Enjoy cooking
Browse through over
650,000 tasty recipes.
Home » » كفتة الحاتي

كفتة الحاتي

Written By Mony on Sunday, June 13, 2010 | 3:00 PM

بمانسبة الصيف و اننا مش بنحب نقف في المطبخ علشان الحر



قلت اقول لكم على حاجة أتعلمتها من شيف شربيني ربنا يجازيه خير



كان عمل كفتة الحاتي بطريقة بسيييطة جدا





نصف كيلو لحم مفروم

بصلاية وسط مبشورة

ملعقة كبيرة لية ضاني مبشورة

(ممكن الاستغناء عن اللية مافيش مشاكل)

ملح و فلفل



البصلاية المبشورة نحط عليها ملح و فلفل و نعصرها و نطلع الماية بتاعتها و نركنها على جنب





و التفل (البصل المعصور) نحطه على اللحم المفروم و اللية و نقلب كويس اوي



نجيب العصير البصل اللي طلع و نبشر عليه طمطماية صغننة أوي

(يستحسن نص طماطماية صغننة)



و فلفل أخضر مبشور
(قرن فلفل صغنن)



و نسيب الكلام ده يتبل مع بعضه في طبق على جنب





و نصبع الكفتة



لما نبدأ نصبع الكفتة نبل ايدينا الاول في عصير البصل المتبل و نصبع

علشان الكفتة تاخد ريحة التتبيلة ديه





طيب في حد هيسأل ليه ماحطيناش البصلة المبشورة كلها على بعض من غير مانفصل عصيرها



هقول

علشان الكفتة ماتفكش يا فندم

و تكون ماسكة نفسها





هنحضر صينية و نرص في الكفتة

لو مش حاطة لية في الخلطة هتحتاجي تدهني الصينية بزيت خفيف علشان الكفتة ما تلزقش







بس كده



حطي الصينية في الفرن و لما الجنب اللي تحت يحمر نقلب على الجنب التاني لحد ما كله تكون لون بعض





لو عايزة ريجة الشوي ممكن تحطي في الصينية مع الكفتة بعد ما تستوي فحماية (فحم) مولعة في شوية ورق بصل و غطي الحلة من 5 ل10 دقائق





ممممم

الريحة تحححفة





انا بعملها في سندويتشات و عليها سلطة طحينة بتبقى تحححفة




ممكن تعملوا جنبها مكرونة و لا خضار سوتيه



بس بيني و بينكم السندويتش افضل





مستنية رأيكم









كلمة ل(ميادة)

انا هعملك المرة الجاية قريييبا جدا كيكة بالموز و الجيلي و كيكة بالكمبوت(اناناس او خوخ)

انتظريني

بس عايزة اجربها الاول قبل ما احطها علشان بقالي كتيييير معملتهاش

SHARE

About Mony

12 comments :

كلمات من نور said...

تسلم الايادي يا سيدتي

مش حتيجي بقى منتدى زبد البحر تشتركي معانا وتنوريه وتأكلينا الأكلات الحلوة دي؟

Mony said...

كلمات من نور


ربنا يكرمك يا جميل

انا بس مقصرة جدا مع الجماعة هنا
فمش عايزة اشتت نفسي


انما ممكن تاخدي اللي انت عايزاه و تشاركي بيه عندك مافيش مشاكل
بس ياريت تقولي انه من مدونة مدام سلامونى



علشان محدش يفتكر اني باخد من أكلاتكم

علشان لسة حاصلة مشكلة قريب مع مجلة مطبخ مشهورة


لقيتهم واخدين من المدونة بالصور
كذا وصفة


و لولا ان الوصفات اللي أخدوها قديمة و المجلة لسة حديثة

انا نفسي كنت هفتكر اني نقلت منهم بصورهم

و الحاجة الجميلة
اني لما كلمتهم اعاتبهم
ردو علي بكل بجاحة و احنا ايه اللي يعرفنا ان انت مدام سلامونى بصحيح


يعني ابوا الموضوغ الاساسي و دخلون في دوامة تانية


علشان كده انا مش مسمحاهم
و مش هسامح اي حد يستفيد بالطريقة ديه من عندي بدون اذن


فعلشان كده الله يكرمك
قولي بس انه من مدام سلامونى


و اي حاجة عيزاها اتفضليها ماتغلاش

:)عليكي

ميادة الحمود said...

مرحبا مدام سلاموني الف شكر عالوصفات الحلوة*انا مش عارفة اذا كان قصدك على ولا وحه تانية اسمها ميادة عشان انا طلبنت منك وصفة حلو بارد عالعموم الف شكر وانا بانتظار وصفتك وواثقة انها حتطلع حلوة تسلم ايديك

Mony said...

ميادة الحمود


أيوة يا جميل أقصدك انت
اول ما اعمل الكيك هصورها و انزلهالك هنا على طول


لا تقلقي

:)
:)

Unknown said...

انا عن نفسي مدمن اكل واوعدك ان انشاء الله حعمل الاكله الجميله دي
الف شكر

أم ياسمين و حبيبة said...

جزاك الله خيرا انا عملت حساب فى المدونة مخصوص علشان اشكرك من فترة متبعاك و متابعة اكلاتك الجميلة و دخت على ماعرفت اسجل عشان ارد عليكى و اشكرك

تسلمى يا رب

الطبخ said...

مرحباً! لم أجد أي طريقة للاتصال بك، لذا فسأكتب إليك في خانة التعليق.

نحن شركة أوروبية وندير موقع طبخ. لقد عبرت بمدونتك عندما كنت أبحث عن مواقع الطبخ وأظنها قد تكون مفيدة لزوار موقعنا. أود لو نقوم بتبادل الروابط على موقعينا.

من فضلك اتصلي بي على ernes@arabiacooking.com بالإنجليزية إن كان ذلك ممكناً وسأرل جميع التفاصيل إلى بريدك الإلكتروني.

شكراً!
إيرنيست

Peggy said...

looks delicious!

tote soly said...

انا بحب جداً كفتة الحاتي
تسلم الايادي على الوصفه الجميلة
ننتظر المزيد

ahmed_k said...

آدي المواضيع اللي تجوع
عموما تسلم إيدك يا مدام موني
وبالهنا والشفا على اللي حيآكل
ومتطوليش الغياب

عائشة said...

طب بتطلع مستوية عادى ؟؟ مش ناشفة ومحجرة معلش اصل على قدى فى الطبخ ودايما لما كنت بعمل الكفتة كنت بحطلها ربع وباية ماية وهى بتستوى ؟؟

Mony said...

عائشة

ايوة يا جميل هتستوي و مش هتنشف بإذن الله
:)

بس تتابعيها انتي برضه

يعني لما تنزل مايتها و تبدأ تاخد لون تابعيها بأنك تقلبيها

علشان انا نسيتها لقيتها بقت زلطةو بقينا بناكلها و نقرقش
:)