لسة برضه ماليش نفس اطبخ
و تامر عارف يعني ايه ماليش نفس اطبخ
(يعني لو دخلت طبخت الاكل يطلع اعوذ بالله)
فرحت معوضاه و عملاله عصير دوم
قلت اما اعوضكم انت كمان و اعملكم انهاردة عصير دوم و عصير خروب
يااالا انشاللة ما حد حوش
الاول كده علشان محدش يسألني يعني ايه دوم و خروب
هو ده الدوم الصحيح
هو ده الدوم الصحيح
و ده الخروب الصحيح
زمان كده تامر جابلي علبة كده فيها دوم مجروش و قاللي اعمليلي ده عصير
و ديه كانت اول علاقة ليا بيه
عملت زي ماهو مكتوب علي العلبة بالضبط
اني انقعة في شوية ماية لتاني يوم
بس طعمة مكنش اوي
فكنت بشربهوله هو
:)
و في يوم كنا ماشيين و عدينا علي محل عطارة نوبي
و شفنا الدوم مجروش خشن
(مش مطحون زي البودرا)
و الخروب المجروش سايب
(مش مطحون زي البودرا)
و الخروب المجروش سايب
كنا اول مرة نشوفه كده
فراح تامر اشتري كيلو دوم
و كيلو خروب
و الدوم وزنه خفيف خالص
فعمل كيس كبير معتبر
المهم قلت أسأل الراجل بيتعمل الزاي
حكم النوبيين دول شطار
و الدوم ده بتاعهم اساسا هو و الخروب
الراجل قاللي علي طريقة عجيبة بس شكلها كده طعمها تححححفة
اسمعوا بأه علشان هقول الطريقة اهه
عصيرالدوم
كوب كبير دوم مجروش
كوب كبير سكر
و احطهم في حلة علي نار هادية
و اقلب باستمرار علشان السكر يسيح في الدوم و يصبح دوم مسكر
افضل اقلب لحد ما السكر يسيييح خااالص
بس ناخد بالنا السكر مايعملش لون علشان لو عمل لون هيطلعله ريحة شياط في العصير
و ده مش حلو
اقلب باستمرار
و لما السكر يكون تقريبا اختفي
اروح حاطة عليه 9 كوبايات ماية
هو الراجل قال 8 بس كان تقيل اوي
و اسيبه علي النار لحد ما يبدأ يغلي
و اول ما يبدأ يغلي اطفيه مباشرة
اهم حاجة في الموضوع اني اعاير كل حاجة بكباية واحدة
يعني نفس الكباية اعاير بيها الدوم و السكر و الماية
و طريقة عصير الخروب
زي الدوم بالضبط
بس بنزود كوب ماية
بحيث يصبح 10 كوبايات
طبعا تامر باشا مايكفيهوش 9 ولا 10 كبايات
انا بعمل مقدارين طبعا
بعد فترة كنا في اسكندرية و دوقنا هناك في شارع خالد ابن الوليد الدوم و الخروب
تامر قاللي طبعا مافيش اي وجه شبه
بتاعك احسن مليون مرة
(بس تعمليه بمزاج)
طبعا بعد كده انا عرفت ان الدوم مناسب للضغط العالي و المنخفض
بيظبطه يعني
و مفيد للرجال بوجه خاص
اما عصير الخروب
ففوائد في تقوية المعدة وإدرار البول وتجديد النشاط,
و سكر المانوز والجليكوز في الخروب يساعد في امتصاص السموم والافرازات الضارة الموجودة في الأمعاء
و يهدئ من الحركة الزائدة لعضلات الأمعاء ويعالج القولون العصبي ويقلل من فقد السوائل الذي يصاحب حالات الاسهال
و الكلام ده طبقا لما ورد
'بجريدة الأهرام'
16 comments :
فعلا الطريقة دي صحيحه يا قمر
انا بعمله كده بالضبط بس بصراحة مش بعاير كبايات المية
يعني بعمل السكر مع الدوم في الاول شوية وبعدين احط الماية لغاية لما احس ان طعمه اتظبط
