الكانيلوني

طلبت مننا صديقتنا العزيزة ياسمين اعملها كانيلوني

cannelloni

ربنا ييسر و البوست يستحمل

نبدأ الاول في عجينة الكانيلوني
انا بعملها بنفس مقادير عجينة الكريب

1 كوب دقيق
1 كوب لبن
1 بيضة
ملح و فلفل

و نضربهم كلهم مع بعض في الخلاط علشان مايكونش في حاجة مكلكعه

و في طاسه تيفال صغيرة نمسحها بشوية زيت
و بالكبشة ننزل فيها من العجين مقدار ما يملاء قعر الطاسه
و لما تبدأ الجوانب في الارتفاع
نقلبها علي الوجه الاخر
ولما يبدأ يتلون هو الاخر نشيله في طبق

و هكذا حتي تنتهي الكمية

خدي بالك عادة اول واحدة بتكون مش مظبوطة :)
خدي بالك من الباقي

الحشوات بأه

عندنا الحشوة العادية اللي هي

**حشوة اللحم المفروم

(لحم مفروم معصج عادي)

في طاسة بنبشر بصلة كبيرة خشن و نحط عليها شوية زيت

و نقلب لحد ما البصل يذبل

و بعدين نحط اللحم المفروم(نصف كيلو)

و نقلب كويس علشان اللحم ما يتكتلش

و نهدي النار و نسيبها لحد ما اللحم المفروم يستوي و يتعصج

و ممكن بعد ما الحم يستوي نبشر عليه جزر بيدي طعم كويس

و نحشي بيه الكانيلوني و نلفه

ممكن نحشي بلحم مفروم و سبانخ

(طعمها جميل جدا و صحي للاطفال)

بنحط في طاسة فيها زيت ساخن بصلة كبيرة مقطعة مكعبات صغير
(مفرومة خشن)
و عليها 3 فصوص ثوم مهروسين
و نقلب و لما يذبل نحط اللحم و نقلب
عند مرحلة ان اللحم اصبح لونه بني
(قبل ما يتعصج)
نحط ملعقة كبيرة صلصة طماطم
(ممكن نستغنى عن الصلصة لو عايزة )
و بعدين بنحط السبانخ اللي بنكون محضرينها كالاتي
نغسل السبانخ كويس جدا و نعصرها كويس جدا بإيدينا قبل تقطيعها و بعدين نحطها مقطعة شرائح رفيعة جدا

و نحط الشرايح ديه علي اللحم المفروم

و نقلب كويس وندوق علشان لو محتاج ملح ولا حاجة
و نسيبها يادوب دقيقتين علشان السبانخ تلحق تتجانس
و بعدين نشيلها من علي النار و نسيبها تبرد شوي
و نضيف 150 جرام جبن ريكوتا و 3 ملاعق كبيرة جبن بارميزان مبشورة
(انا ماكنش عندي الاتنين و حطيت جبن موزاريلا و جبن رومي مبشور و مشي الحال)
(طبعا مش نفس الطعم) بس طعم حلو برضه:)
و نقلب كويس
و بعدين نحط بيضة كبيرة عليها ملح و فلفل و نقلب كويس
و بعدين نحشي بيها الكانيلوني و قبل ما نقفل نرش رشة موزاريلا
و بعدين نلف الكانيلوني

و بعدين نلف الكانيلوني

ممكن كمان نحشي بالفراخ

نسلق الفراخ حتي النضج و بعدين نقطعها مكعبات صغيرة
(قطعتين صدور كبيرة)
و نحط عليهم نصف ربطة اوراق جرجير مفرومة خشن
و شوية ريحان اخضر
(ان وجد)
و ربع كوب زيتون اسود مفروم خشن
(مكعبات صغيرة)

و كوب جبن مبشور متنوعة رومي/بارميزان/موزاريلا/شيدر
(ممكن نوع واحد لومافيش)

و ثلث كوب فريش كريم
(ممكن بتاعة جهينة لو مالاقيتيش الفريش)

و 3 ملاعق كبيرة زيت زيتون
(او زيت ذرة)

