طاجن سبيط بالجمبري

السلام عليكم

بقالي كتييييير ماعملتش اكلة جديدة 

عملت اخيرا بعد طوووول انتظااااار طاجن سبيط بالجمبري 

الموضوع سهل و بسيط و مش هياخد منك وقت خاااااالص و مش محتاج تتبيل قبلها بس امشي زي ماهقولك بالضبط علشان نعوض التتبيل

بسم الله نبدأ

عندك كيلو سبيط تخلي الراجل ينظفه و يقطعه شرائح طولية و انتي في البيت قطعيه مربعات كبيرة

و كيلو جمبري بقشره منظف

هتحتاجي 3 طماطم

ملعقة صغيرة كمون

3 فصوص ثوم مفرومين لوحدهم

و 3 او 5 فصوص ثوم سليم

كرفس اخضر ممكن ربع حزمة

بصلاية صغننة

ملح و كمون

2 فلفل حامي (حسب الطلب) او رومي عادي

بقدونس مفروم للتزيين

مكعب مرقة خضار كنور

و نبدأ بأه على طول

هنبدأ الاول بتسخين الفرن على ما نحضر الحاجة بتاعتنا

و في طاسة غويطة او حلة نحط الثوم المفروم مع ملح و ملعقة الكمون و نقلب تقليبتين و بعدين نحط السبيط و نقلب كويس لحد ما ياخد ريحة و لون الثوم و الكمون

و بعد ما تبدأ مايته تنشف نحط الجمبري  و نقلب بالراحة علشان مانفصلش الجمبري لحد ما ياخد هو كمان من ريحة و لون الثوم و الكمون

و نسيبه شوية و نقلب كل فترة لحد ما تبدأ مايته تنشف و نركنه على جنب

اثناء ما احنا بننتظر ماية الجمبري تنشف نحضر الصلصة

في الخلاط هنحط الطماطم و فصوص الثوم الصحيحة  و الفلفل الحامي(او الرومي) و البصلاية الصغننة و الكرفس و ملح وكمون  و نضربهم لحد ما كله يتخلط  و يتقطع كويس

و نضع الخليط ده ف حلة صغيرة و عليهم زيت (قليل) و نسيبهم على النار 10 دقائق تقريبا او لحد ما تبدأ الصلصة تتخن شوي و اثناء ما هي على النار و بتغلى نفرك  عليها مكعب مرقة الخضار و دوقي و شوفي محتاج ملح تاني و لا لاء

و بعدين نجهز طاجن فخاري او حتى طبق باريكس و نحط فيه خليط الجمبري بالسبيط و نحط عليهم الصلصة و نحطهم كلهم في الفرن على درجة حرارة عالية من 20 ل30 دقيقة او لحد ما وجهه ياخد لون

(بلاش شواية)

و بعدين نطلعه و نرش على وجهه البقدونس المفروم و بألف هنا و شفا


ملاحظات على الماشي

الصورة اللي فوق ديه مش بتاعتي
علشان لما عملت الطاجن مالحقتش اصوره من الهجوم اللي حصل عليه

ثانيا
ممكن طبعا تعملي الطاجن ده بباقي البحريات زي شربة السي فود 
يعني ممكن اضافة السمك و الجندوفلي و الكابوريا
و هيكون ترتيب وضع الحاجات اثناء الطبخ كالتالي
سبيط
كابوريا
جمبري
سمك
جندوفلي

بنحط اللي يستحمل فالاقل فالاقل

بس يستحسن بلاش حاجات كتير و خلي الكتير للشربة احسن

و ممكن طبعا يبقى حاجة واحدة بس سبيط او جمبري

كفتة بالجبن الموزاريلا

السلام عليكم و رحمة الله و بركاته

هعمل انهردة حاجة اجنبي مع شوية تعديلات و ادمجها مع حاجة شرقي

كفتة داود باشا بالموزاريلا

الاجنبي هي الكفتة اللي محشية جبن موزاريلا بنفس الطريقة الاجنبية لكن احنا مانعرفش ناكلها كدة حاف محمرة و لا و هي عليها شرحة جبنة فقط لاغير زي الاجانب

علشان كده قلت شكلها النهائي في الصوص بتاع كفتة داود باشا هيكون افضل لنا و لطرق اكلنا

نبدأ و نقول بسم الله 

المقادير بسيطة جدا:

لحم احمر مفروم (كيلو مثلا)

