انهاردة هنشوف مع بعض طريقة البراونيز
(Brownies)
الطريقة ديه واحدة صحبتي قالتلي عليها
و نظرا لعشقي للشكولاتة بجميع اشكالها
فقد قررنا عمل الآتي
(البراونيز طبعا)
"المقدير"
2 بيضة
1\2 كوب زبدة لينة
1\2 كوب شوكلاتة سايلة
1\2 كوب سكر
1 كوب دقيق
1\4 م ك بيكنج بودر
فانيليا كيس واحد
مكسرات مجروشة حسب الرغبة
(ممكن لوز -بندق-عين جمل)
طبعا كلنا عارفين مجروش يعني مطحون خشن
و برضه عارفين ان المكسرات المستخدمة في الحلويات بتكون محمصة و مش مملحة
(المعلومة ديه انا شخصيا ماكنتش اعرفها)
"الطريقة"
بتسيحى طبعا الشيكولاته فى حمام مائى
زى ما انت عارفة
برضه للي مش عارف
بنحط الشكولاته في سلطانية كبيرة علي حلة فيها ماء مغلي علي النار
(ده اسمه حمام مائي)
و نستني لما الشكولاته تسيح ناخد منها مقدار نصف كوب
و الباقي ممكن نحط عليه شوية زبدة و نعماه صوص شكولاته علي وش الكيكة
ناخد بأه نص كوب الشكولاته ده
و بعدين ضيفى عليه البيض بالفانيليا بعد ما تكونى ضارباه كويس
و اخلطى الزبدة مع السكر(بمضرب البيض) لحد ما يكونوا زي الكريمة و ضيفي عليهم الشكولاتة و البيض
و بعدين اخر حاجة الدقيق و البيكنج باودر
و اضربيهم كويس
ممكن كمان تحطى كل حاجة فى الخلاط
و تضربيها و تريحى نفسك
(بس انا بحب الترتيب)
بس و تصبيها فى صينية مستطيلة
بس متخليش الخليط عالى
يعنى هى اصلا المفروض تكون رفيعة بس مش اوى
يعنى مش زى الكيكة العادية
ارفع
و حطى على وشها المكسرات مع صوص الكراميل
و ممكن كمان تحطيها جواها
و اللي مش بيحب المكسرات ممكن يحط فيها قطع شكولاته
و علي وشها كمان قطع شكولاته
و ممكن ماتحشيهاش حاجة خالص
و ممكن ترشي عليها رشة سكر بودرة
(بيدي شكل شيك برضه )
و اعملى لها صوص شوكولاتة
و بتتاكل دافية
و مش بتاخد وقت فى الفرن خالص
سريعة جدا فى عمايلها
و فى السوى
في درجة حرارة 180
مده 25 دقيقة تقريبا
او لحد ما تختبريها بالسكينة و تطلع نضيفة
و بالهنا و الشفا
2 comments :
ازيك يا منمن
معلهش متأخره على مطبخك بس ظروف والله
بصى بقى عارفه انى قلت هاجيب لك طريقة الايس كريم..هاجيبها إن شاء الله
كمان ياستى هاجيب لك طريقة سينابون توحفه..هاحطهاهناك
ودلوقت دى طريقة عمل البراون
http://oumelbanat.blogspot.com/2008/05/blog-post.htmlى
جربيها يا منمن
وأنا هاجرب طريقتك وان شاء الله ااقولك النتيجه
على فكرة انا جربت طريقة الايس كريم بتاعتك
طلع جميل قوى فعلا
ربنا يجعل ما تقدميه زكاة علم فى ميزان حسناتك
الفقيرة إلى الله أم البنات
اولا اعتذر جدااااااااا عن التأخير اللي طبعا غير مقصود
ربنا سبحانه و تعالي يعلم انا بحبك اد ايه
الطريقة حلوة و سهلة
اسهل من بتاعتي كمان
لازم اجربها بإذن الله
و ربنا يكرمك علي الاطرائات الجميلة ديه
انا ماستاهلهاش و الله
ربنا يبارك فيكِ و في بناتك و يقر عينك بهم
Post a Comment