و ملح و فلفل



و نخلط الخليط ببعض كويس جدا و هو ده الحشو بتاعنا

نحشي بيه الكانيلوني

و في كمان حشوة الفراخ بالمشروم

بصلة كبيرة مقطعة مكعبات صغيرة جدا
(مفروم خشن)
نشوحها في شوية زيت علي النار و عليها ملح و فلفل حتي تذبل
و بعدين نحط الماشروم المقطع شرائح و نشوح مع البصل حتي يصبح لونه بني شوي
و بعدين احط الفراخ المقطعة مكعبات صغيرة
(مستوية)
(ممكن احط صدور الدجاج نية مقطعة مع البصل و لما تستوي احط عليهم المشروم)
و اقلب كويس لحد ما تاخذ لون البصل و المشروم

وممكن احط زيتون مقطع مع الحشوة للي عايز طعم حادق

و قلبي شوي كمان علشان الزيتون يتجانس كويس مع الخليط

و اشيلها من علي النار و اسيبها تبرد شوي

و بعدين احط نصف علبة قشطة (معلقتين كباااار

و شوية كسبرة مفرومة خشن

و اقلب

و هو ده الحشو

و ممكن نحشيها بحشوة الفراخ بالسبانخ

ممكن نعملها بنفس طريقة اللحم المفروم مع السبانخ او بالطريقة ديه::

4 كوبايات صدور فراخ مستوية و مقطعة مكعبات صغيرة

2 علبة كريم تشيز
(مقدار نصف كيلو)

تقريبا نصف كيلو سبانخ مغسولة و جاهزة و مقطعة شرائح
كوب جبن موزريلا
نصف كوب بقسماط مبهر

(العيش الفينو الناشف نطحنه في المطحنة و نتبله بالملح و الفلفل و ممكن نحط عليه ملعقة صغير باربيكا و مكن شطة كمان و ملعقة كبيرة جبن بارميزان مطحون او جبن رومي مبشور)

و ملح و فلفل

و نقلب الخليط كويس اوي مع بعض

و كده عندنا حشوة جاهزة

نحشي بيها الكانيلوني:)

و في حشوة السبانخ بالجبن الريكوتا

(معلش بأه الجبن الريكوتا غالية شوي و انا استخدمتها كتير)

(استحملوني بأه)

نصف كيلو  جبن ريكوتا
(500 جرام)

ربع كيلو سبانخ مجهزة و مقطعة

(250 جرام)

(شرحنا ازاي نجهزها فوق)

 

بيضة كبيرة

كوب جبن بارميزان

و نخلط الريكوتا و السبانخ و البيض مع بعض كويس

و نحشي بيهم الكانيلوني
(ممكن نعكس المقادير بين الريكوتا و السبانخ )
و شكلها هيكون كده

و علي وجه الصينية نرش كوب البارميزان فوق الصلصة
(ممكن خليط الرومي مع الموزاريلا)

و في حشوة كمان بالسلامون المدخن

باكت سلامون مدخن

نصف ربطة شبت مفروم خشن

300 جرام جبن ريكوتا

بنقطع السلامون قطع صغيرة و نخلطها بباقي المقادير

و كده عندنا الحشو جاهز

طبعا احنا ممكن نبدع براحتنا بالحشوات علي حسب المتاح عندنا

انا جبتلك كام حشوة مشهورة

و ممكن ندور حولها بالتباديل و التوافيق

بس نبعد عن الشواذ الله يكرمكم

يعني لما نخترع مكونات

ياريت تكون مقبولة عقلا علي الاقل

ممكن اوي نعمل الكانيلوني بالحشوات ديه بس بدل ما نعمل عجينة الكانيلوني

ممكن نجيب بتنجان رومي كبير و نقطعة شرائح طوليه و عريضة و نشوحة في النار في زيت بسيط علشان يستوي و ينفع نثنيه

