Enjoy cooking
Browse through over
650,000 tasty recipes.
Home » » مغامرات حبوبي المطبخية

مغامرات حبوبي المطبخية

Written By Mony on Sunday, May 17, 2009 | 10:02 PM

كل الفترة اللي فاتت ديه عمالة افكر في صنف حلو

لان المرة ديه الدور علي الحلو

و انا دماغي فيها 300 حاجة
مش فاكرة ولا حاجة منهم

المهم

مش لاقية مكان في دماغي افكر في صنف حلو اليومين دول
فقلت احكيلكم علي مغامرات حبوبي المطبخية
اصل في موقف لسة حاصل

و في الرايحة و الجاية عمالة اذله  بيه


الفترة ديه كل ما انزل الشارع اقع

مش عارفة ايه العلاقة

لاااا مش اي واقعة

ده فن ياناس

بتفنن  ازاي اقع

 بحيث اكون حصلت علي اكبر كمية اصابات ممكنة
 (بس الحمد لله ربنا بيسترها و بتكون الإصابات بعيدة عن بطني)

المهم كنت تعبانة و مش قادرة اتحرك من السرير

و الأولاد صحيوا الصبح جعانين

عايزين فطار
كان يوم اجازة الحمد لله
فقلت لتامر الله يكرمك يا حبوبي فطر الولاد علشان مش قادرة اقف
لو وقفت هقع من طولي

هو طبعا شايف اللي فيها من اصابات فصعبت عليه

فقاللي ماشي

بس اعملهم ايه انا مش بعرف اعمل حاجة
(دايما بيقول كده لو عايز يهرب من حاجة و ينفضلها)

قلتله خلاص خلي الولاد جعانين كده

يا حبوبي انشالله حتي تسلق لهم بيض
 
دانت هتحط البيض و بعد شوي تشيله

بصلي شوي و قالي طيب خلاص

و انا نمت بأه و معرفش ايه اللي حصل
و بعد ساعتين صحيت من النوم لقيت البيت هاديييي و مافيش دوشة علي غير العادة
و مش كل شوي طلبات ولا زن لا اااااااااااي حاجة

قلت
و الله ربنا يكرمك يا حبوبي
عارف اني تعبانة
فاخذ الولاد و نزل لمامته
علشان مايزعجونيش
و قعدت ادعيله

و شوي لقيتهم طلعوا

قلتله ربنا يخليك يا حبوبي و يبارك فيك
انا فعلا استريحت الساعتين دول 
بقي علشان الولاد مايزعجونيش نزلت بيهم عند مامتك

قاللي اي خدعة
علشان ماتقوليش اني حارمك من حاجة

راح الكتكوت الفصيح ابني(عبد الله)قاللي
لا يا ماما بابا اصلا بوظ البيض الللي كان عامله
كان عامل زي الماية كده
راح قاللنا ماتقولوش لماما و انا هجيبلكم حاجات حلوة

راح واخد الأولاد عند مامته علشان تفطرهم

و يداري عملته

طبعا عبد الله قال الكلمتين و جري علشان عارف انه هيتفعص من ابوه

مش عارفة اقولكم درجة اللون الأحمر اللي علي وشه وصلت لايه من الكسوف
علشان اتفضح
لا و ودانه كانت بتطلع دخااان


قلتله
بقي يا تامر مش عارف تسلق بيضه
دانت هتحط البيضه 
10 دقائق و تقفل عليها
بس كده خلاص


قالي و انا ايش عرفني انا حطيت البيضة و اول ما الماية غلت رحت طافي و مقشر البيضه

طبعا ضحكت لما فطست
قلتله يا حبوبي هو انت بتعمل شاي
قاللي ايه ده هو الشاي بيتعمل كده
هنا بأه 
لطمت