جبن موزاريلا (نوع نضيف كده يكون بيسيح حلو و طعمه مملح قليلا)

بقسماط مطحون ناعم (3 ملاعق كبار)

رشة زعتر

ربع ملعقة صغيرة فلفل اسود

ملح

نصف ملعقة صغيرة بهارات لحمة

كسبرة خضراء

رشة جوزة الطيب

نصف ملعقة صغيرة بصل بودر

ربع ملعقة صغيرة ثوم بودر

بصلاية مبشورة وسط

4-5 حبهانات مطحونين

للصوص::

2 طماطم  

بصلاية صغننة 

فص ثوم 

جنزبيل مبشور

بصل بودر 

ثوم مبشور

رشة زعتر

ربع ملعقة صغيرة فلفل اسود مطحون

ملح

بندأ نشتغل بأه:

انا كان عندي لحم في الفريز سيحته و فرمته طلع تقريبا كيلو بعد ا شلت منه الدهن و العروق الصغيرة اللي مابتتفرمش

و حطيت عليه البصل المبشور و كووووول البهارات اللي قلناها فوق

بالنسبة للحبهان افتحي الحبهاناية و طلعي البذر اللي فيها و اطحنيه بالهون مع شوية ملح و كمون علشان مايقعدش البذر يجري منك

و الكسبرة الخضراء حطيتها في الاخر خاااااالص 

و نقلب و نعجن بإيدينا لحد ما المكونات كلها تتجانس

و ياريت ندوق و نشوف لو ناقص ملح و لا حاجة عايزة تتظبط

و بالنسبة للجبن الموزايلا ارجوووووكوا ياريت جبن نوع كويس 

و انا بقولكم اهه جبنة باندا زيييي الزفت 

مش بتسيح خااالص .. ديه بتتمدد و بعدين تتجمد

الولاد كانوا فاكريني حاشية الكفتة بياض بيض مسلوق و عادم كمان من غير ملح

ماتجيبيش المبشورة ..كور(جمع كوة) او ستيكس (أصابع)

انا في المرة التانية جبت نوع كده مستورد مش فاكرة اسمه ايه بس كان عبارة عن كور قد كف اليد في الشرش بتاعه و ده فادني اني حطيت عليها شوية ملح و سيبتها في مايتها كام ساعة علشان الجبن تملح شوية و وقت الاستخدام نقطعها مربعات صغيرة علشان نحشي بها الكفتة

http://www.familyfeedbag.com/2011/03/pizza-meatballs.html

و نحشي عادي بحيث يكون شكل كورة الكفتة كده و نحطها في شوية دقيق يادوب تتعفر بس

و نحمرها في قليل من الزيت علشان تتشوح قبل ما تتحط في الصوص

ندخل على الصوص::

في قليل من الزيت هنحط البصلاية المبشورة مع قليل من الملح و الفلفل و نشوح قليلا يادوب تذبل و بعد كدة نحط الجنزبيل المفروم و فص الثوم المفروم و نقلب بس ناخد بالنا مانحرقش الثوم علشان ما يعملش طعم مر في الاكل

و نحط الطماطم المعصورة و عليها البهارات بتاعتنا كووووولها و نسيبها لحد ما تستوي

لااازم ندوق الاكل و احنا شغالين علشان لو لقينا حاجة غلط نلحق نتداركها

و بعد ما الصوص يثقل نحط فيه الكفتة المتشوحة و نسيها تاخد معاها غلوتين علشان الصوص يثقل من شوية من الدقيق الي على الكفتة

http://www.kellycraves.com/2012/09/smoked-mozzarella-stuffed-meatballs.html

و بعد كده بالهنا و الشفا ممكن تقدميها مع ارز او مع مكرونة زي ما تحبي 

و على و شها رشة جبن موزاريلا مبشورة و رشة كسبرة مفرومة تدي شكل حلو عند التقديم

و تسلم ايد اللي وقف و تعب و عمل 

:))

بألف هنا

كوكيز ببشر البرتقال

بما ان عندنا برتقال إذا فنحن نمتلك ثروة

:))

عرفت طريقة كوكيز ببشر البرتقال طعمة لذيذ و في نفس الوقت مش بياخد وقت خاااااالص لا في تحضيره و لا في خبزه

 جبتها من البلوج ده ----& stephanie's kitchen

لتحضير الكويز:

2 ½ كوب دقيق

1 ملعقة كبيرة بيكنج بودر

رشة ملح

ا كوب زبدة سايحة

1 كوب سكر بحبب "من غير طحن"