زي كده

بعد ما بنحشي الكانيلوني باي خلطة من الخلطات اللي عملناها

بنجيب صينية بايركس و نحط فيها صلصة طماطم بتاعة الباستا

نغطي قعر الصينية بصلصة الطماطم

انا هقول علي طريقة الصلصة اللي بعمل بيها

في حلة بحط شوية زيت سخنين و اذبل فيهم بصلة كبيرة مقطعة مكعبات صغيرة

و اقلب شوي لحد مايذبل و بعدي احط تقريبا 5 فصوص ثوم مهروين و اقلب تاني و لو عندنا ريحان اخضر نحطه مفروم خشن و بعدين احط نصف كوب خل و قلب شوي لغاية ما المكونات تتجانس

و بعدين احط عصير كيلو طماطم و عليه الملح و الفلفل و اسيبه يتسبك لغاية ما يصبح عندنا صوص ثقيل

احط الصوص ده في قعر الصينية

و ارص عليه الكانيلوني المحشي

و بعدين احط علي الكانيلوني بالملعقة باشاميل يا دوب اغطي بس مانكترش

انا بعمل الباشاميل ازاااي؟؟؟

كيلو اللبن احط عليه 4 ملاعق كبيرة دقيق و اضربه في الخلاط

و بعدين احطه في حلة علي النار و عليه ملح و فلفل و ملعقة كبيرة زبدة او سمن

و اقلب لحد ما يصل للقوام المرغوب فيه

انا بحب القوام بتاعه يكون كريمي

ممكن نحط بيضة علي الباشاميل بعد ما يبرد

(ساعات كتير مابحطش)

بعد ما نحط الباشاميل علي الكانيلوني المرصوص في الصينية احط عليه بالملعقة طبقة صلصة تاني

مش كتير برضه

و بعدين ارش الوجه بجبن بارميزان مطحون او رومي مبشور

ممكن طبعا نحط الصلصة الاول علي الكانيلوني و بعين الباشاميل

و ممكن نستغني عن الباشاميل اصلا

ده مسألة زوق

(مش هتفرق يعني)

و ادخله الفرن تقريبا نصف ساعة ممكن يصل لساعة الا ربع
(على حسب فرنك)
في الرف اللي في النصف

علشان يستوي من فوق و من تحت

هتكون الجبن ساحت و الجوانب بان عليها السوا

و اطلعه

و يقدم ساخنا

و بالهنا و الشفا

انا هاخد اجازة كتييير بعد البوست المجهد ده

سمبوسك بالجبن

في رمضان كنت بعمل طبق جانبي كده

الكل كان بيحبه

الحمد لله

و مهما كترت الكمية كان بيخلص لاخر قطعة

كنت بعمل السمبوسك بالجبن الرومي و القشطة

اصل انا مش بحب اكله محشي لحم مفروم

طبعا السمبوسك ليه حشوات كتيييير

بس اللي جربتها ديه فعلا حازت علي اعجاب الجميع

كنت بجيب سمبوسك فرجللو علشان مش لازق في بعضه و مافيهوش نسبة دهون كتير

في برضه السنبلة مش بطال و الكرامة كويس برضه

المهم ندخل بأه في المقادير

يالا بأه بسم الله

لفة سمبوسك

(النوع المفضل بتاعكم)

ربع كيلو جبن رومي مبشرور

(اشتروه قطعة علي بعضها و بعدين ابشروه)

علبة جبن مثلثات

(نوع يكون طري زي لافاشكيري و لا حلايب)

نصف علبة قشطة

زي ديه

و نبشُر الجبنة الرومي ونحط عليه الجبن المثلثات و القشطة

و نقلب مع بعض بشوكة حتي يصبح خليط طري كده ناعم من القشطة

لو احتاجت قشطة تاني نزود

في اضافة كمان لو تحبوا

نحط قطع بسطرمة للي بيحبها

بس طبعا ننظفها من الثوم اللي في الاطراف
و شوحها في طاسة علي النار لحد ما تبقي مقرمشة

و نضيفها للخليط

بس كده و نحشي بيه السمبوسك بالطريقة المعتادة

الحشوة ديه بتخلي الجبن الرومي تذوب و تمط معنا و احنا بناكلها

طيب لو السمبوسك نوعه مش اوي
و مش بيقفل نعمل ايه

نعمل محلول من ملعقة دقيق علي ملعقة ماية حاجة كده اخف من العجين و نستخدمها كصمغ نقفل بيه

