صينية بطاطس باللبن و البيض

ما اتأخرتش أهه

;)

انا مش النوع الي اقتنع بوصف اكلة غريبة غير لما ادوقها الاول

اخت جوزي كانت عاملة صينية بطاطس بالبيض و الجبنة و دوقتهالي

بس كانت روووعة

جميلة جدا

اول ماشفتها بصراحة قلت ممممممم

نظام اكل صحي بأه و وبيض و انا مابحبش ريحته و لبن اللي اساسا مابشربوش

وفعلا ركنتها

بس اليوم ده للحظ السعيد ماكنتش عاملة اكل

و الجوع قرص عليا

و طبعا الجوع كافر

قلت اما اشوف البطاطس ام بيض ديه عاملة ازاي

بدوق اول قطعة و انا متوجسة خيفة

و اذ بي أفوجأ ان الطعم فعلا جميل

جميل جدا

تخيلوا المشهد كده اول قطمة بحرص شديد و تاني قطمة اسرع شوية و بعدين الطبق خلص في دقيقة

جعتوا و ريقكم سال و لا لسة

:)

ادخل على الطريقة بأه بسرعة علشان المرحلة ديه خطر عليكم 

:)

بطاطس مقطعة شرائح اتخن من الشيبس

(الضعف تقريبا)

نصف كيلو لبن

بيضتين

ربع كيلو جبن رومي مبشور

بصل مقطع مكعبات صغننة

فلفل أخضر مكعبات صغننة لو حامي يبقى احسن

ملح و فلفل

نبدأ بأه بسم الله

نبدأ الاول نسخن الفرن قبل ما نبدأ

هنحط شرائح البطاطس في شوية ماية و ملح خفيف و نديهم غلوة على النار

ربع سوا كده :)

و البصل و الفلفل المكعبات نرش عليهم ملح و فلفل و نفركهم كويس مع بعض

و نضرب البيض و اللبن في الخلاط مع بعض عليهم شوية ملح و فلفل

و نجيب صينية و نبدأ نرش في قعرها نص كمية البصل و الفلفل اللي عندنا

و بعدين نرص عليهم البطاطس

و تاني بصل و فلفل و عليهم نص كمية من الجبن الرومي المبشور

و تاني بطاطس

و بعدين باقي الجبن الرومي

و في الاخر نحط اللبن بالبيض

و ندخلهم في الفرن لحد ما ياخد لون حلو

تبقى كدة استوت و بقت تمام

و بألف هنا

;)

على فكرة

ممكن جدا تحطي لحمة مفرومة متعصجة في النص 

ممكن شرايح بسطرمة

ممكن سوسيس او لانتشون

الاكيل و ليه ذوق في الاكل هيعرف يتصرف

;)


**
طبعا مش محتاجة اقول لكم ان ديه مش صوري
بس اوعدكم بنفس النتيجة

مكرونة بصوص الجبنة

كالعادة راجعة بعد غيبة طويلة

بس معايا مكرونة بصوص الجبنة

و جنبها اي حاجة تحبوها

هقولكم انا عملت ايه معاها و على شوية اقتراحات تانية معاها لو تحبوا

كنت في كارفور و شفت جنب برطمانات المايونيز حاجة كده شبه المايونيز بس مكتوب عليها انها صوص جبنة فورماج

كنت جعانة طبعا و قعدت اتخيل بأه الطعم و الشكل النهائي 

مكدبتش خبر

 قلت طب مانجرب

جبت معاها مشروم و مكرونة شرايط

و رجعت البيت قلت اعملها ازاااي اعملها ازاااي

بشرت بصلاية صغننة و عليها ملح و فلفل و شوحتها شوية لحد ما دبلت و بعدين حطيت عليها شرائح مشروم و قلبت شوية حلوين كده لحد ما المشروم بدأ ياخد لون بسيييط و بعدين حطيت من صوص الجبنة 3 ملاعق كبار مليانين و قلبت مع المشروم و زودت تقريبا نصف كوب لبن علشان يطلع لي قوام الصوص

قلبتها مع اللبن لحد ما بدأ يغلي و قوام الصوص بدأ يبان

و بشرت عليها رشتين من جوزة الطيب

يمي كان طعمها تحححفة

لازم ندوق علشان لو محتاج ملح و فلفل تاني و لا حاجة

لحد ما نظبط الطعم 

لو القوام بتاعها تخن شوية حطي عليها شوية لبن تاني و قلبي و استني لحد ما يغلي علشان تشوفي القوام كده مظبوط و لا لاء

و رحت جايبة المكرونة بعد ما سلقتها و حطيتها على الصوص

و كنت عاملة جمبها فراخ بتتبيلة البانية

(بلصة مبشورة – طماطم مبشورة – ملح و فلفل – شوية كاري – خل – ليمون)

و بعدين شوحتها على النار كده مع شوية زيت ذرة لحد ما بدأت تاخد لون و تستوي

و قطعتها شرائح بالعرض و حطيتها على الصوص قبل ما اضيف المكرونة

و عيشت في ملكوت تاني مليان سعادة

:)

