كنت في يوم معزومة عند اخت تامر
هي ما شاء الله عليها شطورة خاااالص
و كان من ضمن الموجود صينية الفراخ بالكاري
و تامر كان مبهور بيها
لدرجة انه قاللي ماتمشيش من غير طريقتها
و اخدنا الطريقة و عملناها و طلعت زيها بالضبط الحمد لله
هي مش بتاخد وقت خالص
(و ده اهم حاجة بالنسبالي)
يعني لو واحدة موظفة ولا واحدة مالهاش نفس تقوم تطبخ
او واحدة اول مرة تطبخ
يبقي الصينية ديه ممكن تكون من الحلول المتاحة
و اللي هيدوقها هيفتكر انك تعبتي فيها كتير
نبدأ بأه بسم الله
المقادير:
فرخة
(مقطعة اربع ارباع)
(ممكن تحطي اوراك بس او صدور بس)
بس انا مابعرفش آكل غير الفراخ البلدي
1 بصلة كبيرة
(مقطعة مكعبات صغيرة)
1 طماطم كبيرة
(مقطعة مكعبات صغيرة)
ملعقة كبيرة كاري
ملعقة صغيرة ملح
نصف ملعقة صغيرة فلفل اسود مطحون
3 ورق لوري
3 حبهان
نصف ملعقة صغيرة شطة او هريسة شطة
(حسب الرغبة)
طبعا نراعي ان المقادير ديه لاربع قطع فراخ
(فرخة يعني)
يعني لو زودنا في قطع الفراخ
طبعا هنزود في مقادير التتبيلة
الطريقة:
من بالليل
تحطي قطع الفراخ في الصينية
و تغرزيها بالسكين علشان التتبيلة تتغلغل
وحطي عليها البصلة المكعبات و الطماطم المكعبات
و ورق اللوري و الحبهان
و الكاري و الملح و الفلفل
(ممكن اضافة ملعقة صلصة طماطم علشان يكون لون صوص الفراخ احمر)
و قلبيهم مع بعض كويس
خدي بالك ماحطناش اي دهون خاااالص
و مش هنحط
و غطيهم بورق فويل
و حطيهم في الثلاجة لتاني يوم لما يجي وقت الطبخ
و وقت الطبخ طلعيها من التلاجة بنفس الصينية و اللفة اللي بورق الفويل
و حطيها في فرن ساخن
(تكوني مسخناه من قبل كده)
بتاخد من ساعة الا ربع لساعة
بعد ساعة الاربع
اكشفي الورق الفويل علشان تشوفيها استوت ولا لاء
لو لقيتيها استوت سيبيها مكشوفة في الفرن شوي علشان وجهها يحمر
ممكن تحطيها دقيقتين تحت الشواية
ممكن تقدم في الصينية زي ماهي
و ممكن بعد ما تتحط تحت الشواية و تاخد لون نقدمها علي رز ابيض او ارز بالكاري
و ممكن نعمل معاها تومية
و سلطة
23 comments :
كده برضه يا مدام سلاموني ؟
أول مرة أتعرف على مدونتك تجوعيني بالشكل ده؟
يسلموا إيديكي الوصفة تجنن والصور تهبل وتجوع
ومش هقدر أكمل فرجة على باقي المواضيع لأني جعت جدا وهقوم آآآآآآآآآآآآآآآآكل
خالص مودتي وتحياتي
تمام .. تمام ..
دى سهلة خالص ..
انا عملت واحدة قريبة كانت سريعة وخفيفة كده برده بس اللى عملته كانت ففراخ بالكريمة والجبنة والقشطة وكان طعمها حلو اوى وسهلة زى دى ..
هابقى اشترى كارى ان شاء الله واجربها ..
جزاكِ الله خير حبيبتى مونى ..
دمتِ بخير ..