و نحمر عادي

بس في ملحوظة و احنا بنحمر

طبعا اكيد بنحب السمبوسك يكون مقرمش كده

و انت بتقلبي علي النار بالكبشة المخرمة الكبيرة

قلبي و ارفعي السمبوسك من النار

زي الراجل بتاع الطعمية كده

علشان الهوا يدخل و يخليها مقرمشة

ييييمي

فكرتوني بطعمه

ممكن اطلب السوبر ماركت اعملها دلؤتي

يالا بالهنا و الشفا

ريش بالكولا

السلام عليكم و رحمة الله و بركاته

كيفكم يا جماعة

انا عملت انهاردة اختراع كان عمله شيف شربيني من سنة تقريبا

عملت ريش بالكولا

او زي ما سماها في البرنامج

(ريش بالمياه الغازية)

بصراحة انا استغربتها خالص

بس انا اخدت ان شيف شربيني لما بيعمل حاجة بعملها وراه و انا مغمضة

و كانت النتيجة تحححححفة

طبعا عجبت ابو العيال جدا

و اخويا الصغير مش بيحب ياكل لحمة خالص

و لما داقها عجبته جدا

و قال لماما اعملي اللحمة زي ما موني عملتها

المهم

ندخل علي المقادير بأه

نصف كيلو ريش

(هو عملها في البرنامج بالريش الضاني)

بصلة كبيرة مقطعة مكعبات صغيييرة

5 فصوص ثوم مهروسين

ملعقة كبيرة صوص صويا

ملعقة كبيرة عسل نحل

(هو حط فيها 3 ملاعق بس انا مابحبش الاكل يكون مسكر بصراحة)

ملح و فلفل

نصف كوب كولا

الطريقة:

نتبل الريش بالبصل و الملح و الفلفل و الثوم و صوص الصويا و نتركها فترة مش اقل من نصف ساعة
نغرز اللحم بالسكين علشان اللحم يشرب التتبيلة كويس

في طاسة نحط فيها شوية زيت يادوب لتحمير الريش من الجانبين

(مش كتير يعني)

لما نحط الريش ننفضها من التتبيلة

نحمر الريش من الجانبين حتي يصل لونهم للبني

و بعد ما تحمر من الجانبين كويس نحط باقي التتبيلة و نقلب كويس لحد ما تذبل التتبيلة

و بعدين نحط العسل و نقلب كويس

و نحط الكولا و نقلب و نهدي النار خااالص و نغطي الطاسة و نسيبها تستوي براحتها

هي اخدت تقريبا نصف ساعة

علي حسب نوع الريش المستخدمة

(ضاني او بتلو او كندوز)

كل فترة كده نطل عليها نشوفها استوت ولا لسة

و نشوف الصوص اللي حوليها نقص ولا لسة

لو الصوص بدأ ينشف و لسة اللحم ما استواش نزود شوية ماية مغلية (قليلة)للتسوية

انا عملت معاها مكرونة و بطاطس محمرة

و بالهنا و الشفا

و أي سؤال انا حاضرة

فشار بالكراميل و بالجبنة

طبعا احنا عارفين ان الفشار ممكن يتعمل بنكهات كتير

حبيبتي ماما اموله طلبت مني الفشار بالكراميل

من عيني يا ماما امولة

لو عليا اعمله و اجيبهولك لحد عندك و الله

نبدأ بأه نعمل الفشار

فشار بالكراميل

نحضر للفشار كوب و نصف من ذرة الفشار و نعمله عادي

بالطريقة العادية

هقولها للي مش عارف

في حلة تيفال

نغطي قعرها بزيت ذرة و نحط عليه الفيشار ونمسك الحلة و نهزها جامد علشان الزيت يغطي الذرة كويس

(لو كمية الفشار كبيرة علي الحلة ياريت نعمله علي مرتين علشان مافيش حاجة تتحرق)