ممكن نحط الفراخ على الوش بعد مانغرف المكرونة و الصوص مع بعض

زي سبكترا مثلا

ممكن تعملي جنبها ايييي حاجة

لو لحمة باردة بصوص المشروم او الفلفل الاسود مثلا

أو حتى زي ماعملت في الفراخ كده

 تتقطع و تتقلب مع الصوص و المكرونة

ممكن فراخ مشوية

ممكن اي حاجة احنا شايفين انها مناسبة

*ملحوظة*

ان حنا ممكن نعمل صوص الجبنة ده من الاف للياء في البيت 

جبن بارميزان+جبن شيدر+بلو تشيز+جبن كيري

 الصلب يتبشر و الكميات بتكون متساوية

و نحطهم على نار هادية معاهم شوية لبن و تقلبي براااحة لحد ما كله يسيح مع كله

ممكن طبعا نغير في انواع الجبن 

بس اهم حاجة بلاش الرومي

ارجوكم

بتقلب طعمها تماما و تخلي الاكلة مش مظبوطة

بس كده

و بألف هنا

و شفا 

:)

طبعا الصورة اللي فوق ديه مش بتاعتي 

:(

مالحقتش اصور

بس وعد

هحطها اول ما اعملها تاني

;)

السلام عليكم جميعا 

و بعودة :)

بما اني لسة بحاول ارجع تاني

فقلت اشارككم حاجة جميلة عملتها الاسبوع اللي فات و طلعت جميلة الحمد لله

"سلطة الجمبري"

تصدقوا قرأتها فين؟؟

لقيهتا مكتوبة في مجلة الأميرات بتاعة بنتي

قلت اجرب في ربع كيلو كده علشان لو طلعت وحشة ماتبقاش تعويرة كبيرة :)

شلت حاجات و أضفت حاجات و هقولكم عليها انهردة بإذن الله بعد التعديلات النهائية (;

المهم الخطوات مابتاخدش اكتر من ربع ساعة كله على بعضه و تكون جاهزة

بس انا بحب اكتب بالتفصيل الممل علشان تكوني فاهمة كويس بنعمل ايه

فماتقلقوش من الكلام الكتير الجاي ده :)

ندخل على المقادير بأه بسم الله

السلطة::

-بنشتري مثلا نص كيلو جمبري مقشر(أو حسب العدد اللي عندك أكتر أو أقل)

-التتبيله :
3ثوم -1 فلفل أخضر - شوية خل  ربع كب مثلا - ملح و فلفل اسود و -شوية كمون.. و نضربهم مع بعض في الخلاط

-شوية زيت للتسوية

- خس كابوتش

- فلفل ألوان واحدة حمرا و واحدة صفرا

الصوص

عصير ليمونة كبيرة + ملعقتين صغيرين خل + ملعقتين كبار زيت زيتون + ملعقة صغيرة ريحان + 4 ملاعق كبار مايونيز على كاتشب( اللي بيتباع جاهز ده بيبقة اسمه مايوكاتشب تقريبا) "ممكن مايونيز بس على فكرة بس لما حطيت اللي بالكاتشب ده كان طعمه احلى

**الاول الجمبري نفسه و تسويته**

نحط التتبيلة على الجمبري و نسيبهم شوية .. نص ساعة مثلا (ممكن أقل كمان) 

**""لو ما عندكيش وقت للتبيل حطي الجمبري بالتتبيل في الزيت""

و بعدين نجيب طاسة سخنة و نحط فيها شوية زيت و نسخنهم كويس 

و لما يسخن خالص نشيل الجمبري من التتبيلة و نحطه في الطاسة على نار عالية و نقعد نقلب يادوب نقلب شوية و هنلاقي الجمبري نزل ماية كتير

اول ما تلاقي الجمبري دخل في السوا صفي الماية اللي نزلت ديه و ارميها 

و حطي رشة ريحان مجفف و كملي تقليب في الجمبري لحد ما يبدا ياخد لون بسيط و اهم حاجة تحاولي تحافظي علي حجم الجمرياية على أد ما تقدري

ماتستنيش لحد ما تصغر و تنكمش على نفسها

الموضوع ده ياخد معاكي يا دوب خمس دقائق 

ندخل بأه على الصوص بتاعنا 

نخط المكونات كلها على بعض و نقلبهم كويس لحد التجانس التام و بعدين نحط عليهم الجمبري اللي سويناه

نقطع الكابوتش شرائح رفيعة و الفلفل الألوان مكعبات صغيرة(بس مش أوي)

و نخلطهم مع الجمبري بالصوص قبل الاكل بنص ساعة و نسيبهم في التلاجة لحد ميعاد الأكل

ماتخلطيهمش من بدري او فترة اطول من كده علشان هتلاقي الخس دبل و بقى طري مش مقرمش

بس كده خلاص خلصنا :)

شوفتوا بأه سهل ازاي

على فكرة
زي ما انا عدلت و غيرت انتي كمان ممكن تغيري و تجددي
ممكن تحطي مكرونة فيونكة مثلا و لا سوستة و لا اي شكل تحبيه بدل الخس

ممكن تزودي طماطم شيري و ذرة حلوة (المعلبة)
ممكن تشيلي الريحان خالص لو مش بتحبيه

كل مرة جربيها بشكل جديد و شوفي ايه اللي يناسب ذوقك انتي و عيلتك

مستنية رأيكم بأه
:)

**على فكرة الصور ديه مش بتاعتي

انا حاولت اجيب صور مطابقة للواقع لحد ما اعملها تااااني و اصورها بإذن الله :)