الارز بالخلطة

السلام عليكم

.

اخباركم ايه يا جماعة بعد العيد

.

كنت ناوية اخد اجازة بعد العيد بس في حد عزيز علي طلب الارز بالخلطة

.

و مقدرتش استني كتير

.

و قلت لزما و حتما انزلهولها في بوست خاص كده بالتفصيل الممل

.

هو سهل و مافيهوش غلبة خالص

.

بس علشان هشرح بالتفصيل الموضوع طول مني شوي

.

طبعا كلنا عارفين الرز بالخلطة بيكون بالمكسرات و الكبد و القوانص

.

كده يعني

.

.

بس بصراحة انا ماليش في الكبد و القوانص

.

فبعمل تحايل و مبحطش كبد و قوانص

.

بحط مكسرات بس

.

انا هقول الطريقة العادية و بعدين في الاخر هقول اللي مش بيحب الكبد و القوانص يعمل ايه

.

بسم الله

.

الاول بنحط اللوز في ماية مغلية دقيقتين تلاتة و بعدين نطلعه

(بحيث يمكن فرك القشر من اللوز)

و البندق كده برضه بس بياخد وقت اطول يعني ممكن خمس دقائق

و الزبيب يتحمر في شوي سمن صغيرين و اول ما يبدأ يتنفخ تشيله علي طول علشان بيتحرق بسرعة

لو هتحطي سنوبر يبقي مش محتاج حاجة لانه بيكون مقشر جاهز ممكن بس تحمريه شوي قبل الزبيب

.

.

علي فكرة ممكن مانغليش المكسرات و نحطها في فرن سخن 5 دقائق تقريبا و نطلعهم يكونوا جاهزين للتقشير تماما

و بكده يكون اتحمص و اتقشر من غير اي دهون

(انا بعمل كده)

(بس في ناس مش بتحب المكسرات ناشفة اثناء الاكل)

.

و نحط المكسرات و الزبيب علي بعض في طبق و  نحطهم علي جنب

.

و نعصج الكبد و القوانص

ازاااي؟؟

.

.

عادي

بنبشر بصلة كبيرة و عليها الملح و الفلفل

(او حسب الكمية)

بس راعي ان البصل يكون كتير

.

و بعدين في زيت او سمن شوحي البصل لحد ما يدبل و بعدين ننزل بالكبد و القوانص المقطعة صغير و نقلب كويس و بعدين نغطيها 

.

بس كل فترة نتابعها بالتقليب

.

لغاية ما تنزل مايتها و تشربها

.

هنا بأه نحط عليها ملعقة كاري

(ملعقة صغيرة او كبيرة علي حسب الكمية برضه)

.

اللي مش بيحب الكاري مش هنختلف ممكن نحط كركم علشان اللون بس

.

و نقلب كويس و نسيبها شوي و لما ندوقها و تكون استوت نطفي النار و نركن الكبد و القوانص علي جنب

.

.

.

نبدأ بأه في الرز

.

في حلة نحط فيها ملعقتين كبار او ربع كوب سكر

و نقلب لحد ما يكون كراميل غامق

بس اوعي يا حلوة يتحرق منك

.

و بعدين ضيفي عليه الماية او الشربة اللي هتحطيها علي الرز

.

يعني لو كوبايتين رز حطي كوبايتين و نص مايه او شربة

.

و نسيبها تغلي 

و علي ما تغلي الماية نبدأ في الرز في حلة تانية

.

نجيب الحلة الاساسية اللي هنعمل فيها الرز

.

و نحط فيها سمن او زيت

(حسب كمية الرز )

بس ماتقلليش السمنة علشان مايعجنش

.

و لما السمن  تسخن حطي الرز المغسول و قلبي كويس لغاية ما يكون لون الرز ذهبي

و بعدين حطي الملح و ملعقة كبيرة قرفة و قلبي كويس

و بعدين حطي الماية اللي جهزناها للرز

.

و لما تغلي الماية  و تبدأ تنقص وطي خااالص علشان الرز يستوي براحته

.

و لما الرز يستوي اغرفيه في سرفيس كبير 

.

و بعدين حطي عليه الكبد و القوانص

.

و عليهم الزبيب و المكسرات

.