2 ملعقة كبيرة بشر برتقال

2 ملعقة كبيرة عصير برتقال

1 بيضة

لتحضير الصوص:

1 ½ كوب سكر مطحون ناعم

ملعقة كبيرة بشر برتقال

2 ملعقة كبيرة عصير برتقال

نبدأ نعمل الكويز:

نحط بشر البرتقال على السكر في طبق و نفرك البشر مع السكر لحد ما السكر ياخد طعم و لون البرتقال

كدة

و في طبق غويط نحط الدقيق + البيكنج بودر و رشة الملح و نقلب كويس

نحط عليهم خليط السكر اللي عملناه و نقلب

و نحط البيضة و الفانيليا و نقلب كويس

اخر حاجة الزبدة

و نقلب كويس لحد ما تتشكل معانا عجينة ماسكة نفسها

و نجيب الصواني اللي هنعمل فيها و نفرش فيها ورق زبدة

و نبدأ ناخد قطعة صغننة من العجين و نكور كور وسط مش صغننة و مش كبيرة

و نرصهم في الصينية

كدة

و ندخلهم الفرن على درجة حرارة عالية لمدة 10 ل 12 دقيقة

يادوب تبدأ تاخد لون ذهبي فاتح من تحت و نشيلها على طول

نطلع الصينية تبرد شوية و بعدين نشيل الكوكيز بالراحة بملعقة مسطحة كبيرة من بتوع المطبخ علشان ماتتفتفتش معانا

و بعد ما بتبرد خالص بتنشف شوية علشان كده مش المفروض نسيبها في الفرن كتير علشان ماتنشفش اوي

و ديه تجربتي الفريدة

لو انا ماكنتش فاشلة في التصوير كان زمان عرضها افضل
:(

انا بعد ما عملت الصوص لقيتها عجبتني اكتر من غيره

بس هقوله علشان اللي بيحب الحاجة مسكرة اوي

بنحط السكر المطحون و بشر البرتقال و عصير البرتقال مع بعض و نقلب كويس و بس كده

:)

بتحطيه على الكوكيز او كيكة البرتقال اللي عملناها المرة اللي فاتت

و بألف هنا و شفا

:))

كيكة البرتقال

السلام عليكم و رحمة الله و بركاته

بمناسبة ان الدنيا ملياااانة برتقال بجميع انواعه عملت كيكة البرتقال

مقاديرها سهلة و طريقتها سهلة جدااا 

ديه  طريقة منال العالم

كي جي وان مطبخ هتجيبها من اول مرة بإذن الله تعالى

:)

نبدأ بأه بسم الله

2 كوب دقيق

ملعقة كبيرة بيكنج باودر

1 كوب سكر مطحون

فانيليا

5 بيضات

1 كوب زيت ذرة

¾ كوب عصير برتقال

1 ملعقة كبيرة بشر برتقال

سخنى الفرن على درجة حرارة عالية

و نحضر الصينية  بإننا ندهنها بزيت و نرش عليها دقيق بحيث تتبطن كويس علشان الكيك مايلزقش في الصينية و سيبيها على جنب لحد ما نخلص خليط الكيك

أنخلي الدقيق و البيكنج باودر والملح و خليهم على جانب

و في الخلاط (او بالمضرب اليدوي) حطي السكر و البيض و الفانيا و اضربي لحد ما يبقى الخليط كريمي.

حطي الزيت وعصير البرتقال و اخلطي

و بعدين ضيفي خليط الدقيق و بشر البرتقال و استمري لحد ما يختفي الدقيق

و بكدة نكون خلصنا الحمد لله

صبي الخليط في الصينية اللي حطرناها من قبل كدة

و اضبطي الفرن على درجة حرارة متوسطة

و دخلي الصينية لمدة لا تقل عن ½ ساعة

و لما تخلص جربي فيها سكينة ناشفة و اغرزيها في النصف و لما تطلع نظيفة يبقى كدة تمام

عموما بعد النص ساعة دية مفيش مجال انها تكون مش مستوية

بعد ما تخرج سيبيها شوية في نفس الصينية علشان وشها ينشف  شوي و مايعجنش

و بعدين اقلبيها على منخل او اي حاجة عندك مخرمة علشان الكيكة تتهوى

و سيبيها على الاقل 10 دقائق كمان قبل التقطيع علشان ماتتفتفتش منك 

و بعد كدة بالف هنا و شفا
:))