الحواوشي المصري

السلام عليكم و رحمة الله و بركاته

 

معلش يا توتا اتأخرت عليكي في طلبك

طريقة الحواوشي ديه قاللي عليها واحد شغال في محل بيبيع حواوشي

و الحواوشي بتاعهم مشهور جدا و دايما زحمة

 

قاللي الموضوع بسيط جدا

المقادير

1 كيلو لحم مفروم

نصف كيلو بصل مبشور

ثمن كيلو لية ضاني

ملح و فلفل

 

الطريقة

بنحط اللحمة المفرومة و البصل المشور و اللية و الملح و الفلفل علي بعض

اللية لو طرية

(مش مجمدة في التلاجة )

اضربيها في مطحنة الخلاط و هي هتبقي عاملة زي السمن

و لو لسة مطلعاها من التلاجة يعني جامدة

ابشريها علشان تبقي حتت صغيرة ماتبانش

بس الاحسن ان تحطيها في الخلاط او المطحنة او الكبة

(المتاح يعني)

و علي فكرة مش هيكون ليها أي ريحة زفرة خاااالص

لان الراجل اللي قاللي الطريقة قاللي ان السر في اللية الضاني

انا مابحبش اطبخ باللية و الحاجات ديه بس لما دقت طعم الحواوشي

(قبل ما اعرف ان فيه ليه)

ماحستش بطعمها خااالص

و البصل و الملح و الفلفل غطي علي طعمها خالص

حتي انا سألت الراجل قلتله مامتي بتبشر علي اللحم المفروم طماطم و بتحط فلفل اخضر

قاللي كل ده مالوش لزمة لو من غير اللية

و ممكن تقللي كميتها بأنك تحطي نص الكمية اللي قلت عليها

و بعدين تجيبي العيش البلدي و تفتحيه من الجنب و تحشي بيه اللحم المفرومة اللي بالخلطة اللي قلنا عليها

بس ماتكتريش كمية اللحمة في الرغيف علشان تستوي

و تلفيها في ورق ابيض

او ورق فويل

و تحطيه في الفرن من تحت في درجة حرارة متوسطة

لو الفرن سُخن من قبل كده الرغيف مش بياخد تلت ساعة

انا بعمل الكمية بتاعة اللحم المفروم اللي بالخلطة ديه كلها  و احشي بيها عي
العيش و ألِفهم و احطها في الفريزر علشان لو ماليش نفس اطبخ اليوم ده ولا كنت بره طول اليوم
الاقي حاجة ناكلها

 

و طبعا الطريقة ديه غير بتاعة الاسكندرانية

لانهم مش بيحشوه في عيش

دول بيعملوا عجينة و يحشو العجينة باللحم المفرومة

و أي خدمة يا فندم انا تحت امرك

يالا بالهنا و الشفا

عصير دوم و عصير خروب

لسة برضه ماليش نفس اطبخ

و تامر عارف يعني ايه ماليش نفس اطبخ

(يعني لو دخلت طبخت الاكل يطلع اعوذ بالله)

فرحت معوضاه و عملاله عصير دوم

قلت اما اعوضكم انت كمان و اعملكم انهاردة عصير دوم و عصير خروب

يااالا انشاللة ما حد حوش

الاول كده علشان محدش يسألني يعني ايه دوم و خروب
هو ده الدوم الصحيح

و ده الخروب الصحيح

زمان كده تامر جابلي علبة كده فيها دوم مجروش و قاللي اعمليلي ده عصير

و ديه كانت اول علاقة ليا بيه

عملت زي ماهو مكتوب علي العلبة بالضبط

اني انقعة في شوية ماية لتاني يوم

بس طعمة مكنش اوي

فكنت بشربهوله هو

:)

و في يوم كنا ماشيين و عدينا علي محل عطارة نوبي

و شفنا الدوم مجروش خشن
(مش مطحون زي البودرا)

و الخروب المجروش سايب

(برضه مش مطحون بودرا)