في طرق كتير لتقديم الرز ده

.

ممكن تجيبي الصينية بتاعة الكيك المفتوحة من النص و تفرشي فيها و رق فويل

.

 و بعدين تحطي المكسرات و الزبيب

.

و بعدين تفرشي عليهم الكبد و القوانص

.

و في الاخر تحطي الرز و تكبسي كويس علشان يمسك نفسه 

.

و لما تقلبيه في سرفيس كبيرهيكون شكلهم اجمل

.

.

.

زي ده كده بس ده باللحم المفروم المعصج و البسلة

.

.

.

نيجي بأه للناس اللي زيي مش بيحبوا الكبد و القوانص

.

هنعمل كل الخطوات اللي فاتت و نوقع منهم خطوة الكبد و القوانص

.

.

.

طبعا لازم يتعمل جنبه صنف لحوم علشان يكمل الاكلة ممكن عرق لحم بارده

.

و عليها صوص ماشروم ولا صوص فلفل اسود بيكونوا تحفة مع العرق ده

.

و بالهنا و الشفا

.

.

.

.

ملحوظة بمناسبة العيد

.

.

.

ممكن بمناسبة اننا في عيد الاضحي نعمل الرز ده بالكبدة و القلب و الكلاوي بتاعة الخروف

بيكون طعمها احلي كتير

بالنسبالي علي الاقل

.

.

بس طبعا نراعي ان تسوية الكبدة بتاخد وقت اقل من تسوية القلب و الكلاوي

فنعمل الكبدة لوحدها

و القلب و الكلاوي لوحدهم

و بعدين

نحطهم علي وش الرز اثناء الغرف

بجد بجد طعمهم احلي من الكبد و القوانص

عايزين ناكل فتة و لحمة و رز

تقريبا كده الفتة ديه شئ اساسي في العيد

.

مش عارفة ليه

.

يمكن علشان بيكون في لحمة كتير مش عارفين يعملوا بيها ايه؟؟

.

المهم انا انهارده هقولكم علي طريقة الفتة علي طريقة شيف شربيني

(اول مرة اعمل الفتة حلوة كان لما شفته و عملت بطريقته)

(و من ساعتها تامر دايما بيقول ربنا يخليلنا شيف شربيني)

.

طبعا نكون سالقين اللحم و محضرين الشربة و مظبطين القعده كلها

.

بنحضر برضه ارز ابيض

و ده طريقته سهلة

يعني لو هنعمل كوبايتين رز

نحط في الحلة ملعقة سمن كبيرة و عليها كوبايتين و نص ماية

و نحط الحلة بالماية علي النار و لما الماية تغلي تحط الملح و بعدين نحط الرز

و اول ما الماية تبدأ تنقص نهدي النار خااالص لحد ما يستوي الرز

.

.

كده الرز خلص

.

.

.

نحضر الدقة بتاعة الفتة

(اللي هي الصوص اللي بنحطه فوق وش الفته)

.

.

نكون مفصصين شوية ثوم معتبرين

(راس ثوم كبيرة مثلا)

(طبعا نراعي لو هنعمل كمية كبيرة او صغيرة)

(يعني ناخد الطريقة و نظبط المقادير بمعرفتنا)

و نهرس الثوم بحيث يكون مفروم و عليه ملح و فلفل

.

نشيل ملعقة من الثوم المهروس ده علي جنب علشان هنستخدمه تاني

.

و نحط الباقي في طاسة فيها سمن

و نقلب لحد ما يبدأ ياخد لون

و بعدين نحط عليه نصف كوب خل

(لو كمية الاكل قليلة كفاية ربع كوب)

.

لما تغلي نزودها شوية ماية صغيرين علشان نخفف الخل

.

ده بأه لو عايزين الصوص من غير طماطم

.

.

انا بأه بعملها بصوص الطماطم بيكون طعمها احلي كتييير

.

لو هنحط طماطم يبقي نلغي الماية

و نضرب 2 طماطم في الخلاط و نحط العصير بتاعم علي الثوم و الخل و نسيبهم لما يستوا مع بعض

(لو الكمية اكثر نزود طماطم)

و لما يستوا كده نكون خلصنا الصوص

.

.

