كريب حلو

السلام عليكم و رحمة الله و بركاته

.

.

المفروض المرة ديه الدور علي صنف حلو

.

قعدت افكر

ايه اللي عملته اخر مرة و حاز علي اعجاب الجميع

افكر

افكر

.

.

اصلي بقالي فترة مش موجودة في البيت علشان اعمل حلويات

.

.

و افتكرت الحمد لله

.

.

كنت عملت كريب حلو

(مش حادق يعني)

.

و الحمد لله عجب تامر و اخواته

 عملت منه كمية و شلته في الفريزر

و لما حد يزورنا اطلع من الفريزر و اسيبه يبرد شوي

و أحشيه من الحشوات المتاحة عندي

.

.

مقاديره بسيطة اوي

.

كوب لبن

كوب دقيق مليااان

رشة ملح

ملعقة صغيرة سكر

بيضه كبيرة 

فانيليا

.

و نحطهم كلهم في الخلاط و نضرب

علشان مايبقاش فيه كلاكيع

.

(بالنسبة للحادق بنحط ملح و فلفل بدل الفانيليا و طبعا بنشيل السكر)

.

لو عايزة قرص الكريب يكون بالشيكولاته

يبقي ننقص من كوب الدقيق مقدار ملعقتين كبار و نستبدلهم بملعقتين كاكاو خام

.

.

و المقادير ديه تعمل تقريبا من 6 ل7 اقراص بحجم وسط

.

بس انا في الكريب الحلو بحب اعمل اقراص صغيرة

شكلها بيكون اشيك

فكده هيطلع عدد اكتر

.
.

طبعا بنستخدم طاسة تيفال او اي طاسة مايلزقش فيها الاكل

.

و بعدين ندهنها زيت او سمن

 (علي حسب الرغبة)

.

و نحط بالكبشة في نصف الطاسة

و نوزع في باقي اطراف الطاسة بأننا نميل الطاسة في الاتجاهات الفاضية علشان تتملي

.

لما بنحط الكبشة بالخليط نراعي ان النار تكون هادية علشان نلحق نوزع الخليط في انحاء الطاسة بالتساوي

و بعدين نعلي

و نتابع

لما بيدأ القرص في الاحمرار من تحت

(طبعا هنعرف انه احمر بأننا نستخدم ملعقة او سكين و نرفع بيها طرف القرص شوي )

هو مش لازم يكون محمر اوي

يفضل يكون لونه بصلي كده

.

.

و لما  يحمر من تحت نقلبه

بحيث الناحية المحمرة تكون من فوق

.

و نعمل نفس الفكرة

و لما يتلون من تحت

كده يكون خلاص استوي من الجانبين

نحطه في طبق مسطح

بس مانحطهمش فوق بعض و هو سخن علشان مايلزقش

.

.

و هكذا لحد ما تخلص كمية الخليط بتاعتنا

.

الحشو بأه ممكن احنا نبتكره

و ممكن نحشي فاواكه و عليها كريم شانتيه او كريم باتسري

.
.

هقول علي كام حشوة كده عجبتني

.

احلي حشوة عجبتني

.

حشوة البلح بالقرفة

.

نحط ملعقة كبيرة زبدة و لما تسخن نحط عليها تقريبا كوب بلح اسود مقشر و منزوع منه النوي

و عليهم 2 ل3 ملاعق سكر

(حسب الرغبة)

 و نصف ملعقة صغيرة قرفة

و 3 ل4 ملاعق مكسرات مجروشة

(اختياري)

.

و نقلب مع بعض كويس

لحد ما يتكون لهم صوص

.

و يستخدم في الحشو

.

ممكن نحشي بالتفاح و الكمثري كمان

.

نفس طريقة البلح بس التفاح يكون اخضر اوي

علشان لما بيطري بيكون طعمه وحش

و القرفة برضه معاه بتدي طعم جميل

بس نراعي اننا نزود السكر علشان هنا التفاح اخضر مش مسكر زي البلح

.

.

ممكن الخوخ المعلب

.

بنفس الطريقة برضه

بس هنا يستحسن من غير قرفة

ولا سكر خاااالص لانه اساسا مسكر

.

و نستخدم الشربات اللي معاه في العلبة كصوص

نحطه علي النار و نستني لما يغلي

و نكون مجهزين ملعقة كبيرة دقيق و نذوبها في شوية ماية

و لما الشربات يغلي ننزل عليه بخليط الدقيق و نقلب لحد قوامه ما يوصل للقوام المطلوب

.

طبعا ملعقة الدقيق ديه قصاد كوب شربات

.

و نراعي اننا لوزودنا كمية الشربات نزود كمية الدقيق

.

نفس طريقة الخوخ ديه نعملها مع اي فاكهه معلبة تانية

زي الاناناس مثلا

.

ممكن نجيب برطمان شيكولاته من السوبر ماركت

و نحشي بيه الكريب

و نرش فوقها بندق مجروش

(طبعا انسب مكسرات للشوكولاته هي البندق)

.

