Enjoy cooking
Browse through over
650,000 tasty recipes.
Home » » الكشري

الكشري

Written By Mony on Saturday, March 14, 2009 | 11:17 PM

انهاردة بمناسبة رجوعي بالمدونة
جبتلكم طريقةالكشري



بتاعة شيف شربيني

بصراحة ماطلعش حلو زي بتاع بره الا بعد ما اخدت طريقة الراجل ده



ندخل علي الطريقة علي طول بأه



المقادير:



كيلو ارز

نصف كيلو مكرونة اسباجيتي
(مقصوصة قصير)

نصف كيلو مكرونة مقصوصة
(بتاعة الكشري)

نصف كيلو عدس بجبة

نصف كيلو حمص مسلوق

كيلو طماطم
(عصيرمضروب في الخلاط)

راس ثوم كبيرة مهروسة و عليها ملح و كمون

نصف كيلو بصل مقطع شرائح رفيعة

(علبة هريسة شطة)

خل



الطريقة



الأول نعمل الارز:

نغسل العدس و نسيبة في شوية ماية

و نغسل الارز و نركنه علي جنب



في حلة علي النار نحط فيها شوية زيت و نبشر فيها بصلة كبيرة و عليها ملح و كمون و فلفل

و نقب و لما تذبل البصلة نحط العدس بمائه علي البصلة
(الماية يا دوب تكون مغطية العدس بسنتي متر)

و نسيبه علي النار و نغطية

و لما يتشرب احط شوية زيت و بعدين احط عليه الرز
(علشان ما يعجنش)

و اقلب كويس علشان يتجانس و بعدين ازود ماية
(المقدار العادي لتسوية الرز)

و ادوقه علشان لو محتاج ملح تاني

و اغطية لحد تمام التسوية



طبعا ممكن نعمل الارز لوحده و العدس لوحده

بس العدس هنعمله بالطريقة بتاعتنا من غير ما نزود الرز و لما يستوي نطفي عليه

و الرز نعمله بالشعرية مثلا او رز ابيض عادي



المكرونة:

هنسلقها عادي بالطريقة العادية بتاعتنا

بس نسلق كل نوع لوحده





صلصة الطماطم:



ناخد نصف مقدار الثوم المهروس و نحطه في حلة فيها زيت علي النار

و نقلب

يا دوب الثوم يبدأ ياخد لون

احط عليه 3\4 كوب خل

و لما الخليط يغلي احط عصير الطماطم و اسيبها لحد ما تستوي

(بس ما اسبهاش لحد ما تبقي غليظة)

يادوب تكون بدأت تربط و ليها قوام



للصلصة اللي بالشطة:

ناخد مقدار من الصلصة اللي عملناها و نحطه في كسرونة صغيرة و ندوب في نصف ملعقة من هريسة الشطة

و نسيبها علي النار و لما تغلي نطفيها



الدقة اللي بتكون موجودة في المحلات في زجاجة:

ناخد النصف الباقي من الثوم المهروس و نحطه في حلة فيها زيت ساخن علي النار

و نقلب و لما يبدأ الثوم يتلون نحط عليه مقدار من الخل و علي مقدارين ماية
(مثلا لو نصف كوب خل يبقي نحط كوب ماء)

و عليهم ملح و كمون

و نتركهم لحد ما يغلو و بعد كده نطفي عليهم

و نحطهم في برطمان و نغطيه كويس لحين الاكل



البصل المحمر:

نرش علي البصل شوية ماية و بعدين نحطه في كيس فيه دقيق و نقلب علشان يتغطي بالدقيق

و نحمره علي النار في زيت غزير و ساخن

كده البصل هيفضل مقرمش فترة طويلة و مش هيشرب زيت كتير



و كده خلاص نكون خلصنا الكشري



نبدأنغرف الطبق بأه حسب الرغبة

الارز بالعدس الاول

(لو معملناهومش مع بعض نحط الارز في الاول و العدس في الاخر خااالص)

و بعدين المكرونة بنوعيها

ثم الحمص المسلوق

و العدس

(لو ما ضفناهوش مع الرز)

و بعدين الصلصة

و في الاخر علي الوش البصل المحمر







علي فكرة مش بياخد وقت خالص

لو بدأنا في كل حاجة في نفس الوقت

هنخلص في نصف ساعة كل حاجة



و بالهنا و الشفا
SHARE

About Mony

30 comments :

صبرني يارب said...