.

.

و نكون محضرين عيش بلدي مقطع

(يستحسن يكون محمص خفيف في الفرن و بعدين نقطعه)

.

.

و نحط العيش في طاسة كبيرة فيها سمن سخن و نقلب العيش لحد ما يتحمص تمام

و بعدين نحط عليه شوي من الصوص اللي عملناه

و نقلب كويس لحد ما الصوص يكون تغلغل في العيش كويٍس

و بعدين نزود الشربة

بس ماتكونش كتير علشان مايعجنش

و نقلب و هو علي النار لحد ما العيش يكون طري و شرب الشربة

(بس مش معجن)

.

.

.

.

كده احنا خلاًصنا

نبدأ نرص الفتة

.

.

.

.

نجيب سرفيس كبير

(يستحسن لو صينية بايركس علشان طبقات الفتة تبان)

.

و نحط العيش

و نجيب حتة لحم و نفصصها علي وش العيش

و نرش شوية من الصوص

.

و بعدين نحط الرز

و نجيب قطعتين لحم و نفصصهم علي الوجه و نرش علي الوجه باقي الصوص

.

.

.

اما باقي قطع اللحم

فهنحمرها تحمير خفيف مع ملعقة الثوم اللي شيلناها علي جنب

.

بيطلع طعم اللحم راااائع

.

.

و بالهنا و الشفا

صينية الرقاق باللحم المفروم

مشهور الرقاق اوي في العيد

.

مش عارفة ليه

.

بس في كتير بيحبوا يعملوه في العيد

.

كنت اول ما تجوزت لما اعمله ينشف منٍي و يرسي علي في الاخر انا اللي اكله او يترمي

.

و في يوم كنت عاملة عقيقة عبد الله

.

و جبت واحد طباخة و شفتها و هي بتعمله و اتعلمته منها

.

هي طريقة سهلة

.

بس الرك علي الصنعة برضه

.

بنجيب الصينية اللي هنعمل فيها الرقاق و ندهنها سمن

.

و نكون محضرين جنبنا شوربة سُخنة

.

نجيب الرقاق و يادوب نرش عليه شربه

(يعني يا دوب نبله)

.

و نبدأ نرص في الصينية

.

و اول ما يكتمل اول صف نجيب فرشة ندهن وش الصف بالسمن

(بنستخدم فرشة علشان مانستخدمش سمن كتير)

.

و نعمل كده لحد 3 طبقات

(بس الطبقة الثالثة مانحطش عليها سمن)

.

و بعدين نحط اللحم المفروم المعصج

(طعا بنعصج اللحم المفروم بالبصل المبشور و الملح و الفلفل و ممكن جوزة الطيب و السنوبرو قليل من السمن او الزيت علي النار حتي تستوي اللحم المفرومة و تكون مفلفلة)

.

و بعدين نحط 3 طبقات اخرين

(بنفس الطريقة اللي فاتت)

اخر طبقة لازم نحط سمن علشان يحمر و يعمل لون حلو

.

و نحط عليهم 3 كبشات شربة

.

و نحطهم في الفرن

لحد ما الشربة تنشف و يبدأ الرقاق ياخد لون علي الوش

.

اهم حاجة انه ياخد لون ذهبي من غير ما بنشف

.

و هيطلع روووعة من غير ما يعجن و لا يكون ناشف

.

.

.

ملحوظة

-------

لو ماحطيتيش سمن بين كل راق هيطلع معجن منك

.

.

.

و بالهنا و الشفا

سلطة الكول سلو

ناس كتير سألتني علي سلطة الكول سلو

.

و ماكنش فيه فرصة انزلها

.

و بمناسبة العيد قلت اقول علي كام صنف كده علشان لو في عزومة ولا حاجة

.

.

.

.

نجيب كرنب سلطة

(مهم انه يكون الكرنب الابيض الصغير بتاع السلطة علشان الكرنب العادي بيكون فيه شوية مرارة)

و نقطعه شرائح رفيعة خااالص

.

و نبشر علية جزر

.

بحيث لما نقلب مع الكرنب يكون متجانس

.

و بعدين نحط تقريبا 3 او اربع ملاعق كبار سكر

(طبعا السكر علي حسب الرغبة)

.