اللي مش عارف الفرق بين سلق البيض و عمل الشاي نقوله ايه
مش عارفة

قاللي مانا ياختي كعيت اد كده
رحت اشتريت فطار و اديته لماما علشان تأكل العيال
و جبتلهم حلويات كتيييير علشان مايتكلموش

و الجزمة ابنك اول ما شافك راح قايل علي كل حاجة

قلتله:و انا الي فاكراك واخد الولاد علشان تريحني و ساعتين
قاللي 
لا ياختي
انا قعدت ساعتين تحت 
علشان يكونوا نسيوا 
و مايقولوش علي حاجة
و اهه كله طلع علي الفاضي



و جري ورا عبد الله يقوله هات يا ابن ال(...) الحلويات اللي جبتهالك 
طبعا كلنا عارفين اللي بين قوسين ده ايه
مافيش اب مابيقولهاش
:)
بس بيني و بينكم
انا اللي فزت في الليلة ديه
لاني نمت و استريحت
شحنت يعني
الحمد لله
SHARE

About Mony

34 comments :

دعاء said...

هههههههههههه
شوفتى العيال مبيستروش ازاه
ولا ابائهم الصراحة كمان بيستروا
ياله الحمد لله انه مولعش فى البيت وانتى نايمة
تقبلى مرورى
دمتى بخير

نكهة مغربية said...

ضحكت من قلبي و الله
رنبا يخليهم ليكي و تفرحي بيهم زي منت عايزة
و تسلمي على الطريقة الجميلة في الحكي و الله خليتيني أتخيل الموقف
ههههههههههههههههه
ربنا ينجيكي من كل شر

Anonymous said...

ههههههههههه
انتى حارمانا من التدوين ليه يا استاذه
عموما الراجل ماغلطتشي مش دا اسمه بيض برشت باين
ليه تعذبيه و تحسسيه انه غلطان
اههه من شغل بنات حواء

إيمان said...

يلا المهم انك طلعتيلك بساعتين بس شكل تامر عاملها قصد علشان متطلبيش منه يفطر الولاد تانى
حركات حافظينها يا بنتى

ستيتة said...

هههههههههههههههههههههههههههههههه
جدع يا بيدو ما تخبيش حاجة عن ماما يا حبيبي

بقى سلق البيض مش عارفه يا تامر تؤتؤتؤتؤ طيب أقرأ بقى الفقه المطبخي الميسر لأن ده لازمن ولابد كل الناس تعرفه هههههههههههههههههههه

خدي بالك من نفسك شوية يا موني يعني ايه كل ما تمشي تقعي ربنا يلطف بيكي ويسترها معاكي ومع دعبس افندي

بوسي بيدو على المقلب المحترم الشحط محط ده
هههههههههههههههههههههههه

تحياتي

Mony said...

دعاء

هههههه

مش المثل بيقول ابنك علي ما تربيه
ما الخمس سنين دول لازم يكون في ولاء ليا برضه
مش انا تعبت في حمل و رضاعة و تربية
و لسة كمان


انما الآباء اللي مابيستروش دول مش كتير و الله
بس هي مشكلة زوجي انه حبيب مامته مووووووووووت فمكانتش تخليه يعمل حاجة ابداااا

بس لا تقلقي
انا بحاول اطبق باقي المثل
اللي هو جوزك علي ماتعوديه
(ضحكة شريرة جدااا)

و ربنا يسترها علينا

نورتيني يا دودو

Mony said...

نكهة مغربية


ربنا يباركلك يا جميل
دانتي اللي روحك حلوة بس

Mony said...

biberss

يا اهلا وسهلا


تصدق المطبخ نور و الله يا فندم

انا اللي محرومة و الله من التدوين

ربنا يصلح الحال

طيب البيض برشت ده لازم تكسر البيضة الاول و تنزلها في ماء مغلي و عليها ملعقة خل
و تقعد 3 دقائق بالضبط

انما ديه كانت ماية خالص لاهي ينفع تتطبخ ولا حتي ينفع تترمي

الحمد لله علي كل حال

Mony said...

