بقالي كام يوم بفكر في الحلو المرة يه يكون ايييه؟؟
و الجو الحر الجامد اللي احنا فيه ده اوحالي اني اعمل آيس كريم
قلت اهه مناسب برضه اقولكم عليه
بس هفضل شايلاه في الفريزر لحد ما اولادي يخفوا
علشان هم تعبانين اوي من تقلبات الجو ديه
بسم الله نبدأ
هنعمل في البوست ده الآيس كريم
و كام صوص
و كمان طريقة البسكويت (القرطاس )بتاع الآيس كريم
الطريقة سهلة جدا و المقادير متوفرة برضه
انا بحب اعمل الآيس كريم بالفواكه الفريش في الموسم بتاعها
المقادير:
في حدود 3/4 كيلو مانجة مثلا
(او أي نوع فاكهة انت عايزة تعمليه)
و لو شوكولاته يكون في حدود نصف كيلو شيكولاتة خام و نسيحها
(500 جرام يعني)
علبة لبن مكثف نستلة او أي نوع
(ال370 جرام اللي هي اصغر حاجة)
علبة جيلي من نفس نوع الفاكهة
(لو مش متوفر النوع يبقي علي الأقل اللون)
(ممكن طبعا نستخدم الجيلاتين الشفاف)
بس كده المقادير كده خلاص
الطريقة:
نحضر الجيلي زي ما هو مكتوب عليه في التعليمات بالضبط
هيطلع لنا 2 كوب سائل الجيلي
نسيبه لحد ما يبرد شوي
نكون محضرين الفاكهة اللي هنستخدمها
تكون متقطعة
نحطها في الخلاط مع الجيلي و نضرب في الخلاط حتي التجانس التام
و بعدين نضيف اللبن المحلي المركز بتاع نستله
و نضرب كويس و بعدين نصب الخليط ده في علبة في الفريزر
ممكن نحط مع الخليط قطع من الفاكهة و نقلبها بتدي طعم جميل برضه
تخيلي كده انت بتاكلي ايس كريم فراولة و فيه قطع فراولة ي
و ياسلام لو مكسرات كمان
بالذات مع الشوكولاته البندق بيخلي طعمها رااااائع
و كمان ممكن نحط قطع من الشوكولاته في الخليط بتدي شكل جميل ساعة الغرف
و نسيبة علي الأقل ساعتين علشان يمسك نفسة و يكون قوامه زي الآيس كريم
طبعا علي حسب الفريزر بتاعك
ممكن يتطلب يقعد في الفريزر ل6 ساعات
بس بيطلع كريمي و طعم الفاكهة الفريش واضح جدا فيه
بيطلع تحححفة
كل اللي هيدوقة مش هيصدق انه معمول في البيت
و من غير ماكنة آيس كريم كمان
ممكن طبعا يتقدم كده سادة او يتقدم مع صوص حسب نوع الآيس كريم اللي معمول
انا بصراحة بستسهل و اجيب مربي و أخفها علي النار باشوية ماية صغيرين و استخدمها صوص
مربي مانجة او مشمش او فراولة او تين
علي حسب نوع الفاكهة المستخدم في الأيس كريم
ممكن تعملي صوص كراميل
كوب كبير و نصف سكر
نصف كوب كبير كريمة لباني
(فريش كريم)
نصف كوب كبير بندق مجروش
نحط السكر في حلة علي نار هادية و نقلب بالراحة لحد ما يسيح و لونة يكون كراميل غامق بس اوعوا يتحرق منكم
و بعدين نحط عليه الفرش كريم و نقلب لمدة دقيقة كده و نحط البندق و نقلب علي النار لحد ما قوامه يغلظ و يصبح عندنا الصوص جاهز
(تقريبا من 4 ل5 دقائق تقليب متواصل)
ممكن صوص شيكولاته
نشيل شوي من الشوكولاته الخام اللي سيحناها
و نحط عليه زبدة و فريش كريم و نقلب كويس لحد التجانس التام و يكون في قوام الصوص
بس مانكترش الفريش كريم علشان ماتأثرش علي لون الشوكولاته
او نعمله بالطريقة ديه:
نصف كيلو لبن
ملعقة كبيرة مليانة كاكاو
نصف كوب كبير سكر
(100 جرام)
ملعقة كبيرة زبدة لينة
150 جرام شوكولاته دارك قطع
نحط اللبن و عليه السكر علي النار و نقلب كويسو لما يغلي نهدي النار شويو نحط الشوكولاته القطع و الكاكاو و نفضل نقلب علي نا هادية خاااالص حد ما الشوكولاته تسيح تماما في الأخر نحط ملعقة الزبدة علشان التلميع
طيب كده احنا خلصنا الآيس كريم
و الصوصات كمان
ندخل بأه علي المفاجئة الكبري
هقولكم علي طريقة بسكويت الأيس كريم
يالا ان شالله ما حد حوش
المقادير:
90 جرام زبدة لينة
90 جرام سكر بودرة
45 جرام دقيق
بياض بيضة
فانيليا
مبدأياً كده علشان صبرني ماتحدفنيش بحاجة
الملعقة الصغيرة بتساوي 5 جرام
و الملعقة الكبيرة(بتاعة الأكل) بتساوي 15 جرام
يعني 90 جرام هتساوي 6 ملاعق طعام
45 جرام هتساوي 3 ملاعق طعام
اتفقنا؟؟
كده مافيش ضرب
:)
في مقادير تانية و بتدي نتيجة كويسة برضه
نصف كوب سكر بودرة
نصف كوب زبدة
كوب دقيق
(بس ننقص منه مقدار ملعقة كبيرة)
بياض 2 بيضة
فانيليا
(لو اخدنا بالنا هنا زود في مقدار الدقيق مقابل السكر و الزبدة و عوض ببياض البيض)
نسيح الزبدة علي النار و نذوب فيها السكر البودرة و نقلب كويس و يستحسسن نضرب بالمضرب السلك
و نحط بياض البيض و عليه الفانيليا و نخفق كويس جدا و بعدين نحط الدقيق و نفضل نخفق لحد ما الخليط يكون عجين سائل بدون أي كلاكيع
و نجيب ورق مقوي مضلع من عند أي حد بتاع مستلزمات الحلواني
او حتي مش مضلع
و نقصه دواير و نحط عليه العجين بتاعنا بالكبشة و نفرد بالملعقة علي الدايرة بتاعتنا
نحاول ما نرفعهوش اوي علشان يكون قوامه كويس
و نحطه في الفرن علي درجة حرارة عالية
يادوب 5 دقائق او لحد ما الأطراف تحمر
نقوم بسرعة مطلعينه من الفرن و في ساعتها نلفه علي شكل قرطاس
او ممكن نحطه علي طبق علشان ياخد شكل الطبق
و هو دقيقة واحدة و هينشف علي الوضع اللي عملناه عليه
ممكن نحطه في الفرن تاني بعد ما شكلناه علشان يكمل احمرار
كده
علي فكرة انا ساعات بستخدم البسكويت اللي علي شكل طبق ده في تقديم الفروت سلاد (سلطة فواكة)
بتبقي فكرة حلوة ان الواحد بعد ما يخلص طبقة ياكله بعد كده
طبعا ممكن تشتري بسكويت جاهز من بره
و تعملي ساندويتش ايس كريم
زي الويتش اللي بيتباع في السوبر ماركت
و ممكن نقدمه بالأشكال ديه
يالا بأه بالهنا و الشفا
انا عارفة اني تقلت عليكم اوي في البوست ده
بس ده موضوع متكامل لازم يتحط كله مع بعض