مبرووووووووووك مبروووووووووووووووووك مبرووووووووووووووووووك

يعنى لازما اكون انا اول تعليق يا رجاله

نورتي البلوج يا اختي

كشري كشري تحيا مصر

ايوه انا باعمله قريب من كده
بس انا باحب الرز لوحده والعدس لواحده

انا مصوراه يعنى فى الخطه بس شويه بقى

نورتي البلوج يا قمر

وتسلم ايدكي

Mony said...

الله يبارك فيكي يا جميل


ما أنت صاحبة الفضل بعد ربنا يا صبرني


اه يا ستي انت اول تعليق
ده شرف ليا طبعا

و بعدين محدش يعرف يجيبني الا لو عنده اللينك الجديد بدل اللي اتلطش

علشان جوجل بيختلط عليه انهو مدام سلاموني فبيجيب الاقدم طبعا


و بعدين يا صبرني انت اساسا شطورة
اكيد اي حاجة تعمليها تطلع تحفة

مستنين الكشري بتاعك يا ستي


ده نورك انت يا جميل
نورتيني و الله

tota said...

الله الله الله .....عليكي ياموني ****** جامدة طول عمرك
حتى الكشري بحبه قوي بس عمري ماجربت اعمله دايما بحب أكله من بره حتى هنا اما الاقي نفسي فيه اقول لعتلم نفسي في كشري طبعا طعمه مش زي عندنا في مصر بس بما أنك عملتيه يبقى ربنا يسهل واعمله ويارب يطلع حلو عموما اللي يمشي على طريقة الاكل زي مانتي بتقولي بيطلع جامد مووووت حتى لو أول مره يعملها علشان انتي مبسطه كل حاجه

بجد ومن غير مجاملة المينيو اللي انتي بعتييهولي واللي عملته تحت اشرافك وبترتيب زي مانتي قولتيلي كان حلو قوي وعجبهم بجد بس ده كله بفضلك انتي ومساعدتك ليا ربنا يخليكي لينا ياموني ويبعد عنك اي مكروه

تسلم اديكي

بوساااااااااااااااات كتير لاحلى أخت

Mony said...

tota

جزاك الله خيرا يا جميل


انا برضه ما كنتش اكله في البيت ابدا
دايما حاسة ان في حاجة ناقصة


بس بصراحة لما شفت الشيف شربيني عمله مقدرتش اقاوم و خصوصا ان انا مجربه للشيف ده كذا اكله

و للصدف السعديدة جوزي مش بيحب الكشري خاااالص

و ما ياكلخوش الا نادرا
او لو اصحابة اتجمعوا و غصبوا عليه


لما جيت اطبخه كنت متأكده ان تامر مش ممكن ياكل منه

لما دخل البيت و شم الريحة
حطيتله طبق
ماصدقش خااالص ان انا اللي عملاه
و قاللي احلفي انك مش جايباه من بره

و خلص الطبق و طلب كمالة كمان:)


جربي و علي ضمانتي

و هتلاقي جوزك عمل عزومة تانية الاسبوع اللي بعده علي كشري فقط لا غير علي اعجابة بالكشري
هههههههه

و انت نفسك حلو في الاكل ماشاء الله فهيطلع تحفة ان شاء الله


مستية العزومة التانية بأه علشان نظبطها مع بعض:)


نورتيني يا ارق اخت

ستيتة said...

عودا حميدا يا مووووووووووووووني

وجايلنا حامية ومشطشطة

مونكن طبق ندوق بس كتري الورد ايف يو بليز

تعرفي اني مستمتعش بالكشري اطلاقا لو عملته انا ومعرفش اكل
بينما الولاد ميعجبهمش الجاهز ويقولوا بتاعك طعمه هو اللي بنحبه

المهم جوعتيني ووحشتيني

لا قفل الله لك بلوجا ولاحرمنا بوستاتك "حلو العربي ده"

سلام ياقمر

همس الاحباب said...

حمدلله على السلامة
ونورتى المدونة
بس تغيبى تغيبى وترجعى بطبق كشرى
ده كلام

يلا هاتى طبق وكترى الدقة
هههههههه
تحياتى

Anonymous said...

نفسي اذوق الكشري ومع ذلك خايفة اجرب واعمله لانه في مكونات كتيرة ارز وعدس ومكرونة يعني اكلة غربية عليي شوية

بس ان شاء الله هجربها

تسلم ايدك

Anonymous said...

انا مش ليه في الكشري ولا
الليله دي خالص ياموني انا اخري اقلي بيضتين
بس جيت اقولك عودا حميدا ياقمر

Mony said...