كنا اول مرة نشوفه كده

فراح تامر اشتري كيلو دوم

و كيلو خروب

و الدوم وزنه خفيف خالص

فعمل كيس كبير معتبر

المهم قلت أسأل الراجل بيتعمل الزاي

حكم النوبيين دول شطار

و الدوم ده بتاعهم اساسا هو و الخروب

الراجل قاللي علي طريقة عجيبة بس شكلها كده طعمها تححححفة

اسمعوا بأه علشان هقول الطريقة اهه

عصيرالدوم

كوب كبير دوم مجروش

كوب كبير سكر

و احطهم في حلة علي نار هادية

و اقلب باستمرار علشان السكر يسيح في الدوم و يصبح دوم مسكر

افضل اقلب لحد ما السكر يسيييح خااالص

بس ناخد بالنا السكر مايعملش لون علشان لو عمل لون هيطلعله ريحة شياط في العصير

و ده مش حلو

اقلب باستمرار

و لما السكر يكون تقريبا اختفي

اروح حاطة عليه 9 كوبايات ماية

هو الراجل قال 8 بس كان تقيل اوي

و اسيبه علي النار لحد ما يبدأ يغلي

و اول ما يبدأ يغلي اطفيه مباشرة

اهم حاجة في الموضوع اني اعاير كل حاجة بكباية واحدة

يعني نفس الكباية اعاير بيها الدوم و السكر و الماية

و طريقة عصير الخروب

زي الدوم بالضبط

بس بنزود كوب ماية

بحيث يصبح 10 كوبايات

طبعا تامر باشا مايكفيهوش 9 ولا 10 كبايات

انا بعمل مقدارين طبعا

بعد فترة كنا في اسكندرية و دوقنا هناك في شارع خالد ابن الوليد الدوم و الخروب

تامر قاللي طبعا مافيش اي وجه شبه

بتاعك احسن مليون مرة

(بس تعمليه بمزاج)

طبعا بعد كده انا عرفت ان الدوم مناسب للضغط العالي و المنخفض

بيظبطه يعني

و مفيد للرجال بوجه خاص

اما عصير الخروب

ففوائد في تقوية المعدة وإدرار البول وتجديد النشاط‏,‏

و سكر المانوز والجليكوز في الخروب يساعد في امتصاص السموم والافرازات الضارة الموجودة في الأمعاء

و يهدئ من الحركة الزائدة لعضلات الأمعاء ويعالج القولون العصبي ويقلل من فقد السوائل الذي يصاحب حالات الاسهال‏

و الكلام ده طبقا لما ورد

'بجريدة الأهرام'

صينية الفراخ بالكاري

كنت في يوم معزومة عند اخت تامر

هي ما شاء الله عليها شطورة خاااالص

و كان من ضمن الموجود صينية الفراخ بالكاري

و تامر كان مبهور بيها

لدرجة انه قاللي ماتمشيش من غير طريقتها

و اخدنا الطريقة و عملناها و طلعت زيها بالضبط الحمد لله

هي مش بتاخد وقت خالص

(و ده اهم حاجة بالنسبالي)

يعني لو واحدة موظفة ولا واحدة مالهاش نفس تقوم تطبخ

او واحدة اول مرة تطبخ

يبقي الصينية ديه ممكن تكون من الحلول المتاحة

و اللي هيدوقها هيفتكر انك تعبتي فيها كتير

نبدأ بأه بسم الله

المقادير:

فرخة

(مقطعة اربع ارباع)

(ممكن تحطي اوراك بس او صدور بس)

بس انا مابعرفش آكل غير الفراخ البلدي

1 بصلة كبيرة

(مقطعة مكعبات صغيرة)

1 طماطم كبيرة

(مقطعة مكعبات صغيرة)

ملعقة كبيرة كاري

ملعقة صغيرة ملح

نصف ملعقة صغيرة فلفل اسود مطحون

3 ورق لوري

3 حبهان

نصف ملعقة صغيرة شطة او هريسة شطة

(حسب الرغبة)

طبعا نراعي ان المقادير ديه لاربع قطع فراخ

(فرخة يعني)

يعني لو زودنا في قطع الفراخ

طبعا هنزود في مقادير التتبيلة

الطريقة:

من بالليل

تحطي قطع الفراخ في الصينية

و تغرزيها بالسكين علشان التتبيلة تتغلغل

وحطي عليها البصلة المكعبات و الطماطم المكعبات

و ورق اللوري و الحبهان

و الكاري و الملح و الفلفل

(ممكن اضافة ملعقة صلصة طماطم علشان يكون لون صوص الفراخ احمر)

و قلبيهم مع بعض كويس

خدي بالك ماحطناش اي دهون خاااالص

و مش هنحط

و غطيهم بورق فويل

و حطيهم في الثلاجة لتاني يوم لما يجي وقت الطبخ

و وقت الطبخ طلعيها من التلاجة بنفس الصينية و اللفة اللي بورق الفويل

و حطيها في فرن ساخن

(تكوني مسخناه من قبل كده)

