السلام عليكم
اديني ماتأخرتش المرة ديه اهه الحمد لله
ربنا مايجيب تأخير تاني
انهردة ان شاء الله هنتكلم عن مندي الفراخ اللي في الفرن
عارفة ان في ناس كتير بتعرف تعمله بس في الفرن ديه اللي حلوة
انا عن نفسي بموووت في المندي
ياسلام لو مندي لحم
تبقي احلي حاجة
نبدأ بأه بسم الله
مندي الفراخ
فرخة لا تزيد عن 1 و نصف كيلو
بصلة وسط مبشورة
جزراية وسط مبشورة
فلفل رومي اخضر مبشور
ملح و فلفل
كمون
(حبة صغننين نصف ملعقة صغيرة مثلا)
(حبة صغننين نصف ملعقة صغيرة مثلا)
نصف ملعقة قرفة
(يمكن الاستغناء عنها للي مش بيحبوا يتبلوا بيها)
عصير ليمونة
نصف ملعقة كاري
ملعقة كبيرة كسبرة ناشفة مطحونة ناعم
في الخلاط نضرب
(ورقتين لورى+2 حبهان+2 فص ثوم+نصف ليمونة ناشفة(لومي)
للأرز
2 كوب ارز بسمتي
نصف عود قرفة خشب
ليمونة ناشفة
(لومي)
ملعقة كركم او زعفران لو متاح
2 ورق لوري
2 حبهان
2 قرنقل
سمن او زيت ذرة
بصلة مبشورة متوسطة
مكعب مرقة دجاج
(يمكن الاستغناء عنه في حاله استخدام شربة)
لو استخدمنا شربة يبقي نحط 2 كوب
ندخل علي الطريقة بأه
نتبل الفراخ الاول
مش محتاجة وقت في التتبيل خالص
نغسل الفراخ الاول بالماء و الدقيق و الملح و عصير ليمونة
و بعدين ندعكها كويس بالملح و الفلفل في العظم
و نقطعها نصفين او اربع ارباع
و بعدين نشرطها بالسكين كده
و تتبيلها بالتتبيلة بتاعتها اللي قلنا عليها في الاول
في العظم و بين الجلد و اللحم و في الفتحات اللي شرطناها بالسكين
و نركن الفراخ علي جنب لحد ما نجهز الأرز
في الصينية اللي هتعملي فيها الارز او في حلة عادية
نحط شوية سمن او زيت علي حسب الرغبة
و نحط فيها البهارات بتاعتنا
القرفة الخشب و ورق اللورى و الحبهان و نقلب كويس لحد ما ريحتهم تتطلع
(الصورة ديه مش بتاعتي علي فكرة)
و بعدين نحط البصلة المبشورة و عليها ملح و فلفل خفيف و تقلبي لحد ما تبدأ تذبل
و بعدين تحطي عليها ملعقة الكركم
او ملعقة صغيرة زعفران مذوبين في قليل من الماء
و تقلبي كويس
و تحطي الارز و تقلبي لحد ما يبدأ الارز يتحمر
و بعدين تحطي 2 كوب شربة
او مكعب مرقة الدجاج+2 كوب ماء
(لكل كوب ارز كوب ماء او شربة)
نجهز بأه المندي علشان يدخل الفرن
و تحطي الارز في صينية عادية او صينية بايركس
و تغطي الصينية بالورق الفويل
و تخرمي الفويل بطرف سكين صغير بالشكل ده
علشان التتبيلة بتاعة الفراخ و هي بتستوي تنزل علي الرز و تديله النكهة
و ترصي الفراخ فوق الورق الفويل
و بعدين تغطي تاني الصينية و عليها الفراخ كلها مع بعض
كده
و سيبيها في فرن تكوني مسخناه من 10 دقائق علي درجة حرارة عالية (250) لمدة ساعة
ولا تقلقي الرز مش هيلزق ولا هينشف
هيعمل بس طبقة ملونة شوي في القعر بس مش هيتحرق ولا هيلزق
انا قلت درجة حرارة عالية علشان الرز ما يعجنش
و بعد ما الفراخ تستوي ننظفها من التتبيلة اللي عليها و نديها لون تحت الشواية
و ممكن تحطي بعد كده معاها فحماية مولعة علشان تاخد طعم الشواء
و بعد كده شيلي الفويل الي عليه الفراخ و اغرفي الارز في سرفيس و عليه الفراخ
ممكن تحطي علي الارز لوز محمر و زبيب
بيدي طعم حلو
اهم حاجة ماتملحوش الارز اوي علشان هينزل عليه تتبيلة الفراخ بالملح اللي فيها
بس كده خلاص بالهنا و الشفاء
و ده طبق ادو
27 comments :
تسلم الأيادى ، جوعتينى يا مونى
واحشانى والله
يا رب تكونى بخير دائمًا
بجد يا مونى جميلة جداا وانا وعدتك انى هعملها وكويس انك كتبتيها علشان اقراها وهعملهالك مفجاه بس اكيد طعمو مش هيبقى زى بتاعى
Shimaa Gamal
الله يسلمك يا جميل
اين انت؟؟
و انت كمان و الله وحشاني
ماتغيبيش عننا تاني بأه
marmortyana
طبعا بتاعك احلي يا مرمورة
علي فكرة يا جماعة مرمورة شطورة موووت
Hello this is Pierre from France
I cannot read arabic it is too bad as your dishes looks terrific !!