إيمان


ايه ده
ممكن؟؟



لا لا ده شكله فعلا كان في ورطه
و بعدين برضه بالشكل ده كده كع كتير


يعني برضه مش انا اللي خسرانة
:)

نورتيني يا قمر

Mony said...

ستيته حسب الله الحمش

ما هو ده كهن الفلاحين يا سوتيتة
ووخده من ابوه رأسا


الحمد لله انه ما اخدش مني عبط الصعايدة




اما الوقوع ده
فعلا مش عارفة المشكلة فين

تامر بيقولي لو يوم خرجتي و جيتي ماقلتيليش انك وقعتي اليوم ده
كده ممكن اقلق عليكي


ربنا وحده هو اللي بيسترها و الله
و من عيني البوسة لأدو

و ليكي انت كمان

ELMASRYA - SHAMLOOLA HANEM said...

أولا سلامتك يا موني من الكعبلات اللي بتتعرضي ليها انتبهي لروحك وانتي ماشية في الشارع

وعلى فكرة إبقي اسألي بابا وماما عملولك عقيقة وانتي نونو ولا لأ ولو لأ اعمليها انتي لنفسك ممكن يكون ده السبب

بالنسبة لجوزك ده بقى حكاية

والله معجزة

بقى مالوش في المطبخ خالص؟

ياعيني عليكي يا موني يا حبيبتي ربنا يديلك الصحة وتأكليه

تحياتي وقبلاتي إلى الواد العسل عبوده أنا بحب العيال الرويتر لمامتهم دول خالص وعندي من الصنف ده أربعة

ربنا يحميهم ويخليهم لينا

دمتي سالمة إنتي وزوجك وأبنائك

Anonymous said...

هههههههههههههههه
ههههههههه

انا اشطر منك بقى علطول جوزي بيعمل نفسه مش عارف حاجة وكنت اصدقه لكن بالاخر عرفت انه كان بيساعد امه بشغل البيت كله

بقيت اقوله يعمل اي حاجة واشرحله يعمل ايه بالتفصيل الممل عشان مايتحجج

يعني بعد هيك اشرحيله يعمل ايه بالضبط عشان تضمني ميحرقش البيت ولا حاجة

والف سلامة عليكي ياقمر وانتبهي شوية لتقعي وقعة جامدة لسمح الله ويحصلك حاجة

الا قوليلي انتي لسه مهتمة باللعبة ولا رميتها من الشباك :)

الي عرفته انه المفروض تشغليها عن طريق الاسطوانة الوهيمة او هيك شي مش عارفة والله

اعذريني عالتاخير

تحياتي ياقمر

أم أحمد المصرية said...

خالص تحياتي و قبلاتي لحبيب قلي عبدالله هما دول الاولاد و لا بلاش ما يتبلش في بقه فولة
بجد عرفت تظبطي ابنك :))))
انا شخصيا لو اولادي لم يعطوني تقارير كاملةبحس بقلق

بارك الله لك في اسرتك و اسعدكم و اتم لك حملك علي خير

حاجات جوايا said...

ههههههههههههههههه
الحمد لله انها جت على أد كده

ده من حسن حظك اصلا
لولا البيض باظ مكانوش نزلوا ولا كنتى عرفتى تنامى يا قمر

:)

الف سلامة عليكى من الوقوع يا جميل
ابقى خلى بالك وربنا الحافظ

tota said...

جميل قوي الموضوع ده وضحكت كتير اما كملته في الأخر هو طبعا كويس جدا ان زوجك عرف يتصرف بس ده علشان يقدر ياأختي انتي بتتعبي أد ايه وده بس في الفطار أمال لو كنتي طلبتي غدا كان عمل ايه وأحلى حاجه ان عبدالله حكالك اللي حصل بجد ربنا يخليكي ضحكتيني ربنا يخليكي ليهم يارب ويبارك في أسرتك ويبعد عنك أي مكروه ياموني
وألف الف مليون سلامة عليكي

Mony said...