بتاخد من ساعة الا ربع لساعة

بعد ساعة الاربع

اكشفي الورق الفويل علشان تشوفيها استوت ولا لاء

لو لقيتيها استوت سيبيها مكشوفة في الفرن شوي علشان وجهها يحمر

ممكن تحطيها دقيقتين تحت الشواية

ممكن تقدم في الصينية زي ماهي

و ممكن بعد ما تتحط تحت الشواية و تاخد لون نقدمها علي رز ابيض او ارز بالكاري

و ممكن نعمل معاها تومية

و سلطة

تورتة ايس كريم

تورتة ايس كريم

بعد الكشري قلت اجيبلكم حاجة تبرد علي قلبكم شوي

:)

انهاردة عرفتلكم طريقة لتورتة الايس كريم

سهلة خااالص

و تكلفتها مش هتكون زي شرائها جاهزة طبعا

جبتلكم الطريقة ديه من نايجلا لاوسون اللي بتيجي في فتافيت

ندخل في المفيد

المقادير:

هنحتاج كيكة او بواقي كيكة

ناس هتقوللي تمشي بسكوت

ماااشي

نمشيها بسكوت

(بس انا مجربتوش)

مكسرات مجروشة خشن

لتر و نص ايس كريم جاهز اللي في علب

طبعا الكمية انتم اللي تحددوها

(النوع اللي تحبوه بأه)

(هبقي اقول لكم علي طريقة الايس كريم اللي بعملها بعدين)

الطريقة سهلة جدااااا:

 

لو عندنا بواقي كيك او تورتة او جاتو

نحط البواقي ديه في التلاجة علشان تنشف

و كده يسهل اننا نفتفتهم علشان يكونوا قاعدة لتورتة الايس كريم

و نخلط بالفتافيت ديه المكسرات المجروشة

(ممكن مانحطش مكسرات طبعا ده حسب الرغبة)

(بس بتدي رونق للحاجة و بترفع من قيمتها)

نجيب الصينية اللي هنشتغل فيها

و نفرد عليها ورق نايلون بحيث يكون مغطي جميع جوانبها

(بيتباع في السوبر ماركت لفة شبة لفة الفويل)

بحيث يكون ده شكل الصينية

و بعدين نفرد الكيكة اللي فتفتناها و خلطناها بالمكسرات

و نضغط عليها جامد علشان تنضغط

و كده نكون عملنا قاعدة للأيس كريم

طبعا احنا كنا سايبين الايس كريم في درجة حرارة الغرفة علشان ينفع افرشه بسهولة

ممكن نحط معاه شوية مكسرات مجروشة و نقلب كويس علشان المكسرات تتوزع كويس

(بس لو هنحط في القاعدة مكسرات يبقي بلاش نحط في الايس كريم)

(علشان الحاجة تطلع شكلها شيك)

و ننزل الايس كريم في الصينية علي قاعدة الكيك اللي عملناها

ممكن طبعا نعمل نوعين ايس كريم

(طبقتين)

بس الله يكرمكم الطبقتين يكونوا لايقين علي بعض

ممكن نحط الطبقتين علي بعض و خلاص

و ممكن نحط بين الطبقتين قاعدة تانية من الكيك المفتفت و فوقيها الطبقة التانية من الايس كريم

بس كده هنستني لما الطبقة الاولي تجمد شوي و بعدين تطلعها و نحط طبقة الكيك و فوقها الطبقة التانية للايس كريم

و نحطها في الفريزر لحين وقت التقديم

و تقدم من الفريزر مباشرة

و لما نقدمها طبعا سهل اننا نطلعها من الصينية بسهولة علشان النايلون اللي فرشناه في الصينية الاول

ممكن وقت التقديم نكون محضرين أي صوص

(اللي بنحبه و طبعا يكون لايق علي الأيس كريم اللي محطوط)

ممكن صوص شوكولاته

صوص كراميل بالمكسرات

لو الايس كريم شوكولاته ممكن الصوص يكون فانيليا

اهم حاجةاننا نراعي ان الحاجة اللي احنا حاطينها تناسب بعضها

(لايقة علي بعض يعني)

ممكن مانحطش صوص خالص و هتكون جميلة برضه

او ممكن نرش علي وش التورتة مكسرات

و ياريت طبعا لو هنعمل الايس كريم شيكولاته مثلا

ياريت الكيكة اللي هنسنخدمها قاعدة تكون كيكة شوكولاته

في ناس هتقوللي احنا ليه محطناش الكيكة او شريحة منها تحت الايس كريم عادي كده من غير ما نفتفتها

هقول ان الايس كريم لما بيسيح علي الكيكة بشكلها العادي بيخليها عاملة زي العيش المبلول

