مكرونة بالكبدة

السلام عليكم و رحمة الله و بركاته

كمالة الثورة اللي عملناها لما عملنا الكبدة المشوية

نعمل كمان المكرونة بالكبدة اللي كانت في نفس الحلقة علشان مانبقاش حرمانكوا من حاجة

:)))))

نفس تتبيلة الكبدة المشوية

هنقول تاني مقادير لتتبيل  ½ كيلو كبدة

ماء بصلاية وسط 

ملعقة كبيرة ثوم مفروم

ملعقة صغننة مش مليانة كمون مطحون

نصف ملعقة صغيرة كسبرة ناشفة مطحونة

نصف ملعقة صغيرة بصل بودر

نصف ملعقة صغيرة بهارات لحم او مشويات

لو مش عندك مافيش اي مشكلة)

ملعقة كبيرة زيت زيتون

عصير 2 ليمونة

ملح

و هنزود هنا بأه رشة فلفل اسود + رشة جوز الطيب بس مش هنحطهم في التتبيلة

الطريقة بأه

هنخلط كل لمقادير اللي قلناها فوق و نحط الكبدة عليهم و نسيبهم يتبلو على الاقل نص ساعة مثلا و الكبدة تكون مقطعة أصابع مش رفيعة و لا تخينة

وعلى ما تتبل نعمل المكرونة

نسلق المكرونة عاادي و نصفيها و نحضر لها بصلة صغننة مبشورة و طماطماية وسط مبشورة برضه و شوية زيت مش كتير و نحطهم في حلة على النار

لما الطماطم لونها يبان انها استوت يبقى كده تمام و نحط الحلة على جنب

ووقت الاكل نحط الكبدة في طاسة ممسوحة زيت  و تقلبيها بالكتير 5 دقائق و تكون استوت اهم حاجة ماتنشفيهاش عايزين فيها شوية صوص 

و تجيبي عليها المكرونة اللي جهزناها و تقلبي كويس علشان المكرونة تاخد صوص الكبدة

 و ترشي عليها رشة الفلفل الاسود و رشة جوزة الطيب و قدميها بالهنا و الشفا

على فكرة الشيف عملها بمكرونة بني من غير اي صوص للرجيم

يعني اشترى مكرونة لونها بني مخصوصة للرجيم

انما احنا مش بتوع الرجيم و الحاجت ديه بتاتا

:)

بس كده خلاص

نقول من اول و جديد تااااااني

خدي بالك يا شطورة

الكبدة مابتقعدش كتير على النااااار بالكتييييير 5 دقائق

واحدة لسة سنة اوي مطبخ تقولي دلؤتي ازاااي اجيب عصير البصل .. بصي يا ستي هتبشري البصل عاااادي و تحطي عليه الملح و الفلفل علشان ريحته ماتغيرش و ناخد منه حبة في كف ايدينا و نكون حاطين طبق تحت ايدينا و نعصرالبصل اللي في ايدينا باننا نضغط جامد بحيث ينزل العصير في الطبق و البصل بذات نفسه يفضل في ايدينا بقدرة قادر

نصيحة اخوية بالنسبة للبنوتات اللي لسة متجوزين جديد ياريت تغسلي ايدك مباااااشرة بعد العاملة ديه علشان ريحة البصل ماتفضلش في ايدك و الراجل يطفش

اما بأه زميلات الكفاح الزوجات القديمات اووووعي تغسلي ايدك علشان جوزك يتعرف عليكي بسهولة و مايقعدش يلف كتير في الشقة

:))))

ملحوظة صغننة :: الصور مش من عندي

كبدة مشوية بالطريقة االشربينية

السلام عليكم و رحمة الله و بركاته

انهردة ثاااالث ايام عيد الضحى 

كسل رهييييب و مش عايزة ادخل المطبخ بقالي كتييييييييييييييييير سنة مثلا ولا حاجة

:)))))

المهم اخدت خطوة جريئة و عملت الكبدة المشوية بتااعة شيف علاااااء الشيربيني

الراجل ده فظيييع 

راااائع

:))

المهم مطولش عليكم و ندخل على طووووول في المفيد

تتبيلة الكبدة المشوية

هنقول مقادير لتتبيل  ½ كيلو كبدة

ماء بصلاية وسط 

ملعقة كبيرة ثوم مفروم

ملعقة صغننة مش مليانة كمون مطحون

نصف ملعقة صغيرة كسبرة ناشفة مطحونة

نصف ملعقة صغيرة بصل بودر

نصف ملعقة صغيرة بهارات لحم او مشويات

لو مش عندك مافيش اي مشكلة)