ELMASRYA - SHAMLOOLA HANEM

الله يسلمك يا قمر

اه طبعا عملولي عقيقة
دانا البكرية و اول فرحتهم كمان
:)

اما بالنسبة لجوزي
فانا في طريق تعليمه الحاجات الاساسية
بس علمته يعمل شاي
و كمان بيعمل دوم و خروب دلؤتي 10/10

يا مسهل بأه
المشوار طويل
بس الحمد لله في تقدم

انا كمان اعز الولاد الرويتر دول اوي
بس معوداهم يحكولي انا بس

انما حد تاني لا ابدا
و لو شاطرة تطلعي منه كلمه
ابوه نفسه مش بيعرف يطلع منه كلمة واحد
و ادو حبيبي بيقعد يتوهه و يجيبه يمين و شمال لحد ما تامر ييأس
و يندهلي انا اتعامل معاه


عيب
دانا اللي تعبت في الحمل و الرضاعة و التربية
و الواد يقر كده بالساهل معاه
ابدا ابدا

Mony said...

نـــوارة


لا تقلقي
انا لسة بقول لمصرية بحاول معاه من الاول في الحاجات الاساسية

و ربنا يسهل

اما اللعبة
فانا بحبها اوي و كان نفسي تشتغل
طيب اجيب الكراك بتاعها منين؟؟

Mony said...

أم أحمد المصرية

ربنا يكرمك يا جميل
و يباركلك في اولادك


و جزاك الله خيرا للدعاء الجميل

Mony said...

حاجات جوايا

اه و الله فعلا ده من حسن حظي


و الحمد لله انها جت علي اد كده
و الحمد لله اننا ساكنين فوق مامتهو الا كان هيصحيني انا برضه

Mony said...

tota


ربنا يكرمك يا احلي توتا
مع اني مكسوفة منك موووت علشان معرفتش اوصلك في الوقت المناسب علشان العزومة


ياريت حد يقدر و الله
فطار و غدا و عشا و نظافة وتربية
كل ده علينا
و مابتكلمش

ربنا يجعله في ميزان حسناتنا

akeed said...

ههههههههههههههههههههههههههه

ربنا يخليلكوا ابنائكم بصحةو عافية بس الحاجات ديه لذيذه بتعنل جو مرح فى البيت وطبعاً لا نغفل دور ست البيت اللى البيت من غيرها مفهوش توازن .


تحياتى

Anonymous said...

الواد عبد الله ده حكاية
كده يفقس ابوه
بس ازاى ابو عبد الله لم يستفيد من زوجته الشيف الممتاز كل المدة ديه
خلى بالك من نفسك ياحبيبتى
وربنا يكملك بالخير
وبوسة لعبد الله ضحكنى من قلبى

مي ثابت said...

سلامتك يا مونى

شفاكى الله و عفاكى

و أُعيذك بكلمات الله التامة من كل شيطانٍ و هامة و كل عينٍ لامة





على فكرة يا مونى

هيه العادة كده .. زوج الست الشاطرة.. مبيعرفش حتى يسلق بيض

لإنه خلاص بيبقى واثق فى أكلها و مش مضطر يتعلم حتى و لو الأكل البسيط


فده دليل على شاطرتك يا قمر

سلامتك ألف سلامة

و قبلاتى عبد الله

kochia said...

الغلطة عندك بقي مش عنده هو
اهو ده نتيجة الدلع
ابقي علميه بقي -اخدم نفسك
تحياتي

Remas said...