وهو فعلا كويس اوي للضغط ... بس كتره مش تمام لأنه لما بيكون الضغط عالي اه بشربه بس بلاقي الضغط نزل جداااا
او يمكن لأن انا طفسة حبتين وبحبة تلات حبات فممكن كل شوية افتح التلاجه واشرب شوية
فلازم يتشرب بحدود لأصحاب الضغط اللي زي حلاتي
توبيك رائع بس صاحبته أروع
تحياتي
تصفيق حاد للبنيه دي
بس اازاي نحط السكر مع الدوم على النار وهو ناشف
السكر مش بيتحرق ؟؟؟
وبرضه الخروب
تعرفي انا روحت سألت مره العطار على الخروب عشان رضا بيحبه
وقالي بتوع المحلات دول بيعملوا الوان وكده واداني خلطه كده من طعم ولون وريحه
بس انا مش باعملها كتير عشان مش طبيعيه
طبعا انا باعمل الحاجات دي فى رمضان علىوجه الخصوص بس يعنى الصيف داخل وكله بيشتغل
قوليلي يا موني حكاية السكر دي عشان هاجرب الخروب
وقوليلي ازاي يعنى احطه على النار ناشف هو المفروض السكر يتحمر زي الكراميل كده ولا ا يه
اه وعلى فكره انا ما باجيبش خروب مجروش العطار يومها قالي القرون انظف وفعلا ضعف السعر من المجروش
باجيبه قرون واكسره انا
تسلم اديكى يا موني
الا قوليلى هو انتى مش جايلك نفس تطبخي ليه
اسباب سياسيه شكلها
هههههههههههههههههههه
طيب بتاكلوا ايه طيب ؟؟
ابعتلك طبق سبانخ ؟؟
بنت مصر
و الله يا بنوتة مامتي و باباي بيشربوا منه اد كده و هم ضغطهم عالي و بيظبطلهم الضغط خالص
و تامر طول ماهو قاعد علي الكمبيوتر يقوللي
يا مونيييييي
ريفيل
refill
و الحمد لله لغاية دلؤتي احنا كويسين
اما موضوع الشكر فالراجل النوبي هو اللي قايلنا علي المعيار ده و اللي بيكون فعلا مظبوط جدا لاهو مسكر ولا ناقص سكر
ربنا يكرمك يا جميل انت الاروع
صبرني يارب
لا يا جميل السكر مش بيتحرق ولا حاجة
لانك حاطة الحلة علي نار هادية خااالص
و السكر يا دوب بيسيح اثناء التقليب
و مابنديلوش فرصه انه يتحرق لانك بتقلبي باستمرار
فالسكر السايح اللي هيكون شبه السكر الجلوكوز هيلزق في قطع الدوم او الخروب
اما موضوع نظافة قرون الخروب فانا معنديش خبره
ممكن فعلا تجيبيه و تكسريه بنفسك
بس الدوم هيكون صعب تكسيره علي ما اعتقد
بس ابعدي الله يكرمك عن البودرة علشان بيكون فيها حاجات الله اعلم بيها
و لا الالوان
احنا مش ناقصين
لا تقلقي يا جميل انا تقريبا بقالي 5 سنين اهه شغالة فيه من غير خسائر الحمد لله
اما بخصوص ماليش نفس اطبخ فده نتيجة اسباب مرضية
و الراجل عاذرني بصراحة
ربنا يعينه
و يعيني
وااااااو
حلو اوى العصاير البيتى ده واضمن كمان ..
انا للاسف مع فوايد الدوم بس مش بحبه عندى منه ارتباط شرطى ..
انما الخروب بمممموت فيه ..
طب ما كنتى قلتى بالمرة العرق سوس اصلى بعشقه فعلا ..
كان بابا بيعملهونا فى البيت وكان بيبقى احسن من المحلات مية مرة كان بنشرب فى المرة لتر انا واخواتى :D
جزاكِ الله خير يامونى بجد انا باستفاد منك جدا ..
وبحبك فى الله جدا ..
دمتِ بخير ..