ملعقة كبيرة زيت زيتون

عصير 2 ليمونة

فلفل حامي مقطع شرائح

حسب الرغبة

ملح

الطريقة العويصة بأه
الاول الكبدة بتخلي الجزار يقطعهالك شرائح او انتي اعمليها شرئح بنفسك بس تكون مجمدة نص نص علشان تتظبط معاكي

هنخلط كل لمقادير اللي قلناها فوق و نحط الكبدة عليهم و نسيبهم يتبلوا على الاقل نص ساعة مثلا

ووقت الاكل تحطيها في طاسة ممسوحة زيت  تنفضيه كوي من ي حاجة شابكة فيها من التتبيلة علشان متتحرقش و تقلبيها اول ما تاخد لون على الوش التاني و بعد التسوية تشيليها في طبق التقديم على طووول مش على منديل علشان ماتلزقش و علشان اللي نازل منها ده مش زيت ده صوص يا قطة 

و ريت ماتنسيش تزيني الطبق برشة بقدونش مفروم

:)

بس كده خلاص

.  

خدي بالك يا شطورة

الكبدة مابتقعدش كتير على النااااار بالكتييييير 5 دقائق

واحدة لسة سنة اوي مطبخ تقولي دلؤتي ازاااي اجيب عصير البصل .. بصي يا ستي هتبشري البصل عاااادي و تحطي عليه الملح و الفلفل علشان ريحته ماتغيرش و ناخد منه حبة في كف ايدينا و نكون حاطين طبق تحت ايدينا و نعصرالبصل اللي في ايدينا باننا نضغط جامد بحيث ينزل العصير في الطبق و البصل بذات نفسه يفضل في ايدينا بقدرة قادر

و نفضل نعمل كده لحد ما كمية البصل المبشور الي قدامي تخلص
و ممكن تصيلي البصل لمعصور ده في الفريزر في كيس ممكن تشتخدميه تاني في اي اكلة

نصيحة اخوية بالنسبة للبنوتات اللي لسة متجوزين جديد ياريت تغسلي ايدك مباااااشرة بعد العاملة ديه علشان ريحة البصل ماتفضلش في ايدك و الراجل يطفش

اما بأه زميلات الكفاح الزوجات القديمات اووووعي تغسلي ايدك علشان جوزك يتعرف عليكي بسهولة و مايقعدش يلف كتير في الشقة

(;

بطاطس محشية بالبيض

السلام عليكم و رحمة الله و بركاته

طبعا في رمضان بتكتر العزومات

و بنقعد نفكر و نعصر مخنا ممكن نقدم ايه جديد ما اتقدمش قبل كده

اللي هنقوله انهردة طبق جانبي بس فكرته عجبتني

كانت عملته شيف منال العالم من سنتين تقريبا بس لقيته انهردة على موقع اجنبي بإضافات بسيطة تخلي الاكلة متميزة

جبتلكم الطريقة و الصور بتاعة الاكلة كمان بالخطوات واحدة واحدة مع بعض علشان كل حاجة تكون واضحة و معروفة و بالتالي تكون سهلة

اكلتنا انهردة هي

 البطاطس المحشية بالبيض

http://homecookinginmontana.blogspot.com/2010/04/egg-stuffed-baked-potato.html

فكرة و طعم حلو كمان

:))

عايزين بطاطس كبييييرة علشان تاخد بيضة كاملة

و لكل بطاطساية هنحتاج بيضة

و هنحتاج لانشون فراخ او لحمة  و نقطعه مكعبات صغننة

و كمان جبن رومى و جبن موزاريلا

ممكن طبعا تمشيها نوع جبنة واحد انا بس بقولك الاساس و انت اختاري اللي تحبيه و حسب مصروف البيت كمان

;)

عايزين كسبرة مقطعة صغنن جدا و ممكن كمان بصل أخضر شرائح صغننة برضه

ممكن الاستغناء عن البصل لو هيضايقك :))

ملح و فلفل

بس كده خلاص

نجيب البطاطس و نغسلها كويييس جدا و بقشرها نحطها في حلة تستوي ثلاثة اربع سوا أو قبل السوا بحاجة بسيييطة

مش عايزينها عجينة يا كميلة علشان تعرفي تقوريها من غير ما تتكسر منك و لا تتفتفت

و بعد ما تستوي تسيبيها تبرد خاااالص و بعدين تشيلي منها طبقة تكون هي الغطا 

الطبقة ديه تكون بعرض البطاطس او طولها على حسب الشكل عايزاها ايه

يعني تحبيها واقفة زي الكوباية كده 

و لا زي القارب او الطبق

لو عايزاها واقفة زي الكواية يبقى تقطعي منها جزء يكون لها قعر زي قعر الكوباية علشان تفضل مسنودة و واقفة ماتقعش