و نحط برطمان مايونيز

(مش الكبير)

.

و نقلب كويس

.

لغاية ما يتجانس مع كل الخليط

(بس يكون ثقيل شوي صغيرين)

.

و بعدين نحط نصف البرطمان لبن

(علشان نخفف بيه المايونيز)

.

و نحطه علي الخليط

.

و نقلب كويس حتي التجانس التام

.

و نسيبها شوي كتير في الثلاجة

(ساعتين مثلا)

.

علي فكرة الكول سلو ده ممكن يستحمل يقعد في التلاجة مدة اسبوع كامل

.

و بالهنا و الشفا

صينية اللحم المشوية في الفرن

كل سنة و كل الامة الاسلامية بخير

.

و كلكم طيبين

.

ان شاء الله

.

بمناسبة العيد جبتلكم وصفة لصينية لحم ضاني مشوي في الفرن

.

ناس كتير مش بتحب الضاني ولا ريحته

.

و اولهم اخواتي

.

.

و لما عملتلهم الصينية ديه افتكروها كباب

(انا حاولت ادور علي اقرب شكل ليها علي الجوجل)

طبعا اللحمة ديه شكلها كده مش مستوية

(تخيلوها مستوية و ده الصوص بتاعها)

اصل مالاقتش صورة احسن من كده

.

.

.

.

.

اه و الله

.

مافيش اي اثر للزفارة ابداااااااا

.

و الطريقة سههههلة خاااالص

.

لو هتعملي مثلا كيلو لحم

(ضاني)

.

مشكل

(يعني ريش مع لحم احمر مع لحم بالعظم)

.

و تتبليه بكمية كبيرة بصل مبشور

(نقول مثلا 3 بصلات كبار)

.

و عليهم شوية خل معتبرين

(نصف كوب كبير مثلا)

ده علشان يستوي بسرعة

.

و عصير ليمونتين كبار

.

و ملح و فلفل

.

و فلفل اخضر رومي مقطع مكعبات

(ممكن نحط واحد حامي لو بتحبوا الشطة)

(ممكن الاستغناء عن الفلفل علي فكرة)

.

.

.

و نحط كل الحاجات ديه علي بعضها و عليها اللحم في الصينية اللي هنطبخها بيها و نقلب كويس و نغطيها بورق فويل و نبيتها ليلة في الثلاجة

.

.

و تاني يوم قبل وقت الغذاء بساعة نحط عليها ملعقة سمن او زيت و نحطها في الفرن

(من غير ما نشيل الفويل)

(و طبعا الفرن بيكون سخن)

.

.

.

و نسيبها براحتها مده ساعة الا ربع او ساعة.

(اهم حاجة تكون متغطية كويس علشان تنزل الماية بتاعتها و تستوي فيها و تعمل صوص)

.

.

.

و لما تستوي اللحم كويس اوي نشيل الفويل و نسيبها 3 دقائق تحت الشواية

علشان تاخد لون

.

.

بيكون ليها صوص تحفة مع لونها و ريحة روعة

احلي من الكباب كمان

.

بعمل معاها سلطة تومية كاتباها هنا

.

و ممكن سلطة كول سلو و بطاطس محمرة و عيش

.

و بالهنا و الشفا

كوكيز بقطع الشوكولاتة

ازيكم يا جماعة

.

عارفة اني اتأخرت شوية

.

و ان ناس كتيييييير متبعاني و مستنياني

(بصبر نفسي)

.

بس اعمل ايييييه مشغوليات بأه

.

ايه رأيكم في الكوكيز اللي بقطع الشوكولاتة

.

.

ده

.

.

.

.

انا كنت بشوفه كتير طبعا في الافلام الاجنبي

.

و لما شفته في السوبر ماركت لقيت انه بسكوت عادي جدا

.

و غيظا فيهم عرفت طريقته و بقيت بعمله كتير

.

.

لانه سهل و سرييييع جدااا

.

و ممكن عبد الله ياخده معاه المدرسة و مايتفتفتش منه

.

لانه بسكوت ناشف شوي

.

يعني مش ناعم

.

بس طعمه حلو بجد

.

نبدأ بأه الشغل

.

"المقادير"

.