لجين أبو الدهب
من عيني يا جميل العرقسوس من واحد بتاع عرقسوس رأساً
و زي بتاع بره و احسن كمان
كنت عايزة انزله بعد البوست ده
بس في واحدة عزيزة علي عايزة طريقة الحواوشي
و انا انشاء الله هنزله في بوست بعده ان شاء الله
احبك الله الذي احببتني فيه
و انا ايضا احبك في الله
موني الشهيرة بمدام سلاموني
اولا تسلم ايدك ع الفراخ طلعت تحفة بس نسيت خالص مالص اشكر الأخ العقيد علي حسن سلوكه
ثانيا تحفة مشروباتك وانا بحب الدوم والخروب حب خااااااااااااص جدا
بس جميع المشروبات اللي بحبها لأن ضغطي واطي بتجيبني لمس اكتاف
بس حلو اني اعرف بيتعملوا في البيت ازاي
تسلم ايدك وواضح انك زيي اذا المزاج راح فعليهم وعلى الجبنة والفول اسلم هههههههههههههههههه
تحياتي يا قمر
اعرف الدوم والخروب
بس معرفش انهم بيتعملوا عصير
انا اخرى الكركادية
:)
ان شاء الله لما انزل مصر لازم اجربهم
شكلهم هيكونوا طعمهم حلو
وكمان الطريقة سهلة
شكرا ليك
تقبلى مرورى
تسلم ايدك يا مونى
أنا جبت فعلا الدوم المطحون والمجروش والاكياس حتى " ايزيس " بس مش مقتنعة بطعمه
وسمعت انه ممكن يتنقع فى ميا ويتحط معاه كراميل فى شاش بيديه طعم حلو بس مجربتش الطريقة دى
طريقتك دى شكلها فعلا بتدى طعم الكراميل
بس الدوم بتغسليه الاول وبعدين تحطيه عالسكر ولا من غير غسل ؟؟
هجرب واقولك ان شاء الله بس عرفينى بتغسليه ولا لا ؟
حاجات جوايا
انا الراجل العطار ده حذرني من المطحون لانه كير بيكونوا حطين فيه حجات تانية غير الدوم و طبعا مش هنعرف
و لما سألته بيتغسل ولا لاء قاللي لا
بس تبصي فيه برضو علشان ساعات بلاقي فيه قطع جوز هند او قش
تنقيه يعني زي الرز قبل ما تعمليه
علشان كده بقولك هاتي المجروش علشان بيكون فيه قطع كبيرة كتير فمن السهل تطلعي منه الشوائب
و جربي الطريقة ديه هتعجبك كتير
احساس طفلة محبة للرومانسية بس واقعية
لا ان شاء الله هيعجبك الدوم
لو انت في دولة من دول الخليج بيتباع هناك برضه عند العطارين
بس اسألي
ستيته حسب الله الحمش
معلش يا جميل العتب علي النظر
بس فرحتيني ان الفراخ طلعت كويسة الحمد لله
انا كنت خايفة و الله
تقولي توبا ما اجرب حاجة من عند الست ديه تاني
بس ده مايمنعش انك استاذة و رئيس قسم يا فندم
انا كنت سمعت دكتور عادل عبد العال اللي فضحوه و عملوله جرسة علي الفاضي و في الاخر الراجل طلع مظلوم
كان قال لو الناس هتشرب الدوم كعلاج للضغط
او الكركاديه اوكل المشروبات بتاعة الضغط ديه
ان اللي ضغطه مرتفع يشربهم قبل الاكل بربع ساعة
و ذوات الضغط المنخفض يشربو بعد الاكل بربع ساعة
و كده بيظبط الضغط
طيب علشان ضغطك انا هلحقك بطريقة العرقسوس البوست الجاي
ده بأه صديق الضغط المنخفض
طيب يا مونى بالله عليكى تجربى الطريقة دى وتدوقيها لجوزك وحتعجبكم جدا جدا والله انا واثقة باذن الله
هاتى سكر حطيه على النار واعمليه كراميل بس اوعى يتحرق ويشيط منك خلى لونه دهبى وانزلى عليه بالدوم المجروش تقليبتين فقط والنار واطية جدا وزودى ماية وسبيها لما تغلى وطفى وسبيه منقوع بعد كدة صفى الدوم وظبطى الماية والسكر
وخليه يسقع ودوقى والله احلى واطعم دوب واعملى نفس الطريقة فى الخروب بس الخروب بنزودله شوية صغيرة مورد معلقة كدة ودوقى والله وحستنى ردك عليا وتقوليلى ايه الاخبار
عائشة
هتبقى نفس الطريقة برضه يا ايوشة
بس جربي تسيبي الدوم في الماية لاخر قطرة
ماتصفيهوش يعني
انا بحط الحلة بحالها في الثلاحة
علشان النكهة تكون اتقل و اغنى
عملته وطلع تحفففففة زي بتاع برة
وبعدين نسيت الطريقة ورجعت دورت تاني على طريقتك ولقيتها :)
شكررررررا جدا لإنك قلتي الطريقة
بالمناسبة إنتي فين ؟؟؟ مش بتعملي حاجات جديدة ليه ؟؟
Lo2li2a
تسلم ايدك يا لؤلؤة
اكيد انتى اللي نفسك حلو علشان كدة طالع تحفة
:)))
و بالنسبة للجديد فادعيلي
كل ما انوي احط حاجة يحصل مصيبة حقيقية من النوع التقيل تعطلني شهور
ربنا يسهل
:)
Post a Comment