ستيته حبيبتي


(الا الرد بتاع عودا حميدا ايه؟؟)
(اصل ماخدناهاش في المدرسة)


ربنا يكرمك يا جميل
ماهو البركة فيكم برضه


تصدقي انا بأه اي اكله انا اطبخها ما استمتعش باكلها ابدا

لو انا و تامر خرجنا نتغدي في مكان بره

يقوللي بذمتك مش انت بتعملي احسن من كده

اقولله اللي انا بعمله مابستطعمهوش
(شكله عايز يوفر!!صح؟)


سبحان الله

طبق مخصوص لاحلي ستيته
تجوعي و انت في مطبخ مدام سلاموني

ده عيبه حتي



نورتيني يا جميل

Mony said...

همس الاحباب

الله يسلمك يا استاذ خالد


اصل بصراحة انا بحبه اوي
و كمان لسة عملاه فتأثيره لسه موجود
:)


من عيني اكبر طبق لاستاذ خالد

Mony said...

نـــوارة

لا تقلقي لا كتير ولا حاجة

و مش بياخدوا وقت خالص

لان كلهم بيحتاجوا سلق
مش محتاج تدخل منك خالص يعني
غير في الصلصة



عايزين نسمع عن التجارب بأه

Mony said...

mayada

مادي حبيبتي

نورتيني يا جميل

كده برضه
ماتعرفيش غير تقلي بيضتين بس

عموما في تحسن ان شاء الله
انا ماكنتش بعرف غير اسلقهم بس

و ربك فتح عليا
و بقيت بعك براحتي
:)

لجين أبو الدهب said...

عودااا حميييييييدا ..

بجد انا فرحانة جدا انك رجعتى لان ما تعرفيش انا اتعلقت بمدونتك اد ايه ..

واخر مرة لما سئلتك المدونة اتقفلت وراها على طول قلقت الصراحة قلت هو انا السبب ولا ايه :(

بس الحمد لله انك رجعتى ..

وعلى فكرة انا عملت التومية وكانت جميلة جدا ..

جزاكِ الله خير ..

وما تغيبيش تانى ..

وحمد لله على السلامة ..

دمتِ بخير ..

Mony said...

لجين أبو الدهب


ربنا يكرمك يا لوجي

و انا كمان و الله فرحانه انك عرفتي توصليلي علي اللينك الجديد


لا يا جميل انت وشك حلو
فتحنا علي لينك جديد اهه


نورتيني يا قمر

Anonymous said...

الف الف مبرووك على الافراج

ما تصوريش فرحتى اد ايه يا استاذه

انا عارف انك زعلانه من حضرتى

بس ما تحرميناش من كلامك و تعليقاتك الجامده جدا
و دمك الخفيف و اكلك الروعه

تقبلى اعتذاراتى
بس هيا جت فيكى الكلمات السابقه غصبا عنى لانى كنت ف حله قرف من القطط معلش سورى

Mony said...

biberss222


الله يبارك فيك يا فندم
هو مش افراج اوي يعني
بس الحمد لله احنا كنا فين


اما بالنسبة للزعل
فخلاص مافيش مُشكِل
طالما ماكنتش تقصدنا


و ربنا يهديلك قطتك

بنت مصر said...

يا سلااااام على الكشري المصري مفيش اجمل منه

بالمناسبة انا عايزة اقولك معلومه لاحظتها

انااصلا من القاهرة وعايشة بالاسكندرية لظروف عمل زوجي فكل ما اقول لواحده صحبتي عن الكشري تقولي اه دا اللي بالعدس الأصفر اقولها لأ واقعد اشرحلها الطريقة تقولي لأ في الاسكندرية الكشري ده اللي بالعدس بجبة والمكرونه والصلصة ده مش معروف اوي في الاسكندرية لكنه معروف ومن الاكلات الاساسية والشعبية بالقاهرة

انا بس حبيت اقولك المعلومه دي لأني لاحظتها واستغربت منها جدا

حاجه تانية اسمحيلي اضيفها على طريقتك الجميله

علشان يطلع معاكي البصل محمر لفترة ومقرمش وانتي بتحمريه ضعي عليه شوية ملح حتلاقيه اتحرمش واصبح جميل وطعمه مملح

انا بعمل كده علطول بجمرالبصل في الاول قبل ما احط العدس بجبة بحمر بصلة كبيرة او بصلتين متوسطين واحط الملح وبعد ما يتحمر اخد نصه على منديل ليشرب الزيت والباقي اضيف عليه العدس والمية زي ما تفضلتي وقلتي

اسفة ان كنت طولت عليكي لكن مدونتك شدتني جدا وان شاء الله حكون متابعاكي علطول

Mony said...