.

.

طبعا الكريب ممكن يتاكل كده وخلاص

.

ممكن بأه نعمله انواع صوص جميله

.

مثلا الصوص الابيض

"صوص الكريم تشيز"

.

ربع كيلو كريم تشيز
(بتكون في علبة زي ديه)

(بس ديه علبة قشطة احنا عايزين كريم تشيز)
نصف كوب كبير لبن

نصف كوب كبير سكر بودرة

ملعقتين كبار زبدة

فانيليا

.

و نحطهم كلهم في الخلاط

وبكده يكون جاهز

.

.

"صوص الكراميل"

بالبندق

.

كوب كبير و نصف سكر

نصف كوب كبير كريمة لباني

(فريش كريم بتاع جهينة)

نصف كوب كبير بندق مجروش

.

.

نحط السكر في طاسة علي النار لحد ما يسيح و نقلب لحد ما يوصل للبني الغامق

و بعدين ننزل عليه بالفريش كريم

و نقلب دقيقة و نحط البندق

و نقلب علي النار لحد التجانس التام و يكون قوامه زي الصوص

من 4 ل5 دقائق تقريبا

.
.

"صوص الشوكولاتة"
.
نصف كيلو لبن
ملعقة كبيرة مليااانه كاكاو
نصف كوب كبير سكر
(100 جم)
ملعقة كبيييرة زبدة لينة
150 جرام شيكولاتة دارك قطع
.
.
نحط اللبن و عليه السكر علي النار
و لما يغلي اللبن
نهدي النار شوي
و نحط قطع الشيكولاته الدارك و الكاكاو
و نفضل نقلب لحد ما الشيكولاته تسيح خااالص
و بعدين في الاخر نحط ملعقة الزبدة الكبيرة علشان التلميع
.
.
ممكن نعمل بعصير الفاكهة صوص

اي فاكهة

كوب من عصير الفاكة ديه

و عليها سكر علي حسب الذوق

و نحطه علي النار و لما يغلي العصير ننزل عليه بخليط الدقيق اللي قلنا عليه قبل كده

.

ممكن مانحشيش الكريب حاجة

و نعمله كريب سوزيت

.

كوب سكر كبيرالا ربع

و ملعقتين كبار زبدة

نصف كوب عصير برتقال

.

نحط السكر في طاسة و نسيبه لحد ما يسيح و لما يبدأ يتلون نقلب لحد ما يصل للون البني

و بعدين نحط عليه الزبدة

و عصير البرتقال

.

و نقلب شوي لغاية ما يتجانسوا

.

و نجيب اقراص الكريب و نطبقها علي شكل مثلث

و نقلبها تقليبتين في الصوص اللي عملناه

.

و بيتقدم كده من غير اي اضافات

ممكن تزينيه بفستق مفروم

و بشر برتقال

.

و ممكن نستخدم الخليط ده كصوص برتقال عادي

.

.

.

.
هنا بأه انا حاطة اشكل تانية لتقديم الكريب علشان تلهمكوا

.

.

.

جربوه و ادعولي بأه

.

بالهنا و الشفا

طاجن الرز باللحم

االسلام عليكم يا جماعة

.

انهاردة جايبالكم معايا اكله جميييييلة جدا

.

طاجن رز باللحم

.

.

فالطاجن ده زي بتاع بلبع و حسني بتوع الاسكندرية

هو قريب من الرز المعمر بس فيه شوية تغيرات

.

.

و عملته

و طلع فعلا طعمه جميل و عجب تامر اويييي

.

.

.

ندخل بأه علي" المقادير" علي طول

.

.

(المقادير ديه لعمل اربه برامات صغيرة)

(لكل فرد برام)

.

.

نصف كيلو لحم

(مقطع مكعبات زي كباب الحلة)

.

بصلتين كبار مبشورين

.

ملح و فلفل

.

ملعقة سمن كبيييرة

(او ملعقتين زيت)

.

ملعقة صغيرة قرفة

.

2 كوب رز

.

2 او 2و نص كوب لبن مغلي

(علي حسب الحاجة)

.

قشطة

.

.

"الطريقة"

.

نحط البصل المبشور و عليه الملح و الفلفل و السمن و الزيت في حلة علي النار

و نقلب لحد ما يذبل البصل

.

و بعدين نضيف اللحمة و نقلب من حين لاخر

(علي نار هادية)
و قرب  اللحم مايستوي نحط القرفة

.
.
و نفضل نقلب من حين لاخر

لغاية ما اللحم يكون تقريبا استوي

(ممكن نزد ماية قليييلة لو لسة ما استواش و هكذا لحد ما تستوي)

.

و بعد ما اللحمة تستوي نحط عليهم في الحلة كوبايتين الرز المغسولين

و نقلب لحد ما الرز ياخد لون اللحم

.