2 كوب دقيق

(لجميع الاغراض)

.

ملعقة صغيرة بيكنج باودر

.

نصف ملعقة صغيرة ملح

.

3\4 كوب زبده

(لازم زبده يعني مانتفزلكش و نحط سمنة)

.

واحد و نصف كوب سكر بودرة

(و اللي هتقول رجيم تجيب سكر بني)

.

2 بيض

.

كيس فانيليا

.

1 كوب شوكولاتة قطع

(زي ديه مثلا)

بتتجاب من السوبر ماركت او عند بتوع مستلزمات الحلويات

(زي محلات درب البرابرة)

في اكياس زي كده

.

او سايب

.

او ممكن تجيبي بار شوكولاتة بتاعة الطبخ و تكسريه انت بمزاجك

.

.

1 كوب مكسرات مجروشة خشن

(طبعا نوع المكسرات علي حسب الرغبة)

.

.

ممكن مانحطش مكسرات و نخليها كوبايتين شوكولاتة

او العكس

.

.

.

" الطريقة"

.

نخلط الدقيق مع البيكنج باودر و الملح

.

نضرب الزبدة بالمضرب الكهربائي لحد ما تكون زي الكريمة

.

و نضيف ليها السكر بالتدريج

.

ونضرب لحد ما يكون القوام هش زي الكريمة

.

و نحط عليهم البيض و الفانيليا و نضرب حتي التجانس التام

.

و بعدين نحط خليط الدقيق اللي حضرناه في الاول

.

و نقلب حتي يختفي الدقيق تماما و يتجانسوا

.

و نحط في الاخر قطع الشوكولاتة و المكسرات المجروشة

.

و نقلب

.

و نجيب الصينية اللي هنرص فيها

.

و بملعقة صغيرة نملاها من الخليط و نحط في الصينية

(مانبططش علشان هيفرش لوحده)

.

و نسيب مسافة بين كل واحدة اتنين انش تقريبا

(علشان مايلزقوش في بعض)

.

و نرش عليهم في الاخر رشة شوكولاتة قطع و مكسرات

.

و ندخلهم الفرن

(يكون سخن طبعا)

.

في درجة حرارة متوسطة

200 درجة مئوية

.

تقريبا من 8 ل10 دقائق

.

او لحد ما تبدأ تحمر من تحت

.

و تعبأ في علب مباشرة علشان ما تنشفش بسرعة

.

.

و بالهنا والشفا

كوردون بلو

كردون بلو علي طريقتي

(Cordon bleu)

.

.

المفروض الكوردون بلو بيكون محشي جبن شيدر و اي نوع لحم مدخن

.

انا بأه مابحبش اكل اللحم باللحم

زي الرسول صلي الله عليه وسلم

.

او سيدنا علي

.

مش فاكرة مين اللي قال لا آكل اللحم باللحم

.

انا دورت علي المقولة ديه في جوجل علشان اجيب اثبات بس موصلتش لحاجة

.

المهم انا مش بحب اكل اللحم باللحم

.

فعلشان كده عدلت في الكوردون بلو

.

"المقادير"

.

فراخ بانيه

(صدور دجاج مخليه)

بس و احنا بنشتريها نقول للراجل رققها علشان هنحشيها

.

نتبل الفراخ البانيه بماء البصل و الليمون و الملح و الفلفل

.

جبن رومي او شيدر مبشور

.

ملعقة قشطة علب

(او حسب الكمية بحيث تكون متجانسة مع الخليط)

اللي هي زي ديه

.

.

.

فلفل اخضر مقطع مكعبات صغيرة

.

دقيق ابيض

.

بيض مضروب وعليه ملح و فلفل

.

دقيق ذرة

(علشان هتاخد وقت و البقسماط بيتحرق بسرعة انما ده بيستحمل)

.

زيت للتحمير

.

.

بس خلاص

.

.

"الطريقة بأه"

.

نخلط الحشو في طبق

(اللي هو الجبن المبشور +الفلفل الاخضر المقطع + القشطة)

.

.

نجيب قطعة الفراخ

ونفردها

و تحشيها من الحشو اللي في الطبق

(ملعقة كبيرة مثلا)

.