بنت مصر

نورتيني يا جميل

فعلا المنتشر في المدن الساحلية هو الكشري الاصفر

انا بحبه اوي علي فكرة
و بعمله كتير
و ساعات كتير هم بيعملوه و بيحطوا علي وشه عند التقديم جمبري محمر
ده جنب البيض المحمر اللي هو اساسي


و بيقولوا علي الكشري بتاعنا
"كشري مصري"


انا كمان برش ملح علي البصل بعد التحمير
اصلي بحب الملح زايد في الاكل بصراحة


انت بتقولي انك بتحمري بصل قبل العدس و بعدين تشيلي منه شوي و هو ده يكن البصل المحمر اما الباقي فبيكون لتسوية العدس

بس كده انت محطيتيش علي البصل المحمر دقيق
الدقيق بيخلي البصل مقرمش لتاني يوم لو عايزة كمان


و بيخلي لونه ذهبي جميل


جربي البصل بالدقيق و قوليلي علي الفرق
هتلاقي فرق يعجبك بجد



و نورتيني يا بنت مصر

فضفضتي said...

ميرسي كتير ليكي مدام سلاموني انت ما شاء الله في الطبخ
انا كمان بحب الطبخ جدا
وكان نفسي اتعرف عليكي
كنت زعلانه جدا لما المدونه بتاعتك مكنتش شغاله من فتره
الحمد لله انها رجعت

Mony said...

فضفضتي

هو انا بحب الطبخ بس بشروط

اني ما اقضيش عمري في المطبخ

يعني كبيري ساعتين
مع اني مابكملش ساعة


نورتيني يا فضفضتي

علي فكرة انا بعتلك الميل بتاعي عندك
بس ماتظهريهوش يا ريت

فضفضتي said...

ميرسي كتير ليكي علي الرد السريع ده
انا كمان كده
احب اعمل السهل والسريع وخصوصا اللذيذ

واكره تنظيف المطبخ بعد الشغل

ومبسوطه جدا اني اتعرف عليكي...

Mony said...

فضفضتي

لا ميرسي علي واجب يا جميل


انا تحت امرك في اي وقت

Mony said...

علي فكرة يا فضفضتي انا عاملة تحكم في التعليقات

يعني ماتبانش غير لما اواقف عليها

علشان كده مش بتظهر لما تكتبي في ساعتها
لازم اقرائها الاول و اعملها اوكي

فضفضتي said...

علشان كده طيب ميرسي انا مكنتش فاهمه
وعماله اكتب في الحجات مره واتنين
ميرسي ليكي

فضفضتي said...

لو ممكن حضرتك تضيفيني علي الماسنجر ولا الياهو
وبلاش اظهار الماسدج دي

Mony said...

فضفضتي

طيب اضيفك ازاي يا جميل من غير ما يكون عندي الميل بتاعك

انا بعتلك الميل بتاعي في رد علي اخر موضوع عندك في مدونتك



طيب ممكن تبعتيلي الميل بتاعك هنا و انا مش هظهره و اضيفك عندي علي طول

فضفضتي said...

كل مبدخل عندك بتعب جدا من كتر ما المدونه بتاعتك ما شاء الله تفتح النفس
وانا عامله دايت زي مانت عارفه
بس قلت اسلم وانا هنا

Mony said...

فضفضتي

منوراني دايما يا جميل

بس اشمعني الكشري بس اللي بتعلقي فيه

هي اكلاتنا التانية مش عجباكي ولا ايييه؟؟

sabah said...

تسلم ايديك, انا عايزة ادوق الكشري, من كثر مابشوفو في الافلام, حبيت ادوقو, شكرا على الوصفة, و ان شاء الله, ناوية اسرق وصفتك واجربها, وطبعا حقول لك على النتيجة , شكرا كثير كثير

Mony said...

sabah

اهلا بالمغرب معنا
نورتيني و الله


اتفضلي يا فندم جربي الطريقة و هتحسي انك سافرتي مصر
القاهرة بالتحديد علشان تدوقي الكشري المصري الأصيل

و ان شاء الله انزل الكشري الساحلي و الكشري بالعدس الأصفر

علشان تكوني دوقتي كشري جميع اقطار مصر من الشمال للجنوب و كأنك زرتينا