الف سلامة عليكى ياموني

مش تاخدى بالك من الوقعات دي

انتى وحشانى جدااااااااا

بجد ضحكتينى وبيدو دا عسول انه مش بيحبي حاجة على مامي


انا جوزى مش بيعرف حتى يحط كوباية ماية لنفسه

والله ولا يعرف يولع البوتاجاز

شفتى المعاناة

المهم انك ارتحتى ساعتين

ربنا يخلي لك جوزك واولادك يارب

Mony said...

akeed

جزاكم الله خيرا يا فندم علي الدعاء الجميل
و لك مثل ما دعيت

و علي الاطراء

Mony said...

أم مالك

ادو ده حبيبي

عموما اي حد لما بيشوف اللي قدامه بيعرف يعمل حاجة
بيتكل عليه في كل حاجة
و ينفض ايده
:)


و بعدين كده بيني و بينك
انا بحب اطبخله
بتبسط لما اقوم اطبخ و اكون عارفة ان الاكلة ديه هتعجبه

Mony said...

مى

ربنا يكرمك يا قمرايا
ده من ذوقك بس


جزاك الله خيرا علي التحصين اللي فعلا محتاجاه

Mony said...

kochia

طبعا انا ساعات كتير بكون فعلا محتاجة المساعدة

بس انا بحب اعمله الحاجة بنفسي
اها انا اللي مدلعاه

بس لما اكون تعبانة و محتاجة مساعدة المفروض يكون في شوية تقدير صغننين

Mony said...

reem


و انت كمان فعلاا وحشاني يا ريم


انا بعترف اني مقصرة معاكي و مع كتييير اوي
بس و الله غصب عني


لان شغلي عبارة عن شغل علي الكمبيوتر لمدة 8 ساعات و بيتطلب تركيز شديد
بعد ساعات الشغل ما بتخلص
بكون خلاااص
عايزة ارمي الشاشة و الكي بورد من الشباك


علي رأيك فعلا

المهم اني ارتحتلي ساعتين
و ده قلما يحدث في وجود الشياطين الحمر ولادي

nona said...

و الله انتى زى العسل
و الواد عبد الله كمان
فيه عندنا مثل بيقول
بنت الشاطرة عويله و بنت العويله شاطرة
يعنى اللى شاطرة فى البيت بنتها بتطلع خايبه و العكس
فواضح ان بينطبق على الازواج كمان
بس ارجع و اقول العيب عندك كان لازم تعرفيه ازاى يطبخ و يعمل شغل البيت
حاجه كده للطوارىء
بس عارفه اكتر حاجه عاجبانى
انك بتقولى على جوزك (حبوبى)مع ان واضح انكم مع بعض بقالكم كتير
ما شاء الله
ربنا يخليكم لبعض

Mony said...

nona


ربنا يكرمك يا جميل
ده بس من ذوقك


بس المثل ده مش بيتطبق كتير
لان مامتي ما شاء الله عليها شطورة خاااالص
بس كانت بتحب الراحة
فكان عندها كتير يخدموها


اما لو علي الزوج
فممكن

بس تصدقي
لاء

لان بابايا كمان كان عليه كام اكلة
روووووووعة

كنا بنطلبهم منه بالاسم
و نصر انه هو اللي يعملهم بنفسه

و موضوع انه يتعلم حاجة للزمن
فربنا يديني الصحة و اعمله كل حاجة
و لو تعبت يبقي ينزل عند مامته
اهه تحت مش مشكلة
و ربنا يخليلي مامتي و اخواتي مش مخليني محتاجة حاجة ابدا


اما بأه كلمة حبوبي

فأنا حبيت تكون هي ديه طريقة الكلام بينا
حتي لو بنتكلم جد
علشان يكون هو ده العادي

علشان كده بقت روتين معانا

نورتيني يا قمر بزيارتك

Unknown said...

رأيى أنها مدونة ممتازة و أكثر من رائعة
و أنا سعيدة جدا أنى وصلت إليها
إنتظرونى فسأقدم بقوة
إن شاء الله تعالى

Mony said...

الجنة


و انا في رأيي ان انت بنوتة زي العسل
و نفسك حلوة
:)


في انتظار الاقدام السريع