بنحشي بالطول مش بالعرض

.

يعني بالتشبيه بكف اليد بنبدأ من الصوابع لاعلي

(مفهوم ولا ايه؟؟)

.

و نحطها مباشرة في دقيق

بحيث الدقيق يغطيها تماما

(سامعة واحدة بتقول كده مش هتفك؟؟)

(ماهو الدقيق لما يغطيها تماما مش ممكن تفك ابدا)

(عموما لو خايفة تفك اقفليها بخلة السنان بالطول علشان ماتكونش بارزة)

.

.

و بعدين في البيض

.

و بعدين دقيق الذرة

.

و نرصهم في طبق

.

و لما نخلص الكمية اللي عندنا نحطهم في التلاجة نصف ساعة مثلا علشان يمسك نفسه

.

و بعدين نحضر طاسة فيها زيت غزير و نحط الفراخ فيها و نقلب كل فترة

علشان تتحمر من كل الجوانب

.

و بعدين نشيلها علي ورق ماص

.

و تقدم ساخنة

.

.

ياااا سلاااام

.

انا متخيلاني باكلها دلؤتي و الجبن الرومي او الشيدر بتمط معاي

.

ييممممميييي

.

.

ممكن ناكل معاها مكرونة

.

او ممكن نعملها جنب محشي

.

يالا بالهنا و الشفا

براونيز

انهاردة هنشوف مع بعض طريقة البراونيز

(Brownies)

الطريقة ديه واحدة صحبتي قالتلي عليها

و نظرا لعشقي للشكولاتة بجميع اشكالها

فقد قررنا عمل الآتي

(البراونيز طبعا)

"المقدير"

2 بيضة

1\2 كوب زبدة لينة

1\2 كوب شوكلاتة سايلة

1\2 كوب سكر

1 كوب دقيق

1\4 م ك بيكنج بودر

فانيليا كيس واحد

مكسرات مجروشة حسب الرغبة

(ممكن لوز -بندق-عين جمل)

طبعا كلنا عارفين مجروش يعني مطحون خشن

و برضه عارفين ان المكسرات المستخدمة في الحلويات بتكون محمصة و مش مملحة

(المعلومة ديه انا شخصيا ماكنتش اعرفها)

"الطريقة"

بتسيحى طبعا الشيكولاته فى حمام مائى

زى ما انت عارفة

برضه للي مش عارف

بنحط الشكولاته في سلطانية كبيرة علي حلة فيها ماء مغلي علي النار

(ده اسمه حمام مائي)

و نستني لما الشكولاته تسيح ناخد منها مقدار نصف كوب

و الباقي ممكن نحط عليه شوية زبدة و نعماه صوص شكولاته علي وش الكيكة

ناخد بأه نص كوب الشكولاته ده

و بعدين ضيفى عليه البيض بالفانيليا بعد ما تكونى ضارباه كويس

و اخلطى الزبدة مع السكر(بمضرب البيض) لحد ما يكونوا زي الكريمة و ضيفي عليهم الشكولاتة و البيض

و بعدين اخر حاجة الدقيق و البيكنج باودر

و اضربيهم كويس

ممكن كمان تحطى كل حاجة فى الخلاط

و تضربيها و تريحى نفسك

(بس انا بحب الترتيب)

بس و تصبيها فى صينية مستطيلة

بس متخليش الخليط عالى

يعنى هى اصلا المفروض تكون رفيعة بس مش اوى

يعنى مش زى الكيكة العادية

ارفع

و حطى على وشها المكسرات مع صوص الكراميل

و ممكن كمان تحطيها جواها

و اللي مش بيحب المكسرات ممكن يحط فيها قطع شكولاته

و علي وشها كمان قطع شكولاته

و ممكن ماتحشيهاش حاجة خالص

و ممكن ترشي عليها رشة سكر بودرة

(بيدي شكل شيك برضه )

و اعملى لها صوص شوكولاتة

و بتتاكل دافية

و مش بتاخد وقت فى الفرن خالص

سريعة جدا فى عمايلها

و فى السوى

في درجة حرارة 180

مده 25 دقيقة تقريبا

او لحد ما تختبريها بالسكينة و تطلع نضيفة

و بالهنا و الشفا