Enjoy cooking
Browse through over
650,000 tasty recipes.
Home » , , » طاجن سبيط بالجمبري

طاجن سبيط بالجمبري

Written By Mony on Saturday, June 8, 2013 | 4:04 AM

السلام عليكم

بقالي كتييييير ماعملتش اكلة جديدة 



عملت اخيرا بعد طوووول انتظااااار طاجن سبيط بالجمبري 


الموضوع سهل و بسيط و مش هياخد منك وقت خاااااالص و مش محتاج تتبيل قبلها بس امشي زي ماهقولك بالضبط علشان نعوض التتبيل

بسم الله نبدأ

عندك كيلو سبيط تخلي الراجل ينظفه و يقطعه شرائح طولية و انتي في البيت قطعيه مربعات كبيرة

و كيلو جمبري بقشره منظف
هتحتاجي 3 طماطم
ملعقة صغيرة كمون
3 فصوص ثوم مفرومين لوحدهم
و 3 او 5 فصوص ثوم سليم
كرفس اخضر ممكن ربع حزمة
بصلاية صغننة
ملح و كمون
2 فلفل حامي (حسب الطلب) او رومي عادي
بقدونس مفروم للتزيين
مكعب مرقة خضار كنور

و نبدأ بأه على طول
هنبدأ الاول بتسخين الفرن على ما نحضر الحاجة بتاعتنا
و في طاسة غويطة او حلة نحط الثوم المفروم مع ملح و ملعقة الكمون و نقلب تقليبتين و بعدين نحط السبيط و نقلب كويس لحد ما ياخد ريحة و لون الثوم و الكمون

و بعد ما تبدأ مايته تنشف نحط الجمبري  و نقلب بالراحة علشان مانفصلش الجمبري لحد ما ياخد هو كمان من ريحة و لون الثوم و الكمون

و نسيبه شوية و نقلب كل فترة لحد ما تبدأ مايته تنشف و نركنه على جنب


اثناء ما احنا بننتظر ماية الجمبري تنشف نحضر الصلصة
في الخلاط هنحط الطماطم و فصوص الثوم الصحيحة  و الفلفل الحامي(او الرومي) و البصلاية الصغننة و الكرفس و ملح وكمون  و نضربهم لحد ما كله يتخلط  و يتقطع كويس
و نضع الخليط ده ف حلة صغيرة و عليهم زيت (قليل) و نسيبهم على النار 10 دقائق تقريبا او لحد ما تبدأ الصلصة تتخن شوي و اثناء ما هي على النار و بتغلى نفرك  عليها مكعب مرقة الخضار و دوقي و شوفي محتاج ملح تاني و لا لاء

و بعدين نجهز طاجن فخاري او حتى طبق باريكس و نحط فيه خليط الجمبري بالسبيط و نحط عليهم الصلصة و نحطهم كلهم في الفرن على درجة حرارة عالية من 20 ل30 دقيقة او لحد ما وجهه ياخد لون
(بلاش شواية)


و بعدين نطلعه و نرش على وجهه البقدونس المفروم و بألف هنا و شفا


ملاحظات على الماشي

الصورة اللي فوق ديه مش بتاعتي
علشان لما عملت الطاجن مالحقتش اصوره من الهجوم اللي حصل عليه


ثانيا
ممكن طبعا تعملي الطاجن ده بباقي البحريات زي شربة السي فود 
يعني ممكن اضافة السمك و الجندوفلي و الكابوريا
و هيكون ترتيب وضع الحاجات اثناء الطبخ كالتالي
سبيط
كابوريا
جمبري
سمك
جندوفلي

بنحط اللي يستحمل فالاقل فالاقل

بس يستحسن بلاش حاجات كتير و خلي الكتير للشربة احسن

و ممكن طبعا يبقى حاجة واحدة بس سبيط او جمبري
SHARE

About Mony

2 comments :

وي كير جيرمانى said...

thank you

مدير موقع وي كير جيرماني

Anonymous said...

هو انتى ليه بطلتى تنزلى اكل هنا او فى الفيس انا لسه مكتشفاكى النهاردة من جوجل وبجد باين من وصفاتك انها تحفة وان شاء الله حجرب القرع بس ياريت ترجعى تنزلى وصفات تاني