I have opened my food blog recently which is dedicated to inventive french food ! so if you want have a visit you are very welcome !!
see you soon !
Pierre from Paris
ممممممممممممممم حلوة دي تنفع في الصيام الأيام الجاية قوي قوي ...تسلم ايديكي بس يعني إيه مندي؟هل هو الرومي؟
Pierre
Thanks pierre
Sure i'll visit your blog
It's known that the french food is the best at all
Any dish you like in my blog just tell me about it & i'll translate it immediately
c u
كلمات من نور
اهلا بيكي يا جميل
اول مرة معانا هنا
صحيح؟؟
المندي ده بأه طريقة اكل
زي الكبسة السعودية
و المكبوس و الأكلات الخليجي ديه
المندي بأه من اليمن
بس المفروض انه بيتعمل علي نار و حطب بس المدنية عدلت في شوي
مش بتسمعي عن محلات حضرموت
مستنية رأيك بأه
ما شاء الله رائعة
تسلم ايدك يامونى بجد
ان شاء الله اجربها وابقى اقولك النتيجة ..
دمتِ بخير ..
wooooooooow tofa ya mony begad taslam edak
لا مش جديدة يا موني ..كنت علقت عندك قبل كده على الكبدة تقريبا؟ والله نسيت ..بس تسلم إيديكي عالوصفة الهايلة دي ...ماما شكلها حتعمل حساب عالجوجل علشان تدخل مدونتك .......ههههههههه باهزر طبعا ..زبس هي أخدت الوصفة وعملتها وقررت تعمل العيش البوري كمان بإذن الله .تسلم إيديكي
Your blog is very beautiful!I tried to use Google to help translate your blog but the translation isn't so good.It looks delicious!I came across your site from the foodieblogroll and I'd love to guide our readers to your site if you won't mind.Just add your choice of foodista widget to this post and it's all set, Thanks!
Oh,I forgot to mention this, you know what,Foodista announced that they are going to publish the best food blogs in a full color book that will be published by Andrews McMeel Publishing this Fall 2010.I'm writing to you because I would like to invite you to enter! All you need to do is simply submit your favorite blog post, photo and recipe into the entry form. Adding multiple recipes will improve your chances of being published!! And your friends and family vote for you, too. You can see the contest details here: http://www.foodista.com/blogbook.Sorry If I had to leave the message here, I was looking for your email to reach you but couldn't find one. Thanks and have a great week!