المهم

نبدأ نحفر بالراحة بملعقة صغننة و نوسع واحدة واحدة علشان نعمل مكان للبيض نعرف نحطه فيه

و بعدين ندهن المكان من جوة بملح و فلفل بسيط و نحط رشة جبن مبشور و ممكن شوية بصل أخضر شرائح رفيعة خااالص بس مش كمية كبيرة

و نكسر البيضة و نحطها نية جوا البطاطس

و بعدين نرش عليها ملح و فلفل و رشة بصل أخضر(قليييييل) و رشة لانشون من اللي مقطعينة صغنن و رشة جبن موزاريلا و عليها الجبن الرومي

و نحطها في صينية مدهونة زيت في فرن ساخن ربع ساعة تقريبا او لحد ما البيض يستوي مش بتاخد وقت خالص

و بعد ما تخرج من الفرن و عند التقديم نرش عليها رشة بقدونس

على فكرة انا لما عملتها قشرتها في الاول 

يعني بعد ما سلقتها قبل ما احطها في الفرن

ممكن انت بعد التسوية قبل التقديم تقشريها أو تقدميها بقشرها و الضيوف تتعامل بأه

:))

بس صدقيني هتعجبهم و يشكروكي عليها كمان 

في انتظار الاراء طبعا:))

عرق اللحمة الباردة بصوص الفلفل الاسود

كتير كانوا عايزين طريقة عرق اللحم الباردة 

اللي هو الروستد فيليه

هنعمله انهردة بصوص الفلفل الاسود

و طبعا الصوصات ديه بتبقي حسب ما تحبي

المهم نبدأ بسم الله

نروح للجزار و نقوله عايزين عرق لحم باردة او عرق تربيانكو

على حسب المناسبة بتاعتك عايزاه كبير و لا صغير

و بتقوليله يجهزه و يربطه كويس

و انتي تتبليه براحتك 

التتبيلة الاساسية بتكون بسيطة جدا و هي:

نجيب راس ثوم و نقشرها و نقسم الفص الواحد نصفين بالطول

و نحطهم في شوية ملح بالفلفل

و نغرز السكين في العرق في اماكن متفرقة بالتساوي

هتعمل فتحات كتير نحاول نخليها غويطة شوية علشان تاخد نصف فص الثوم كله و مايطلعش منك اثناء التسوية

و نحط انصاف فصوص الثوم ديه اللي بالملح و الفلفل جوة الفتحات اللي عملناها

و بعد ما نخلص ندهن العرق كله بالملح و الفلفل كويس

ديه التتبيلة الاساسة

ممكن تزودي لو تحبي من برة

ممكن نعمل خليط ربع كوب زيت زيتون نحط فيه ملح و فلفل و روز ماري و زعتر و ممكن زبادي و ندهن بيه العرق من برة

بس خليكي في الاساسى الاول و بعد كده فنني براحتك يا ستي

:)

و نجيب صينية كبيرة مستطيلة او بيضاوية او حلة تاخد العرق كله بطوله

علشان  مايطلعش متني منك

و نحط فيها شوية زيت

يادوب نملى القعر بس

و نبدأ نحمر فيهاالعرق بالراحة لحد ما ياخد لون التحمير البني من جميع الجوانب

و بعدين نزود ماية مغلية نغطي بيها العرق

لو الصينية ماتاخدش مافيش مشاكل حطي للنص و نزود كل فترة لما نحص ان الماية قربت تخلص

و هنحط مع الماية ورق لورى و حبهان و مستكة ممكن و طماطم صغننة و بصلاية صغننة

ممكن نزود جزر و كرفس "افرنجي او عادي"حسب الرغبة

خدي بالك مازودناش في الماية ملح خاااالص علشان يستوي

و نغطي الصينية او الحلة بالورق الفويل كويس جدا

الموضوع بياخد تقريبا من ساعة و نص لساعتين على حسب وزن العرق

طبعا ممكن يزيد او يقل حسب الوزن برضه

فكل فترة نلقي نظرة عليه و نشوف اخبار السوا ايه و اخبار الماية لو محتاجة تتزود

و بعد ما يستوي نشيل منه الحبل اللي كان مربوط بيه و نسيبه يبرد خااالص قبل التقطيع

و نقطعه بعد كده بسكينة مشرشرة علشان مايتهريش مننا

 و نرصه في سرفيس التقديم و نحط عليه الصوص اللي تحبيه

انا بحب معاه صوص الفلفل الاسود

في كاسارولة نحط شوية زيت في القعر و نحط عليه ملعقة كبيرة فلفل اسود مجروش

"مش مطحون و مش حصي"

