهلا
:))
رب أخ لك لم تلده أمك
هنا بأة نقول أخت
و انا يشرفني طبعا انك تكوني أختى:))

بيني و بينك رمضان محييييير جدا في أكلاته

انا ممكن اعمل منيوهات لاي عزومة رهوان
و اجي للأكل اليومي ابلم
:))
خدي أراء البيت عندك يحبوا ايه
و امشي زي ا يقولوا لك
علشان لما يكونوا صايمين هيقولولك على اكلات فعلا نفسهم فيها و تعجبهم بإذن الله
و نبعد عن الاكلات اللي مش بيحبوا او مش بيفضلوها

و انا بالنسبالي انهردة عاملة ياستي مكرونة بالسوسيس و فراخ بانيه و سلطة
كول سلو

:)) و الحال بيمشي
:))