انما الفتافيت المضغوطة ديه هتقاوم شوي

طبعا انت ممكن تحطيها كده من غير ما تفتفيها لو متأكده انك اول ما تحطيها لضيوفك مش هيسيبوها تسيح

و هتتاكل فورا

و سلمولي بأه علي التهاب الزور

:)

و بالهنا و الشفا

الكشري

انهاردة بمناسبة رجوعي بالمدونة

جبتلكم طريقةالكشري

بتاعة شيف شربيني

بصراحة ماطلعش حلو زي بتاع بره الا بعد ما اخدت طريقة الراجل ده

ندخل علي الطريقة علي طول بأه

المقادير:

كيلو ارز

نصف كيلو مكرونة اسباجيتي

(مقصوصة قصير)

نصف كيلو مكرونة مقصوصة

(بتاعة الكشري)

نصف كيلو عدس بجبة

نصف كيلو حمص مسلوق

كيلو طماطم

(عصيرمضروب في الخلاط)

راس ثوم كبيرة مهروسة و عليها ملح و كمون

نصف كيلو بصل مقطع شرائح رفيعة

(علبة هريسة شطة)

خل

الطريقة

الأول نعمل الارز:

نغسل العدس و نسيبة في شوية ماية

و نغسل الارز و نركنه علي جنب

في حلة علي النار نحط فيها شوية زيت و نبشر فيها بصلة كبيرة و عليها ملح و كمون و فلفل

و نقب و لما تذبل البصلة نحط العدس بمائه علي البصلة

(الماية يا دوب تكون مغطية العدس بسنتي متر)

و نسيبه علي النار و نغطية

و لما يتشرب احط شوية زيت و بعدين احط عليه الرز

(علشان ما يعجنش)

و اقلب كويس علشان يتجانس و بعدين ازود ماية

(المقدار العادي لتسوية الرز)

و ادوقه علشان لو محتاج ملح تاني

و اغطية لحد تمام التسوية

طبعا ممكن نعمل الارز لوحده و العدس لوحده

بس العدس هنعمله بالطريقة بتاعتنا من غير ما نزود الرز و لما يستوي نطفي عليه

و الرز نعمله بالشعرية مثلا او رز ابيض عادي

المكرونة:

هنسلقها عادي بالطريقة العادية بتاعتنا

بس نسلق كل نوع لوحده

صلصة الطماطم:

ناخد نصف مقدار الثوم المهروس و نحطه في حلة فيها زيت علي النار

و نقلب

يا دوب الثوم يبدأ ياخد لون

احط عليه 3\4 كوب خل

و لما الخليط يغلي احط عصير الطماطم و اسيبها لحد ما تستوي

(بس ما اسبهاش لحد ما تبقي غليظة)

يادوب تكون بدأت تربط و ليها قوام

للصلصة اللي بالشطة:

ناخد مقدار من الصلصة اللي عملناها و نحطه في كسرونة صغيرة و ندوب في نصف ملعقة من هريسة الشطة

و نسيبها علي النار و لما تغلي نطفيها

الدقة اللي بتكون موجودة في المحلات في زجاجة:

ناخد النصف الباقي من الثوم المهروس و نحطه في حلة فيها زيت ساخن علي النار

و نقلب و لما يبدأ الثوم يتلون نحط عليه مقدار من الخل و علي مقدارين ماية

(مثلا لو نصف كوب خل يبقي نحط كوب ماء)

و عليهم ملح و كمون

و نتركهم لحد ما يغلو و بعد كده نطفي عليهم

و نحطهم في برطمان و نغطيه كويس لحين الاكل

البصل المحمر:

نرش علي البصل شوية ماية و بعدين نحطه في كيس فيه دقيق و نقلب علشان يتغطي بالدقيق

و نحمره علي النار في زيت غزير و ساخن

كده البصل هيفضل مقرمش فترة طويلة و مش هيشرب زيت كتير

و كده خلاص نكون خلصنا الكشري

نبدأنغرف الطبق بأه حسب الرغبة

الارز بالعدس الاول

(لو معملناهومش مع بعض نحط الارز في الاول و العدس في الاخر خااالص)

و بعدين المكرونة بنوعيها

ثم الحمص المسلوق

و العدس

(لو ما ضفناهوش مع الرز)

و بعدين الصلصة

و في الاخر علي الوش البصل المحمر

علي فكرة مش بياخد وقت خالص

لو بدأنا في كل حاجة في نفس الوقت

هنخلص في نصف ساعة كل حاجة

و بالهنا و الشفا