كمية الفلفل تتحكمي فيها انتي برضه على حسب كمية الصوص اللي عايزاه

ديه صورة عن قرب توضح الفرق بين الفلفل الحصى و المجروش

في مطاعم بتحط شوية فلفل حصى كديكور زي كده

لكن المطلوب الطعم فبناخده من المجروش و مافيش مانع نحط شوية حصى

و نقلب شوية علشان الريحة تظهر و ممكن كمان نحط معاه مشروم 
بيدي شكل جميل
نقلبه شوية مع الفلفل المجروش
 و نحط عليه بعد كده 2 كوب من المرقة بتاعة العرق اللي عملناه 

هنستخدمها كـ"جريفي صوص" علشان اللون

و نسيبها على النار لحد ما تغلي

اول ما تغلي احط عليها كوب كريمة و اقلب لحد ما القوام يبدأ يتخن شوية

انا مش بستخدم الكريمة كتير بحط مكانها كوب لبن عليه 2 ملعقة دقيق مدوب فيه و اقلب كويس افضل و اسرع و نفس النتيجة

لو بتحبي الصوص يكون غامق يبقى كفاية نص كوب كريمة او نص كوب لبن بملعقة دقيق مذوبة في اللبن كويس

و يوصل بس لقوام الصوص بتطفي عليه و تحطيه و هو سخن على العرق اللي انتي رصيتيه في السرفيس

و بألف هنا و شفا

**ملحوظة**

للي مش بتعرف تعمل الفلفل مجروش

شيف شيربيني كان قال قبل كده رشي على سطح الرخامة شوية ملح خفيف بس علشان الفلفل مايجريش و حطي عليهم الفلفل و دوسي عليه بالراحة بالنشابة "العصاية بتاعة فرد العجين" او اي حاجة على شكل اسطوانه عندك و امشي عليهم كده كأنك بتفرديهم و هتلاقيه اتجرش بسهولة خالص

افتكري ماتكتريش الملح لان الغرض منه انه يمنع الفلفل انه يجري بس:))

 مستنية رأيكم طبعا
:))

مكرونة اسباجيتي بالسوسيس

السلام عليكم و رحمة الله و بركاته

واحدة صاحبتي قالتلي على طريقة تقديم جديدة للمكرونة

فكرتها لذيذة و جديدة و ممكن تخلي اولادك يشاركوا معاكي فيها

هي ديه

مكرونة بالسوسيس

جبت السوسيس و قطعته حلقات مش تخينة و لا رفيعة

وسط يعني

و جبت المكرونة الاسباجيتي و و قسمتها على اربعة

يعني العود الواحد يتكسر لاربع قطع صغنين علشان ولادي مش بيعرفوا ياكلوها لو طويلة

ممكن تقسميها على 3 قطع او نصين بس

زي ماتحبي يعني

و حطيت المكرونة و هي لسة مش مستوية في حلقات السوسيس كده

الموضوع هياخد منك وقت على فكرة فياريت تخلي حد يساعدك من الاولاد او تبدأي من قبل تحضير الغذاء بفترة كافية

و لا تقلقي مش بتاخد وقت في التسوية خالص

المهم

بعد ما تخلصي كل المكرونة مع السوسيس تكوني محضرة ماية في حلة و عليها شوية ملح لسلق المكرونة اللي جهزناها

ملح بسسسسس

هنحط المكرونة لما الماية تغلي

و لما المكرونة تستوي صفيها في مصفاه و سيبيها على جنب

و تحضري الصوص اللي هتقدمي فيه المكرونة

ممكن كذا طريقة

ممن تقديممها بالصلصة عادي

و ممكن في شوية زبدة نشوح فيها نص ملعقة صغيرة ثوم مهروس و نحط فيها المكرونة و نقلبها كويس و تحط عليها رشة بقدونش مفروم و عند التقديم نحط عليها جبن رومي او برميزان مبشور

انا بأه عملت الطريقتين مع بعض بس مع بعض التعديلات

بشرت بصلة صغننة و حطيت عليها ملح و فلفل و بشرت عليهم 2 طماطم وسط يادوب كده علشان يدو لون

و حطيت عليهم نص ملعقة صغيرة ثوم بودرة(اللي كان عندي) ممكن فريش طبعا

و شوية زيت صغننين علشان بس البصل و الطماطم يتجانسوا

لما اتظبط الصوص ده رحت حطيت فيه المكرونة و قلبت

خدي بالك و انتي بتقلبي علشان اتهريش المكرونة

بمجرد ما طفيت حطيت عليها شوية بقدونس مفروم علشان يدي ريحة و طعم حلوين

بيفرق على فكرة

بس كده