الفشار لازم يكون مغطي قعر الحلة برضه و مش ازيد من كده علشان كله يتعمل مع بعض في نفس الوقت
و نغطي الحلة طبعا
علشان الفشار مايطلعش بره
علي درجة حرارة وسط
و مانطفيش النار غير لما يبطل فرقعة
و كده خلاص

 نحطه في سلطانية كبيرة

و نتأكد ان كل الفشار سليم و ان مافيش أي بذر ذرة ضمن الفشار

و نحط عليه 2 كوب مكسرات مجروشة

(كاجو ؛ بندق او لوز)

(ممكن مانحطش ده طبعا حسب ذوقك)

ونحضر خليط الكراميل:

قبل تحضير الكراميل لازم تسخن الفرن علي درجة حرارة 120 درجة مئوية

(درجة حرارة هادية خاااالص)

2 كوب سكر بني

(جايبالكم طريقة عمله بس اقرأوا البوست لاخره)

نصف كوب شربات ذرة

corn syrup

(ممكن نستبدله بعسل الجلوكوز)

ملعقة صغيرة ملح

كوب زبدة

و نقلب معا جيدا علي النار حتي تذوب كل المقادير و تتجانس تماما

و نتركه يغلي مده 5 دقايق مع التقليب علي نار هادية

و بعد كده نشيله من علي النار

و احط عليه كيس فانيليا

ونصف ملعقة صغيرة من بيكاربونات الصودا

هتلاحظو ان الخليط تجانس كويس جدا بعد اضافة الصودا

و بعدين نقلب خليط الكراميل علي الفشار و االمكسرات و نقلب كويس جدا لحد التجانس التام

و بعدين نجيب صينيتين فرن غويطتين و ندهنهم بزيت ذرة

(يستحسن يكون زيت كويس علشان ما يعملش ريحه)

و نقسم فيهم الفيشار المغطي بالكراميل بالتساوي

و طبعا احنا مسخنين الفرن من قبل كده علي درجة حرارة منخفضة

و نحط الصينيتين في الفرن لمدة ساعة

بس لازم كل ربع ساعة نقلب الفشار كويس جدا علشان المحتويات كلها تتجانس مع بعض كويس و ماتنشفش

و بعد ساعة نطلعه من الفرن و نسيبه يبرد خااالص

و لو في حاجات لازقه في بعضها نفككها بالراحة خالص بعد ما يبرد طبعا

و كده يكون الفشار خلص

ممكن لو عايزين تشوفو الطريقة فيديو

تشوفوها هنا

انا جايباها من موقع اسمه

all recipes.com

طريقة عمل السكر البني

علشان سعره غالي في السوبر ماركت

ممكن نعمله بكل سهولة في البيت

في عندنا ثلاثة انواع للسكر البني

سكر بني فاتح

سكر بني وسط

سكر بني غامق

انا هقول علي طريقة السكر البني الوسط لانه هو اللي بنستخدمه كتير

و هشرح الفرق بينهم

(هو ده اللي استخدمناه في الوصفة بتاعتنا)

علشان نعمل سكر بني وسط

عايزين 2 كوب سكر ابيض و يقابلهم ربع كوب عسل اسود

(كوب السكر عليه ملعقة كبيرة عسل)

طيب لو عايزين سكر بني فاتح

يبقي نحط 2 كوب السكر ابيض و يقابله 2 ملعقة كبيرة عسل اسود

(كوب السكر عليه ملعقة صغيرة عسل)

و لو عايزين السكر البني يكون غامق

نحط 2 كوب سكر ابيض و عليه ثلث كوب عسل اسود

(كوب السكر عليه ملعقتين كبار عسل)

و نقلب بالشوكة كويس اوي لغاية ما يتجانسو تماما و نرجع نشوف حبيبات السكر تاني

(يستحسن نضرب السكر بالعسل بمضرب بيض ولا بالكيتشن ماشين علشان حبيبات السكر ترجع تنفصل تاني)

بياخد 5 دقائق لو هنعمله في الكيشن ماشين

برضه جبتلكم الفيديو بتاع طريقة عمل السكر البني علشان يكون واضح بالنسبالكم

هنا

طيب علشان صبرني طلبت الفشار بالجبنة

نعملهولها من عنينا

الفشار بالجبنة

نجيب 4 كوبايات فشار معمول جاهز

(من اللي عملناه فوق)

