تارت الجوز بالشيكولاته

التارت ده فكرته زي اي تارت

بس عجبني علشان بالشوكولاته





و بعدين انا بحب الجوز اوي

(البقان)





اللي اكل عند سينابون هيعرف الجوز ده



اصل انا ماعرفتوش الا من هناك





نبدأ بأه



"المقادير"





3 بيضات مضروبين و طالع عينهم



1 كوب شربات ذرة

(بيتباع في السوبر ماركت)

غامق او فاتح مش مشكلة





4 مربعات شوكولاته طهي سايحة و باردة
(سكر قليل)


1/2 كوب سكر



2 ملعقة سمن او زبدة سايحة



1 فانيليا

(اوملعقة سايلة)

1 1/2 كوب جوز مقطع انصاف

(ممكن لوز او بندق حسب الرغبة)

1 قاعدة تارت

"الطريقة"

في سلطانية كبيرة

نحط البيض المضروب و عليه شربات الذرة و الشوكولاتة و السكر و الزبدة و الفايليا و نخلطهم مع بعض كويس اوي لغاية التجانس التام

و بعدين نصب الخليط علي قاعدة التارت و نرص علها الجوز

و نحطها في درجة حرارة 180 من 50 ل 60 دقيقة

او لحد ما ندخل السكين و يطلع نضيف

ازاي نعمل قاعدة التارت؟؟

انا شوفت الطريقة ديه علي برنامج اسمه حلويات علي قناة الاسرة و الطفل

150 جرام دقيق

100 جرام زبدة

50 جرام سكر بودرة

اضرب السكر و الزبدة لحد ما يبيضوا و يتجانسوا تماما

وبعدين احط الدقيق واقلب حتي يكون عندي عجينة صالحة للتشكيل

اسيب العجينة تستريح في كيس لمده نصف ساعة في الثلاجة

و بعدين افرد العجينة و اقطعها علي مقاس الصينية

و اخرمها بالشوكة

و بعدين احطها شوي في الفرن شوي بس تمسك نفسها و بعدين احط فيها الخليط

وفي طرق اخري بيكون الخليط بيتحط بعد تسوية التارت زي اللي فوق علي الشمال

كريم كراميل

الطريقة ديه من بنت عمتي نونا

و هي لهلوبة في المطبخ

يعني ناخد منها الوصفة واحنا مغمضين



"المقادير"

.

.

6 ملاعق كبيرة سكر

(علشان الكراميل)

.

3 كوب لبن

.

6 بيضات

.

6 ملاعق كبيرة سكر

(غير اللي فاتو)

.

2 باكو فانيليا

.

.

.

.

.

"الطريقة"



بالنسبة للكراميل

.

نسيح السكر علي نارهادية لحد ما يصل لونه للذهبي الغامق

(بس حاسبوا لحسن يتحرق)
.



.

.
اما باقي المقادير نضربها مع بعض في الخلاط
.
وكده يكون خلاص الكريم كراميل جاهز للتسوية
.

.
لو تحبوا تعملوه في اطباق صغيرة بتاعة الفرن ماشي
.

.
و لو مافيش اطباق صغيرة ممكن في صينية فرن تكون مناسبة
.

.
نحط السكر المحروق في الصينية و نفرده كويس بالتساوي
.

.
و بعدين نحط الخليط اللي ضربناه في الخلاط فوق السكر المحروق
.

.
و نجهز صينية اكبر يكون فيها ماية سخنة و نحط فيها صينية الكريم كرامل او الاطباق الصغيرة
.

.
و نسيبها في الفرن علي درجة حرارة 180 (متوسطة) لمده ساعة الا ربع
.

.
و لما يبرد نحطه في التلاجة
.

.
و وقت التجهيز تحط الصينية علي النار دقائق علشان السكر يفك
.

.
و لما نحس انه فك خلاص تقلبه علي طبق التقديم
.

.
وبالهنا و الشفا

بيف ستروجانوف

الطبق ده بأه انا جبته من مجلة اجنبية كانت بتاعة تيتا

(جدتي)

.

اصل تيتا كانت غاوية مجلات من لوندون و باريز

(يعني لندن و باريس)

.

اه هي صعيدية

.

بس كانت بتقرأ انجليزي علي قدها

و ماكانتش بتغلب

.

علي فكرة

برضه الطبق ده ينفع في عزومة و جنبه سلطة كول سلو او سلطة زبادي و سمبوسه بالجبن و تبقي عزومه راقية جدا

.

مش لازم يعني المحمر و المشمر

.

.

.

.

نبدأ بأه

.

.

"المقادير "

.

1/2 كيلو لحم بقري مقطع مكعبات صغيرة

.

3 ملاعق زبدة

(ممكن يمشي زيت للي مش بيحب الزبدة)

.