و بعدين نحضرالطواجن الصغيرة

(ممكن برام كبير لو معندكيش صغير)

.

و نحط فيها اللحم من تحت و نكمل باقي الطاجن بالرز و نسيب 2 سم فاضي في الطاجن علشان تعمل حساب اللبن و الزيادة بعد التسوية

.

و هكذا في كل الطواجن

.

و بعدين نحط اللبن بحيث يغطي الرز ب1 سم

.

و ندخله في الفرن

(الفرن يكون سخن)

.

هياخد تقربيا من ثلث لنصف ساعة

(علي حسب الفرن)

و لما يبدأ يتشرب نحط علي وش كل طاجن قشطة

و ندخله الفرن تاني لحد ما يحمر الوش

.

و كده خلاص يكون خلص

.

مابياخدش منك وقت كتير

ولا وقوف في المطبخ

.

انا عملت معاه سلطة كول سلو و بطاطس محمرة

.

.

يالا بالهنا و الشفا

كيكة التمر بصوص الكراميل

بعد غيبة طويييييييلة

رجعنا تاني و الحمد لله

.

.

قلت نبدأ كده بحاجة حلوة

تنفع في جميع الاوقات

نعمل

.

كيكة تمر

.

.

.

و التمر زي ما احنا عارفين مفيد جدا

و خصوصا للولاد الصغيرين

علشان بينمي الذكاء و بيطهر المعدة

و بيمنع من تسوس الاسنان علشان فيه مادة الفلور

و الوقاية من السموم علشان بيحتوي علي الصوديوم و البوتاسيوم و فيتامين ج

.

و كتييييييير

لوقعد اتكلم مش هخلص انهاردة

.

طريقة الكيكة ديه شفتها علي قناة فتافيت

كانت عاملاها واحدة اسمها سمر

(مش فاكرة سمر ايه)

.

و لما عملتها

تامر و عبد الله خلصوها في ساعة واحدة تقريبا

.

.

نبدأ بأه في المقادير

.

1\2 كوب ماء

ا ملعقة صغيرة بيكنج صودا

(اللي هي البيكربوناتو او بيكاربونات الصوديوم)

1 ملعقة كبيرة بيكنج باودر

170 جم سكر

(ممكن نقول كوب كبير بتاع الماية الا ربع)

170 جم دقيق

70 جم زبدة لينة

(بدرجة حرارة الغرفة)

150 جم تمر من غير بذر

1ملعقة صغيرة فانيليا سائلة

(او كيس فانيليا)

2 بيض كبير

.

.

(نصيحة: هاتي ميزان بيتي احسن علشان تطلع مظبوطة معاكي,بيتباع في المحمل و اولاد رجب ب 25 جنيه)

.

.

"مقادير صوص الكراميل"

كوب سكر

كريمة سائلة

ملعقتين كبار زبدة

.

.

"الطريقة"

.

.

اولا

.

.

نقطع التمر قطع صغيرة جدا

و نحطة في حلة

و نحط علي الماية(1\2 كوب) لغاية ما تغطي التمر تماما

و نحطهم علي النار

و نسيبه يغلي 5 دقائق تقريبا

و بعدين نرفعة من علي النار و نحط عليه البيكنج صودا

و نسيبه علي جنب حتي يبرد

.

.

في الوقت ده بأه نبدأ في الكيكة

.

نحط الزبدة في طبق غويط و نحط عليه السكر و نضرب حتي يتجانس تماااما و يصبح مثل الكريمة

ثم نضع البيض و الفانيليا و نضرب مرة اخري حتي التجانس التام

ثم نضع الدقيق و البيكنج باودر مع بعضهم نضرب مرة اخري كويس لحد ما يختفي الدقيق تماما

.

.

و بعدين اضرب خليط التمر اللي ركناه علي جنب في الاول

اضربه في الخلاط

و بعدين احطه علي الخليط بتاع الدقيق و اضرب كويس لغاية التجانس التام

.

.

و بعدين اجيب قالب الكيك

(انا بحب اللي فيه فتحة في النص)

.

و ابطنه بالزبدة و الدقيق كويس

و بعدين اصب الخليط فيه

.

و احطه في الفرن في درجة حرارة متوسطة

25 دقيقة تقريبا

.

و لما تطلع من الفرن نسيبها تبرد علي جنب الاول طبعا

.

.

"صوص الكراميل"

.

في طاسة نحط الزبدة و السكر مع بعض علي النار مع التقليب المستمر 5 دقائق تقريبا و ما نقلقش لو اخد لون غامق

و بعد الغليان نهدي النار خاااالص

و نضيف الكريمة و نقلب لغاية ما يتجانسوا تماما بحيث يغلظ قوامة زي الصوص

و نطفي النار

.

***

عند التقديم نحط قطعة الكيك في طبق و عليها الصوص

و ممكن نحط جنبها ملعقة ايس كريم فانيليا

و طبعا

بالف هنا و شفا