تسلم ايدك يا مونى
أنا متخيلة طعمها عشان بعملها بطريقة قريبة من كده وبحط عليها كمان زعتر وشمر مطحون وليمون
نورتى مدونتك من تانى يا جميل
سالى
اصلا انا بحب الرز بالكاري واللحمة المفرومة والفلفل الملون
وعليه مؤنكد ها احب ادوق هذه الصينية اللوزعية
تبلت الفراخ في التلاجة يا فندم وندوق وندعي للفوميليا كولتها
ربنا يهنيكم ويسعدكم
ودايما مبدعة يا مدام سلاموني
تحياتي
ELMASRYA - MRS EGY_
اعمل ايه طيب
مانت اللي داخلة المطبخ برجليكي
اهلا بيكي معانا
و يا رب ترجعلنا تاني
لجين أبو الدهب
تسلم ايدك يا لوجي
انت اللي جوعتيني
الصينية اللي عملتيها ديه غير بيكاتا الفراخ؟؟
لو غيرها شاركينا بيها
اهه تنعلم منك يا قمر
و جزانا و اياكم
مستنين النتيجة بأه
:)
حاجات جوايا
ربنا يكرمك يا جميل
فعلا الزعتر مناسب جدا مع الفراخ
بس مجربتش الشمر ده قبل كده
اصل انا عملت طريقتها زي ما قلتلي من غير اي اختراع مني
انت اللي نورتيني يا سالي من تاني
:)
ستيته حسب الله الحمش
اوكي يا ستوتة
مستنين النتايج
و لا تقلقي يا جميل
مش بتاخد مجهود خاااالص
طيب غششينا الرز بالكاري اللي باللحمة المفرومة ده
و اهه ينوبك ثواب
نورتيني يا ستوتة
اولادي بيحبو الفراخ دي جداااا وكتير بعملها
بس بأه انا كنت بسويها على النار من فوق الاول وبعدين احطها في الفرن ومكنتش بسيبها من بالليل زي ما عملتي
لكن المرة الجاية حعملها زي ما كتبتي لأنها شكلها تحفة حتبلها من بالليل واغطيها بالفويل واسويها بالفرن
وانتي عارفه لو ضفتي كمان فلفل اخضر رومي شرائح حتكون حلوة اوي برضه
تحياتي وفي انتظار الاكلة القادمة
اوووعي تتأخري علينا
بنت مصر
لما تسيبيها من باليل التتبيلة بتتغلغل في الفراخ و يوصل طعمها للعظم
:)
و ربنا ييسر و ما يجبش تأخير
تسلم ايدك اكلة تجنن
انا بحب الفراخ موووت
هبقى اجربها وادعليك يا قمر
دمتِ بالف خير
نـــوارة
اوك يا جميل مستنين النتايج
اه يامونى غير بيكاتا اللحمة هاقولك عملتها ازاى ..
هاتى كوبية كريمة وعليهم معلقتين قشطة ومعلقتين مايونيز ومكعبين كيرى او اى نوع جبنة ومكعب مرقة واضربيهم ببعض لغاية ما يتجنسوا ..
المقادير دى على اد فرخة ..
وبعدين تجيب الفرخة مقطعة وتحطيها فى الصينية وتحطى عليها الخلطة اللى قلت لك عليها وتشقق الفراخ علشان الخلطة تدخل فيها وبعدين تغطيها بالفويل وتدخليها الفرن من ساعة الا ربع لساعة ..
وبعدين تكشف من عليها الفويل تاخد وش تحمير 10 دقتئق وخلاص على كده ..
بس طعمها جميل جدا والصوص بتاعها تحفة
طبعا كل ما تزودى فى الفراخ تزودى فى الخلطة بس ما تزوديش مرقة لان المرقة بتحدئها ..
يارب اكون افادتك وبالهنا والشفا ..
وعلى فكرة عملت البيكاتا وطلعت جميلة ما شاء الله ..
جزاكِ الله خير ..
السلاااااام عليكم يا موني
اولا حمدا لله علي السلامة و ربنا مايقفلك مدونة ماتتصوريش كنت مفتقدة المطبخ بتاعك قد ايه و كل يوم ادخل ادور عليكي
كنتي وحشانا يا شيخة والله و اكلاتك الحلوة دي
النهاردة عملت الكوردون بلو و كان تحفة ماشاء الله
كده يبقي محصلة الاكلات اللي عملتها من عندك 4
البيف ستروجانوف
الفته
التومية
الكوردون بلو
تسلم ايديكي يا جميييييييييلة
سلااااام
لجين أبو الدهب
ربنا يكرمك يا لوجي
شكلها حلوة
قريبا ان شاء الله اجربها و اكيد هتطلع تحفة
ام محمد و عمر
جزاك الله خيرا و الله
رفعتي روحي المعنوية خاااالص
انا كمان و الله كنت مفتقداكم لما قفلتها
ربنا ييسر و مانفقلهاش تاني
جزاك الله خيرا يا ام محمد و عمر
ميه ميه يا جميل
هانجرب ونقولك ان شاء الله
تسلم اديكى
ماشاء الله عليكي ربنا يسعدك ياااااارب
انا بقالي اكتر من 3 شهور لينك المدونة معايا بس نويت من انهرده ماسكة الاجندة وعمالة انقل كل وصفاتك
مش عارفة ادعيلك بايه ولا بايه ربنا يستجيب اللي دعيتهولك يا قمر
ومستنية كل الحاجات الجديدة ليكي
بجد انتي زي العسللل ومش متخيله انا استفدت منك ازاي ربنا يبارك فيكي
غير معرف
انت اللي زي العسل يا فندم
:)
متشكرين خالص جاري التطبيق اليوم
وان شاء الله نعيدها لو زبطت
بس انا زدت عليها شوية خل ومخليتها تنقع في الخلطة بتاع ساعة ونص تقريبا وبعديها هحطها بالفرن
3roob
ربنا معاكي:)
و طمنيني على النتيجة
بس المقصود بان تخليها تبات في الخلطة ان الفرخة تتشرب من الخلطة بحيث يوصل التتبيل للعظم
لكن كده كده الفراخ تستوي في الفرن من غير خل
ممكن لو مستعجلة عليها تشرطي الفراخ بالسكين زي مابيعملوا في الشوي
علشان تشرب من التتبيلة اثناء التسوية
مستنين النتائج:)
أنا جربتها وطلعت تحفة ، تسلك إيدِك يا قمر وجزاكِ عنا كل خير
Post a Comment