200 جرام مشروم مقطع شرائح

(اقل من الربع كيلو بشوي)

الفريش ممتاز

و ممكن نمشيها علب من اللي في السوبر ماركت

.

2 ملعقة كيبرة بصل مكعبات صغيرة

(بصلة كبيرة)

.

1 كوب ماء

.

1/2 كوب فريش كريم

(زي بتاعة جهينة مثلا)

.

1/2 كوب دقيق

.

ملح و فلفل

.

"للمكرونة"

.

كيس مكرونة

(الشكل حسب الرغبة)

.

ملعقتين زبدة

.

جزرة صغيرة مبشورة

.

ورق كسبرة خضرا مقطع صغير اويييي

.

.

"الطريقة"

.

نرش الدقيق علي اللحمة و نقلبه فيه كويس بحيث تكون اللحمة كلها متغطية دقيق

.

و بعدين نجيب طاسة كبيرة و نحط فيها ملعقتين الزيت او الزبدة و لما تسخن نحط فيها اللحمة و نقلٍب حتي تصل للون البني

.

و نشيلها من الطاسة و نحطها في طبق علي جنب

.

في نفس الطاسة اللي عملنا فيها اللحم نحط البصل مكعبات صغيرة و ملح و فلفل

ونقلب لحد ما يدبل شوي

.

و بعد كده نحط الماشروم و نقلب معاه كويس لحد ما يتجانس و البصل يكون تقريبا مش باين

و بعدين نحط اللحم اللي كنا ركنينه و نقلٍب كويس مع بعض

.

و نضيف شوية ماية يادوب نغطي اللحم

.

و لما تغلي الماية نوطي النار ونغطي و نسيبها شوي

لما تبدأ الماية تنشف نشوف اللحم استوي و لا لسة عايز كمان

(طبعا لو اللحم بتلو مش هياخد وقت خالص علي النار ,انما لو كانت كندوز ممكن تحتاج نضيف مايه كمان)

(و نكرر اضافة المايه لحد ما اللحم يستوي)

.
.

و لما نتأكد ان اللحم استوي نضيف الكريمة ونسيبها تاخد غلوة(يعني تغلي)مع اللحم

.

.

*ملحوظة*

لو الصوص بتاع اللحم قليل ممكن نضيف شوي مايه ونسيبها تغلي علشان تتجانس مع باقي الصوص

.

.

و نقدم اللحم علي المكرونة زي الصورة كده بالضبط

.

.

ازاي نحضر المكرونة ديه بأااااااه????

.

.

نسلق المكرونة بتاعتنا عاااادي

.

و في طاسة صغيرة نحط ملعقتين زبده سخنين

.

و نشوح فيهم شوية جزر مبشور

.

ونطفي النار

.

و نحط ورق كسبرة خضرا مقطع صغير خالص

ونقلب كويس اوي

.

.

و بعدين نحط المكرونة علي الخلطة ديه و نقلب

.

هتطلع زي المكرونة اللي في الصورة فوق

.

اه و الله

.

بس جربوا انتوا وقولولي ايه الاخبار

.

.

.

.

.

علي فكرة انا بعمل البيكاتا بصوص الماشروم بنفس الطريقة

.

بس الفرق ان اللحم بيكون فلتو او بفتيك سميك شوي

.

و بتبل اللحم قبل الطبخ بالبصل المبشور و الملح و الفلفل

شربة فراخ بالكريمة

الشوربة ديه تليق مع البوست اللي فات

علشان الاجنحة اللي شيلناهم من الفراخ

"المقادير"

كوب كريمة فريش

(ممكن لو مافيش)

(كوب لبن مذاب فيه ملعقة كبيرة دقيق)

2 كوب شربة فراخ

جوزة الطيب

(لو مافيش مش مشكلة)

ملح و فلفل

.

تذيب الدقيق في اللبن ونحطه علي الشربة

و نحطهم علي النار

و نضيف اللحم اللي بأجنحة الفراخ للشربة

و نقلب علي النار حتي تبدأ في الوصول للقوام المطلوب

(غليظ شوي صغيرين)

(بس اوعي تسيبيها كتير لحسن تقلب مهلبية)

و نبشر عليها جوزة الطيب

(ان وجد)

و لو محتاجة ملح و فلفل نحط حسب الحاجة

.

اتمني اني اكون اضفت لاي حد اي حاجة

نبدأ بالفراخ المحشية

الفراخ المحشية سهلة و سريعة و جميلة

.

و لو عملتيها في عزومة ممكن تسد اوي كمان

.

.

.

"المقادير"

فرخة ضغيرة في حدود 1 كيلو

(لفردين)

(او فرد واحد لو اكيل شوي)

بس مش اكتر من كيلو علشان تستوي كويس

نصف كوب ارز

2 ملعقة سمن او زيت

1 بصلة صغير

1 بصلة كبيرة

1 طماطم صغيرة

ورق لوري

حبهان

ملح و فلفل

.