حلو اوي يا موني
ما ينفعش كده انا لسه بدأه دايت من جديد من يومين
ههههههههههههه
بصي البت اختي لاجئه عندك فى المدونه يا اختي
وقالتلى انها خدت من عندك طريقة البيكاتا والماندي وهاتعملهم
ومعجبه بيكى ايما اعجاب فاكره لما قلتلك جوزك بيفكرنى بجوز اختي
اهي دي بقى
وبعدين يا موني بتعايرنى وتقولي مدونة موني شيك وشكلها حلو عن مدونتك يا اختي
يرضيكى كده
وحشاااااااني يا جميل
اه نسيت اقولك
انا هاقوم اعمل البيكاتا اهو
امووووووووووه
صبرني يارب
يانهار ابيض يا صبصب
الكلامك ده كله ليا
انا وشي بقي طماطم من الكسوف و الله
كتير علي الكلام ده أوي
اختك بحالها بتقول كده
لا و الله يا صبصب
انا مجيش جنبك حاجة
قولي لأختك تستغلك اقصي استغلال علشان الشطارة اللي انت فيها ديه
ماشاء الله
الله أكبر
و بعدين بالنسبة للمدونة انا قلتلك اقعد معاك و ننزل احلى تملبلت لأجمل مدونة بس انت تفضي
قوليلي بأه علي طعم المندي و البيكاتا
Alisa@Foodista
Thanks too much Alisa for your nice invitation
I've joined your foodista widget
& now i'm creating a new english food blog
Translating from this blog
Hope you find it good
لجين أبو الدهب
ربنا يكرمك يا لوجي
جزاك الله خيراً
عايزة أعرف ايه أخبار الأكلة بعد ما جربتيها
كلمات من نور
دانت قديم يا معلم بأه
:)
اهلا بيكي و بطنط
سلميلي عليها اوي و قوليلها ان موني غلبانة و الله
و نفسها تتعلم من خبرة زيك
السلام عليكم أختي، جزاك الله كل خير على الوصفة الرائعة.
أعجبتني طريقة تحضيرها، يجب أن أجربها.
الله يعطيك ألف صحة.
http://mhg1962.ba7r.org/montada-f29/topic-t485.htm#2256
مرحباً،
إسمي نانسي مطر وانا أعمل في مجال الطبخ والوصفات على الإنترنت. إكتشفت مدونتك وأنا معجبة جداً بها، وكنت أحاول الإتصال بك لمناقشة موضوع يخص المدونة، لكن للأسف لم أجد الوسيلة.
هذا بريدي الإلكتروني : nancy@shahiya.com الرجاء ان ترسلي إلي بريدك الألكتروني لأكتب لك ونناقش التفاصيل.
مع فائق الإحترام
أُمَ سوريا
ربنا يباركلك يا أم سوريا
انا بحب أهل سوريا اوي على فكرة
ايه أخبار المندي بأه
:)
يهمني رأيك
في انتظارك
nancy
أهلا نانسي
انا تحت امرك يا جميل في اي وقت
على فكرة انا بعتلك ميل من ساعة ما كتبتي الكومنت
مكنتش حابة الكومنت بتاعك يظهر علشان محدش ياخد الميل بتاعك و يضايقك
بس لما مالقيتش منك رد اضطريت اظهر الكومنت علشان تعرفى اني رديت عليكي
و بكده الميل بتاعي يكون عندك
:)
و أهلا بيكي في أي وقت
في انتظارك
كلمات من نور
شكراً لأمانتك يا قمراية
للأسف لقيت وصفات من بتاعتي في منتديات بنفس الصور و اللي حطاها نسباها لنفسها
ده حتى بالصدفة اشتريت مجلة خاصة بالاكل و لقيت في حاجات من عندي موجودة و بالصورة برضه عندهم و لما كلمتهم انكروا في الاول و بعد كده قالوا لي فيما معناه اخبطي دماغك في الحيط
ربنا يباركلك و يجزيكي كل خير في الدنيا و الآخرة لأمانتك
السلام عليكم ورحمتة وبركاتة ازيك يا مونى بجدا ربنا يقويقى انا بحب الحلويات جدا واول ماشوفت المندى عجبنى جدا لو ممكن عايزكى تعلمنى ازى تزويق الجاتوهات والتورتات ممكن مش عارفة اوصلك ازى
Anonymous :
ربنا يكرمك يا جميل
بس للأسف الشديد
انا ماليش خااالص في تزويق التورتات و الحاجات الكبيرة ديه..
انا يادوب على أدي
معلش لو كنت أحبطتك..
و برحب بيكي يا ستي في اي وقت
اكتبيلي ميلك هنا علشان اضيفك عندي
و نتشات براحتنا و تسألي في اللي انت عايزاه
ولا تقلقي مش هظهره
بس بلاس تورتات
التورتة آكلها بس
انما ماعملهاش:)
Post a Comment