و في طاسة نسيًح 3 ملاعق زبدة و نشيلها من علي النار

و نحط عليهم نصف كوب جبن شيدر مبشور

(يستحسن يكون مطحون يعني بعد ما تبشريه اطحنيه في المطحنة)

(ممكن طبعا تكتري كمية الجبنة او تقلليها علي حسب انتي بتحبي ايه)

و عليهم نصف ملعقة كبيرة بودرة مسترده

و ملح

(و اختياري لو عايزة تحطي ملح و فلفل مع بعض)

نحط كل الخليط ده علي الفشار و نقلب كويس لحد التجانس التام

و يقدم في الحال

(طبعا المقادير ديه تقدري تقللي او تزودي فيها علي اساس عدد الاشخاص)

و بالهنا و الشفا

الكيكة الرخامية

المرة ديه الدور علي صنف حلو

كنت عملت انهاردة كيكة رخامية فقلت اما اشارككم بيها

marble cake

هيه اسمها كيكة رخامية علشان شكلها بيكون عامل زي نقشة الرخام

نبدأ بأه في المقادير

3\4 كوب زبدة

كوب و نصف سكر بودرة

5 بيضات كبيرة

2 كيس فانيليا

(ممكن الاكتفاء بكيس واحد بس انا مابحبش احس ان فيه بيض خااااالص)

كوبين و نصف دقيق منخول
كيس بيكنج باودر

كوب لبن

ملعقتين كبار كاكاو

رشة بسييييطة ملح

ندخل بأه علي الطريقة

بالمضرب الكهربائي او بالكيتشن ماشين

نضرب الزبدة لحد ما تصل لقوام كريمي

و بعدين نحط السكر البودرة كله

و نضرب تاني لحد ما يرجعلنا القوام الكريمي تاني

و نحط البيض بيضة ورا بيضة

و مع اخر بيضة نحط الفانيليا

و بعدين نحط الدقيق علي البيكنج باودر و رشة الملح علي بعض و نحطهم علي خليط البيض بتاعنا

و بعد خليط الدقيق ما يختفي تماما

نحط كوب اللبن

و بعدين نقسم خليط العجين ثلث و ثلثين

الثلث هنحط عليه الكاكاو و نقلب كويس جدا لحد ما يختفي و يتجانس تماما

و الثلثين هنخليه زي ما هو

نجيب صينية الكيك و نبطنها بالزبدة و الدقيق

و بعدين نفرش القعر بتاع الصينية بطبقة من خليط الفانيليا

و فوقيها نحط خط دائري من خليط الكاكاو

و عليه فانيليا تاني

و هكذا لحد ما ينتهي الخليط

لازم نراعي ان القعر فانيليا و الوش برضه فانيليا علشان نعرف نشوف الكيكة

الكلام ده لو هنعمل الكيكة في صينية مفتوحة من الوسط

طيب لو هنهمل في صينة عادية

يبقي الخليط هيتقسم نصفين

(مش ثلث و ثلثين)

و نص هيكون فانيليا و النصف الثاني نحط عليه الكاكاو

و نبطن الصينية عادي

وبعدين بكبشة صغيرة نحط في وسط الصينية من خليط الفانيليا

و فوقيهم نحط كبشة من الكاكاو برضه في النصف

و نفضل نحط كبشة فانيليا و اخري كاكاو في نصف الصينية بالضبط و فوق بعضه لغاية ما يخلص العجين كله

و هتطلع نتيجتها بالشكل ده

و ممكن طبعا نعملها في صينية الكب كيك علشان لو هنديها للاولاد في المدرسة

و ده شكلها لو هنحطها في قالب الكيك المستطيل

و كده خلاص

نحطها في فرن متوسط الحرارة

في الرف اللي تحت

مدة من 30 ل35 دقيقة

(علي حسب الفرن بتاعك)

و لما تخرج نسيب وجهها يبرد 5 دقائق

و بعدين نقلبها علي منخل سلك علشان تتهوى كلها

و بالهنا و الشفا