.

.

و نقول لبتاع الفراخ ان الفرخة ديه للحشو علشان مايقطعش رقبتها

.

و بعدين نتبلها من جوة بالملح و الفلفل

(ندعك العظم كويس اوي بالملح و الفلفل و من تحت الجلد)

.

و نسيبها تتبل شوي و نعمل الحشو

.

نجيب نصف كوب كبير رز و نغسله كويس

و بعدين نحمره كويس في حلة فيها ملعقتين سمن او زيت

(حسب الرأي الشخصي)

.

و نفضل نقلب حتي يصل الرز للون الذهبي

و بعدين نزود الماية لحد ما يادوب نغطي الرز ب1سم

.

و اول ما تغلي الماية نوطي النار خالص لحد ما يستوي الرز 3/4سوي

يعني قبل السوا بحاجة بسيطة خالص

.

و بعد ما يخلص الرز

نبشر عليه بصلة صغيرة و نتبله بالملح و الفلفل

و نقلب كويس

.

و بعدين نحشي الفرخة و ندخل الحشو في الزور

(الحصلة)

.

و بعدين نكتف الفرخة

.

و نكون مجهزين حلة علي النار فيها

ماية

و 3 حبهان

و 3 ورق لوري

و بصلة كبيرة مقطعة 4 ارباع

و طماطم صغيرة 4 ارباع

قليل من الفلفل الاسود المطحون

.

.

و لما تغلي الماية نحط الفرخة و نغطيها و نسيبها مبدأياً ثلث ساعة و نشوف لو استوت ولا لاء

.

الملح نضيفة في الاخر علشان مايأخرش السوا

.

ماتنسوهاش علي النار علشان ديه فراخ صغيرة بتستوي بسرعة

والا الفراخ تتهري و الرز يقع في الشربة

.

.

ماتخافوش هتكون استوت انشاء الله

.

و بعدين نطلع الفراخ من الشربة و نسيبها تبرد شوي

و نقطع الجناح بتاعها علشان نعرف نحمرها

.

نجيب طاسة كبيرة و نحط فيها سمن بس كتير شوي

(ملعقتين تلاتة كده)

و بعد ما السمن يسخن

و نحط فيها الفراخ كاملة و نقلبها براحة علي كل الجوانب

و كأنها مشوية

(ماتخافوش السمن ده مش هتشربه الفرخة ده للتحمير بس)

يعني مش هيضر

.

و ممكن نعمل جنبها بطاطس محمرة و سلاطة خضرا و شربة فراخ بالكريمة

(بالجناحين اللي شلناهم)

.

يا رب اكون افدتكم

و بالهنا و الشفا

مقدمة لابد منها

السلام عليكم و رحمة الله و بركاته

.

انا من الناس الي مش بحب الطبخ اوي

.

اقصد الطبخ التقليدي

.

اكيد مش عايزة اقضي عمري في المطبخ

.

بس بحب الحاجات الجديدة و السهلة اللي ماتاخدش وقت

.

و دايما بحب اتابع برامج الطبخ

(اولهم برنامج من كل بلد اكلة)
(شيف شربيني و شيف يسري)

.

او المنتديات اللي بتبدع فيه

.

و اكيد بتفرج علي قناة فتافيت

.

و عندي كشاكيل كتييييير من وصفات

منها اللي جربته و اللي لسة ماجربتوش

.

.

و كمان يا سلام لو اكلة تقليدية بس بطريقة و نكهة احسن و اجدد

.

.

.

.

وكتير من الوصفات ديه كان ليها قبول عند العائلة و الاصدقاء

.

فقلت لنفسي طيب ما انا اجمع الوصفات اللي انا نقلتها من كل حتة ديه

.

و جربتها و لقيتها فعلا حلوة و احطها في مكان واحد علشان افيد و استفيد

.

بس ياريت اكون فعلا بفيد

.

و يا ريت لو كمان استفيد

.

.

انا مابقولش اني شيف بأه وخبره وحاجات

بالعكس

.

دانا ياما بوظت اكل كتييييير

.

بس الحمد لله اتعالجت خفًيت خلاص

.

بس في ايام بتعدي علينا بنبقي مش عارفين نعمل ايه انهارده

.

و ممكن واحدة تكون راجعة من الشغل و مش قادرة تقف في المطبخ

.

او واحد قاعد لوحده و عايز يعمل حاجة سريعة

.

فممكن بصًة صغير هنا وهيكون في اقتراحات سهلة و سريعة للمنيو بتاعة انهارده

.

.

.

.

.

.

اي حد عنده اقتراح او تعديل لاكلة معينة او نوع حلويات او حتي مشروبات بطريقة حلوة

اكيد هكون مبسوطة لو تكرم و قاللي عليه

و اخيرا

يا ريت اكون ضيفة خفيفة عليكم

وتحبوا تطلًوا عليا